Home ព័ត៌មានសំខាន់ៗ ថ្ងៃនេះ​ថៃ​រក...

ថ្ងៃនេះ​ថៃ​រកឃើញ​អ្នក​ឆ្លង​វីរុស​កូរ៉ូណា​១៥៥​នាក់​ទៀត និង​ម្នាក់​ស្លាប់​ដោយកូវី​ដ​១៩

​ប្រែ​សម្រួលៈ​វាសនា​/​បាងកក​(​បាងកក​ប៉ុស្តិ៍​)៖​រដ្ឋាភិបាល​ថៃ​នៅ​ថ្ងៃ​អង្គារ​ទី​២៩​ធ្នូ បាន​រក​ឃើញ​អ្នក​ឆ្លង​វីរុស​កូរ៉ូណា​ថ្មី​ចំនួន​១៥៥​នាក់ ក្នុងនេះ​១៣៤​នាក់​ឆ្លង​នៅក្នុង​ស្រុក ១១​នាក់​ជា​ជន​ចំណាកស្រុក​និង​១០​នាក់​ជា​អ្នក​ធ្វើ​ចត្តា​ឡីស័ក​បន្ទាប់​ពី​ចូលមក​ពី​ក្រៅប្រទេស​។​

​ចំនួន​ថ្មី​នេះ​នាំអោយ​ថៃ​មាន​អ្នក​ឆ្លង​វីរុស​នេះ​សរុប​៦.៤៤០​នាក់ និង​ចំនួន​ស្លាប់​ដោយ​ជំងឺ​កូវី​ដ​១៩​បាន​កើន​ដល់​៦១​នាក់ ក្រោយ​អ្នកជំងឺ​ម្នាក់​ទៀត​បាន​ស្លាប់​។​

​អនុរដ្ឋមន្ត្រី​សុខាភិបាល​ថៃ បានបញ្ជាក់​អះអាង​អំពី​ការស្លាប់​ម្នាក់​ដោយកូវី​ដ​១៩​។​ជនរងគ្រោះ​ជា​បុរស​វ័យ​៤៥​ឆ្នាំ​ដែល​មាន​ជំងឺ​បេះដូង ស្ត្រូ​ក​និង​ទឹកណោម​ផ្អែម​ស្រាប់ បាន​ឆ្លង​វីរុស​កូរ៉ូ​ណា​នៅ​មន្ទីរពេទ្យ​​ខេត្ត​រ៉ា​យ៉ង​កាលពី​ថ្ងៃអាទិត្យ​ហើយ​ធ្លាក់ខ្លួន​ពិបាក​ដកដង្ហើម​ធ្ងន់ធ្ងរ​កាលពី​ថ្ងៃ​ចន្ទ​។​ជនរងគ្រោះ​ជា​អ្នកយាម​នៅ​កន្លែង​លេងល្បែង​ខុសច្បាប់​មួយ​នៅ​រ៉ា​យ៉ង​ដែល​ជា​មជ្ឈមណ្ឌល​ផ្ទុះ​ការឆ្លង​ជា​ចង្កោម​តូច​​ចុង​ក្រោយ​នៅ​ថៃ​។​

​លោកតា​វី​ស៊ី​ល វី​សានុ​យ៉ូ​ធី​ន អ្នកនាំពាក្យ​មជ្ឈមណ្ឌល​គ្រប់គ្រង​ស្ថានភាព​កូវី​ដ​១៩​ថៃ បាន​និយាយថា ការឆ្លង​ថ្មី​១០​ករណី​មកពី​អាឡឺម៉ង់ វៀតណាម ឥណ្ឌា ស៊ុយ​អ៊ែត អាម៉េរិក តួ​ក​គី​និង​បា​រ៉ែ​ន​។​

​ការឆ្លង​ក្នុងស្រុក​១២​ករណី​មាន​ជាប់​ពាក់ព័ន្ធ​នឹង​ផ្សារ​បង្គា​មួយ​នៅក្នុង​ខេត្ត​សាមុត សា​ខន និង​២​ករណី​ពាក់ព័ន្ធ​នឹង​ការឆ្លង​ជា​កញ្ចុំ​នៅ​វង់ល្បែង​ក្នុង​ខេត្ត​រ៉ា​យ៉ង​។​រីឯ​ការឆ្លង​ក្នុងស្រុក​ប្រមាណ​១០០​ករណី​​ទៀត​កំពុង​ស្ថិត​ក្រោម​ការស៊ើបអង្កេត​រក​ប្រភព​នៅ​ឡើយ រួមមាន​៥៦​ករណី​នៅ​ខេត្ត​រ៉ា​យ៉ង និង​២៨​ករណី​នៅ​ឈុន ប៊ូ​រី​។​

​លោក​អ្នកនាំពាក្យ​មជ្ឈមណ្ឌល​គ្រប់គ្រង​ស្ថានភាព​កូវី​ដ​១៩​ថៃ​បាន​អោយដឹងថា ចំនួន​ខេត្ត​ឆ្លង​បាន​កើន​ពី​៦​ខេត្ត​ក្នុងអំឡុង​ថ្ងៃ​១៨-២០​ធ្នូ មក​២៦​ខេត្ត​(២១-២៣​ធ្នូ​) និង​៣៧​ខេត្ត​(​ថ្ងៃ​២៤-២៦​ធ្នូ​)​មក​៤៥​ខេត្ត​នៅ​អំឡុង​ថ្ងៃ​២៧-២៩​ធ្នូ​។​ផ្អែក​តាម​ការ​គន់គូរ​របស់​ផ្នែក​សុខាភិបាល ចំនួន​ឆ្លង​ប្រចាំ​ថ្ងៃ​ថ្មី​អាច​កើន​ដល់​១៨.០០០​នាក់​នៅ​ត្រឹម​ពាក់កណ្តាល​ខែ​មករា បើសិន​មិនមាន​ចាត់​វិធានការ​គ្រប់គ្រង​ជំងឺ​​នេះ​ដ៏​ម៉ឺងម៉ាត់​ទេ​។​

​លោក​បាន​បន្តថា ការដាក់ចេញ​វិធានការ​គ្រប់គ្រង​ល្មម អាច​នាំ​ដល់​ការឆ្លង​មួយថ្ងៃ​៨.០០០​នាក់​តែ​បើ​វិធានការ​គ្រប់គ្រង​តឹងរឹង​អាច​កំហិត​មក​នៅ​ក្រោម​១.០០០​នាក់​ក្នុង​មួយថ្ងៃ​។​បើ​តាម​អ្នកនាំពាក្យ​​រូបនេះ បច្ចុប្បន្ន​អាជ្ញាធរ​ថៃ​កំពុង​ដាក់ចេញ​វិធានការ​ល្មម​នៅឡើយ​ទេ បើ​ប្រៀបធៀប​នឹង​អ្វី​ដែល​បាន​ដាក់​ចេញ​និង​ប្រើ​កាលពី​ពេលមុន​។​

​ក្នុង​ថ្ងៃនេះ​ដែរ ការ​ឆ្លងកូវី​ដ​១៩​នៅ​ទូទាំង​ពិភពលោក​បាន​កើន​៤៨៧.២៧៣​នាក់ រហូត​ដល់​ចំនួន​៨១,៦៧​លាន​នាក់ និង​ស្លាប់​កើន​ដល់ ១,៨៧​លាន​នាក់​ក្រោយពី​៩.១០៥​នាក់​ទៀត​បាន​ស្លាប់​ដោយកូវី​ដ​១៩​នៅ​២៤​ម៉ោង​កន្លងទៅ​៕

ទីតាំងផ្សាយពាណិជ្ជកម្ម

- Advertisment -

Most Popular