Home ព័ត៌មានអន្តរជាតិ ថៃ​ប្រុង​អោយ​...

ថៃ​ប្រុង​អោយ​កម្មករ​ចំណាកស្រុក​ខុសច្បាប់​ទាំងអស់​ទៅ​ចុះ​ឈ្មោះ​ធ្វើការ​ស្រប​ច្បាប់​ដើម្បី​…

​ប្រែ​សម្រួលៈ​វាសនា​/​បាងកក​៖​ក្រសួង​មហាផ្ទៃ​ថៃ កំពុង​ស្វះស្វែង​សុំ​ការអនុម័ត​ពី​គណៈរដ្ឋមន្ត្រី​ដើម្បី​អនុញ្ញាត​អោយ​កម្មករ​ចំណាកស្រុក​ខុស​ច្បាប់​មក​ពី​ប្រទេស​កម្ពុជា ឡាវ និង​មី​យ៉ាន់​ម៉ា ប្រមាណ​១​លាន​នាក់​​ទៅ​ចុះ​ឈ្មោះ​សុំ​ធ្វើការ​ដោយ​ស្របច្បាប់ ក្នុង​បំណង​ជួយ​ទប់ស្កាត់​ការឆ្លង​រាលដាល​ជំងឺ​កូវី​ដ​១៩ នេះ​បើ​តាម​ប្រភព​ព័ត៌មាន​មួយ​ចេញពី​ក្រសួង​។​

​គេ​រំពឹងថា​ក្រសួង​នឹង​ស្នើ​សុំ​ការអនុម័ត​ផែនការ​នេះ​ពី​គណៈរដ្ឋមន្ត្រី​នៅក្នុង​ជំនួប​ប្រចាំ​សប្តាហ៍​នៅ​ថ្ងៃ​អង្គារ​ទី​២៩​ធ្នូ​នេះ​។​

​បើសិនជា​វា​ត្រូវ​គណៈរដ្ឋមន្ត្រី​អនុម័ត ក្រសួង​នឹង​យក​វគ្គ​ទី​១៧​នៃ​ច្បាប់​អន្តោប្រវេសន៍​មក​ប្រើ​ដើម្បី​ធ្វើ​ការចុះ​ឈ្មោះ​កម្មករ​ចំណាកស្រុក​ខុស​ច្បាប់​មក​ពី​ប្រទេស​ក្បែរ​ខាង​។​

​តាមពិត​ថៃ​មាន​កម្មករ​ចំណាកស្រុក​ស្របច្បាប់​ពី​២,៣​ទៅ​២,៥​លា​នាក់​នៅ​ថៃ នៅ​ពេល​ប្រមាណ​១​លាន​នាក់​ទៀត​កំពុង​រស់នៅ​ឬ​ធ្វើការ​ដោយ​ខុសច្បាប់​នៅក្នុង​ប្រទេស​នេះ​។​

​ប្រភព​ព័ត៌មាន​បាន​និយាយថា ផែនការ​ស្នើឡើង​នេះ​អនុវត្ត​តែ​លើ​ជន​ចំណាកស្រុក​ទៅ​ពី​កម្ពុជា ឡាវ និង​មី​យ៉ាន់​ម៉ា ដែល​ចូល​ថៃ​មុន​ថ្ងៃ​២៩​ធ្នូ ឆ្នាំ​២០២០​នេះ ហើយ​ជន​ណា​ដែល​ចូល​ក្រោយ​ថ្ងៃនេះ​នឹង​មិន​​ទទួលបាន​ការលើកលែង​ឬ បន្ធូរបន្ថយ​ទេ​។​

​ប្រភព​ព័ត៌មាន​បាន​បន្ថែមថា ចំណាត់ការ​នេះ​មានបំណង​ជួយ​រដ្ឋាភិបាល​តាមដាន​កម្មករ​ពលករ​ចំណាកស្រុក​ខុសច្បាប់​នៅក្នុង​ប្រទេស​ថៃ ដើម្បី​អោយ​ពួកគេ​ចូលរួម​ក្នុង​ផែនការ​គ្រប់គ្រង​ជំងឺ​របស់​រដ្ឋ​។​

​ពួក​អ្នកជំនាញ​និយាយថា ជន​ចំណាកស្រុក​គ្មាន​ឯកសារ​ជា​ឧបសគ្គ​ធំ​ក្នុង​ការទប់ស្កាត់​ការឆ្លង​រាលដាល​ជំងឺ​នៅ​ថៃ​។ ក្រោយ​ចុះបញ្ជី ពួកកម្មករ​ដែលមាន​ថៅកែ​អាច​បន្ត​ធ្វើការ​ជាមួយ​ថៅកែ​ដដែល​ហើយ​​អ្នក​ដែល​មិនទាន់​មាន​ការងារ​ធ្វើ រដ្ឋ​នឹង​ជួយ​រក​ការងារ​និង​និយោជក​អោយ​ពួកគេ​។​

​សំខាន់ ក្នុង​ផ្នែក​នៃ​ផែនការ​ចុះឈ្មោះ​នេះ ពួកកម្មករ​ចំណាកស្រុក​នឹង​ត្រូវ​ធ្វើតេស្តិ៍​រក​វីរុស​កូរ៉ូណា​និង​នៅក្រោម​ច្បាប់​គ្រប់គ្រង​វីរុស​តឹងរឹង​៕

ទីតាំងផ្សាយពាណិជ្ជកម្ម

- Advertisment -

Most Popular