អាជ្ញាធរ​ខេត្តកោះកុង សុំ​ចិត្ត​ពលរដ្ឋ កុំ​បារម្ភ អំឡុងពេល​ធ្វើ​ច​ត្តា​ឡី​ស័ក ១៤​ថ្ងៃ​

ដោយៈ សុ​ផានី​តា / កោះកុងៈ រដ្ឋបាលខេត្ត និង​មន្ត្រី​សុខាភិបាល ខេត្តកោះកុង​ទទូច​សុំ​ចិត្ត ពី​ពលរដ្ឋ ឬ​ពលករ​ខ្មែរ កុំ​មានការ​ព្រួយបារម្ភ ក្នុងអំឡុងពេល កំពុង​ធ្វើ​ច​ត្តា​ឡី​ស័ក ក្នុង​មណ្ឌល​ទី​២ រយៈពេល ១៤​ថ្ងៃ​។ ការស្នើសុំ​បែបនេះ ធ្វើឡើង ក្រោយពី​មានមតិ​បង្ហាញ ព្រួយបារម្ភ​ពេក ពី​វិធានការ​ពិនិត្យ​សុខភាព​។

​លោក ទូ សាវុធ អភិបាលរង​ខេត្តកោះកុង បាន​អះអាងថាៈ ការធ្វើ​ច​ត្តា​ឡី​ស័ក ចំពោះ​ពលរដ្ឋ ឬ​ពលករ ដែល​ធ្វើដំណើរ ឆ្លងដែន​ពី​ប្រទេស​ថៃ គឺជា​រឿង​ដ៏​ចាំបាច់​បំផុត ដើម្បី​បញ្ចៀស ការឆ្លង​រីក​រាលដាល ដល់​សហគមន៍ ធ្វើ​ប៉ះពាល់​យ៉ាងធ្ងន់ធ្ងរ ដល់​ការរស់នៅ និង​សេដ្ឋកិច្ច ប្រាក់ចំណូល​ទាំងមូល​។​

​លោក​អភិបាលរង បាន​បន្ថែមថាៈ ពេលដែល​ក្រុម​ពលករ​ឆ្លងដែន ចូលមក​តាម​ច្រក ព្រំដែន​នានា​នោះ ហើយ​អាជ្ញាធរ មន្ត្រី​សុខាភិបាល បាន​ពន្យល់​ណែនាំ និង​ទទួលយក ពួកគេ មក​ស្នាក់នៅ ក្នុង​មណ្ឌល​ទី​២ អតីត​សាលាខេត្ត​ចាស់ មុននឹង​ធ្វើតេស្ត​ពិនិត្យ​រក វីរុស​កូ​រ៉ូ​ណា ១៤ ថ្ងៃ​។ ដំបូង​ឡើយ ពួកគាត់​ព្រួយបារម្ភ​ថា ទុក​ពួកគេ​ចោល​មិនបាន​មើលថែ រក្សា​ត្រឹមត្រូវ ប៉ុន្តែ​ពុំ​ដូច្នេះ​ទេ អាជ្ញាធរ គិតគូរ​ពី​សុវត្ថិភាព និង​សុខភាព ដល់​ពលករ​ណាស់ ដោយ​ថែមទាំង​ផ្តល់​អាហារ ៣ ពេល ក្នុង​១​ថ្ងៃ បូករួម​ផ្តល់​សេវា ពិនិត្យ​ព្យាបាល​ករណី សុខភាព ខុស​ប្រក្រតី​ណាមួយ​។​

​ទន្ទឹម​នោះ អភិបាលរង​ខេត្ត ក៏​សំណូមពរ ដល់​ពលរដ្ឋ និង​ពលករ​ខ្មែរ ដែល​ពាក់ព័ន្ធ កុំ​បារម្ភ​ពេក ចំពោះ​ការចូលរួម ធ្វើ​ច​ត្តា​ឡី​ស័ក អោយបាន​ត្រឹមត្រូវ តប​តាម​បទបញ្ជា​របស់ ប្រមុខ​រដ្ឋាភិបាល​កម្ពុ​ជា ដែល​ប្រាប់​ដល់​អាជ្ញាធរ​ថ្នាក់ក្រោម​ជាតិ អនុវត្ត​ឱ្យបាន​តឹងរឹង នៅពេល​ប្រទេស​ថៃ ផ្ទុះ​ជំងឺ​កូ​វីដ​១៩ នាបច្ចុប្បន្ន​។​

​គួរ​ជម្រាប​ថា គិត​ចាប់ពី​ថ្ងៃទី​២២ ខែធ្នូ ២០២០ មកដល់​ម៉ោង​នេះ (​ថ្ងៃទី​៥ មករា​) ខេត្តកោះកុង ទទួលបាន​ពលករ​ខ្មែរ ចំនួន ៦៣​នាក់ ស្ត្រី​២០​នាក់ ដែល​បានធ្វើ​ដំណើរ​ឆ្លងដែន ពី​ប្រទេស​ថៃ ចូលមក​កម្ពុជា តាម​ច្រក​ផ្លូវទឹក និង​ផ្លូវគោក លើ​ខ្សែបន្ទាត់​ព្រំដែន ខេត្តកោះកុង និង​ខេត្ត​ត្រាត​។​

​លោក​វេជ្ជបណ្ឌិត ទៅ ម៉ឹង ប្រធាន​មន្ទីរ​សុខាភិបាល ខេត្តកោះកុង បានលើកឡើង​នៅ​ថ្ងៃទី​៥ មករា នេះ​ថាៈ ក្នុងចំណោម ក្រុម​ពលករ​ខ្មែរ ទាំង​៦៣​នាក់ គឺមាន ៥៣ នាក់​ហើយ​បាន​យក សំណាក ទៅពិនិត្យ​ចំនួន ២ លើក នៅ​វិទ្យាស្ថាន​ប៉ាស្ទ័រ ប៉ុន្តែ​ជា​លទ្ធផល គឺ​អវិជ្ជមាន ទាំងអស់​។ រីឯ​ពលករ ចាត់​ប​ញ្ចូ​ន​មក​ថ្មីៗ ក៏​កំពុង​ត្រូវបាន​យក​សំណាក បន្ថែមទៀត​។​

​លោក ទៅ ម៉ឹង បាន​អះអាងថាៈ បើទោះបីជា​ពលករ​ខ្មែរ ទាំង​៥៣​នាក់​បាន​យក​សំណាក ពិនិត្យ ២ ដង​រួចហើយ​ក៏ដោយ ក៏​ការ​រឹតបន្តឹង​ពិនិត្យ​សុខភាព ឱ្យ​គ្រប់​ចំនួន ជា​បន្តបន្ទាប់ តាម​លក្ខណៈ​វេជ្ជសាស្ត្រ មុននឹង​អនុញ្ញាត ចាក​ចេញពី​មណ្ឌល​ទី​២ ទៅ​ស្រុកកំណើត​។

​មិន​ខុសពី​លោក ទូ សាវុធ ទេ លោក​ប្រធាន​មន្ទីរ​សុខាភិបាល ខេត្តកោះកុង ក៏​ស្នើសុំ​ដល់ ពលរដ្ឋ ក្នុង​មូលដ្ឋាន និង​ក្រុម​ពលករ​ខ្មែរ ដែល​ត្រឡប់​មកពី​ប្រទេស​ថៃ ចាំបាច់​ត្រូវ​ចូលរួម សហការ​ធ្វើ​ច​ត្តា​ឡី​ស័ក ឱ្យ​ត្រឹមត្រូវ គ្រប់ៗ​គ្នា ជៀសវាង​គេចវេស​បណ្តាលឱ្យ​ឆ្លង​ចូល សហគមន៍ ពិបាក​អន្តរាគមន៍​។​

​កន្លងទៅ​ថ្មីៗ​នេះ អាជ្ញាធរ​ខេត្តកោះកុង ធ្លាប់បាន​ចុះ​ពិនិត្យ​ស្ថានភាព តាម​តំបន់​ព្រំដែន ជាប់​ខេត្ត​ត្រាត ប្រទេស​ថៃ ជាច្រើន​កន្លែង ដោយ​ថែមទាំង​ដាក់​នូវ​បញ្ជា​មិនអាច​ចន្លោះ ប្រហោង បានទេ ដល់​គ្រប់​មន្ត្រី​ជំនាញ និង​សមត្ថកិច្ច​ចម្រុះ នៅតាម​ខ្សែបន្ទាត់​ព្រំដែន ក្នុងភូមិ​សាស្ត្រ​ខេត្ត បាន​កំពុង​ផ្តោត ការយកចិត្តទុកដាក់ លើ​ការ​ល្បាត​ប្រចាំ មិន​ថា តែ​ច្រកទ្វារព្រំដែន​គោក ច្រកព្រំដែន​ទឹក ឬ​ច្រករបៀង ទេ គឺ​សុទ្ធតែ​ត្រៀម​រង់ចាំ​ទទួល ពលករ​ខ្មែរ ដែល​ឆ្លងដែន​៕/V-PC​

ទីតាំងផ្សាយពាណិជ្ជកម្ម

- Advertisment -

Most Popular