គណៈកម្មាធិការ​គោលនយោបាយ​សេដ្ឋកិច្ច និង​ហិរញ្ញវត្ថុ​ពិភាក្សា​អំពី​ការបង្កើត​ក្រុមហ៊ុន​ថ្នាល​ទូរទស្សន៍​ឌីជីថល​ថ្មី​”

ដោយ​ស៊ា ថាំង​/​ភ្នំពេញ​:​កាលពី​ម្សិលមិញ​នៅ​ទីស្ដីការក្រសួង​សេដ្ឋកិច្ច និង​ហិរញ្ញវត្ថុ​លោក​អគ្គបណ្ឌិត​សភាចា​រ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ និង​ជា​ប្រធាន​គណៈកម្មាធិការ គោលនយោបាយ សេដ្ឋកិច្ច និង​ហិរញ្ញវត្ថុ (​គ​.​ស​.​ហ​) បាន​ដឹកនាំ​កិច្ចប្រជុំ​អន្តរក្រសួង ដើម្បី​ពិនិត្យ និង​ពិភាក្សា​លើ​សំណើសុំ​គោលការណ៍​អនុញ្ញាត​“​បង្កើត​ក្រុមហ៊ុន​ថ្នាល​ទូរទស្សន៍ ឌីជីថល​ថ្មី​” ដោយមាន​ការអញ្ជើញ​ចូលរួម​ពី​ថ្នាក់ដឹកនាំ​ជាន់ខ្ពស់​ក្រសួង​ព័ត៌មាន​ក្រសួង​ប្រៃសណីយ៍ និង​ទូរគមនាគមន៍ និង ក្រសួង​-​ស្ថាប័ន​ពាក់ព័ន្ធ​ផ្សេងទៀត ។

មន្ត្រី​នាំពាក្យ​ក្រសួង​សេដ្ឋកិច្ច​បាន​ប្រាប់ថា​ស្របតាម​បរិបទ​នៃ​ការវិវឌ្ឍ​ជាក់ស្តែង​នៃ​ឌី​ជី​ថ​លូ​ប​នីយកម្ម​របស់​កម្ពុជា​, កិច្ចប្រជុំ​នេះ មាន​គោលបំណង​ប្រមូល​ធាតុ​ចូល​បន្ថែម និង​ផ្លាស់ប្តូរ​ទស្សនទាន ដើម្បី​ស្វែងយល់​ពី​ស្ថានភាព​បច្ចុប្បន្ន​, វឌ្ឍនភាព និង​បញ្ហា​ប្រឈម​ពាក់ព័ន្ធ​នឹង​ការផ្លាស់ប្តូរ​ការផ្សាយ​ទូរទស្សន៍ ពី​ប្រព័ន្ធ​អាណា​ឡូ​ក​ទៅជា​ប្រព័ន្ធ​ឌីជីថល ។ ហេតុនេះហើយ​អង្គប្រជុំ ក៏បាន​ពិភាក្សា​ពី​ការគ្រប់គ្រង​និង​ការប្រើប្រាស់​នូវ​បន្ទារ​ហ្វ្រេ​កង់​ស៍​៧០០MHz​ដែលមាន​ភាព​បន្ស៊ី​គ្នា​ទៅនឹង​ការបង្កើត​ថ្នាល​ទូរទស្សន៍​ឌីជីថល​ថ្មី​ផងដែរ ។
​កិច្ចប្រជុំ​ក៏បាន​ពិភាក្សា​ដែរ​លើ​ចំណុច​សំខាន់ៗ​ចំនួន​បួន រួមមាន ១. ការអនុវត្ត​ផែនការ​ផ្លាស់ប្តូរ​ការផ្សាយ​ទូរទស្សន៍​ពី​ប្រព័ន្ធ​អាណា​ឡូ​ក ទៅជា​ប្រព័ន្ធ​ឌីជីថល​ឱ្យបាន​មុន​ឆ្នាំ ២០២៣, ២. ការគ្រប់គ្រង​នូវ​ការប្រើប្រាស់​បន្ទារ​ហ្វ្រេ​កង់​ស៍ ៧០០ MHz ក្នុង​វិស័យ​សោតទស្សន៍ រួមមាន​ទូរទស្សន៍​ឌីជីថល​, ប្រព័ន្ធ​អ៊ី​ន​ធើ​ណេ​ត និង​ទូរស័ព្ទ​ចល័ត​, ៣. យន្តការ​គ្រប់គ្រង និង​វិនិយោគ លើ​ថ្នាល​ទូរទស្សន៍​ឌីជីថល​ថ្មី និង ៤. ការធ្វើ​បច្ចុប្បន្ន​កម្ម​លើ​វឌ្ឍនភាព​ពាក់ព័ន្ធ​នឹង​ការរៀបចំ និង​ការគ្រប់គ្រង​ហេ​ដ្ឋា​-​រចនាសម្ព័ន្ធ​ប្រព័ន្ធ​ឌីជីថល​ក្នុង រយៈពេល​មធ្យម និង​វែង ក៏ដូចជា​ពិភាក្សា​ពី​លទ្ធភាព នៃ​ការបង្កើត​គំរូ​ពាណិជ្ជកម្ម​សម្រាប់ ការវិនិយោគ​ក្នុង​វិស័យ​ពាក់ព័ន្ធ​នឹង​ប្រព័ន្ធ​ឌីជីថល ។​
​មន្ត្រី​បាន​ប្រាប់ថា​ជា​លទ្ធផល​ចំពោះ​យន្តការ​គ្រប់គ្រង និង​ការវិនិយោគ​លើ​ថ្នាល​ទូរទស្សន៍​ឌីជីថល​ថ្មី​អង្គ​ប្រជុំបាន​ពិនិត្យ ពិភាក្សា និង​ប្រៀបធៀប​នូវ​ជម្រើស​យន្តការ​ចំនួន​បី​ផ្សេងគ្នា​រួមមាន​យន្តការ​គ្រប់គ្រង​និង​វិនិយោគ​ដោយ​វិស័យ​ឯកជន​ទាំងស្រុង​។​យន្តការ​សហការ​ចម្រុះ​រវាង​វិស័យ​រដ្ឋ​-​ឯកជន និង​យន្តការ​គ្រប់គ្រង និង​វិនិយោគ​ដោយ​រដ្ឋ​ទាំងស្រុង ។​

​អង្គប្រជុំ​បាន​ឯកភាព​ថា ការអភិវឌ្ឍ និង​ការគ្រប់គ្រង​ប្រព័ន្ធ​សោតទស្សន៍ ប្រកបដោយ​ជោគជ័យ​គឺជា​កិច្ចការ​ដ៏​មាន​សារសំខាន់ សម្រាប់​ការអភិវឌ្ឍ​ប្រទេស​កម្ពុជា​ទាំងមូល ដែល​ការណ៍​នេះ​មិន​ត្រឹមតែ​អាចជួយ​ជំរុញ​វិស័យសេដ្ឋកិច្ច​ឱ្យមាន​ភាព​រីកចម្រើន តាមរយៈ​ការបង្កើន​ភាព​ប្រកួតប្រជែង ដែល​ទ្រទ្រង់​ដោយ​ប្រព័ន្ធ​បច្ចេកវិទ្យា​ទំនើប និង​ការធ្វើ​ពិពិធ​កម្ម​សេដ្ឋកិច្ច​តែប៉ុណ្ណោះ​ទេ ថែមទាំង​អាចជួយ​លើកកម្ពស់​យន្តការ​នៃ​ការគ្រប់គ្រង​ទិន្នន័យ និង​ប្រព័ន្ធ​ឃោសនាការ​ក្នុងប្រទេស ក្នុងន័យ​ធានាបាន​នូវ​សន្តិសុខ​ជាតិ និង​សុវត្ថិភាព​សង្គម​-​សេដ្ឋកិច្ច​ប្រកបដោយ​ប្រសិទ្ធភាព​ខ្ពស់ ។​

​លោក​អគ្គបណ្ឌិត​សភាចា​រ្យ អូន ព័ន្ធមុនីរ័ត្ន ឧបនាយករដ្ឋមន្ត្រី ប្រធាន​អង្គប្រជុំ បាន​ថ្លែងអំណរគុណ និង វាយតម្លៃ​ខ្ពស់ ដល់​ក្រុមការងារ ដែល​ដឹកនាំ​ដោយ​ក្រសួង​ព័ត៌មាន​, ក្រសួង​ប្រៃសណីយ៍ និង​ទូរគមនាគមន៍​ដែល បាន ខិតខំ​សម្របសម្រួល​ការងារ​ដ៏​មាន​សារសំខាន់​នេះ និង​បាន​ណែ​នាំឱ្យ​ក្រុមការងារ​រៀបចំ​អនុសាសន៍​ស្របតាម​ស្មារតី​នៃ​អង្គប្រជុំ​ដើម្បី​បន្ត​នីតិវិធី​គោរព​ស្នើសុំ​ការអនុម័ត​ពី​ប្រមុខ​រាជរដ្ឋាភិបាល ៕​សរន

ទីតាំងផ្សាយពាណិជ្ជកម្ម

- Advertisment -



Most Popular