កម្ពុជា​ទទួលបាន​កំណើន​ទុនវិនិយោគ​ពី​ក្នុងស្រុក​និង​ក្រៅប្រទេស​បាន​ជាង​បួន​ពាន់​លាន​ដុល្លារ​នៅក្នុង​ឆ្នាំ​២០២០

ដោយៈ ច្រាយ ចំណាន​/​ភ្នំពេញៈ កម្ពុជា​ទទួលបាន​កំណើន​ទុនវិនិយោគ សរុប​ជាង​៤​ពាន់​លាន​ដុល្លារ​ទៅលើ​គម្រោង​​​ចំនួន​១៧៨ នៅ​ទូទាំងប្រទេស ខណៈដែល​ទំហំ​នៃ​ការនាំចេញ​មានការ​កើនឡើង​រហូត​ដល់​ប្រមាណ​១៦​ពាន់​លាន​ដុល្លារ​។

សមិទ្ធផលដែលកើតចេញពីការវិនិយោគ(រូបឯកសារ)

​ប្រធានសភា​ពាណិជ្ជកម្ម​កម្ពុជា លោក​ឧកញ៉ា លឹម ហេង បាន​មានប្រសាសន៍​កាលពី​រសៀល​ថ្ងៃទី​៤ ខែមករា ឆ្នាំ​២០២១​នេះ​ថា ការកើនឡើង​នៃ​ចំនួន​ទុនវិនិយោគ​នៅក្នុង​ឆ្នាំ​២០២០​កន្លងទៅ​ថ្មីៗ​នេះ គឺ​បណ្តាលមកពី​ចលករ​សំខាន់ៗ​ចំនួន​២ គឺ​ទី​១​កត្តា​សន្តិភាព និង​ស្ថិរភាព​នយោបាយ ទី​២ ការដាក់ចេញ​ឱ្យ​អនុវត្តន៍៍ នូវ​គោលនយោបាយ​សេដ្ឋកិច្ច​បើកទូលាយ​ថ្មី​របស់​រាជរដ្ឋាភិបាល​កម្ពុជា​។
​លោក​ឧកញ៉ា​បន្តថា “​គោលដៅ​នៃ​ការវិនិយោគ​ពី​សំណាក់​ក្រុមហ៊ុន​ជាតិ និង​អន្តរជាតិ​គឺ​វា​នៅតែ​បន្ត​កើន​ឡើងជា​បន្តបន្ទាប់ ដែល​ក្នុងនោះ​មួយ​ភាគ​ធំ​ទទួលបាន​ផលប្រយោជន៍​ពី​កិច្ចព្រមព្រៀង​ពាណិជ្ជកម្ម​សេរី ជាមួយ​មហាអំណាច​សេដ្ឋកិច្ច​ចិន ការទទួលបាន GSP ពី​ចក្រភព​អង់គ្លេស ដែល​អាច​នាំ​ទំនិញ​ចូល​ទីផ្សារ​អឺរ៉ុប​ដោយ​ការ​រួច​ពន្ធ ការអនុវត្ត​នៃ​កិច្ច​ចុះហត្ថលេខា​លើ​កិច្ចព្រមព្រៀង ដៃគូ​សេដ្ឋកិច្ច​គ្រប់​ជ្រុងជ្រោយ​(RCEP)​ជា​កិច្ចព្រមព្រៀង​ពាណិជ្ជកម្ម​ធំ​បំផុត​ក្នុង​ពិភពលោក​រួមជាមួយ​នឹង​ការរៀបចំ​កំណែទម្រង់​ច្បាប់​វិនិយោគ​ថ្មី​”​។

សមិទ្ធផលដែលកើតចេញពីការវិនិយោគ(រូបឯកសារ)

​លោក​ឧកញ៉ា​បាន​បន្តថា បន្ថែម​ពីនេះ ហេតុផល​សំខាន់​ដែល​ធ្វើឱ្យ​ប្រទេសមួយ អាច​ទទួលបាន​កំណើន​ទុនវិនិយោគ​បន្ថែម គឺមាន​កត្តា​សំខាន់ៗ​ចំនួន​យ៉ាង​ទី​១​សន្ដិភាព​ស្ថិរភាព​នយោបាយ​,​ទី​២​ការដាក់ចេញ​នូវ​គោលនយោបាយ​សេដ្ឋកិច្ច​ដ៏​ល្អ​ត្រឹមត្រូវ​ដែល​ធុរជន នៅតាម​បណ្តា​ប្រទេស​នានា អាចមាន​ជំនឿ​ចិត្ត​យ៉ាង​មុតមាំ​ក្នុងការ​ចូលមក​បណ្តាក់​ទុនវិនិយោគ ដែល​អាច​ទទួលបាន​ចំណេញ​។ ដូច្នេះ​កត្តា​នៃ​គោលនយោបាយ​ទាំង​២​នេះ​គឺមាន​សារសំខាន់​បំផុត​។​

​លោក​ឧកញ៉ា​បាន​លើក​ឧ​ទារ​ហណ៍​ថា “​យើង​ធ្លាប់​បានឃើញ​រួចមកហើយ​ថា នៅតាម​បណ្តា​ប្រទេស​មួយចំនួន មាន​សន្ដិភាព​ពេញលេញ ប៉ុន្តែ​កត្តា​នៃ​គោលនយោបាយ​សេដ្ឋកិច្ច​មិនល្អ មិន​អំណោយផល​ដល់​វិនិយោគិន​”​។​លោក​បន្តថា​“​ដូច្នេះ​សេដ្ឋកិច្ច​នៃ​ប្រទេស​នោះ​មិនអាច រីកចម្រើន​បាន​នោះទេ​។ ផ្ទុយទៅវិញ​គោលនយោបាយ​ទាំង​២ ដូចដែល​បានលើកឡើង​ខាងលើនេះ បាន​ដើរតួនាទី​យ៉ាងសំខាន់ នៅ​ក្នុងការ​ទ្រទ្រង់​ដល់​កំណើនសេដ្ឋកិច្ច​ប្រទេសជាតិ​ទាំងមូល​”​។​

​ជាមួយនឹង​ការ​សាទរ ទៅនឹង​ការទទួលបាន​កំណើន​ទុនវិនិយោគ​បន្ថែម ក៏ដូចជា​ទំហំ​នៃ​ការនាំចេញ​របស់​កម្ពុជា មានការ​កើនឡើង​នៅក្នុង​ឆ្នាំ​២០២០ លោក​ឧកញ៉ា លឹម ហេង បាន​បញ្ជាក់ថា ថ្វី​ត្បិត​ទំហំ​នៃ​ការនាំចេញ​របស់​យើង​បាន​កើនឡើង ប៉ុន្តែ​យើង​ត្រូវតែ​បង្កើន​លទ្ធភាព​ផលិត​សម្រាប់​នាំចេញ​ទៅកាន់​ទីផ្សារ​អន្តរជាតិ​បន្ថែមទៀត​។

សមិទ្ធផលដែលកើតចេញពីការវិនិយោគ(រូបឯកសារ)

​លោក​បន្តថា ការនាំចេញ និង​មាន​ទីផ្សារ​ល្អ​របស់​កម្ពុ​ជាមួយ​ភាគ​ធំ គឺ​ផលិតផល​វាយ​ន​ភ័ណ កាត់ដេរ គ្រឿង​បង្គុំ ជាពិសេស កង ដែលមាន​ទីផ្សារ​ទូលាយ ប៉ុន្តែ​សម្រាប់​ប្រភេទ​ផលិតផល​ក​សិ​-​ឧស្សាហកម្ម​កម្ពុជា​នៅមានកម្រិត​នៅឡើយ​។ ដូច្នេះ កម្ពុជា​ត្រូវតែ​ពង្រឹង និង​ពង្រីក​លទ្ធភាព​ក្នុង​ផលិត​ប្រកបដោយ​គុណភាព សម្រាប់​ការនាំចេញ​បន្ថែមទៀត ដើម្បី​អាច​ទទួលបាន​ប្រយោជន៍​ពី​កិច្ចព្រមព្រៀង និង​ការទទួលបាន​កិច្ច​អនុគ្រោះ​ពន្ធ​សំខាន់​លើ​មុខទំនិញ​នៃ​ការនាំចេញ​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular