ផ្សារភាគហ៊ុន​អាម៉េរិក​នឹង​ដក​ចេញ​ក្រុមហ៊ុន​ទូរគមនាគមន៍​យក្សៗ​របស់​ចិន​ដោយសារ​មាន​ទំនាក់ទំនង​ជាមួយ​យោធា​

ប្រែ​សម្រួល : កញ្ញា​ដា​លី​ស ៖ ផ្សារភាគហ៊ុន​ញូវយ៉ក (NYSE) បាន​និយាយថា ខ្លួន​នឹង​ដក​ក្រុមហ៊ុន​ទូរគមនាគមន៍​ចិន​ចំនួន ៣ ដោយ​ផ្អែក​លើ​ទំនាក់ទំនង​របស់​ពួកគេ​ជា​មួយ​យោធា​ចិន​។​

​ក្រុមហ៊ុន China Mobile ក្រុមហ៊ុន China Telecom និង​ក្រុមហ៊ុន China Unicom Hong Kong សុទ្ធសឹង​ជា​គោលដៅ​របស់​រដ្ឋបាល​ត្រាំ​។​

​ភាគហ៊ុន​នៅក្នុង​ក្រុមហ៊ុន​ទូរគមនាគមន៍​យក្ស​ទាំងអស់នេះ​នឹង​ត្រូវ​ផ្អាក​នៅ​ផ្សារ​ហ៊ុន NYSE នៅ​សប្តាហ៍​ក្រោយ ខណៈពេល​ដែល​នីតិវិធី​ដើម្បី​លុបឈ្មោះ​ពួកគេ​បាន​ចាប់ផ្តើម​។​

​ក្រុមហ៊ុន​ទាំងនេះ​រក​ប្រាក់ចំណូល​ទាំងអស់​របស់​ពួកគេ​នៅ​ប្រទេស​ចិន​ហើយ​មិន​មាន​វត្តមាន​គួរឱ្យ​កត់សម្គាល់​នៅ​សហរដ្ឋ​អាម៉េរិក​ទេ​។​

​ការដក​ឈ្មោះ​ចេញ​នេះ​ត្រូវបាន​គេ​មើលឃើញថា​ជា​ការប៉ះទង្គិច​គ្នា​ជា​និមិត្តរូប ចំ​ពេល​ភាព​តានតឹង​ខាង​ភូមិសាស្ត្រ​នយោបាយ​រវាង​សហរដ្ឋ​អាម៉េរិក​និង​ចិន​កំពុង​កើនឡើង​។​

​ភាគហ៊ុន​របស់​ក្រុមហ៊ុន​ទាំង​បី​ត្រូវ​បាន​ជួញដូរ​តិចតួច​បំផុត​នៅ​សហរដ្ឋ​អាម៉េរិក​បើ​ធៀប​ទៅនឹង​ការចុះបញ្ជី​បឋម​របស់​ពួកគេ​នៅ​ហុងកុង​។​ក្រុមហ៊ុន​គ្រប់គ្រង​ដោយ​រដ្ឋ​ទាំង​បី​នេះ​គ្របដណ្តប់​លើ​ឧស្សាហកម្ម​​ទូរគមនាគមន៍​នៅ​ប្រទេស​ចិន​៕

ផ្សារភាគហ៊ុន​ញូវយ៉ក (NYSE) កំពុង​រៀបចំ​នីតិវិធី​ដក​ឈ្មោះ​ក្រុមហ៊ុន China Mobile ក្រុមហ៊ុន China Telecom និង​ក្រុមហ៊ុន China Unicom Hong Kong