ដោយៈ ប.ខុន / ភ្នំពេញៈ ភ្លៀងខុសរដូវ អាចនឹងកើតមាន នៅលើភាគខាងក្រោម (ត្បូង) នៃប្រទេសកម្ពុជា នាពេលព្រលឹម ស្រាងៗ ថ្ងៃទី៥ ខែមករា ដោយឥទ្ធិពលសម្ពាធទាប រុញមកពី សមុទ្រចិនខាងត្បូង។
លោក ចាន់ យុត្ថា អ្នកនាំពាក្យ និងជារដ្ឋលេខាធិការ ក្រសួងធនធានទឹក និងឧតុនិយម បានប្រាប់ឱ្យរស្មីកម្ពុជាដឹង នៅថ្ងៃទី៤ ខែមករា ឆ្នាំ២០២១ថាៈ សម្ពាធទាប ដែលបានបង្កឱ្យភ្លៀងធ្លាក់ រហូតដល់មានជំនន់ នៅលើប្រទេសហ្វីលីពីន បានដើរ ដល់កៀកឆ្នេរ របស់ប្រទេសវៀតណាម និងអាចបង្កឱ្យភ្លៀង នៅលើភាគខាងត្បូង របស់ប្រទេសកម្ពុជា នាពេលព្រលឹមស្រាងៗ ថ្ងៃទី៥ ខែមករា ឆ្នាំ២០២១។
អ្នកនាំពាក្យក្រសួងជំនាញ ខាងលើ បាននិយាយឱ្យដឹងទៀតថាៈ ភ្លៀងអាចនឹងកើតមាន នៅលើខេត្តត្បូងឃ្មុំ កំពង់ចាម ព្រៃវែង ស្វាយរៀង ភ្នំពេញ តាកែវ កំពង់ស្ពឺ និងបណ្តាខេត្តជាប់មាត់សមុទ្រ នៅពេលព្រឹក ថ្ងៃទី៥ មករា តែមានបរិមាណ មិនច្រើនទេ។
លោក ចាន់ យុត្ថា បានឱ្យដឹងថាៈ សីតុណ្ហភាពអប្បបរមា ជាទូទៅ បានចាប់ផ្តើមកើនឡើង លើសពីអង្សាសេវិញហើយ នៅគ្រប់ខេត្ត តែវានឹងចុះត្រជាក់ ជាថ្មីលើកទី៣ ក្នុងរដូវរំហើយនេះ នាប៉ុន្មានថ្ងៃខាងមុខ៕/V.mara
