Home ព័ត៌មានសំខាន់ៗ សម្តេច​តេ​ជោ ...

សម្តេច​តេ​ជោ បន្ត​ផ្តល់​ថវិកា​បន្ថែម ៦៥០ លាន​រៀល និង​សម្ភារ​មួយចំនួន ដល់​ខេត្ត​ជាប់​ព្រំដែន​ថៃ ចំនួន​៤ ក្នុងការ​ទប់ស្កាត់ ការរីក​រាលដាល​កូ​វីដ ១៩ មក​ផ្ទៃ​ក្នុងប្រទេស​

ដោយៈ តារា​រិ​ទ្ធ / ភ្នំពេញៈ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជា ណា​ចក្រ​កម្ពុជា បានសម្រេច​ឧបត្ថម្ភ ថវិកា​បន្ថែម សរុប​ចំនួន ៦៥០ លាន​រៀល និង​សម្ភារ​មួយ ចំនួន​ទៀត ដល់​ខេត្ត​ជាប់​ព្រំដែន ចំនួន​៤ ដែលមាន​បន្ទុក​ទទួល​ពលករ ត្រឡប់​មកពី​ប្រទេស​ថៃ ដើម្បី​រៀបចំ​ធ្វើ​ច​ត្តា​ឡី​ស័ក​។ នេះ​បើតាម​ការបញ្ជាក់​របស់ លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាល នៅ​ព្រឹក​ថ្ងៃទី​២ ខែមករា ឆ្នាំ​២០២១ នេះ​។​

​ខេត្ត​ចំនួន ៤ រួមមានៈ ខេត្តបាត់ដំបង ខេត្តបន្ទាយមានជ័យ ខេត្តឧត្ដរមានជ័យ និង​ខេត្ត​ប៉ៃលិន​។ ខេត្ត​ទាំង ៤ ទទួលបាន​ថវិកា សរុប​បន្ថែមចំនួន ៦៥០ លាន​រៀល និង​សម្ភារ​សរុប​បន្ថែម ចំនួន ១៤.០០០ ឃី​ត (​មុង ភួយ ខ្នើយ កន្ទេល ជាដើម​)​។ ថវិកា និង​សម្ភារ​ទាំងនេះ ត្រូវបាន​ប្រគល់ជូន អភិបាលខេត្ត ជា​អ្នកគ្រប់គ្រង និង​ចាត់ចែង​ផ្ទាល់​។​

សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណា​ចក្រ​កម្ពុជា

​លោកស្រី យក់ សម្បត្តិ បានបញ្ជាក់​ទៀតថាៈ សម្រាប់​ខេត្ត​ប៉ៃលិន ដែល​រកឃើញ​មាន​ពលករ វិជ្ជមាន​ជំងឺ​កូ​វីដ ១៩ ច្រើនជាងគេ ក៏ត្រូវ​បាន​បន្ថែម​សម្ភារ មាន​ម៉ាស៊ីន​ជំនួយ ដកដង្ហើម ២ គ្រឿង ម៉ាស៊ីន​តាមដាន សញ្ញា​ជីវិត​អ្នកជំងឺ ៥ គ្រឿង និង​ទឹក​ថ្នាំ​សម្លាប់​មេរោគ ចំណុះ ២៥ លីត្រ ៥ ប៊ីដុង​។ ក្រសួងសុខាភិបាល ក៏បាន​សម្រេច​បញ្ជូន ក្រុមគ្រូពេទ្យ​ជំនាញ ពី​មន្ទីរពេទ្យ​រុ​ស្ស៉ី ទៅ​ជួយ​ផ្នែក​បច្ចេកទេស ដល់​មន្ទីរពេទ្យ ខេត្ត​ប៉ៃលិន​ថែមទៀត​។​

​សូមបញ្ជាក់ថាៈ សម្តេច​តេ​ជោ ហ៊ុន សែន នាយករដ្ឋមន្ត្រី បានដាក់​បទបញ្ជា​បន្ទា​ន់ ទៅ​អាជ្ញាធរខេត្ត ដែល​នៅជាប់​ព្រំដែន កម្ពុជា​-​ថៃ ដោយ​​ពង្រឹង​ការធ្វើ​ច​ត្តា​ឡី​ស័ក នៅតាម​បណ្តា​ខេត្ត ជាប់​ព្រំដែន សម្រាប់​ពលករ​ខ្មែរ ដែល​ត្រឡប់​មកពី​ប្រទេស​ថៃ រយៈពេល ១៤ ថ្ងៃ​ពេញ និង​ពិនិត្យ​សំណាក នៅ​ទីនោះ​តែម្តង ដោយ​មិន​អនុញ្ញាត ឲ្យ​ចូលមក​ខេត្ត​ខាងក្រោយ ដែល​អាច​បង្ក​នូវ ការឆ្លង​រាលដាល​ជា​សហគមន៍​ជាថ្មីទៀត​។​

​សម្តេច​តេ​ជោ ហ៊ុន សែន ក៏បាន​ឧបត្ថម្ភ​ថវិកា ៥០ លាន​រៀល ក្នុង ១ ខេត្ត​ផងដែរ ដើម្បីឱ្យ​ខេត្ត​ទាំងនោះ រៀបចំ​ដោះស្រាយ បញ្ហា​ចំពោះមុខ ដើម្បី​ទប់ស្កាត់ ការចម្លង​កូ​វីដ ១៩ ពី​ប្រទេស​ថៃ​៕/V​

ទីតាំងផ្សាយពាណិជ្ជកម្ម

- Advertisment -

Most Popular