​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត ផ្តល់​អគារ​ជាទី​ចាត់ការ ដល់​សាលា​ទក្សិណ ក្រុង​កំពង់ចាម​

​ដោយៈ គង់​ហេង / កំពង់ចាមៈ លោក​ឧ​ត្ត​ម​សេនីយ៍​ឯក ហ៊ុន ម៉ា​ណែ​ត អគ្គ​មេបញ្ជាការរង នៃ​កង​យោ​ធិ​ពល​ខេមរភូមិន្ទ និង​ជា​មេបញ្ជាការ កងទ័ពជើងគោក បានផ្តល់​ជំនួយ​អគារ ជាទី​ចាត់ការ ចំនួន មួយ​ខ្នង ដល់​សាលា បឋមសិក្សា​ទក្សិណ ក្រុង​កំពង់ចាម ដោយសារ​អគារ​ចាស់​មួយ ខ្នង​នេះ មាន​អាយុកាល ប្រមាណ​មួយ​សតវត្សរ៍ ទៅហើយនោះ និង​មាន​សំណូមពរ ពី​គណៈ​គ្រប់គ្រង​សាលា និង​លោកគ្រូ អ្នកគ្រូ​។​

​ឆ្លើយតប​នឹង​សំណូមពរ​នេះ នៅ​ព្រឹក​ថ្ងៃទី​៤ ខែមករា ឆ្នាំ​២០២១ លោក អ៊ុន ចាន់​ដា អភិបាលខេត្ត​កំពង់ចាម តំណាង​លោក​ឧ​ត្ត​ម​សេនីយ៍ ហ៊ុន ម៉ា​ណែ​ត ជា​ម្ចាស់ជំនួយ អមដំណើរ​ដោយ​លោក លោកស្រី ជា​អភិបាលរង ជាច្រើនរូប និង​សហការី បាន​អញ្ជើញ​ចូលរួម បញ្ចុះបឋមសិលា សាងសង់​អគារ មួយ​ខ្នង​នេះ មាន​បណ្តោយ ១១ ម៉ែត្រ ទទឹង ៧,៧ ម៉ែត្រ និង​កម្ពស់ ៥ ម៉ែត្រ សាងសង់​អំពី​ថ្ម និង​ដំបូល​ប្រក់​ក្បឿង​។​

​គួរ​បញ្ជាក់ថា បច្ចុប្បន្ន សាលាបឋមសិក្សា​ទក្សិណ ដែលមាន​ទីតាំង ស្ថិតក្នុង​ភូមិ​ទី​១៥ សង្កាត់​កំពង់ចាម ក្រុង​កំពង់ចាម មាន​អគារសិក្សា ចំនួន បី​ខ្នង ស្មើនឹង ១៥ បន្ទប់​។ ក្នុងនោះ អគារ​ចំនួន ពីរ​ខ្នង កសាង​តាំងពី សម័យ​អាណានិគមនិយម​បារាំង ឆ្នាំ​១៩៣៦ និង​មួយ​ខ្នង ត្រូវបាន​សហគមន៍​អឺរ៉ុប ជួយ​សាងសង់ មាន​កម្ពស់​ពីរ​ជាន់ ក្នុង​ឆ្នាំ​២០០១៕/V​

ទីតាំងផ្សាយពាណិជ្ជកម្ម

- Advertisment -

Most Popular