Home ព័ត៌មានជាតិ នយោបាយ ក្រសួងមហាផ្ទៃ...

ក្រសួងមហាផ្ទៃ អញ្ជើញ​មេដឹកនាំ​សម្ព័ន្ធភាព អ្នកប្រជាធិបតេយ្យ​ខ្មែរ ចូលរួម​ប្រជុំ នៅ​ថ្ងៃទី​៤ មករា ខាងមុខ​

ដោយៈ មុនី​រ័ត្ន / ភ្នំពេញៈ ក្រសួងមហាផ្ទៃ បាន​កោះអញ្ជើញ មេដឹកនាំ​សម្ព័ន្ធភាព អ្នកប្រជាធិបតេយ្យ​ខ្មែរ ដើម្បី​ចូលរួម​កិច្ចប្រជុំ​ពិភាក្សា ពាក់ព័ន្ធ​នឹង​ការបង្កើត “​សម្ព័ន្ធភាព​អ្នកប្រជាធិបតេយ្យ​ខ្មែរ​” នៅ​រសៀល​ថ្ងៃទី​៤ ខែមករា ឆ្នាំ​២០២១ ខាងមុខនេះ នៅ​ទីស្តីការ​ក្រសួងមហាផ្ទៃ​។ កិច្ចប្រជុំ​នេះ នឹង​ដឹកនាំ​ដោយ​លោក ប៊ុន ហុន រដ្ឋលេខាធិការ ក្រសួងមហាផ្ទៃ​។​

​នាយ​ឧ​ត្ត​ម​សេនីយ៍ ប៉ោ ភក្តិ អគ្គលេខាធិការ ក្រសួងមហាផ្ទៃ កាលពី​ថ្ងៃទី​២៩ ខែធ្នូ ឆ្នាំ​២០២០ បានចេញ​លិខិតអញ្ជើញ លោក ម៉ម សូណង់ដូ ប្រធាន​គណបក្ស​សំបុក​ឃ្មុំ សង្គម​ប្រជាធិបតេយ្យ និង​ជា​ប្រធាន​សម្ព័ន្ធភាព អ្នកប្រជាធិបតេយ្យ​ខ្មែរ លោក ញឹក ប៊ុនឆៃ ប្រធាន​គ​គណបក្ស​ខ្មែរ​រួបរួម​ជាតិ និង​ជា​អនុប្រធាន​សម្ព័ន្ធភាព អ្នកប្រជាធិបតេយ្យ​ខ្មែរ និង​លោក គុជ លី ប្រធានស្តីទី គណបក្ស​ខ្មែរ​តែមួយ និង​ជា​អគ្គលេខាធិការ សម្ព័ន្ធភាព​អ្នកប្រជាធិបតេយ្យ​ខ្មែរ ចូលរួម​កិច្ចប្រជុំ​ពិភាក្សា ពាក់ព័ន្ធ​នឹង​ការជូនដំណឹង មក​ក្រសួងមហាផ្ទៃ អំពី​ការបង្កើត “​សម្ព័ន្ធភាព​អ្នកប្រជាធិបតេយ្យ​ខ្មែរ​” តាមរយៈ​លិខិត​ចុះ ថ្ងៃទី​១៨ ខែវិច្ឆិកា ឆ្នាំ​២០២០ នៅវេលា​ម៉ោង ៣ រសៀល​ថ្ងៃទី​៤ ខែមករា ឆ្នាំ​២០២១ នៅ​សាលប្រជុំ​អគារ “S” ទីស្តីការ​ក្រសួងមហាផ្ទៃ ដោយ​កិច្ចប្រជុំ​ដឹកនាំ ដោយ​លោក ប៊ុន ហុន រដ្ឋលេខាធិការ ក្រសួងមហាផ្ទៃ​។​

​ការអញ្ជើញ​មេដឹកនាំ សម្ព័ន្ធភាព​អ្នកប្រជាធិបតេយ្យ​ខ្មែរ មក​ប្រជុំ​នេះ បានធ្វើ​ឡើង បន្ទាប់ពី​លោក ម៉ម សូណង់ដូ ប្រធាន​សម្ព័ន្ធភាព អ្នកប្រជាធិបតេយ្យ​ខ្មែរ កាលពី​ថ្ងៃទី​១៨ ខែវិច្ឆិកា ឆ្នាំ​២០២០ បានដាក់​លិខិត​ជូន សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ជូនដំណឹង​ស្តីពី “​សម្ព័ន្ធភាព​អ្នកប្រជាធិបតេយ្យ​ខ្មែរ​”​។​

​បន្ទាប់ពី​ជូនដំណឹង ទៅ​រដ្ឋមន្ត្រី​ក្រសួងមហាផ្ទៃ សម្ព័ន្ធភាព​អ្នកប្រជាធិបតេយ្យ​ខ្មែរ ត្រូវ​ប្រកាស​ជា​ផ្លូវការ កាលពី​ថ្ងៃទី​២៥ ខែវិច្ឆិកា ឆ្នាំ​២០២០​។ គណបក្សនយោបាយ ចំនួន​បី ដែល​បាន​ផ្តួចផ្តើម​បង្កើត សម្ព័ន្ធភាព​អ្នកប្រជាធិបតេយ្យ​ខ្មែរ គឺមាន​គណបក្ស​សំបុក​ឃ្មុំ សង្គម​ប្រជាធិបតេយ្យ របស់លោក ម៉ម សូណង់ដូ គណបក្ស​ខ្មែរ​រួបរួម​ជាតិ របស់លោក ញឹក ប៊ុនឆៃ និង​គណបក្ស​ខ្មែរ​តែមួយ របស់លោក កែម រិ​ទ្ធិ​សិត​។ ចំពោះ​សមាសភាព ក្បាលម៉ាស៊ីន​ដឹកនាំ សម្ព័ន្ធភាព​អ្នកប្រជាធិបតេយ្យ​ខ្មែរ គឺ​លោក ម៉ម សូណង់ដូ ជា​ប្រធាន​សម្ព័ន្ធភាព អ្នកប្រជាធិបតេយ្យ​ខ្មែរ លោក ញឹក ប៊ុនឆៃ ជា​អនុប្រធាន លោក គុជ លី (​អនុប្រធាន​គណបក្ស​ខ្មែរ​តែមួយ​) អគ្គលេខាធិការ​។​

​យោងតាម​ឯកសារ ស្តីពី​គោលការណ៍​ណែនាំ ការអនុវត្ត​ខ្លឹមសារ នៃ​ពិធីសារ​រវាង មេដឹកនាំ​ទាំងបី​បក្ស បានបញ្ជាក់​ថាៈ គោលបំណង នៃ​ការបង្កើត​សម្ព័ន្ធភាព អ្នកប្រជាធិបតេយ្យ​ខ្មែរ គឺ​ដើម្បី​បណ្តុះ​គំនិត ជាតិនិយម​គំរូ​ថ្មី​មួយ ដើម្បី​យុវជន​ខ្មែរ​បន្តវេន ដោយ​គ្មាន​វប្បធម៌​លាប​ពណ៌ និង​គ្មាន​វប្បធម៌​ក្តិចត្រួយ​។ ហើយ​គណបក្ស​ទាំងបី គឺមាន​គោលដៅ​ដូចគ្នា និង​រឹតចំណង​សាមគ្គីភាព ដើម្បី​ការធ្វើ​កិច្ចសហប្រតិបត្តិការ សម្រាប់​ការបោះឆ្នោត ក្រុមប្រឹក្សាឃុំ សង្កាត់ ឆ្នាំ​២០២២ និង​ការបោះឆ្នោត ជ្រើសតាំង​តំណាងរាស្ត្រ អាណត្តិ​ទី​៧ ឆ្នាំ​២០២៣​។ រួមគ្នា​ដោះស្រាយ​វិបត្តិ​នានា ក្នុងសង្គម​នយោបាយ តាមរយៈ​ខ្មែរ និង​ខ្មែរ​។

​សម្ព័ន្ធភាព​អ្នកប្រជាធិបតេយ្យ​ខ្មែរ មាន​យន្តការ​ការងារ ចំនួន​បី ជា​អាទិភាព រួមមានៈ ១. គ្រប់​គណបក្ស​សាមី ត្រូវ​ចុះ​មូលដ្ឋាន​រួមគ្នា ដើម្បី​ពង្រឹង និង​ពង្រីក​សកម្មជន​គាំទ្រ គណបក្ស​សាមី​គ្រប់​ខេត្ត​ទូទាំងប្រទេស​។ ២. ត្រូវបង្កើត​ការងារ​បណ្តាញ​សង្គម ដើម្បី​ផ្សព្វផ្សាយ ពី​វត្ថុបំណង​របស់​សម្ព័ន្ធ​ភាព អ្នកប្រជាធិបតេយ្យ​ខ្មែរ​។ ៣. ត្រូវបង្កើត​ក្រុម​វាគ្មិន និង​អ្នកនាំពាក្យ ដើម្បី​តស៊ូ​មតិ​គ្រប់​រូបភាព ការពារ​ផលប្រយោជន៍​រួម​។​

​សម្ព័ន្ធភាព​អ្នកប្រជាធិបតេយ្យ​ខ្មែរ ត្រូវ​រក្សា​អត្តសញ្ញាណ គណបក្ស​សាមីខ្លួន​ដដែល​។ គ្រប់​គណបក្ស​សាមី ជា​សមាជិក ត្រូវ​ផ្តល់​កិត្តិយស ឲ្យ​គ្នា​ទៅវិញទៅមក ដោយ​មិន​ប្រកាន់ គណបក្ស​តូច ឬ​គណបក្ស​ធំ ជាដាច់ខាត​។ បង្កើត​ភាតរភាព​រវាង​ខ្មែរ និង​ខ្មែរ ដើម្បី​បង្ហាញ​ពី​ឆន្ទៈ អ្នកនយោបាយ​ខ្មែរ​គ្រប់​ជាន់ថ្នាក់ រួបរួមគ្នា​ការពារ ផលប្រយោជន៍ សង្គមជាតិ និង​ប្រជាពលរដ្ឋ​ខ្មែរ​។ មិនត្រូវ​បង្កើត​វប្បធម៌ លាប​ពណ៌​ដាក់​ខ្មែរ​គ្នាឯង​ជាដាច់ខាត​៕/V

រូបថតពី ឆ្វេង ទៅ ស្តាំៈ លោក គុជ លី លោកម៉ម សូណង់ដូ (កណ្តាល) និងលោកញឹក ប៊ុនឆៃ

លោក ញឹក ប៊ុនឆៃ

ទីតាំងផ្សាយពាណិជ្ជកម្ម

- Advertisment -

Most Popular