ជយោ​! បញ្ចប់​ព្រឹត្តិការណ៍​សហគមន៍​២៨​វិច្ឆិកា បើក​ដំណើរការ​សាលា​ឡើងវិញ​!

ដោយៈ​ម៉េង​ឆៃ / ភ្នំពេញៈ ក្នុងពេល​ថ្លែង​សារ​ផ្ញើជូន​ជនរួមជាតិ​ខ្មែរ កាលពី​ព្រឹក​ថ្ងៃទី​២៩ ខែធ្នូ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បានប្រកាស​បិទ​បញ្ចប់​ព្រឹត្តិការណ៍​សហគមន៍ ២៨​វិច្ឆិកា នៅ​ថ្ងៃទី​២៩ ខែធ្នូ​នេះ​។

​ព្រឹត្តិការណ៍​សហគមន៍​២៨​វិច្ឆិកា មាន​អ្នក​ឆ្លង​ជំងឺ​កូ​វីដ សរុប​ចំនួន ៤១​នាក់ ប៉ុន្តែ​មកដល់​ថ្ងៃទី​២៩ ខែធ្នូ​នេះ មាន​អ្នកជា​សះស្បើយ ៣៨​នាក់​ហើយ​។ បើ​និយាយ​ពី​ក្របខណ្ឌ​ទូទាំងប្រទេស គឺមាន​អ្នក​ឆ្លង​ជំងឺ​កូ​វីដ​១៩ សរុប ៣៦៤​នាក់ ដែល​ក្នុងនោះ ៣៦០​នាក់ ត្រូវបាន​ព្យាបាល​ជាសះស្បើយ ហើយ​មកដល់​ព្រឹក​ថ្ងៃទី​២៩ ខែធ្នូ​នេះ នៅសល់​អ្នកជំងឺ​កូ​វីដ​១៩ តែ ៤​នាក់​ប៉ុណ្ណោះ កំពុង​សម្រាក​ព្យាបាល​នៅ​មន្ទីរពេទ្យ​។​

​សម្តេច​តេ​ជោ ហ៊ុន សែន សម្តែង​ការកោតសរសើរ​ក្រសួងសុខាភិបាល មន្ត្រី​ពេទ្យ កងកម្លាំងប្រដាប់អាវុធ និង​ប្រជាពលរដ្ឋ ដែល​ចូលរួម​ទប់ស្កាត់​កូ​វីដ​១៩ និង​បញ្ចប់​ព្រឹត្តិការណ៍​សហគមន៍ ២៨​វិច្ឆិកា និង​អំណរគុណ​ដល់ដៃ​គូ អង្គការ​សុខភាព​ពិភពលោក ដែល​ចូលរួមចំណែក​ក្នុងការ​ទប់ស្កាត់​ព្រឹត្តិការណ៍​សហគមន៍ ២៨ វិច្ឆិកា​។ក្នុងនោះ ចាប់តាំងពី​ថ្ងៃទី​២០ ខែធ្នូ រហូតមកដល់​ពេលនេះ មិនទាន់មាន​ពលករ​ខ្មែរ ដែល​នាំ​ជំងឺ​កូ​វីដ​១៩ ដែល​កំពុង​ផ្ទុះឡើង នៅ​ប្រទេស​ថៃ ចូលមក​កម្ពុជា​នោះទេ​។

​សម្តេច​តេ​ជោ ហ៊ុន សែន អំពាវនាវ​ដល់​ពលក​រ​ខ្មែរ​ដែល​កំពុងធ្វើការ​នៅ​ប្រទេស​ថៃ បន្ត​រស់នៅក្នុង​ប្រទេស​ថៃ​បន្តទៀត​ចៀសវាង​ចល័ត ពី​កន្លែង​មួយ​ទៅ​កន្លែង​មួយ​។

​សម្តេច​តេ​ជោ​បន្តថា ឆ្លងកាត់​ព្រឹត្តិការណ៍​សហគមន៍​២៨​វិច្ឆិកា យើង​បាន​កំពុង​ប្រយុទ្ធ​នឹង​សមរភូមិ​៣ រួមមាន​ទី​១៖ គឺ​ការ​នាំចូល​, ទី​២៖ គឺ​ការឆ្លង​ក្នុង​សហគមន៍ ដែល​ទើបនឹង​ឆ្លង​កាលពី​ថ្ងៃទី​២៨​វិច្ឆិកា និង ទី​៣៖ គឺ​ការព្យាបាល​ឱ្យ​ជាសះស្បើយ​។

​សម្តេច​តេ​ជោថ្លែង​រំលឹកថា កាល​មុន​កម្ពុជា​ជាប់​លេខ​១​នៅ​អាស៊ី និង​លេខ​៣ នៅលើ​ពិភពលោក ក្នុងការ​ទប់ស្កាត់​កូ​វីដ​១៩ ប៉ុន្តែ​ពេលនេះ​កម្ពុជា​ជាប់​លេខ​១​លើ​ពិភពលោក ក្នុងការ​ទប់ស្កាត់​កូ​វីដ​១៩​។ ទោះជា​ទទួលបាន​ចំណាត់ថ្នាក់​ល្អ ប៉ុន្តែ​យើង​មិនត្រូវ​ត្រេកអរ​ទេ ដោយសារតែ​បញ្ហា​កូ​វីដ​១៩ នៅលើ​ពិភពលោក មិនទាន់​បិទ​បញ្ចប់​ទេ​។

​ទន្ទឹមនឹង​ការប្រកាស​បិទ​បញ្ចប់​ព្រឹត្តិការណ៍​សហគមន៍​២៨​វិច្ឆិកា​ទាក់ទង​ទៅនឹង​វិស័យ​អប់រំ​សម្តេច​តេ​ជោ​នាយករដ្ឋមន្ត្រី​ក៏បាន​សម្រេច​ឱ្យ​យក​ថ្ងៃទី​១១ ខែមករា ឆ្នាំ​២០២១ ជា​ថ្ងៃ​បើក​បវេសនកាល ហើយ​សាលារៀន​ឯកជន អាច​ចាប់ផ្ដើម​ចូលរៀន​ឡើងវិញ ចាប់ពីពេលនេះ​តទៅ​បាន​ហើយ​។

​ទោះបីជា​ព្រឹត្តិការណ៍​សហគមន៍​២៨​វិច្ឆិកា បិទ​បញ្ចប់ ហើយ​សាលារៀន បើក​ដំណើរការ​ចូលរៀន​ឡើងវិញ ប៉ុន្តែ​សម្តេច​ប្រមុខ​រាជរដ្ឋាភិបាល ក៏​នៅតែ​បន្ត​ណែនាំ​ឲ្យ​ប្រុងប្រយ័ត្ន​ជានិច្ច លើ​ការទប់ស្កាត់ និង​ការពារ​ការឆ្លង​ជំងឺ​កូ​វីដ​១៩​។ ក្នុងនោះ ការជួបជុំ​ណាមួយ ដែល​មិនចាំបាច់ គឺ​មិនបាច់​ជួបជុំ​ទេ ដូចជា​ការប្រជុំ​របស់​រដ្ឋ អាច​បន្ត​ធ្វើតាម​អន​ឡាញ​បាន​។

​ក្រៅពីនោះ សម្តេច​តេ​ជោ ក៏បាន​ជំរុញ​ឱ្យ​ម្ចាស់​សណ្ឋាគារ ភោជនីយដ្ឋាន និង​មណ្ឌល​សេវាកម្ម​ទេសចរណ៍ រៀបចំ​វិធានការ ដើម្បី​ទប់ស្កាត់​កូ​វីដ​១៩ ហើយ​ផ្តល់​សិទ្ធិ​ឱ្យ​អាជ្ញាធរ ចុះ​បិទ​ហាង​តែម្តង បើសិន​មិន​អនុវត្ត​វិធានការ​សុវត្ថិភាព​។សម្តេច​តេ​ជោអំពាវនាវ​ឱ្យ​រួមគ្នា​ទប់ស្កាត់​ការឆ្លង​ជា​សហគមន៍​ជាថ្មី​ម្តងទៀត ក្រោយ​បិទ​បញ្ចប់​ព្រឹត្តិការណ៍​សហគមន៍​២៨​វិច្ឆិកា​។

​នៅ​ថ្ងៃទី​២៩ ខែធ្នូ​នេះ ក្រសួង​អប់រំ ក៏បាន​ប្រកាស​ឲ្យ​សាលារៀន​ឯកជន បើកទ្វារ ចូលរៀន​នៅតាម​សាលា​ឡើងវិញ​។ រីឯ​ក្រសួង​ការងារ និង​បណ្តុះបណ្តាល​វិជ្ជាជីវៈ ក៏បាន​ប្រកាស អនុញ្ញាត​ឲ្យ​ដំណើរការ​បណ្តុះបណ្តាល នៅតាម​គ្រឹះស្ថាន​អប់រំ​បណ្តុះបណ្តាល​បច្ចេកទេស និង​វិជ្ជាជីវៈ ឡើងវិញ​ផងដែរ​។ សាលារៀន និង​គ្រឹះស្ថាន​បណ្តុះបណ្តាល​វិជ្ជាជីវៈ​ទាំងអស់ ត្រូវ​បិទទ្វារ ដោយសារតែ​ព្រឹត្តិការណ៍​ឆ្លង​កូ​វីដ​នៅ​សហគមន៍ ចាប់ពី​ថ្ងៃទី​២៨​វិច្ឆិកា​។​

​ក៏​ប៉​ន្តែ​ទាំង​សាលារៀន និង​គ្រឹះស្ថាន​អប់រំ​បណ្តុះបណ្តាល​បច្ចេកទេស និង​វិជ្ជាជីវៈ​ទាំងអស់ នៅពេល​បើកទ្វារ​ឲ្យ​សិស្ស​ចូលរៀន​ឡើងវិញ តែ​ត្រូវ​បន្ត​អនុវត្តតាម​វិធាន​សុខាភិបាល និង​តាម​ការណែនាំ​របស់​ក្រសួង​អប់រំ ក្រសួង​ការងារ រួមទាំង​ក្រសួងសុខាភិបាល ដើម្បី​រួមចំណែក​បង្ការ និង​ទប់ស្កាត់​ការឆ្លង​ជំងឺ​កូ​វីដ​១៩ ជាយថាហេតុ​។​

​ក្រសួង​អប់រំ ក៏បាន​កំណត់ថា គ្រឹះស្ថានសិក្សា​ទាំងអស់ ត្រូវ​បន្ត​អនុវត្ត​គោលការណ៍​ប្រតិបត្តិ​ស្តង់ដារ ( SOP ) សម្រាប់​ដំណើរការ​សាលារៀន​ឡើងវិញ ក្នុង​បរិបទ​កូ​វីដ​១៩ និង​រក្សា​គម្លាត​សុវត្ថិភាព​សង្គម និង​បុគ្គល​។ ក្នុងករណី​ចាំបាច់ ត្រូវ​ពាក់​ម៉ាស​ការពារ នៅក្នុង​បរិវេណ​របស់​គ្រឹះស្ថានសិក្សា​។​

​អនាម័យ​ស្អាត​ជានិច្ច រួមទាំង​ការលាង​សម្អាត​ដៃ​ឲ្យ​បាន​ញឹកញាប់ ដោយ​ទឹកស្អាត និង​សាប៊ូ ឬ​អាល់កុល ជែ​ល ក៏​ជាការ​តម្រូវ​ចាំបាច់​សម្រាប់​សិស្សានុសិស្ស និង​សិក្ខាកាម​ផងដែរ​។ ចូរ​កុំភ្លេចថា «​ការពារ ប្រសើរ​ជាង​ព្យាបាល​»​។ ទម្លាប់​អនាម័យ​ស្អាត មិន​ត្រឹមតែ​បង្ការ​កូ​វីដ​ទេ តែ​ក៏​ដើម្បី​យើង​ម្នាក់ៗ មាន​សុខ​ភាពល្អ​ផងដែរ​។​

​ក្រៅពី​អនុវត្ត​គោលការណ៍​ប្រតិបត្តិ​ស្តង់ដារ ( SOP ) សម្រាប់​ដំណើរការ​សាលារៀន​ឡើងវិញ ក្នុង​បរិបទ​កូ​វីដ​១៩ និង​រក្សា​គម្លាត​សុវត្ថិភាព​សង្គម និង​បុគ្គល ហើយ​ក្នុងករណី​ចាំបាច់ ត្រូវ​ពាក់​ម៉ាស​ការពារ នៅក្នុង​បរិវេណ​របស់​គ្រឹះស្ថានសិក្សា ហើយ​នោះ សិស្សានុសិស្ស រួមទាំង​សិក្ខាកាម ដែល​ចូលរៀន​ឡើងវិញ​នេះ ក៏​គួរតែ​អនុវត្ត​ឲ្យ​បាន​ខ្ជាប់ខ្ជួន មិន​ថា នៅក្នុង​ថ្នាក់រៀន និង​នៅក្នុង​បរិវេណ​សាលារៀន​ឡើយ​។ ពោលគឺ​ជៀសវាង​ការជួបជុំ ដែល​មិន​រក្សា​គម្លាត​ពី​ម្នាក់​ទៅ​ម្នាក់​យ៉ាងតិច ១​ម៉ែត្រ​កន្លះ ហើយក៏​គួរតែ​ពាក់​ម៉ាស​ជាប់​ជានិច្ច មិន​ថា​នៅក្នុង​ថ្នាក់រៀន ឬ​ចេញលេង ឬក៏​ធ្វើដំណើរ​ពី​ផ្ទះ​មក​សាលារៀន ឬ​ពី​សាលារៀន​ទៅផ្ទះ​នោះទេ​។ អនាម័យ និង​លាង​សម្អាត​ដៃ​ញឹកញាប់​ដោយ​ទឹកស្អាត និង​សាប៊ូ ឬ​អាល់កុល ឬក៏​ជែ​ល ក៏​សិស្សានុសិស្ស និង​សិក្ខាកាម​គ្រប់រូប ធ្វើ​ឲ្យ​បាន​ញឹកញាប់​ផងដែរ​។​

​នៅ​មាត់ច្រក​ចេញចូល តាម​សាលារៀន និង​សាលា​បណ្តុះបណ្តាល​វិជ្ជាជីវៈ ក៏ត្រូវ​មានការ​វាស់​ក​ម្តៅ ដាក់​អាល់កុល ជែ​ល ហើយ​តម្រូវ​ឲ្យ​សិស្ស​ទាំងអស់ ពាក់​ម៉ាស​ត្រឹមត្រូវ និង​រក្សា​គម្លាត​សុវត្ថិភាព​ពី​ម្នាក់​ទៅ​ម្នាក់ តាម​ស្តង់ដា​១​ម៉ែត្រ​កន្លះ​ពី​ម្នាក់​ទៅ​ម្នាក់​។ ការប្រកាន់យក​វិធាន​សុខាភិបាល​នេះ ត្រូវ​ឲ្យ​សិស្ស​អនុវត្ត​មិន​ថា​នៅក្នុង​ថ្នាក់រៀន ឬ​នៅក្នុង​បរិវេណ​សាលារៀន​ទេ ហើយ​សូម្បីតែ​ធ្វើដំណើរ​ពី​ផ្ទះ​ទៅ​សាលារៀន និង​ពី​សាលារៀន​ទៅផ្ទះ ក៏ត្រូវ​ពាក់​ម៉ាស​ជាប់​ជានិច្ច​ដែរ​។ យើង​ត្រូវ​បន្ត​ការពារ ទើប​ប្រសើរ​ជាង​ព្យាបាល​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular