សារ​ពិសេស​បន្ទាន់ របស់​ប្រមុខ​រាជរដ្ឋាភិបាល ដើម្បី​ទប់ស្កាត់ ការឆ្លង​រីក​រាលដាល ឆ្លង​ជំងឺ​កូ​វីដ​-១៩ បន្ទាប់ពី​មាន​ពលករ មកពី​ថៃ ឆ្លង​កូ​វីដ​

​ដោយៈ តារា​រិ​ទ្ធ / ភ្នំពេញៈ សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បានដាក់​ចេញ បទបញ្ជា​ថ្មី​មួយទៀត ដើម្បី​ទប់ស្កាត់ ការឆ្លង​រីក​រាលដាល ឆ្លង​ជំងឺ​កូ​វីដ​-១៩ បន្ទាប់ពី​ពលករ ប្រមាណ​ជិត ១០ នាក់ បាន​ឆ្លង​ជំងឺ​នេះ ចេញពី​ប្រទេស​ថៃ​។​

​ក្នុង​សារ​ជា​សំឡេង​បន្ទាន់ ជូន​ជនរួមជាតិ នា​ព្រលប់​ថ្ងៃទី​៣១ ខែធ្នូ ឆ្នាំ​២០២០ សម្ដេច​តេ​ជោ បាន​ថ្លែងថាៈ ក្នុង​រយៈពេល ពីរ​ថ្ងៃនេះ (​ថ្ងៃទី​៣០ និង​៣១ ខែធ្នូ ឆ្នាំ​២០២០) សភាពការណ៍ នៅតាម​ព្រំដែន កម្ពុជា​-​ថៃ គឺមាន​ការរកឃើញ នូវ​អ្នក​ឆ្លង ជំងឺ​កូ​វីដ​-១៩ ចំនួន​២​នាក់ ប៉ុន្តែ​មកដល់​ម៉ោង ៥ ល្ងាច​នេះ គឺ​យើង​មាន​ឆ្លង ចំនួន ៦​នាក់​ហើយ បើតាម​វិទ្យាស្ថាន​ប៉ាស្ទ័រ ឱ្យដឹង គឺ​នៅមាន​ការសង្ស័យ ច្រើន​ទៀត ដែល​ថ្ងៃនេះ អាច​កើន​លើស​ជាង ១០ នាក់​។ ក្នុងស្ថានភាព​បែបនេះ យើង​ត្រូវតែមាន​ការខិតខំ ដើម្បី​រួមចំណែក ជាមួយ​នឺង​ព្រះរាជាណាចក្រ​ថៃ ក្នុងការ​គ្រប់គ្រង សភាពការណ៍ ដែល​នៅក្នុង​ប្រទេស​ថៃ កាលពី​ម្សិលមិញ​នេះ មាន​អ្នក​ឆ្លង​ជំងឺ​កូ​វីដ​-១៩ រហូតដល់ ២៥០ នាក់ និង​ថ្ងៃនេះ ជិត ២០០ នាក់ ។​

​សម្ដេច​តេ​ជោ បាន​គូសបញ្ជាក់ថាៈ “​ក្នុងស្ថានភាព​នេះ ខ្ញុំ​ចេញ​បទបញ្ជា ឱ្យកម្លាំង​នៅតាម​ព្រំដែន​ទាំងអស់ ធ្វើការ​គ្រប់គ្រង ឱ្យបាន​ហ្មត់ចត់ ជាទីបំផុត ចំពោះ​អ្នក​ឆ្លងដែន ទាំង​តាម​ច្រក ដែលមាន​ការគ្រប់គ្រង និង​តាម​ច្រករបៀង​។ ដាច់ខាត​មិនឱ្យ​មាន ការ​លួច​ឆ្លង​ចូលមក ផ្ទៃក្នុង​ប្រទេស ដោយ​មិនបាន​ធ្វើការ​ត្រួតពិនិត្យ មិនបាន​យក​សំណាក និង​ធ្វើ​ច​ត្តា​ឡី​ស័ក​នោះទេ​។ បញ្ជា​ទៅ​កង​ដឹកជញ្ជូន នៃ​កង​យោធ ពល​ខេមរភូមិន្ទ ដែល​ដឹកជញ្ជូន បងប្អូន​ពលករ ទៅ​ចែករំលែក នៅតាម​ខេត្ត ត្រូវ​ផ្អាក​ការដឹកជញ្ជូន បងប្អូន​ទាំងនោះ ចូលមក​ផ្ទៃក្នុង​ប្រទេស​។​”

​សម្ដេច​តេ​ជោ បាន​ថ្លែង​សង្កត់ធ្ងន់ថាៈ យើង​សុខចិត្ត​ធ្វើ​ច​ត្តា​ឡី​ស័ក នៅតាម​បណ្ដា​ខេត្ត នៅតាម​ព្រំដែន ល្អជា​ជាង ដឹក​បងប្អូន មក​ពង្រាយ​នៅ​ផ្ទៃក្នុង​ប្រទេស ដែលនាំឱ្យ​ឆ្លង នៅក្នុង​សហគមន៍ សារជាថ្មី​ម្ដងទៀត​។ ដូច្នេះ​ត្រូវ​យកចិត្តទុកដាក់ គ្រប់គ្រង​បងប្អូន​ទាំងនេះ ឱ្យបាន​ហ្មត់ចត់ ហើយ​ផ្នែក​ដឹកជញ្ជូន គឺ​ផ្អាក​ការដឹកជញ្ជូន​បងប្អូន ហើយ​ត្រូវ​ពង្រឹង នូវ​សមត្ថភាព នៃ​ការធ្វើ​ច​ត្តា​ឡី​ស័ក នៅតាម​ច្រកព្រំដែន ដែល​យើង​បានកំណត់​ទីតាំង ហើយ​ត្រូវយក​សំណាក នៅ​ទីនោះ ធ្វើ​ច​ត្តា​ឡី​ស័ក នៅ​ទីនោះ ក្នុង​រយៈពេល​១៤​ថ្ងៃ ។

សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា

​សម្ដេច​តេ​ជោ នាយករដ្ឋមន្ត្រី បាន​ថ្លែងថាៈ ក្រសួងសុខាភិបាល ត្រូវ​ផ្គត់ផ្គង់​បន្ថែម នូវ​សម្ភារ​ថវិកា ដើម្បី​ធ្វើ​ច​ត្តា​ឡី​ស័ក និង​ការយក​សំណាក ដើម្បី​ធ្វើតេស្ត ដោយ​បន្ថែម​ក្រុមគ្រូពេទ្យ ទៅកាន់​ទីនោះ ប្រសិនបើ​មានការ​ចាំបាច់ ។ ដូច្នេះ​អ្វីដែល​ខ្ញុំ​ចង់ និយាយ​នៅពេលនេះ គឺ​ចង់​បញ្ជាក់​ឱ្យ​បណ្ដា​ខេត្ត នៅតាម​ព្រំដែន ក៏ដូចជា កម្លាំង​នៅតាម​ព្រំដែន​ទាំងអស់ យកចិត្តទុកដាក់ គ្រប់គ្រង ឱ្យបាន​ហ្មត់ចត់ ជាមួយនឹង​ពលករ ពល​ការិនី​របស់​យើង ដែល​ធ្វើដំណើរ ពី​ប្រទេស​ថៃ មកកាន់​កម្ពុជា​វិញ ដែល​មកដល់ពេលនេះ តាម​ការប៉ាន់ស្មាន អាចមាន​ការកើនឡើង ជា​បន្តបន្ទាប់ នូវ​ចំនួន​អ្នក​ឆ្លង​ជំងឺ ដែល​មន្ទីរពេទ្យ ខេត្តបាត់ដំបង អាច​នឹងត្រូវ​រ៉ាប់រង ជាមួយនឹង​ការព្យាបាល ។ ដូច្នេះ​ត្រូវ​បន្ត​ពង្រឹងសមត្ថភាព នៅ​ទីនោះ ហើយ​ក្រ​សួ ង​សុខាភិបាល ត្រូវធ្វើ​សកម្មភាព​បន្ទាន់ ដើម្បី​នឹង​បន្ថែម នូវ​សម្ភារ ថវិកា និង​បង្កើនល្បឿន នៃ​ការធ្វើ​តេស្ត ដោយ​វិទ្យាស្ថាន​ប៉ាស្ទ័រ សំខាន់​គឺ​ការដឹកជញ្ជូន​សំណាក ពី​បណ្ដា​ខេត្ត​ទាំងនោះ មកកាន់​វិទ្យាស្ថាន​ប៉ាស្ទ័រ ព្រោះ​យើង​មិនទាន់មាន ទីកន្លែង​ធ្វើតេស្ត នៅតាម​ខេត្ត​នៅឡើយ​ទេ​។

​ជាងនេះទៀត សម្ដេច​តេ​ជោ ក៏បាន​ដាក់បទបញ្ជា ឱ្យ​បណ្ដា​ខេត្ត នៅ​ខាងក្រោយ​ទាំងអស់ ធ្វើការ​ត្រួតពិនិត្យ ទៅដល់​មូលដ្ឋាន បើ​មាន​បងប្អូន ដែល​មកពី​ប្រទេស​ថៃ ត្រូវ​គ្រប់គ្រង​ឱ្យបាន​ហ្មត់ចត់ ហើយ​អ្នក​ដែល​បាន​ដឹកជញ្ជូន​ទៅ ក៏​ត្រូវតែ​គ្រប់គ្រង ។ ឯ​អ្នក​ដែល​លួច​ចូលមក​ស្ងាត់ៗ ហើយ​មិន​បានធ្វើ​ច​ត្តា​ឡី​ស័ក មិនបាន​យក​សំណាក ចាំបាច់​ត្រូវតែ​យក​សំណាក ដើម្បី​យកមក​ពិនិត្យ ហើយ​ត្រូវតែ​ធ្វើ​ច​ត្តា​ឡី​ស័ក ឱ្យបាន​ត្រឹមត្រូវ ដើម្បី​ចៀសវាង នូវ​ការពង្រាយ​ជំងឺឆ្លង​នេះ ទៅកាន់​ក្រុមគ្រួសារ និង​សហគមន៍ ដែល​ខ្លួន​រស់នៅ​។ នេះ​ជា​វិធានការ​បន្ទាន់ ដែល​ត្រូវ​កាន់​យក ដោយ​ខានមិនបាន ហើយ​ដែល​ត្រូវធ្វើ​ទាំងអស់គ្នា ព្រមៗ​គ្នា​។​

​សម្ដេច​តេ​ជោ ប្រមុខ​រាជរដ្ឋាភិបាល បាន​លើក​ឡើ​ថាៈ ការដែល​និយាយ​បែបនេះ មិនមែន​មា​ន័យ​ថា យើង​នឹង​ដាក់ចេញ ឡើងវិញ នូវ​អ្វីដែល​បានបញ្ជាក់​រួចហើយ ដូចជា​ការបើក​បវេសនកាល និង​ការបើក​ឱ្យមាន​ការជួបជុំ ដោយ​រក្សា​គម្លាត មួយ​ម៉ែត្រ​កន្លះ នោះទេ ប៉ុន្តែ​នេះ គឺជា​ការចម្លង​ដែល រាលដាល​ចេញពី​ប្រទេស​ថៃ ចូលមកក្នុង​ប្រទេស​ក​ម្ពុ​ជា​។

សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា

​សម្ដេច​តេ​ជោ ក៏បាន​អង្វរក​ចំពោះ ពលករ ពល​ការិនី ដែល​ធ្វើការ​ក្នុងប្រទេស​ថៃ ទាំង​ស្របច្បាប់ និង​មិន​ស្របច្បាប់ សូម​បន្ត​ស្នាក់នៅ​ទីនោះ ដើម្បីឱ្យ​អាជ្ញាធរ​ថៃ ជួយ​ដល់​បងប្អូន ក្នុងការ​ពិនិត្យ និង​ព្យាបាល​នៅ​ទីនោះ ប្រសើរ​ជាង​ការនាំ​ជំងឺ ចូលមកក្នុង​ប្រទេស ហើយ​ដែល​នាំទៅដល់ ការបាត់បង់ ការងារ​ធ្វើ​ផងដែរ​។ សង្ឃឹមថា បងប្អូន​នឹងមាន​ការយោគយល់ ចំពោះ​ការលំបាក សម្រាប់​ផ្ទាល់ខ្លួន​ផង សម្រាប់​ក្រុមគ្រួសារ របស់ខ្លួន​ផង និង​សម្រាប់​ប្រទេសជាតិ របស់​យើង​ផង ។ ខ្ញុំ​សុំ​អង្វរ​បងប្អូន ឲ្យ​មានការ​យោគយល់ នៅក្នុង​កាលៈទេសៈ​ដ៏​លំបាក​នេះ ទោះបី​ស្រប ច្បាប់ ឬ​មិន​ស្របច្បាប់ ព្រះរាជាណាចក្រ​ថៃ បាន​បង្កលក្ខណៈ​ឱ្យ​បងប្អូន ដែល​មិន​ស្របច្បាប់ អាច​ស្ថិតនៅ​ទីនោះ​បាន​។ ដូច្នេះ​បងប្អូន គួរតែ​ស្ថិតនៅ​ទីនោះ បន្តទៀត នេះ​ជា​សារ​ពិសេស នៅក្នុង​ល្បឿន​លឿន​ដែរ ត្រូវ​ចាត់ការ​បន្ថែម ហើយ​បញ្ឈប់​ការដឹកជញ្ជូន មក​ផ្នែក​ខាងក្រោយ តែ​ត្រូវ​ពង្រឹងសមត្ថភាព នៃ​ការធ្វើ​ច​ត្តា​ឡី​ស័ក នៅតាម​ព្រំដែន​ជំនួស​វិញ បើទោះបីថា ច្រើន​ម៉ឺន​នាក់ តែ​យើង​ត្រូវតែ​ខិតខំ ធ្វើ​ច​ត្តា​ឡី​ស័ក នៅតាម​ព្រំដែន ដោយ​មិន​នាំមក នូវ​ការពង្រាយ​មនុស្ស នៅ​ខាងក្នុង​នោះទេ ដែល​នឹង​នាំ ទៅដល់ ការរីក​រាលដាល នៅក្នុង​សហគមន៍ ពេញ​ផ្ទៃ​ប្រទេស​ផងដែរ​។ ដូច្នេះ​ក្នុង​គ្រប់ផ្នែក ដែលមាន​ការពាក់ព័ន្ធ​ជា​ពិ សេស គឺ​ខេត្ត​នៅតាម​ព្រំដែន​តែម្ដង ត្រូវតែ​ពង្រឹង ទាំង​តាម​ច្រក​ច្រកព្រំដែន​ផ្លូវការ និង​ច្រករបៀង កងកម្លាំងប្រដាប់អាវុធ ទាំងអស់ ត្រូវតែ​ពង្រាយ ដើម្បី​ពិនិត្យមើល​នូវ​ចលនា នៃ​ការធ្វើដំណើរ របស់​ពលករ ពលការ​នី​របស់​យើង ក្រែង​មានការ​គេច រួចហើយ ប្រសិនជា​មានការ​គេច​រួច នៅ​ទីនោះ នៅតាម​ព្រំដែន​ខេត្ត​ទាំងអស់ នៅ​ខាងក្រោយ ត្រូវតែ​ពិនិត្យ​នូវ​ចំនួន​អ្នក​ដែល​មិនបាន​ឆ្លងកាត់ ការពិនិត្យ​សំណាក និង​ធ្វើ​ច​ត្តា​ឡី​ស័ក នៅ​ព្រំដែន​ឲ្យ​ពួកគេ​បានធ្វើ​តេស្ត និង​ធ្វើ​ចិ​ត្តា​ឡី​ស័ក នៅឯ​ផ្នែក​ខាងក្រោយ ។ នេះ​ជា​វិធានការ ដើម្បី​ប្រយុទ្ធប្រឆាំង បន្តទៀត ជាមួយនឹង​កូ​វីដ​-១៩​។ ខ្ញុំ​បាន​បញ្ជាក់ថា យើង​បាន​បិទ​បញ្ចប់ ព្រឹត្តិការណ៍ សហគមន៍ ២៨ វិច្ឆិកា ប៉ុន្តែ​មិនមែន​បានសេចក្តីថា កូ​វីដ​បានបញ្ចប់​នោះទេ ។ ដូច្នេះហើយ បានជា​យើង ត្រូវ​បន្ត​ការប្រយុទ្ធ ត​ទៀត​ចំនួន នេះ​ជា​ចំនួន​មួយ ដែល​គួរអោយ​ព្រួយបារម្ភ ដែល​ចាំបាច់ ត្រូវតែមាន​វិធានការ ជាបន្ទាន់ ៕/V​

ទីតាំងផ្សាយពាណិជ្ជកម្ម

- Advertisment -

Most Popular