Home ព័ត៌មានជាតិ សន្តិសុខ ធ្លាក់​ដែក​ពី...

ធ្លាក់​ដែក​ពីលើ​អគារ​កំពុង​សាងសង់​ចំ​រថយន្ត​មួយគ្រឿង សំណាងល្អ​មិនត្រូវ​ចំ​មនុស្ស

ដោយ​: រ៉ា​ម៉ន / ភ្នំពេញ​: នៅ​រសៀល​ថ្ងៃទី​១ ខែមករា ឆ្នាំ​២០២១ នៅ​បណ្ដោយ​ផ្លូវ​៩៥ សង្កាត់​បឹង​កេងកង​៣ ខណ្ឌ​បឹង​កេងកង ដោយសារ​មាន​ដែក​ធ្លាក់​ពីលើ​អគារ​មួយ​កំពុង​សាងសង់ ចំ​រថយន្ត​ម៉ែ​ក​សេ​ដេ​ស​មួយគ្រឿង បណ្ដាល​ការខូចខាត តែ​សំណាងល្អ​មិន​បណ្តាល​ឲ្យ​អ្នកបើក​រងរបួស​។​

​យោងតាម​ព័ត៌មាន​នៅ​កន្លែងកើតហេតុ​នោះ បាន​ឲ្យ​ដឹងថា​៖ ដែក​សរសៃ​បាន​ធ្លាក់​ពីលើ​អគារ​កម្ពស់​រាប់សិប​ជាន់​មួយ ចំ​ត្រូវ​រថយន្ត​មួយគ្រឿង​បណ្តាល​ឲ្យ​រង​ការខូចខាត តែ​មិន​ចំ​ត្រូវ​មនុស្ស​នោះទេ​។​

​បើតាម​ម្ចាស់​រថយន្ត​បាន​ឲ្យ​ដឹងថា​៖ សំណាង​ហើយ​មិន​ត្រូវចំ​គាត់ បើ​ត្រូវ​វិញ​មិនដឹង​មាន​គ្រោះថ្នាក់​យ៉ាងណា​នោះទេ ដូច្នេះ​លោក​សំណូមពរ​ដល់​ម្ចាស់​ការដ្ឋាន ត្រូវ​បង្កើន​ការប្រុងប្រយ័ត្ន និង​អំពាវនាវ​ឲ្យ​អាជ្ញាធរ ជួយ​ពិនិត្យមើល​ឡើងវិញ​ផង ចំពោះ​ដំណើរការ​សាងសង់ ត្រូវ​អនុវត្តតាម​បច្ចេកទេស​ត្រឹមត្រូវ​។​

​គួរ​រម្លឹក​ផងដែរ​ថា​៖ កាលពី​ព្រឹក​ថ្ងៃទី​២៩ ខែធ្នូ ឆ្នាំ​២០២០ ក៏មាន​ហេតុការណ៍​នេះ​កើតឡើង​ផងដែរ នៅ​ការដ្ឋាន​សាងសង់​សណ្ឋាគារ​មួយកន្លែង ធ្វើការ​ដោយ​មិនមាន​ការប្រុងប្រយ័ត្ន បណ្តាលឱ្យ​ដែក​សរសៃ​ថ្នាំងអំពៅ ទំហំ​១៤​លី មាន​ប្រវែង​ប្រមាណ ៣​ម៉ែត្រ ធ្លាក់ចំ​កញ្ចក់​រថយន្ត ហើយ​ទម្លុះ​ត្រូវ​បុគ្គលិក​របស់​ធនាគារ​អភិវឌ្ឍន៍ជនបទ និង​កសិកម្ម​ម្នាក់ ធ្លាយ​ត្រូវ​ជើង​ទាំងសងខាង ពី​កំភួនជើង​ខាងស្តាំ​ទៅ​ចំ​ជើងឆ្វេង​ទៀត បណ្តាលឱ្យ​រងគ្រោះ​ធ្ងន់ធ្ងរ ខណៈដែល​កំពុង​រៀបចំ​បើករថយន្ត​ចេញ​។​

​ហេតុការណ៍​នេះ​បានកើត​ឡើង​នៅ​ចំណុច​អគារ​លេខ​០៧ ផ្លូវ​លេខ​០៧ (​ផ្លូវ​ឧកញ៉ា​ស៊ូ​ស្រ៊ុន​) សង្កាត់​ចតុមុខ ខណ្ឌដូនពេញ រាជធានី​ភ្នំពេញ​។​

​ដើម្បី​ចៀសវាង​ការបង្ករ​គ្រោះថ្នាក់​ជាយថាហេតុ​នៅ​ថ្ងៃក្រោយ​ទៀត​នោះ ប្រជាពលរដ្ឋ​នៅ​តំបន់​នោះបាន​ស្នើ​សុំឱ្យ​អាជ្ញាធរ​ជួយ​អន្តរាគមន៍ ដោយ​ពិន័យ​ឱ្យបាន​ធ្ងន់ធ្ងរ ណែ​នាំឱ្យ​ការដ្ឋាន​សណ្ឋាគារ​នេះ ឱ្យ​ចេះ​បង្កើន​ការប្រុងប្រយ័ត្ន​ឱ្យ​ខ្ពស់​បន្ថែមទៀត ជៀសវាង​ការ​ធ្វេស​ប្រហែល បង្ករ​ឱ្យមាន​ការប៉ះពាល់​ដល់​ទ្រព្យសម្បត្តិ​របស់​អ្នកដទៃ និង​បង្ករ​ជា​គ្រោះថ្នាក់​ជាយថាហេតុ​ដូចនេះ​ទៀត​៕​

ទីតាំងផ្សាយពាណិជ្ជកម្ម

- Advertisment -

Most Popular