Home ព័ត៌មានសំខាន់ៗ យប់​នេះ សីតុណ...

យប់​នេះ សីតុណ្ហភាព នៅ​កន្លែង​ខ្លះ ចុះ​ដល់ ១៣ អង្សា​សេ​

ដោយៈ ប​.​ខុន/ភ្នំពេញៈ នៅ​យប់​ថ្ងៃ​ឆ្លង​ឆ្នាំ​សកល ២០២០-២០២១ នេះ ធាតុអាកាស​ត្រជាក់ អាច​ចុះ​ដល់​ក្នុង​រង្វង់ ១៣ អង្សា​សេ នៅ​តំបន់​ខ្ពង់រាប ភាគ​ឦសាន តំបន់​ជួរ​ភ្នំ​ដងរែក និង​តំបន់​វាលវែង នៃ​ខេត្តពោធិសាត់ ។ ការចុះ​ត្រជាក់​បែបនេះ មាន​រហូតដល់​ថ្ងៃទី​៣ ខែមករា ឆ្នាំ​២០២១ ទើប​សីតុណ្ហភាព ងើបឡើង​មកវិញ​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធនធានទឹក និង ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​៣១ ខែធ្នូ ឆ្នាំ​២០២០ ថាៈ នៅ​យប់​នេះ (៣១​ធ្នូ​) ធាតុអាកាស​ត្រជាក់ អាច​ចុះ​ដល់​រង្វង់​កម្រិត ១៣ អង្សា​សេ (​ប្រាសាទ​តា​ក្របី​) នៅ​ខេត្ត ឧ​ត្ត​រ​មានជ័យ ព្រះវិហារ (​ប្រាសាទព្រះវិហារ​) , នៅ​ខេត្ត​ប៉ៃលិន បាត់ដំបង អាច​ចុះ​ដល់ ១៧ អង្សា​សេ​, នៅ​តំបន់​វាលវែង ខេត្តពោធិសាត់ និង​ខ្ពង់រាប​ភាគ​ឦសាន សីតុណ្ហភាព អប្បបរមា មាន​ពី ១៦ ទៅ ១៧ អង្សា​សេ​។​

​អ្នកនាំពាក្យ ក្រសួង​ជំនាញ​ខាងលើ បាន​និយាយ​ឱ្យដឹងទៀតថាៈ ខ្យល់មូសុង​ឦសាន ដែល​បាន​នឹង​កំពុង​អូស​កាត់ ពីលើ​ប្រទេស​កម្ពុជា ដោយមាន​ល្បឿន ពី ៧ ទៅ ១០ ម៉ែត្រ ក្នុង​មួយ​វិនាទី នៅពេលនេះ មាន​ពីរ​ឆ្នូត ដោយ​មួយ​ឆ្នូត កាត់​លើ​ក្រុង​សែន​មនោ​រម្យ ខេត្តមណ្ឌលគិរី ត្បូងឃ្មុំ ព្រៃវែង ស្វាយរៀង និង​មួយ​ឆ្នូត​ទៀត អូស​កាត់​លើ​តំបន់ ភាគ​ពាយព្យ នៃ​ប្រទេស​កម្ពុជា​។ អាកាសធាតុ​នេះ មាន​រហូតដល់​ថ្ងៃទី​៣ ខែមករា ទើប​សីតុណ្ហភាព ចាប់​ងើប​ឡើងវិញ​។​

​លោក ចាន់ យុ​ត្ថា បាន​និយាយថាៈ សីតុណ្ហភាព អ​ប្បរមា នា​ព្រឹក​ថ្ងៃទី​៣១ ខែធ្នូ​នៅ​ខេត្ត មណ្ឌលគិរី មាន ១៧ អង្សា​សេ​, រតនគីរី ១៩ អង្សា​សេ​, សៀមរាប ១៨ អង្សា​សេ​, ឧ​ត្ត​រ​មានជ័យ ១៥ អង្សា​សេ និង​ខេត្ត​ប៉ៃលិន ១៨ អង្សា​សេ​។ នៅ​យប់​នេះ​សីតុណ្ហភាព អ​ប្បរមា ចុះ​ទាប​ជាង​យប់មិញ​ទៀត​។​

​ក្រសួង​ធនធានទឹក និង​ឧតុនិយម កាលពី​ថ្ងៃទី​២៩ ខែធ្នូ កន្លងទៅនេះ បាន​ជូនដំណឹង ស្តីពី​ស្ថានភាព​អាកាសធាតុ សម្រាប់​ពីថ្ងៃ​ទី​៣០ ខែធ្នូ ដល់​ថ្ងៃទី​៥ ខែមករា ឆ្នាំ​២០២១ ដែល​បង្ហាញឱ្យឃើញ ពី​ធាតុអាកាស​ត្រជាក់​ខ្លាំង កើតមាន​ជាថ្មី និង​រលក​សមុទ្រ មាន​កម្ពស់​ខ្ពស់ៗ​។​

​នៅក្នុង​សេចក្តីជូនដំណឹង ខាងលើ បានសរសេរថាៈ ព្រះរាជាណាចក្រ​កម្ពុជា ទទួលរង ឥទ្ធិពល ពី​សម្ពាធ​ខ្ពស់​ប្រទេស​ចិន ដែល​រំកិល​ចុះមក​ក្រោម (​ត្បូង​) និង​ខ្យល់មូសុង​ឦសាន ខ្លាំង ។​

​សេចក្តីជូនដំណឹង បាន​សរសេរ​ទៀតថាៈ ស្ថានភាព​បែប​ខាងលើនេះ ធ្វើ​ឲ្យ​ធាតុអាកាស ចុះ​ត្រជាក់​សាជាថ្មី ចាប់ពី​ថ្ងៃទី​៣១ ខែធ្នូ ដល់​ថ្ងៃទី​៣ ខែមករា ដោយនៅ​បណ្តា​ខេត្ត តំបន់​វាល​ដូចជា ខេត្ត​ប៉ៃលិន ខេត្តបន្ទាយមានជ័យ ខេត្តសៀមរាប និង​ខេត្តបាត់ដំបង សីតុណ្ហភាព អប្បបរមា មាន​ពី ១៦-១៨ អង្សា​សេ និង អតិបរមា មាន​ពី ២៥-២៧ អង្សា​សេ​។​

​សម្រាប់​បណ្តា​ខេត្ត​ដទៃ សីតុណ្ហភាព អប្បបរមា មាន​ពី ១៩-២១ អង្សា​សេ និង​អតិបរមា មាន​ពី ២៦-២៨ អង្សា​សេ ។ ខេត្ត​ជាប់​ជួរ​ភ្នំ​ដងរែក និង​តំបន់​ខ្ពង់រាប ឦសាន សីតុណ្ហភាព អប្បបរមា មាន​ពី ១៤-១៦ អង្សា​សេ សីតុណ្ហភាព អតិបរមា មាន​ពី ២៦-២៨ អង្សា​សេ​។ បណ្តា​ខេត្ត​តំបន់​មាត់សមុទ្រ សីតុណ្ហភាព អប្បបរមា មាន​ពី ២២-២៤ អង្សា​សេ សីតុណ្ហភាព អតិបរមា មាន​ពី ២៧-២៩ អង្សា​សេ​។​

​នៅក្នុង​សេចក្តីជូនដំណឹង បាន​សង្កត់ធ្ងន់ថាៈ អាស្រ័យ​ដូច​បាន​ជម្រាប ជូន​ខាងលើ សូម​សាធារណជន ជ្រាប​ជា​ព័ត៌មាន ពិសេស​វីរៈ​កងទ័ព​ឈរជើង​នៅ​តំបន់ ជួរ​ភ្នំ​ដងរែក និង​ខ្ពង់រាប​ភាគ​ឦសាន ។ ដោយឡែក សម្រាប់​ប្រជា​នេសាទ និង​អ្នកដំណើរ​សមុទ្រ សូម​ប្រុងប្រយ័ត្ន ចំពោះ​អាកាសធាតុ ចុះ​ត្រជាក់​ខ្លាំង ជាមួយ​ល្បឿន ខ្យល់មូសុង​ឦសាន ខ្លាំង និង​រលក​សមុទ្រ​ខ្ពស់ ៕/V-PC

​ផែនទី​ធាតុអាកាស​សម្រាប់​ថ្ងៃទី​៣១​ខែធ្នូ​

​ផែនទី​ធាតុអាកាស​សម្រាប់​ថ្ងៃទី​៣១​ខែធ្នូ​

ទីតាំងផ្សាយពាណិជ្ជកម្ម

- Advertisment -

Most Popular