Home ព័ត៌មានជាតិ សន្តិសុខ ​គ្រោះថ្នាក់​...

​គ្រោះថ្នាក់​ចរាចរណ៍​ផ្លូវគោក នៅ​ខេត្តបន្ទាយមានជ័យ ឆ្នាំ​២០២០ ថយចុះ​ច្រើន ធៀប​នឹង​ឆ្នាំ​២០១៩

​ដោយៈ ប​.​ជ័យ / បន្ទាយ​មាន​ជ័​យៈ ទាក់ទិន​នឹង​ស្ថានភាព គ្រោះថ្នាក់​ចរាចរណ៍​ផ្លូវគោក ឆ្នាំ​២០២០ លោក​វរសេនីយ៍ នាយរង​ការិយាល័យ នគរបាល​ចរាចរណ៍​ផ្លូវគោក នៃ​ស្នងការដ្ឋាន​នគរបាល ខេត្ត បន្ទាយមានជ័យ បានឱ្យដឹង នា​ថ្ងៃទី​៣១ ធ្នូ នា​ដំណាច់ឆ្នាំ​ចាស់​នេះ​ថាៈ ក្នុង​ឆ្នាំ​២០២០ គ្រោះថ្នាក់​ចរាចរណ៍ ក្នុង​ខេត្ត​នេះ មាន​ចំនួន ៨១ ករណី លើ ១៩៦ ករណី បើ​ប្រៀបធៀប​នឹង​ឆ្នាំ​២០១៩ គឺ​ថយចុះ ១១៥ ករណី ស្មើនឹង ៥៩ % ។​

​ប្រភព​ដដែល បានឱ្យដឹង​បន្តថាៈ គ្រោះថ្នាក់​ប្រភេទ​ធ្ងន់ កើតឡើង ៧៧ ករណី លើ ១៨៨ ករណី ថយចុះ ១១១ ករណី ស្មើនឹង ៥៩% ។ គ្រោះថ្នាក់​ប្រភេទ ស្រាល កើតឡើង ៤ ករណី លើ ៨ ករណី ថយចុះ ៤ ករណី ។ គ្រោះថ្នាក់​បណ្តាលអោយ​ស្លាប់​មនុស្ស ៧០ នាក់ / ស្រី ១៤ នាក់ លើ ១៣៤ នាក់ / ស្រី ៣១ នាក់ ថយចុះ ៦៤ នាក់ ។ របួសធ្ងន់ ៦៤ នាក់​/​ស្រី ២០ នាក់ លើ​១៥៦​នាក់ /​ស្រី ៣៣ នាក់ ថយចុះ ៩២ នាក់ ។ របួសស្រាល ៤៤ នាក់​/​ស្រី ១៣​នាក់ លើ ១២៧​នាក់ / ស្រី ៣៩​នាក់ ថយចុះ ៨៣ នាក់ ។​

​ឯ​ផ្នែក​សម្ភារៈ ម៉ូតូ​ខូច​ធ្ងន់ ៤៦ គ្រឿង លើ ១១៨ គ្រឿង ថយចុះ ៧២ គ្រឿង ។ ម៉ូតូ​ខូច​ស្រាល ២១ គ្រឿង លើ​៩២​គ្រឿង ថយចុះ ៧១ គ្រឿង ។ រថយន្ត​ខូច​ធ្ងន់ ៣៥​គ្រឿង លើ ៤៧​គ្រឿង ថយចុះ​១២​គ្រឿង ។ រថយន្ត​តូច​ខូច​ស្រាល ១៦ គ្រឿង លើ​៤៦​គ្រឿង ថយចុះ ៣០ គ្រឿង ។ រថយន្ត​ធំ​ខូច​ធ្ងន់ ៩ គ្រឿង​លើ ១០ គ្រឿង ថយចុះ ១​គ្រឿង រថយន្ត​ធំ​ខូច​ស្រាល ១១ គ្រឿង លើ ២៣ គ្រឿង ថយចុះ ១២ គ្រឿង ជាដើម ។​

​ប្រភព បាន​អះអាងថាៈ នេះ​បើ​ប្រៀបធៀប​នឹង​ឆ្នាំ ២០១៩ កន្លងមក ។ ជាការ​កត់សម្គាល់ គឺ​ចំនួន​គ្រោះថ្នាក់​ចរាចរណ៍ ឆ្នាំ​២០២០ បាន​ថយចុះ​ជាង​ឆ្នាំ ណា​ទាំងអស់ បើ​ប្រៀបធៀប​នឹង ៥ ឆ្នាំ​ចុងក្រោយ ពោល​គឺជា​ពេលដែល​ខេត្ត រឹតបន្តឹង​ការអនុវត្ត​ច្បាប់​ចរាចរណ៍​ថ្មី ។​

​មូលហេតុ​នៃ​គ្រោះថ្នាក់ មកពី​កត្តា​មនុស្ស ច្រើន​ករណី​ជាងគេ ដូចជា បញ្ហា​ល្បឿន , មិន​គោរព​សិទ្ធិ​អាទិភាព , ប្រជែង​ក្នុងស្ថានភាព​គ្រោះថ្នាក់ , បត់ ឆ្វេង – ស្តាំ មិន​ប្រយ័ត្ន , ស្រវឹង , មិន​គោរព​ផ្លាកសញ្ញា​, មិន​ប្រកាន់​ស្តាំ ជាដើម ។ ឯ​ក្រៅពីនោះ មកពី​កត្តា​យានយន្ត កត្តា អាកាសធាតុ​ខ្លះ​ដែរ ៕/V​.mara

ទីតាំងផ្សាយពាណិជ្ជកម្ម

- Advertisment -

Most Popular