Home ព័ត៌មានជាតិ សេដ្ឋកិច្ច បន្ទាប់ពី​បង់...

បន្ទាប់ពី​បង់លុយ​រួច អតិថិជន​ទិញ​ផ្ទះ​បុរី ភី​ធី គម្រោង​ទី​២ ព្រួយបារម្ភ​ខ្លាច​ក្រុមហ៊ុន​មិន​គោរព​សន្យា

ដោយៈ ឫទ្ធិ​ស័ក្តិ​/ភ្នំពេញៈ បន្ទាប់ពី​បង់លុយ​ហើយ អតិថិជន​ដែល​ទិញ​ផ្ទះ​បុរី ភី​ធី​(PT )​គម្រោង​ទី​២ បាន​សម្តែង​ការព្រួយបារម្ភ ខ្លាច​ក្រុមហ៊ុន​មិន​សាង​សង់ផ្ទះ ក្នុងពេលដែល​គ​គេ​ឃើញថា​ក្រុមហ៊ុន​មិនទាន់មាន​សកម្មភាព​អ្វី​សោះ​។ ប៉ុន្តែ​ភាគី​បុរី​បាន​បញ្ជាក់ថា ក្រុមហ៊ុន​ធ្វើតាម​កិច្ចសន្យា​របស់ខ្លួន​ជាមួយ​អតិថិជន និង​ធ្វើ​សកម្មភាព​ទៅតាម​ផែនការមេ​។ ហេតុនេះ​សុំ​អតិថិជន​កុំ​មានការ​ព្រួយបារម្ភ​។

​បុរី PT គម្រោង​ទី​២ មាន​ទីតាំង​នៅក្នុង​ឃុំ​ឈ្វាំង ស្រុក​ពញាឮ ខេត្ត​កណ្តោល មាន​ផ្ទៃដី​ទំហំ ៣៥ ហិកតា ហើយ​មាន​គម្រោង សាងសង់​វីឡា​ទោល​ជាង ១០០០​ខ្នង​។​
អតិថិជន​ទិញ​ផ្ទះ​បុរី PT គម្រោង​ទី​២ បាន​ឲ្យ​ដឹងថា ពួកគាត់​បាន​បង់លុយ​ផ្ដាច់​និង​បង់​រំលស់ ហើយ​ម្ចាស់​គម្រោង​សន្យាថា នឹង​សាង​សង់ផ្ទះ​ឱ្យ​រួចរាល់​ក្នុង​រយៈពេល ១៤​ខែ​។ ប៉ុន្តែ​តាំងពី​ពួកគាត់​បង់លុយ​រួចរាល់​ខែកញ្ញា រហូតមកដល់​ចុងខែ​ធ្នូ​នេះ មិនមាន​សកម្មភាព​ចាក់​បំពេញ​ដី​ដើម្បី​មានការ​សាងសង់​អ្វី​នោះទេ​។​ថ្មីៗ​នេះ​គ្រាន់តែ​ឃើញ​មានការ​សាងសង់​ផ្ទះ​គំរូ​ដែល​កំពុង​សាងសង់​និង​ចាក់ដី​នៅ​ជុំវិញ​ផ្ទះ​គំរូ​បន្តិចបន្តួច​ប៉ុណ្ណោះ ក្រៅពីនេះ​ដី​បុរី​ដែល​ត្រូវ​សាងសង់​ជាង ១.០០០​ខ្នង នៅតែ​ជា​ដី​វាលស្រែ​ដដែល​។

​អតិថិជន​បញ្ជាក់ថា “​ពួកយើងខ្ញុំ​មានការ​ព្រួយបារម្ភ​ជាខ្លាំង​ចំពោះ​ប្រាក់​ដែល​បាន​បង់​ជាមួយ​បុរី ដោយសារតែ​វា​មិន​សម​ហេតុផល ទាល់តែសោះ​ដែល​ផ្ទះ រាប់ពាន់​ខ្នង​មិនទាន់មាន​សកម្មភាព​សាងសង់​សោះ ហើយ​ពេលវេលា​ដែល​សន្យា​ជាមួយ​អតិថិជន​កាន់តែ​ខិត ជិត​មកដល់​។​ពេល​អតិថិជន​សួរ​បុគ្គលិក​បុរី​អំពី​មូលហេតុ​យឺតយ៉ាវ ពួកគេ​មិនអាច​ឆ្លើយ​ដូចគ្នា​នោះទេ​។ អ្នកខ្លះ​ថា​មកពី​ភ្លៀង ដី​សើម​ពិបាក​ចាក់ដី ។​អ្នកខ្លះ ថា​មកពី​ដីស្រែ​ប្រជាជន​មិនទាន់​ច្រូត​យក​ផល​។ អ្នកខ្លះ​ថា​ថៅកែ​មិនអាច​និយាយ​ថ្លៃ​ដី​ដែល​ត្រូវ ទិញ​មកចាក់​បំពេញបាន​ព្រោះ​តម្លៃ​ដី​ថ្លៃ ហើយ​អ្នកខ្លះ​ក៏​ប្រាប់ទៀតថា​ថៅកែ​ដែលជា​ភាគហ៊ុន​មានការ​ឈ្លោះទាស់ទែង​ផ្ទៃក្នុង​។ ពួក​ខ្ញុំ​គាត់​ធ្លាប់បាន​ទូរស័ព្ទ​សួរ​ម្ចាស់​គម្រោង​គឺ លោក​ប្រាក់ ប៊ុនធឿន ប៉ុន្តែ​គាត់​ឆ្លើយ​សន្យា​មិន​ច្បាស់លាស់​ដូចគ្នា​”​។​

រូបថតៈលោក សុខ ឃាង ទីប្រឹក្សាក្រុមហ៊ុនបុរី PT

​ចំណែក​លោក សុខ ឃាង ទីប្រឹក្សា​ក្រុមហ៊ុន​បុរី PT បានបញ្ជាក់​ប្រាប់​រស្មី​កម្ពុជា​កាលពី​ថ្ងៃទី​២៨ ខែធ្នូ ថា “​ក្រុមហ៊ុន​បានទទួល​លក់ និង​ទិញ​ពិត​ប្រាក​មែន ប៉ុន្តែ​ការចាក់ដី​កន្លងមក​យើង​បានធ្វើ ធ្វើបាន​បន្តិច​ទៅ​ក៏​ដល់​ខែវស្សា យើង​ក៏​អត់​បានធ្វើ ប៉ុន្តែ​ឥឡូវនេះ ចាប់ពី​ថ្ងៃទី​២៨ ខែធ្នូ តទៅ គឺ​យើង​មាន​ផែនការ​ចាក់ដី​ហើយ ជាក់ស្តែង​យើង​ចាក់​បាន​ជិត​មួយ​ពាន់​ឡាន​ហើយ​។ អីចឹង​យើង​បន្ត​ចាក់​ជា​រៀងរហូត​ទៅ ហើយ​ផែនការ​ការចាក់ដី​រប​ស់​យើង​ធ្វើ ៤​ខែ​”​។​

​លោក​បាន​បញ្ជាក់ទៀតថា “​ទាក់ទង​ករណីនេះ កុងត្រា​យើង​មាន​រៀងខ្លួន សម្រាប់​គម្រោង​ទី​១៤ របស់​យើង​គឺមាន​រយៈពេល ១៤​ខែ ហើយ​គម្រោង​ទី​២ របស់​យើង​ទើប​បានតែ ៤​ខែ​ទេ នៅសល់​ពេលវេលា ១០​ខែ​ទៀត គឺ​ក្រុមហ៊ុន​រៀបចំ​មិន​ឲ្យ​យឺត​ទេ​ហើយ​បើ​មានការ យឺតយ៉ាវ​គាត់​អាច​ប្តឹង​ពួកយើង​បាន ព្រោះ​យើង​មាន​កិច្ចសន្យា​នៅក្នុង​ដៃ​រៀងៗ​ខ្លួន​”​។​
​លោក​បាន​បន្តថា ក្រុមហ៊ុន​មាន​ផែនការមេ​ត្រឹមត្រូវ អត់​ធ្វើ​អ្វី​តាម​ការ​នឹង​ក​ឃើញ​ទេ គឺមាន​ពេលវេលា​ណា​ដែល​ត្រូវ​ចាក់ដី ពេលវេលា​ណា​ដែល​ត្រូវធ្វើ​ផ្ទះ និង​ពេលវេលា​ដែល​ត្រូវ​កាត់​ប្លង់​ជូន​អតិថិជន​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular