Home ព័ត៌មានសំខាន់ៗ តំណក់​ប្រេង​ដ...

តំណក់​ប្រេង​ដំបូង​របស់​​កម្ពុជា ជា​មហា​សមិទ្ធផល​សម័យ​តេ​ជោ​សែន​

ដោយៈ​ម៉េង​ឆៃ​/ ភ្នំពេញៈសម្តេច​អគ្គមហាសេនាបតី​តេ​ជោ​ហ៊ុនសែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​កាល​ពីថ្ងៃ​ទី​២៩ ខែធ្នូ ម្សិលមិញ​ទាំង​ក្នុង​ទំព័រ​ហ្វេ​ស​ប៊ុ​ក​ផ្លូវការ​ក៏ដូចជា​ក្នុង​សារ​ពិសេស​ផ្ទាល់មាត់​សម្តេច​តេ​ជោ​បានប្រកាស​ពី​ការចាប់ផ្តើម​ផលិត​ប្រេង​តំណក់​ដំបូង នៅ​តំបន់​ប្លុក​អេ​( A) ក្នុង​ដែនសមុទ្រ​កម្ពុជា​ក្រោយ​ទន្ទឹងរង់ចាំ​អស់​ពេល​ដ៏​យូរ​កន្លងមក​។ តំណក់​ប្រេង​ដំបូង​របស់​កម្ពុជា ដែល​ទទួលបាន​គឺ​ចំ​ថ្ងៃ​ខួប​លើក​ទី​២២ នៃ​ការបញ្ចប់​សង្គ្រាម នាំមក​នូវ​ការឯកភាព​ជាតិ ឯកភាព​ទឹកដី តាមរយៈ​នយោបាយ​ឈ្នះ​-​ឈ្នះ របស់​សម្តេច​តេ​ជោ នា​ថ្ងៃទី​២៩ ធ្នូ ឆ្នាំ​១៩៩៨-​ថ្ងៃទី​២៩ ខែធ្នូ ឆ្នាំ​២០២០​។

​បន្ទាប់ពី​ឃើញ​សំណេរ​នៅក្នុង​ផេ​ក​និង​ប្រសាសន៍​របស់​សម្តេច​តេ​ជោ​រួច បណ្តាញសារព័ត៌មាន​គ្រប់​ប្រភេទ​នៅ​កម្ពុជា​បាន​ផ្សព្វផ្សាយ​យ៉ាង គគ្រឹកគគ្រេង​នូវ​ដំណឹង​ដ៏​គួរ​ឲ្យ​រីករាយ​និង​ជាទី​មោទនភាព​ក្រៃលែង​នេះ​។​ទន្ទឹម​នោះ​ក៏មាន​សារ​អបអរ​និង​ប្រសិទ្ធពរ​ពី​មន្ត្រីរាជការ កម្លាំងប្រដាប់អាវុធ​អាជ្ញាធរ​គ្រប់​ជាន់ថ្នាក់​ប្រជាពលរដ្ឋ​គ្រប់ទិសទី​ជូន​ចំពោះ​សម្តេច​តេ​ជោ​ហ៊ុនសែន​ជូន​ចំពោះ​រាជរដ្ឋាភិបាល​ដែល​សម្រេច បង្កើតបាន​សមិទ្ធផល​ជា​ប្រវត្តិសាស្ត្រ​។​

​សម្តេច​តេ​ជោ​ហ៊ុនសែន​បាន​បញ្ជាក់ថា​”​ខ្ញុំព្រះករុណាខ្ញុំ​ក្នុងនាម​រាជរដ្ឋាភិបាល​នៃ​ព្រះរាជាណាចក្រ​កម្ពុជា​ជម្រាបជូន​បងប្អូន​ជនរួមជាតិ​ទាំងអស់​អំពី​ការចាប់ផ្តើម​ផលិតកម្ម​ប្រេង​ដំបូង​របស់​កម្ពុជា​នៅ​តំបន់​ប្លុក​A​ឈូង​សមុទ្រ​កម្ពុជា​ដែល​ជាការ​ទន្ទឹង​រងចាំ​អស់​រយៈកាល​ដ៏​យូរ​កន្លងមកនេះ​។ ដោយ​កិច្ចខិតខំ​ប្រឹងប្រែង​រប​ស់រាជ​រដ្ឋាភិបាល និង​ការចូលរួម​យ៉ាងសកម្ម​ពី​ក្រុមហ៊ុន Kris Energy​ដែលជា​ប្រតិបត្តិ​ករ នៃ​គម្រោង​នេះ មកដល់ពេលនេះ​យើង​បានសម្រេច​បាន​នូវ​ការបញ្ចប់​ដោយ​ជោគជ័យ​ជា​ស្ថាពរ​នូវ​ការសាងសង់​ការបំពាក់​គ្រឿង សម្ភារ​និង​បរិក្ខា​នៃ​បណ្តា​ហេដ្ឋារចនាសម្ព័ន្ធ​ចាំបាច់​នានា​សម្រាប់​ដំណើរ​ការផលិត​កម្មធ​ន​ធាន​រ៉ែ​ប្រេង​របស់​យើង​។
​ដំណក់​ប្រេង​លើកដំបូង​របស់​កម្ពុជា​នឹង​ចាប់ផ្តើម​ផលិត​ចេញពី​អណ្តូងប្រេង​ទី​១ ឈ្មោះ A-0ID នៃ ផ្លាត​ហ្វ​ម A នៅក្នុង​ប្លុក​នៃ​ឈូង​សមុទ្រ​កម្ពុជា នៅ​ថ្ងៃទី​២៩​ធ្នូ ឆ្នាំ​២០២០ ដែល​គាប់​ជួន​ជាមួយ​ថ្ងៃ​ខួប​លើក​ទី​២២ នៃ​ការបញ្ចប់​សង្គ្រាម​នាំមក​នូវ​ការឯកភាព​ជាតិ ឯកភាព​ទឹកដី តាមរយៈ​នយោបាយ​ឈ្នះ​-​ឈ្នះ (២៩​ធ្នូ ១៩៩៨-២៩ ធ្នូ ២០២០)​។ ថ្ងៃទី ២៩ ធ្នូ ១៩៩៨ បង្កលក្ខណៈ​សម្បត្តិ​គ្រប់យ៉ាង​ឱ្យ​យើង​មាន​ដំណក់​ប្រេង​លើកដំបូង​នៅ​កម្ពុ​ជានា​ថ្ងៃទី ២៩ ធ្នូ ២០២០ នេះ​”​។​

​សម្តេច​តេ​ជោ​បាន​រលឹក​ថា កិច្ចព្រមព្រៀង​ប្រេងកាត​ដំបូង​ត្រូវបាន​ចុះ​នៅ​ឆ្នាំ ២០០២ ជាមួយ​សម្ព័ន្ធ​ក្រុមហ៊ុន មាន​ក្រុមហ៊ុន Chevron Oversea Petroleum (Cambodia) Ltd., LG Caltex Oil Corporation, Moeco Cambodia Co., Ltd. និង KrisEnergy) ។ សម្ព័ន្ធ​ក្រុមហ៊ុន​នេះ​ដឹកនាំ​ដោយ​ក្រុមហ៊ុន Chevron របស់​អាមេរិក​។ នៅ​ឆ្នាំ ២០១០ ក្រុមហ៊ុន​Chevron​បានប្រកាស​រកឃើញ ជម្រក​រ៉ែ​ប្រេង​មាន​លក្ខណៈ​ពាណិជ្ជកម្ម ជា​លើកដំបូង​របស់​កម្ពុជា និង​បាន​កសាង​គម្រោង​ផែនការ​អភិវឌ្ឍ​និង​អាជីវកម្ម​ដើម្បី​ស្នើសុំ រាជរដ្ឋាភិបាល​ពិនិត្យ​និង​សម្រេច​។ តាម​ផែនការ​នោះ ផលិតកម្ម​ប្រេង​ដំបូង​គ្រោង​នឹង​ចាប់ផ្តើម​នៅ​អំឡុង​ខែធ្នូ​ឆ្នាំ​២០១២​។​ប៉ុន្តែ​ដោយ ការពិនិត្យ​លក្ខណៈ​បែងចែក​ផល​សេដ្ឋកិច្ច​និង​ស​ង្គ​ត​ភាព​ច្បាប់​ពាក់ព័ន្ធ​និង​ផែនការ​អភិវឌ្ឍ​និង​អាជីវកម្ម​ស្នើឡើង​ដោយ​ក្រុមហ៊ុន Chevron នៅពេលនោះ បាន​តម្រូវ​ឲ្យ​ភាគី​ទាំងពីរ​ត្រូវ​ចរចារ​កែសម្រួល​លក្ខខណ្ឌ​កិច្ចព្រមព្រៀង​មួយចំនួន​ឡើងវិញ​ដើម្បី​ឲ្យ​មាន ស​ង្គ​ត​ភាព​ជាមួយ​បទ​ប្បញ្ញត្តិ​ច្បាប់​កម្ពុជា​ផង​និង​មាន​សមធម៌​កាន់តែ​ប្រសើរ​នៅក្នុង​ការបែងចែក​ផល​សេដ្ឋកិច្ច​ពី​ផែនការអាជីវកម្ម​នេះ​ផង ដំណើរការ​អនុវត្តតាម​ផែនការ​ផលិត​ប្រេង​នៅ​ខែធ្នូ​២០១២​ក៏​ត្រូវបាន​រាំងស្ទះ​មិនអាច​អនុវត្តបាន​។
​ការចរចារ​កិច្ចព្រមព្រៀង​ប្រេងកាត​ក៏ត្រូវ​បាន​ប្រព្រឹត្តិ​ទៅ​យ៉ាង​ស្វិតស្វាញ​រវាង​ភាគី​ទាំងពីរ (​រាជរដ្ឋាភិបាល​និង​ក្រុមហ៊ុន​) ទាំង​លើ​ទិដ្ឋភាព​ច្បាប់ បច្ចេកទេស និង​សេដ្ឋកិច្ច ។ នៅក្នុង​រយៈពេល​ចរចារ​ដ៏​តឹងតែង​នេះ ក្រុមហ៊ុន Chevron Oversea Petroleum (Cambodia) Ltd., LGCaltex Oil Corporation និង​ក្រុមហ៊ុន Mocco Cambodia Co., Ltd. បាន​ស្នើសុំ​ដកខ្លួន​ចេញ​បន្តបន្ទាប់​គ្នា នៅ​ឆ្នាំ ២០១៤ និង​២០១៦​។ ការចរចារ​ត្រូវបាន​បន្ត​អូស​បន្លាយពេល​យ៉ាងយូរ​តាំងពី​ឆ្នាំ ២០១០ រហូតដល់​ថ្ងៃទី​២៣ ខែសីហា​ឆ្នាំ ២០១៧​ទើប​សម្រេចបាន​នូវ​កិច្ចព្រមព្រៀង​ថ្មី​និង​គម្រោង​ផែនការអភិវឌ្ឍន៍​និង​អាជីវកម្ម​អណ្តូងប្រេង​ថ្មី​ដែល​បើកផ្លូវ​ឲ្យ​ដំណើរការ​សាងសង់​និង​អភិវឌ្ឍន៍​ផ្លាត​ហ្វ​ម​អណ្តូងប្រេង​អាច​ចាប់ផ្តើមបាន​។​

​សម្តេច​តេ​ជោ​នាយករដ្ឋមន្ត្រី​កម្ពុជា​ប​បានបង្ហាញ​ទៀតថា​ហេដ្ឋារចនាសម្ព័ន្ធ​ផលិតកម្ម​ប្រេង​ធំៗ​និង​សំខាន់ៗ ដែល​បាន​សាងសង់ ដំឡើង និង​រៀបចំ​រួចរាល់​ជា​ស្ថាពរ​នៅក្នុង​តំបន់​ប្លុក​A សម្រាប់​ដំណើរការ​ផលិតកម្ម​ជារួម​មាន​៖
• ផ្លាត​ហ្វ​ម​អណ្តូងប្រេង ផលិត​នៅ កោះ​បា​តាង​នៃ​ប្រទេស​ឥណ្ឌូនេស៊ី ចាប់ផ្តើម​សាងសង់​នៅ​អំឡុង​ខែធ្នូ​ឆ្នាំ ២០១៩​និង​បានបញ្ចប់ នៅ​ខែសីហា ២០២០​។ ផ្លាត​ហ្វ​ម​នេះ បាន​ដឹក​ចូល​មកដល់​តំបន់​ប្លុក A និង​បានបញ្ចប់​ការដំឡើង​រួចរាល់​ជា​ស្ថាពរ​នៅ​ថ្ងៃទី​៧ កញ្ញា ២០២០​។​
• កប៉ាល់​ផលិតកម្ម​ប្រេង​បាន​តម្លើង ជួសជុល និង​បំពាក់​សម្ភារៈ បរិក្ខា​រួចរាល់​នៅ​ខែ កញ្ញា ២០២០ នៅ​ប្រទេស​សិង្ហ​បុរី​និង​បាន​ដឹក​មក ដល់​និង​ដំឡើង​រួចរាល់​នៅ​ប្លុក A នៅ​ថ្ងៃទី ១៨ ខែតុលា ឆ្នាំ ២០២០​។ កប៉ាល់​ស្តុក​ប្រេង បានរៀបចំ​និង​ត្រៀមចាំ​រួចរាល់​នៅ​ប្លុក A នៅ​ថ្ងៃទី ៩ ខែវិច្ឆិកា​២០២០ ។​

​អណ្តូងប្រេង​ទីមួយ​បានបញ្ចប់​ការសាងសង់​នៅ​ថ្ងៃទី ២៣ ធ្នូ ២០២០ និង​ចាប់ផ្តើម​ផលិត​ចេញ​ប្រេង​ដំបូង​នៅ​ថ្ងៃទី​២៩​ខែ ធ្នូ​២០២០​នេះ ។ ក្រៅពីនេះ​មាន​អណ្តូងប្រេង​ចំនួន​ពីរ​ទៀត​ក៏បាន​ខួង​ជម្រៅ​ដល់​ស្រទាប់​ជម្រក​រ៉ែ​ប្រេង​រួចហើយ​ដែរ​។​ការចាប់ផ្តើម​ផលិតកម្ម​ប្រេង​នេះ គឺជា​ពរជ័យ​សម្រាប់​ក​ម្ពុ​ជា ។ តំបន់​ប្រេង​នៅក្នុង​សមុទ្រ​របស់​កម្ពុជា​មិនមាន​ការត្រួត​ស៊ីគ្នា​ជាមួយ​ថៃ​ទេ​។​

​សម្តេច​តេ​ជោ​បាន​សង្កត់ធ្ងន់ថា​នេះ​ជាការ​ចាប់ផ្ដើម​មួយ​ជំហាន​ដំបូង​ដ៏​សំខាន់​សម្រាប់​កម្ពុជា​ឆ្ពោះទៅ​បង្កើតបាន​នូវ​សមត្ថភាព​ជាតិ​និង​ខឿន​ឧស្សាហកម្ម​ប្រេងកាត ឧស្ម័ន និង​ថាមពល​នៅ​កម្ពុជា​។ ផលប្រយោជន៍​សំខាន់ៗ រួមមាន​៖​ចំណូល​ថវិកាជាតិ​ផល​សេដ្ឋកិច្ច​ទទួល បាន​ពី​ការបង្កើតបាន​នូវ​ពិពិធ​កម្ម​ខឿន​ឧស្សាហកម្ម​ក្នុង​វិស័យ​ប្រេងកាត និង​ការកសាង​សមត្ថភាព​ជាតិ​នៅក្នុង​វិស័យនេះ​។​ការរកឃើញ និង​អាជីវកម្ម​ធនធាន​រ៉ែ​ប្រេង​នៅ​កម្ពុជា​ក្រោម​ការដឹកនាំ​របស់​រាជ​រដ្ឋាភិបាល គឺជា​ពរជ័យ​សម្រាប់​ប្រជាជន និង​ប្រទេសជាតិ​មិនមែនជា បណ្តាសារ​ដូច​ការលើកឡើង​របស់​ជន​អគតិ​មួយចំនួន​នោះទេ​។​
​កូ​វីដ​-១៩ បាន​រំខាន​ដល់​យើង តែ​ក៏​មិនអាច​បំផ្លាញចោល​នូវ​ការខិតខំ​របស់​យើង​ដើម្បី​ផលិត​ប្រេង​នោះបាន​ដែរ​។​ចូលឆ្នាំ​សកល​ថ្មី ២០២១​ខាងមុខ ទោះ​យើង​មិនបាន​សប្បាយរីករាយ​ដូច​ឆ្នាំមុនៗ​ដោយសារតែ​កូ​វីដ​-១៩ តែ​យើង​ទទួលបាន​កាដូ​ដ៍​ធំ​សម្រាប់​ជាតិ​យើង នោះ​គឺ​ប្រេង​ដែល​ផលិត​ចេញ​លើកដំបូង​ក្នុង​ទឹកដី​យើង​។ ឆ្នាំ​ថ្មី​សមិទ្ធផល​ថ្មី​សម្រាប់​សេដ្ឋកិច្ចកម្ពុជា​ចាប់ពី​ដើមឆ្នាំ​២០២១ តទៅ​។​

​ជាមួយនឹង​ការប្រកាស​ដំណឹង​ជាទី​រីករាយ​នេះ សម្ដេច​តេ​ជោ ហ៊ុន សែន បាន​បញ្ជាក់ថា​ចំណូល ដែល​បានមកពី​ប្រេង​នឹង​ប្រើប្រាស់ ក្នុង​វិស័យ​អាទិភាព​២ គឺ​អប់រំ និង​សុខាភិបាល​។​

​ពិតណាស់​!​សមិទ្ធិ​ប្រេង​គឺ​មិនមែន​កើតឡើង​ដោយ​ការ​អភិ​និ​ហា​ដូច​ក្នុង​រឿងព្រេង​និទាន​ទេ​។​តែ​នេះ​គឺ​ដោយសារ​សន្តិភាព ស្ថិរភាព​និង​ភាព​ប៉ិនប្រសប់​របស់​ប្រមុខ​ដឹកនាំ​នៃ​ក​ម្ព​ជា​។​នោះ​គឺ​បុរស​ខ្លាំង សម្តេច​តេ​ជោ​សែន​និង​គណបក្ស​ប្រជាជន​កម្ពុជា​។​
សម្ដេច​តេ​ជោ​យក​ជីវិត​ទៅ​ប្តូរ​កាលពី​២​ទសវត្ស​មុន​ដើម្បី​យក​សន្តិភាព​មក​ជូន​ប្រជាពលរដ្ឋ​ខ្មែរ​។​សង្គ្រាម​កម្ពុជា​ដែល​កើតឡើង​តាំងពី​ឆ្នាំ​១៩៧០​ត្រូវបាន​បញ្ចប់​ជា​ស្ថាពរ​ក្រោម​នយោបាយ​ឈ្នះ​ឈ្នះ​ឆ្នាំ​១៩៩៨​។​ការបញ្ចប់​សង្គ្រាម​ជា​ស្ថាពរ​នៅ​កម្ពុជា​ត្រូវបាន​រាប់​ចាត់តាំង​ពីថ្ងៃ​ដែល​មេដឹកនាំ​កំពូល​របស់​ខ្មែរក្រហម មក​ច​ចារ​ជាមួយ​សម្ដេច​ដល់ផ្ទះ​នា​ថ្ងៃ​២៩​ខែធ្នូ​ឆ្នាំ​១៩៩៨​។

ធនធាន​ប្រេង​ដែល​កម្ពុជា​ទទួលបាន​នេះ​មានតម្លៃ​ក្នុងការ​ពង្រឹងសមត្ថភាព​ជាតិ​យើង ឲ្យ​កាន់តែ​រឹងមាំ រុងរឿង​ថែមទៀត ក្រោម​ការដឹកនាំ​របស់​សម្តេច​តេ​ជោ ហ៊ុន សែន​។​

​​តំណក់​ប្រេង​ដំបូង​ក្នុង​ប្រវត្តិសាស្ត្រ​នេះ ធ្វើ​ឲ្យ​ប្រជាជន​កម្ពុជា​យើង មាន​ក្តី​សង្ឃឹមថា នឹង​ក្លាយជា​ធនធាន​ដ៏​មានតម្លៃ​ដើម្បី​បម្រើ​ដល់ ការអភិវឌ្ឍ ការកសាង​ជាតិ និង​លើកតម្កើង​ជីវភាព​រស់នៅ​របស់​ប្រជាពលរដ្ឋ​។​

​នេះជា​ប្រវត្តិសាស្ត្រ និង​ជា​និមិត្តរូប​នៃ​ជោគជ័យ​របស់​ប្រជាជាតិ​កម្ពុជា​ទាំងមូល ដែល​គាប់​ជួន​ជាមួយ​ថ្ងៃ​ខួប​លើក​ទី​២២ នៃ​ការបញ្ចប់​សង្គ្រាម ដោយ​នាំមក​នូវ​ការឯកភាព​ជាតិ ឯកភាព​ទឹកដី តាមរយៈ​នយោបាយ «​ឈ្នះ​ឈ្នះ​» ( ២៩ ធ្នូ ១៩៩៨-២៩ ធ្នូ ២០២០ ) របស់​សម្តេច​តេ​ជោ​នាយករដ្ឋមន្ត្រី​។​

​សមិទ្ធផល​ថ្មី​នៃ​នយោបាយ​ឈ្នះ​ឈ្នះ​នេះ​បានបង្ហាញ​យ៉ាងច្បាស់​ថា​ក្រោម​ការដឹកនាំ​ដ៏​ប៉ិនប្រសប់​និង​ឈ្លាសវៃ​របស់​សម្តេច​តេ​ជោ​នាយករដ្ឋមន្ត្រី​ដែល​មិន​ត្រឹមតែ​ធ្វើ​ឲ្យ​កម្ពុជា​ទទួលបាន​នូវ​សុខសន្តិភាព​យ៉ាង​ពេញលេញ​ប៉ុណ្ណោះ​ទេ​ប៉ុន្តែ​បាន​កសាង​និង​ផ្តល់នូវ​ទំនុកចិត្ត​សម្រាប់​វិនិយោគិន​ជាតិ និង​អន្តរជាតិ​ឲ្យ​ចូលរួម​បណ្តាក់ទុន​យ៉ាងច្រើន​សន្ធឹកសន្ធាប់ ដើម្បី​អភិវឌ្ឍន៍​សេដ្ឋកិច្ចជាតិ​ឲ្យ​សម្បូរ​រុងរឿង​។

​តំណក់​ប្រេង​លើកដំបូង ជា​សមិទ្ធផល​ប្រវត្តិសាស្ត្រ​ថ្មី​នេះ ក៏​ជាការ​ចាប់ផ្តើម​បើក​ទំព័រ​ប្រវត្តិសាស្ត្រ​ថ្មី សម្រាប់​ប្រទេស​កម្ពុជា​ក្នុងការ​អភិវឌ្ឍ លើ​វិស័យ​ឧស្សាហកម្ម​ប្រេងកាត ជា​សក្តានុពល​មួយ ដែល​នាំ​ឲ្យ​ប្រទេស​កម្ពុជា កាន់តែ​រីកចម្រើន សុខដុមរមនា​ទោះបី​នៅក្នុង​ដំណាក់កាលវិបត្តិ​ជំងឺឆ្លង​កូ​វីដ​១៩ ក៏ដោយ​៕សរន

 

ទីតាំងផ្សាយពាណិជ្ជកម្ម

- Advertisment -

Most Popular