បី​ស្ថាប័ន ចែក​អំណោយ​ដល់ ប្រជាពលរដ្ឋ​ក្រីក្រ លើក​ទី​៦

ដោយៈ បាយ័ន / សៀមរាបៈ ដើម្បី​ចូលរួមចំណែក កាត់បន្ថយ​ទុក្ខលំបាក របស់​ប្រជា ពលរដ្ឋ​ក្រីក្រ ក្នុងអំឡុងពេល នៃ​ការរីក​រាលដាល ជំងឺ​កូ​វីដ​-១៩ ក្រុមប្រឹក្សា​សង្កាត់​សាលា កំរើក ដែលមាន​លោក សាម ឡ​ន ជា​ប្រធាន​ក្រុមប្រឹក្សា​សង្កាត់​បាន​ខិតខំ​ក្នុងការ ទំនាក់ទំនង រក​ជំនួយ​ពី​សប្បុរសជន និង​អង្គការ​សង្គម​ស៊ីវិល​នានា ក្នុង​មូលដ្ឋាន ដូចជា គ្រឿងឧបភោគ បរិភោគ និង​សម្ភារ​ប្រើប្រាស់​ផ្សេងៗ ដើម្បី​ចែកជូន​ដល់​ប្រជាពលរដ្ឋ​ក្រីក្រ ងាយ​រងគ្រោះ ក្នុង​មូលដ្ឋាន ក្នុងអំឡុងពេល នៃ​ការរីក​រាលដាល​ជំងឺ​កូ​វីដ​-១៩​។​

​ជាក់ស្តែង នៅ​ថ្ងៃ​ចន្ទ ទី​៥ ខែមករា ឆ្នាំ​២០២១ នេះ រដ្ឋបាល​សង្កាត់​សាលា​កំរើក​ដោយមាន កិច្ចសហការ ពី​អង្គការ​ផ្ទះ​អញ្ជលី និង​អង្គការ​សម្រេច​សុបិន​កុមារ​កម្ពុជា​បានផ្ដល់​អំណោយ ជា​លើ​ទី​៦ ដល់​ប្រជាពលរដ្ឋ​ក្រីក្រ ចំនួន​៥៣ គ្រួសារ មកពី​៣​ភូមិ ក្នុង​សង្កាត់​ដែល​អំណោយ ទាំងនោះ រួមមាន​: អង្ករ ១០​គីឡូ ទឹកស៊ីអ៊ីវ ១​ដប ទឹកត្រី ១​ដប សាប៊ូ​លាងចាន ១​ដប សាប៊ូម្សៅ ១​កញ្ចប់ សាប៊ូដុំ ៥​ដុំ ស្ករស ១​ថង់ អំបិល ១​ថង់ មាំ​ល្ហុង ១​គីឡូ និង​សាច់ក្រក ០,៥ គីឡូក្រាម​។​

​លោក សាម ឡ​ន ចៅសង្កាត់​សាលា​កំរើក បាន​ណែនាំ​ដល់​ប្រជាពលរដ្ឋ​ទាំងអស់​ដែល​បាន អញ្ជើញ​ចូលរួម​ត្រូវធ្វើ​អនាម័យ ឲ្យ​បាន​ត្រឹមត្រូវ តាម​វិធានការ​ណែនាំ​របស់​ក្រសួង សុខាភិបាល ដើម្បី​ការពារ​ពី ការឆ្លង​ជំងឺ​កូ​វីដ​-១៩ និង​ត្រូវ​រាយការណ៍ អំពី​សាច់ញាតិ​បងប្អូន ដែល​ត្រឡប់​មកពី​ក្រៅប្រទេស ដល់​អាជ្ញាធរ​ភូមិ​សង្កាត់ ដើម្បី​នាំ​ពួកគាត់​ឲ្យ​ទៅធ្វើ​ច​ត្តា ឡី​ស័ក ដើម្បី​បង្ការ​កុំឱ្យ​មានការ​ឆ្លង​ជំងឺ​កូ​វិត​-១៩ ចូលក្នុង​សហគមន៍​យើង​។​

​ជាមួយគ្នានេះ លោក​បាន​ណែនាំ​ដល់ បងប្អូន​ប្រជាពលរដ្ឋ ត្រូវ​ចេះ​ធ្វើ​អនាម័យ​បរិស្ថាន អោយបាន​ស្អាត កុំ​បោះបង់ចោល​សំរាម ពាសវាល​ពាសកាល និង​ត្រូវ​វេច​ខ្ចប់​ឲ្យ​បាន ត្រឹមត្រូវ ហើយ​ត្រូវ​ភ្ជាប់ សេវា​ដឹកជញ្ជូន​សំរាម ជាមួយ​ក្រុមហ៊ុន ដឹកជញ្ជូន​សំរាម​ឲ្យ​បាន គ្រប់​ក្រុមគ្រួសារ ដើម្បី​ឲ្យ​បរិស្ថាន​យើង​ស្អាត និង​ដើម្បី​សោភ័ណភាព ទីក្រុង​សៀមរាប របស់​យើងទាំងអស់គ្នា ឱ្យ​ស័ក្តិ​សមជា​ទីក្រុង​ទេសចរណ៍ ដ៏​ល្បី​របស់​ប្រទេស​កម្ពុជា​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular