Home ព័ត៌មានជាតិ សង្គម អ្នកជំនាញ​ក្រ...

អ្នកជំនាញ​ក្រសួង​សាធារណការ​ប្រជុំ​ពិនិត្យ និង​អនុម័ត​លើ​សេចក្ដីព្រាង​ផែនការ​ហិរញ្ញវត្ថុ និង​វិនិយោគ​ឆ្នាំ​២០២១

​ដោយៈ​សុផល​/​ភ្នំពេញ​: អ្នកជំនាញ​ក្រសួង​សាធារណការ និង​ដឹកជញ្ជូន​កាលពី​រសៀល​ម្សិលមិញ​នេះ​បាន​ប្រជុំ​ពិនិត្យ និង​អនុម័ត​លើ​សេចក្ដីព្រាង​ផែនការ​ហិរញ្ញវត្ថុ និង​វិនិយោគ​ឆ្នាំ​២០២១ និង​របាយការណ៍​នៃ​ការអនុវត្ត​ការងារ​អាជីវកម្ម​សេវាកម្ម​និង​ការងារ​វិនិយោគ​រយៈពេល​៩​ខែ ក្នុង​ឆ្នាំ​២០២០ ។​

​លោកស្រី ឥ​ម នីថា​រ៉ា រដ្ឋលេខាធិការ​ក្រសួង​សាធារណការ និង​ដឹកជញ្ជូន និង​ជា​ប្រធាន​ក្រុមប្រឹក្សាភិបាល​មន្ទីរ ពិសោធន៍​សំណង់ និង​សាធារណការ បាន​ដឹកនាំ​កិច្ចប្រជុំ​ក្រុមប្រឹក្សាភិបាល​នៃ​មន្ទីរពិសោធន៍​សំណង់ និង​សាធារណការ ដោយមាន​ការអញ្ជើញ​ចូលរួម​ពី​តំណាង​ក្រសួង​-​ស្ថាប័ន​ពាក់ព័ន្ធ​។​

​លោកស្រី​រដ្ឋលេខាធិការ​បាន​មានប្រសាសន៍​ឱ្យដឹងថា កិច្ចប្រជុំ​នេះ​ធ្វើឡើង ដើម្បី​ពិនិត្យ និង​អនុម័ត​លើ​សេចក្ដី​ព្រាង​ផែនការ​ហិរញ្ញវត្ថុ និង​វិនិយោគ​ឆ្នាំ​២០២១ របាយការណ៍​នៃ​ការអនុវត្ត​ការងារ​អាជីវកម្ម សេវាកម្ម និង​ការងារ​​វិនិយោគ​រយៈពេល​៩​ខែ ក្នុង​ឆ្នាំ​២០២០ និង​ការរៀបចំ​ហេដ្ឋារចនាសម្ព័ន្ធ​គ្រប់គ្រង​របស់​មន្ទីរពិសោធន៍​សំណង់ និង​សាធារណការ​ក៏ដូចជា ការប្រមូល​ធាតុ​ចូល​បន្ថែមទៀត ដើម្បីឱ្យ​ការរៀបចំ​ផែនការ​នានា​កាន់​តែមាន​លក្ខណៈ​គ្រប់​ជ្រុងជ្រោយ​។​

​លោកស្រី​រដ្ឋលេខាធិការ​បាន​លើកឡើងថា ការរៀបចំ​ផែនការ​ច្បាស់លាស់​គ្រប់​ជ្រុងជ្រោយ​និង​មាន​លក្ខណៈ​វិទ្យាសាស្ត្រ​ស្របតាម​បទដ្ឋាន​គតិយុត្តិ​នានា​ការរៀបចំ​ហេដ្ឋារចនាសម្ព័ន្ធ​គ្រប់គ្រង​ប្រកបដោយ​តម្លាភាព និង​ការអនុវត្ត​វិន័យ​បាន​ខ្ជាប់ខ្ជួន​របស់​បុគ្គលិក​ទាំ​ង​អស់​គឺជា​យុទ្ធសាស្ត្រ​ដ៏​មុត​ស្រួច​ដែល​អាចដឹកនាំ​នាវា​មន្ទីរ​ពិសោធន៍​សំណង់​និង​សាធារណការ​ទៅកាន់​ភាពជោគជ័យ​រប​ស់​ខ្លួន ទាំង​ការងារ​បច្ចេកទេស និង​ការងារ​ផ្ដល់​សេវាសាធារណៈ​។​

​លោកស្រី​ប្រធាន​អង្គប្រជុំ​បានបង្ហាញ​នូវ​មោទនភាព​ចំពោះ​សមិទ្ធផល​និង​ផែនការ​នានា​ដែល​បានរៀបចំ​ឡើង​ដោយ​ក្រុមប្រឹក្សាភិបាល និង​បាន​សម្ដែង​នូវ​អំណរគុណ​និង​កោតសរសើរ​ដល់​អង្គប្រជុំ​ដែល​បាន​ចូលរួម​ជា​មតិយោបល់​យ៉ាង​ផុលផុស​គ្រប់​របៀបវារៈ ដោយហេតុថា​រាល់​មតិយោបល់​របស់​អង្គប្រជុំ​គឺជា​ធាតុ​ចូល​យ៉ាងសំខាន់​ក្នុងការ​កែច្នៃ និង​ច្នៃប្រឌិត​ឱ្យ​ផែនការ​នានា​និង​រចនាសម្ព័ន្ធ​គ្រប់គ្រង​របស់​មន្ទីរពិសោធន៍​កាន់​តែមាន​ប្រសិទ្ធភាព តម្លាភាព និង​គណនេយ្យភាព​៕​

ទីតាំងផ្សាយពាណិជ្ជកម្ម

- Advertisment -

Most Popular