ដោយ: ជា សីហៈ/ភ្នំពេញ: លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទបានចែករំលែកនូវរបាយការណ៍បច្ចុប្បន្នភាពនៃវិស័យកសិកម្មកម្ពុជាក្រៅពីដំណាំស្រូវ។
លោករដ្ឋមន្ត្រីបានបន្តថា លទ្ធផលនៃផលិតផលកសិកម្មសរុប និងការនាំចេញ លើផ្នែកដំណាំក្រៅពីស្រូវដែលបានសម្រេច ក្នុងឆ្នាំ២០២០ សំខាន់ជាងគេគឺដំឡូងមី។
ដំណាំដំឡូងមី: ផ្ទៃដីដាំដុះចំនួន ៦២៨.៨៩៤ ហិកតា ហើយផ្ទៃដីប្រមូលផល មាន ចំនួន ៥៨២.០៥៥ ហិកតា
នៅក្នុងនោះទិន្នផលជាមធ្យម ចំនួន ២០,៦៨៨ តោន/ហិកតា ។ លោករដ្ឋមន្ត្រីបានឲ្យដឹងថាដំណាំដំឡូងមីឆ្នាំនេះប្រមូលបាន ចំនួន ១២.០៤១.៨១២ តោនហើយ បរិមាណនាំចេញ សរុប មានចំនួន ៧.២០៣.១២៨ តោន មានតម្លៃចំនួន ១.១០៨.៣១៥.៨៨១ ដុល្លារអាមេរិក ។
លោករដ្ឋមន្ត្រីបានបន្តថាដំណាំទី 2 គឺដំណាំស្វាយចន្ទី មានផ្ទៃដីដាំដុះចំនួន ២៥៨.៩៨៤ ហិកតា ហើយផ្ទៃដីប្រមូលផល ចំនួន ១៦២.២៩៤ ហិកតាដោយទិន្នផលជាមធ្យម ចំនួន ១,៤៩៣ តោន/ហិកតា។ បរិមាណផលស្វាយចន្ទីដែលទទួលបានមាន ចំនួន ២៤២.៣២៤ តោនហើយបរិមាណនាំចេញសរុប ចំនួន ២៣០.៩៨១ តោន នៅក្នុងនោះមានវិញ្ញាបនបត្រចំនួន ២១៨.៩៨១តោន នៅក្នុងតម្លៃសរុប មានចំនួន ៤៨១.៤៨៣.៧៥០ ដុល្លារអាមេរិក។
លោកបានបន្តថាដំណាំមានសក្តានុពលទី ៣គឺដំណាំស្វាយដែលមាន ផ្ទៃដីដាំដុះ ចំនួន ១៣១.៨៩០ ហិកតាហើយផ្ទៃដីប្រមូលផល ចំនួន ៩៣.០៩៩ ហិកតាដោយឡែកទិន្នផលជាមធ្យម ចំនួន ១៨,៧៨៣ តោន/ហិកតា ។ លោកបានបន្ថែមថា បរិមាណផល ស្វាយមានចំនួន ១.៧៤៨.៦៤២ តោនហើយ បរិមាណនាំចេញស្វាយស្រស់សរុប ចំនួន ៩៤៧.៦២៨ តោន(មានវិញ្ញាបនបត្រចំនួន ៩៧.៦២៨តោន)នៅក្នុងតម្លៃសរុប មានចំនួន ៥៧១.៨៦២.៩៦៤ ដុល្លារអាមេរិក។
ដោយឡែកដំណាំដ៏មានសក្តានុពលទី ៤ របស់កម្ពុជាគឺដំណាំចេកអំបូងលឿងមាន ផ្ទៃដីដាំដុះ ចំនួន ១៥.៩៤៥ ហិកតាហើយផ្ទៃដីប្រមូលផល ចំនួន ១៤.២៧០ ហិកតា នៅក្នុងនោះទិន្នផលជាមធ្យម ចំនួន ៣៣,៥២១ តោន/ហិកតា។ បរិមាណផលដំណាំនេះមាន ចំនួន ៤៧៨.៣៥០ តោនដោយបរិមាណនាំចេញសរុប មានចំនួន ៣៣៣.១៤៣ តោននៅក្នុងតម្លៃចំនួន ៤៣៤.៣៥៣. ៦៦៣ ដុល្លារអាមេរិក។
លោកបានបន្តថា ដំណាំមៀនប៉ៃលិន (តាង៉ែន)មាន ផ្ទៃដីដាំដុះ ចំនួន ១៤.៥០០ ហិកតាហើយផ្ទៃដីប្រមូលផល ចំនួន ១១.៥៩៩ ហិកតានៅក្នុងនោះទិន្នផលជាមធ្យម ចំនួន ១៦,៩៦០ តោន/ហិកតា។បរិមាណផលប្រមូលបានមាន ចំនួន ១៩៦.៧១២ តោនដោយនាំចេញសរុប មានចំនួន ១០២.២៨០ តោន (មានវិញ្ញាបនបត្រចំនួន ២៨០តោន)ក្នុង តម្លៃផលិតផលសរុប មានចំនួន ១៥៥.៨១៦.៧៧៦ ដុល្លារអាមេរិក។
ដោយឡែកដំណាំម្រេចមានផ្ទៃដីដាំដុះ ចំនួន ៧.២៩៣ ហិកតា មានផ្ទៃដីប្រមូលផល ចំនួន ៦.០៩២ ហិកតា ទិន្នផលជាមធ្យម ចំនួន ២,៩៩៤ តោន/ហិកតាហើយ បរិមាណផល ចំនួន ១៨.២៤២ តោន នៅក្នុងនោះបរិមាណនាំចេញសរុប មានចំនួន ៥.០៧៩ តោន មានតម្លៃផលិផលសរុប មានចំនួន ៤២.៥០៨.២៣២ ដុល្លារអាមេរិក។
ក្រៅពីនេះដំណាំផ្សេងទៀតមាន បរិមាណផលសរុបចំនួន ៣.៧៥០.៧៤៤ តោនហើយបរិមាណនាំចេញសរុប ចំនួន ៥៥៥.៧០៦ តោន (មានវិញ្ញាបនបត្រ ៣៤៨.៥០៦ តោន) នៅក្នុងតម្លៃផលិតផលសរុបចំនួន ១.៦៩៦.២៨៣.២៥៣ ដុល្លារអាមេរិក៕
