Home ព័ត៌មានជាតិ សន្តិសុខ តុលាការ​សាកសួ...

តុលាការ​សាកសួរ​មន្ត្រី​យោធា​ម្នាក់​ដែល​ដក​កាំភ្លើងខ្លី​វាយ​ក្បាល​សន្តិសុខ​

ដោយ​: ស​រិ​ទ្ធ / កណ្ដាល​: មន្ត្រី​យោធា​ម្នាក់​ដែល ដក​កាំភ្លើងខ្លី​វាយ​ក្បាល​សន្តិសុខ នៅ​មន្ទីរ​សម្រាក​ព្យាបាល និង​សម្ភព​សុខ​ម៉េង បណ្ដាល​ឲ្យ​ដួលសន្លប់​ត្រូវបាន​កម្លាំង​នគរបាល​ខេត្តកណ្ដាល ប​ញ្ជួ​ន​មក​តុលាការ នៅ​រសៀល​ថ្ងៃទី​៥​ខែមករា​ឆ្នាំ​២០២១ ដើម្បី​ចាត់ការ​តាម​នីតិវិធី​។ លោក​ឯក ស៊ុន​រស្មី ព្រះរាជអាជ្ញារង​អម​សាលាដំបូង​ខេត្តកណ្តាល កំពុងធ្វើការ​សាកសួរ​មន្ត្រី​យោធា​រូបនេះ​។​

​ករណី​អំពើហិង្សា​នេះ​កើតឡើង​វេលា​ព្រឹក​ថ្ងៃទី​៤ ខែមករា ឆ្នាំ​២០២១ នៅ​មន្ទីរ​សម្រាក​ព្យាបាល​និង​សម្ភព​យីហោ «​សុខ ម៉េង​» ដែលមាន​ទីតាំង​ស្ថិតនៅ​ទល់មុខ​ផ្សារ​អង្គស្នួល តាម​បណ្ដោយ​ផ្លូវជាតិ​លេខ​៤ ភូមិ​អង្គស្នួល​ទី​៣ ឃុំ​ពើក ស្រុក​អង្គស្នួល ខេត្តកណ្ដាល ។​

​មន្ត្រី​យោធា​រូបនេះ​ឈ្មោះ ហេង គា​ហុង អាយុ​៤១​ឆ្នាំ ជា​បង​ម្ចាស់​មន្ទីរ​សម្រាក​ព្យាបាល និង​សម្ភព​សុខ​ម៉េង និង​ជាមាន​តួនាទី​ជាម​ន្ដ្រី​យោធា​ពាក់​ផ្កាយ​១ នៅ​ស្ថាប័ន​អយ្យការ​អម​តុលាការយោធា ចំណុះ​ក្រសួងការពារជាតិ​។ ចំណែក បុរសរងគ្រោះ​ឈ្មោះ ច្រឹ​ក ស៊ីណា អាយុ​៣០​ឆ្នាំ មុខរបរ​សន្តិសុខ ស្នាក់នៅ​ភូមិ​ត្រពាំង​ប្រុយ ឃុំ​បែក​ចាន ស្រុក​អង្គស្នួល ខេត្តកណ្តាល ។​

​របាយការណ៍​របស់​ស​ម​ត្ថ​កិច្ច​បាន អោយដឹងថា នៅ​មុនពេល​កើតហេតុ​នៅ​ម៉ោង​៦​ល្ងាច​ថ្ងៃទី​២​ខែ មករា ឆ្នាំ​២០២១ បុរសរងគ្រោះ បាន​ទៅ​យាម​ជំនួស​គេ​មួយ​យប់ នៅ​មន្ទីរ​សម្រាក​ព្យាបាល​និង​សម្ភព​យីហោ «​សុខ ម៉េង​» ។ លុះ​ពេល​យាម​រហូតដល់​ម៉ោង​ប្រហែល​៥​ទៀបភ្លឺ ក៏មាន​មនុស្ស​ប្រុស​ម្នាក់ មក​សួរនាំ​ថា ពូ​សន្តិសុខ​យាម​នៅ​នឹង​រាល់ថ្ងៃ ទៅណា​ហើយ ? បុរសរងគ្រោះ​ឆ្លើយថា គាត់​សម្រាក​មួយថ្ងៃ ហើយ​ខ្ញុំ​យាម​ជំនួស​វិញ​។ ពេលនោះ​មនុស្ស​ប្រុស​ម្នាក់​នោះ ក៏បាន​ខ្ចីលុយ​ពី​បុរសរងគ្រោះ​ចំនួន ៣,០០០​រៀល ហើយក៏​ដើរចេញ​ទៅវិញ ដោយ​ឃើញ​មាន​ពាក់​ស្បែកជើង​ចេញទៅ​ដែរ ។​

​របាយការណ៍​ដដែល​បានអោយដឹង​បន្តថា មកដល់​វេលា​ម៉ោង​០៨​ព្រឹក​ថ្ងៃទី​៣​ខែ មករា យោធា​ពាក់​ផ្កាយ​១ បាន​បាត់​ស្បែកជើង​ស៊ក​ស្បែក​ចំនួន​មួយគូ ដែល​ដោះ​ទុក​នៅ​មាត់ទ្វារ​នោះ​។ រហូតដល់​ម៉ោង​៨​យប់ ក៏បាន​ឆែក​មើល​កាមេរ៉ា​សុវត្ថិភាព ក៏​ឃើញ​បុរស​ម្នាក់ បាន​ឈរ​និយាយ​ជាមួយ​បរុស​រងគ្រោះ ហើយ​ឃើញ​ហុច​លុយ​ឲ្យ​បុរស​នោះ​។ បន្ទាប់មក​បុរស​នោះបាន​ពាក់​ស្បែកជើង​ដើរចេញ​ទៅ​បាត់ ។​
​ក្រោយ​ឆែក​ដឹង​ហើយ យោធា​ផ្កាយ​១ បាន​ទាក់ទង​ទៅខាង​ក្រុមហ៊ុន​សន្តិសុខ ណាត់ជួប​សន្តិសុខ​ដែល​មក​យាម​ជំនួស​គេ​នោះ នៅ​ម៉ោង ១០​ព្រឹក​ថ្ងៃទី​៤​ខែ មករា នៅ​មន្ទីរ​សម្រាក​ព្យាបាល​និង​សម្ភព​យីហោ «​សុខ ម៉េង​» ដើម្បី​មក​ជជែក​គ្នា​ឲ្យ​ដឹង​សាច់រឿង ។​ប៉ុន្តែ​មិនឃើញ​មក​សោះ ទើប​យោធា​ផ្កាយ​១ ខឹងសម្បារ​យ៉ាងខ្លាំង ក៏​បើករថយន្ត​ចេញពី​មន្ទីរ​សម្រាក​ព្យាបាល​និង​សម្ភព ទៅផ្ទះ​នៅ​ម្ដុំ​ផ្សារ​ជម្ពូ​វ័ន​បាត់ទៅ ។​


​រហូតមកដល់​ម៉ោង​ប្រមាណ​១២​រសៀល ទើប​ក្រុមហ៊ុន​សន្តិសុខ​ទៅដល់​មន្ទីរ​សម្រាក​ព្យាបាល​និង​សម្ភព​យីហោ «​សុខ ម៉េង​» មិនឃើញ​យោធា​ផ្កាយ​១​នៅ ក៏​ទូរស័ព្ទ​ទៅ​ហៅ​មក​ជជែក​គ្នា​វិញ ។ លុះដល់​ម៉ោង​កើតហេតុ នៅពេល​យោធា​ផ្កាយ​១ ទៅដល់​ភ្លាម ឃើញ​បុរសរងគ្រោះ​ឈរ​នៅមុខ​មន្ទីរ​សម្រាក​ព្យាបាល​និង​សម្ភព ក៏បាន​ទាញយក​កាំភ្លើងខ្លី ពី​ចង្កេះ មក​វាយ​ជនរងគ្រោះ​ចំក្បាល​ផ្នែក​ខាងឆ្វេង បណ្តាល​ឲ្យ​ដួលសន្លប់ ហើយ​ជនដៃដល់ ក៏​ដើរចូល​ក្នុង​បាត់ទៅ ។​

​ក្រោយ​កើតហេតុ ជនរងគ្រោះ ត្រូវបាន​បុគ្គលិក​ពេទ្យ នាំទៅ​លាង​របួស និង​ដេរ​ចំនួន​០៣​ថ្នេរ ។ ហើយ​ប្រធាន​សន្តិសុខ​ដែល​ជូន​ជនរងគ្រោះ​មក​នោះ ក៏បាន​ទូរស័ព្ទ​រាយការណ៍​ឲ្យ​សមត្ថកិច្ច ទើប​សមត្ថកិច្ច​ចុះ​ទៅដល់​កន្លែងកើតហេតុ និង​ឃាត់ខ្លួន​ជនដៃដល់ រួមទាំង​វត្ថុតាង​ជា​អាវុធខ្លី​មួយ​ដើម​ម៉ាក CF98 លេខ 006009 មាន​បង់​ចំនួន​មួយ និង​គ្រាប់​ផងដែរ ។​

​បើតាម​ចម្លើយសារភាព​របស់​ជ​ន​ដៃដល់ និយាយថា ខ្លួន​ពិតជា​បាន​យក​កាំភ្លើងខ្លី ទៅ​វាយ​ជនរងគ្រោះ​ពិតប្រាកដ​មែន ដោយសារ​ខឹង​ជួល​ឲ្យ​មក​យាម បែរជា​ត្រូវ​គ្នា​ជាមួយ​ចោរ​ទៅវិញ ៕

ទីតាំងផ្សាយពាណិជ្ជកម្ម

- Advertisment -

Most Popular