Home ព័ត៌មានសំខាន់ៗ ក្រសួង​ធនធានទ...

ក្រសួង​ធនធានទឹក​ជូនដំណឹង​ពី​ការចុះ​ត្រជាក់​ដល់​រង្វង់​១២​អង្សា​សេ​


​ដោយៈ​ប​.​ខុន​/​ភ្នំពេញៈ​ក្រសួង​ធនធានទឹក និង​ឧតុនិយម​ជូនដំណឹង​ស្តីពី​ស្ថានភាព​ធាតុ អា កាស ដែល​អាច​នឹង​ចុះ​ត្រជាក់​ដល់​រង្វង់​១២​អង្សា​សេ ជាមួយ​ខ្យល់មូសុង​ឦ​សា ន ខ្លាំង និង​រលក​សមុទ្រ​ខ្ពស់ៗ​នៅ​អំឡុង​ពីថ្ងៃ​ទី​១២ ដល់​១៦ ខែមករា ឆ្នាំ​២០២១​។​

​នៅក្នុង​សេចក្តីជូនដំណឹង ដែល​ចុះហត្ថលេខា​ដោយ​លោក លឹម គានហោ ថ្ងៃទី​៥ ខែមករា ឆ្នាំ​២០២១ បាន​បញ្ជាក់ថា​បន្ទាប់ពី​បានធ្វើការ​តាមដាន​និង​ព្យាករណ៍ លើ​ស្ថានភាព​អាកាសធាតុ បានបង្ហាញ​ឲ្យ​ឃើញថា ទ្រនុង​សម្ពាធ​ខ្ពស់​ពី​ភាគ​ខាង​ជើងបាន និង កំពុង​បន្ត​ធ្លាក់ចុះ​មកក្រោម (​ត្បូង​) គួបផ្សំ​ជាមួយនឹង​ខ្យល់មូសុង​ឦសាន​កាន់តែ​បង្កើន​ឥទ្ធិពល​ខ្លាំង ។​

​លក្ខណៈ​បែបនេះ នឹងធ្វើ​ឲ្យ​អាកាសធាតុ នៅ​ព្រះរាជាណាចក្រ​កម្ពុ​ជានា​ដើមឆ្នាំ ២០២១​នេះ ចាប់ពី​ថ្ងៃទី​០៩ ដល់ ថ្ងៃទី​១៦ ខែមករា ឆ្នាំ​២០២១ មាន​ស្ថានភាព ដូចជា​នៅ​តំបន់​ជួរ​ភ្នំ​ដងរែក និង​តំបន់ ខ្ពង់រាប​ភាគ​ឦសាន​សីតុណ្ហភាព​អប្បបរមា​មាន​ក្នុង​រង្វង់​ពី​១៤ ទៅ ១៧​អង្សា​សេ​។ ពិសេស​ពីថ្ងៃ​ទី​១១ ដល់​ថ្ងៃទី​១៣ ខែមករា នៅ​បណ្តា​ខេត្ត​មួយចំនួន​ដូចជា ខេត្តរតនគិរី មណ្ឌលគិរី ឧ​ត្ត​រ​មានជ័យ ព្រះវិហារ និង​ខេត្តពោធិ៍សាត់ (​ស្រុក​វាលវែង​) សី​តុ ណ្ហ​ភាព អប្បបរមា​នឹង​ធ្លាក់​ចុះមក​នៅក្នុង​រង្វង់​ពី​១២​ទៅ​១៥​អង្សា​សេ លាយឡំ​ជាមួយ​ខ្យល់​ខ្លាំង​។​

​នៅ​តំបន់​វាលទំនាប​សីតុណ្ហភាព​អប្បបរមា​មាន​ក្នុង​រង្វង់​ពី​១៦ ទៅ​១៩​អង្សា​សេ​។ ពិសេស ពីថ្ងៃ​ទី​១១ ដល់​ថ្ងៃទី​១៣ ខែមករា នៅ​បណ្តា​ខេត្ត​មួយចំនួន​ដូចជា ខេត្តកំពង់ធំ សៀមរាប ប៉ៃលិន បាត់ដំបង និង ខេត្តពោធិ៍សាត់ សីតុណ្ហភាព អប្បបរមា​នឹង​ធ្លាក់​ចុះមក​នៅក្នុង​រង្វង់​ពី ១៥ ទៅ ១៨ អង្សា​សេ លាយឡំ​ជាមួយ​ខ្យល់​មធ្យម ។​
​នៅ​តំបន់​មាត់សមុទ្រ​សីតុណ្ហភាព​អប្បបរមា​មាន​ក្នុង​រង្វង់​ពី​១៨ ទៅ ២១ អង្សា​សេ​។ នៅ​ថ្ងៃទី​១២ ខែមករា លើ​ផ្ទៃសមុទ្រ​មាន​ខ្យល់​បក់បោក​ខ្លាំង និង​រលក​សមុទ្រ​ខ្ពស់ៗ​។​

​ក្រសួង ក៏បាន​ប្រាប់​ដល់​ប្រជាពលរដ្ឋ ពិសេស​វីរៈ​កងទ័ព ដែល​រស់នៅ និង​ឈរជើង​នៅ​តំបន់​ជួរ​ភ្នំ​ដងរែក និង​ខ្ពង់រាប​ភាគ​ឦសាន សូម បង្កើន​ការយកចិត្តទុកដាក់​ថែរក្សា​សុខភាព ចំពោះ​អាកាសធាតុ​ចុះ​ត្រជាក់​ខ្លាំង​នេះ​។ ដោយឡែក​ប្រជា​នេសាទ និង​អ្នកធ្វើដំណើរ​តាម​សមុទ្រ​ទាំងអស់ សូម​បង្កើន​ការយក ចិត្ត​ទុកដាក់​ប្រុងប្រយ័ត្ន​ខ្ពស់ ដើម្បី​ចៀសវាង​នូវ​គ្រោះថ្នាក់​ផ្សេងៗ ដែល​អាច​កើត មាន​ឡើងជា​យថាហេតុ​៕​

ទីតាំងផ្សាយពាណិជ្ជកម្ម

- Advertisment -

Most Popular