Home ព័ត៌មានជាតិ សេដ្ឋកិច្ច ​ជនសង្ស័យ​ប្រ...

​ជនសង្ស័យ​ប្រ​ទូ​ស្តិ៍​កេរ្តិ៍ខ្មាស លើ​នារី​ម្នាក់ ត្រូវ​កម្លាំង​នគរបាល ឃាត់ខ្លួន​

ដោយៈ ស​រិ​ទ្ធ / ភ្នំពេញៈ ជនសង្ស័យ​ម្នាក់ ពាក់ព័ន្ធ​ករណី​ប្រ​ទូ​ស្តិ៍​កេរ្តិ៍ខ្មាស លើ​នារី​ម្នាក់ បាន​ត្រូវ​កម្លាំង​ប៉ុស្តិ៍​​នគរបាល​រដ្ឋបាល​ព្រៃ​ស ឃាត់ខ្លួន កាលពី​រសៀល ថ្ងៃទី​៤ ខែមករា ឆ្នាំ​២០២១ នៅ​ចំណុច​ការដ្ឋាន​សំណង់ បុរី​ភ្នំពេញ​សុខសាន្ត ស្ថិតនៅ​ភូមិ​ធម្ម​ត្រ័យ សង្កាត់​ព្រៃ​ស ខណ្ឌដង្កោ រួច​បញ្ជូនមក​អធិការដ្ឋាន នគរបាល​ខណ្ឌដង្កោ ដើម្បី​ចាត់ការ​តាមច្បាប់​។​

​លោក​វរសេនីយ៍ឯក ជឹម ស៊ីថា អធិការនគរបាល ខណ្ឌដង្កោ បានឱ្យដឹងថាៈ ជនសង្ស័យ ឈ្មោះ ម៉ូ​ន រិ​ន ភេទ​ប្រុស អាយុ​៣៧​ឆ្នាំ មុខរបរ ជា​កម្មករសំណង់ បុរី​ភ្នំពេញ​សុខសាន្ត ស្ថិតនៅ​ភូមិ​ធម្ម​ត្រ័យ សង្កាត់​ព្រៃ​ស ខណ្ឌដង្កោ រាជធានី​ភ្នំពេញ ។ ចំណែក​ជនរងគ្រោះ ឈ្មោះ ម​. ស​.​ន អាយុ​២១​ឆ្នាំ មុខរបរ នៅផ្ទះ មាន​លំនៅ នៅ​បន្ទប់​ជួល ភូមិ​ត្រពាំង​ថ្លឹង សង្កាត់​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ​។​

​លោក​អធិការ បានបញ្ជាក់​ថាៈ កាលពី​ថ្ងៃទី​៣ ខែមករា ឆ្នាំ​២០២១ វេលា​ម៉ោង ៤​និង​៣០​នាទី​រសៀល ជនរងគ្រោះ និង​មិត្តភក្តិ ២​នាក់​ទៀត បាន​ជិះ​ម៉ូតូ មក​ផឹកស៊ី នៅ​ការដ្ឋាន​សំណង់ បុរី​ភ្នំពេញ​សុខសាន្ត ស្ថិតនៅ​ភូមិ​ធម្ម​ត្រ័យ សង្កាត់​ព្រៃ​ស ខណ្ឌដង្កោ ។ ពេលមកដល់ ពួកគេ​ក៏បាន​ផឹកស៊ី មាន​គ្នា​ចំនួន ៧​នាក់ អស់​ស្រា​បៀរ Ganzberg ចំនួន​២​កេស និង​ទឹកត្នោតជូ ចំនួន​៤​លីត្រ​។ រហូតដល់​វេលា​ម៉ោង ៨​យប់ ថ្ងៃ​ដដែល ជនរងគ្រោះ បាន​ចុះមក​ក្រោម ដើម្បី​បត់ជើងតូច រួច​ជនសង្ស័យ ក៏បាន​ដើរ​ចុះមក​តាម​ក្រោយ​។ ពេល​ជនរងគ្រោះ ចូលក្នុង​បន្ទប់ទឹក​បត់ជើង​រួច ជនសង្ស័យ ក៏​ស្រែកសួរ​ពី​ខាងក្រៅ​ថា ខ្ញុំ​សុំចូល​បន្ទប់ទឹក ជាមួយ​ផង​បាន​អត់​? រួច​ជនរងគ្រោះ ក៏បាន​ឆ្លើយ​បដិសេធ​។ បន្ទាប់មក ជនរងគ្រោះ ក៏បាន​បើកទ្វារ​បន្ទប់ទឹក ដើរ​ចេញមកក្រៅ ជនសង្ស័យ បាន​រុញ​ទ្វារ​ខ្ទប់​ទៅវិញ ។ ជនរងគ្រោះ ក៏បាន​ស្ទុះ​ចេញ មក​ខាងក្រៅ​។ ជនសង្ស័យ ក៏បាន​ចាប់​ខ្ទប់មាត់ អូស​ទៅ​កន្លែង​ស្ងាត់ ធ្វើ​សកម្មភាព​ប្រ​ទូ​ស្តិ៍​កេរ្តិ៍ខ្មាស ប៉ុនប៉ង​បង្ខំ​រំលោភ​សេពសន្ថវៈ ក៏ប៉ុន្តែ​ជនរងគ្រោះ ក៏បាន​ស្ទុះ​ឡើង​ទៅលើ ឱ្យ​មិត្តភក្តិ​ជួយ ហើយ​ជនសង្ស័យ ក៏បាន​រត់​គេចខ្លួនបាត់​។​

​លោក​អធិការ បាន​បន្តថាៈ បន្ទាប់មក ជនរងគ្រោះ ក៏​បានមក​ដាក់ពាក្យ​បណ្តឹង នៅ​ប៉ុស្តិ៍នគរបាល​រដ្ឋបាល​ព្រៃ​ស ។ លុះដល់​រសៀល​ថ្ងៃទី​៤ មករា សមត្ថកិច្ច ក៏បាន​ស្រាវជ្រាវ​ឃាត់ខ្លួន​ជនសង្ស័យ យកមក​សាកសួរ នៅ​ប៉ុស្តិ៍នគរបាល​រដ្ឋបាល​ព្រៃ​ស​តែម្តង​។​

​ជនសង្ស័យ បាន​សារភាពថាៈ រូបគេ ពិតជា​បាន​ផឹកស៊ី មានការ​និយាយ​ផ្តោះផ្តង ជាប់​ពាក្យសំដី ជាមួយ​ជនរងគ្រោះ រួច​ក៏បាន​ធ្វើ​សកម្មភាព​ចាប់​អោប ថើប ជនរងគ្រោះ ប្រាកដ​មែន​។​

​បច្ចុប្បន្ន ជនសង្ស័យ កំពុង​ឃាត់ខ្លួន​បណ្តោះអាសន្ន នៅ​អធិការដ្ឋាន​នគរបាល ខណ្ឌដង្កោ ដើម្បី​កសាង​សំណុំរឿង បញ្ជូនទៅ​តុលាការ ចាត់ការ​បន្ត​តាម​នី​វិធី ៕/V

ទីតាំងផ្សាយពាណិជ្ជកម្ម

- Advertisment -

Most Popular