១៣​រឿង​សំខាន់ៗ នៅក្នុង​ខែឧសភា ឆ្នាំ​២០២០

​ដោយ​៖ ម៉េង​ឆៃ​/ ភ្នំពេញ​៖ នៅក្នុង​ខែឧសភា ឆ្នាំ​២០២០ មាន​ព្រឹត្តិការណ៍​ជាតិ​ជាច្រើន បានកើត​ឡើង​។ ក្នុងនោះ មាន​ព្រឹត្តិការណ៍​សំខាន់ៗ ដែល​បាន​លេចធ្លោ រួមមាន​៖ ការចាប់ផ្តើម​អនុវត្ត​នូវ​ច្បាប់​ចរាចរណ៍​ផ្លូវគោក ដែល​ទើប​កែប្រែ ដោយ​បង្កើន​ប្រាក់​ផាកពិន័យ​លើ​អ្នក​ល្មើសច្បាប់​ចរាចរណ៍​ពី ៣ ទៅ ៥​ដង រដ្ឋមន្ត្រី​ថ្មី ក្រសួងយុត្តិធម៌ បើក​យុទ្ធនាការ ដោះស្រាយ​ការកកស្ទះ​សំណុំរឿង នៅតាម​សាលាដំបូង​រាជធានី​-​ខេត្ត ព្រមទាំង​ការធូរស្រាល​នៃ​ស្ថានភាព​ជំងឺ​កូ​វីដ​១៩ ជាដើម​។​

១-​ច្បាប់​ចរាចរណ៍​ថ្មី ត្រូវបាន​អនុវត្ត ចាប់ពី​ថ្ងៃទី​១ ខែឧសភា​៖
​កាលពី​ថ្ងៃទី​១ ខែឧសភា កម្លាំង​នគរបាល​ចរាចរណ៍​ផ្លូវគោក នៅ​ទូទាំងប្រទេស បានចាប់ផ្តើម​រឹតបន្ដឹង​អនុវត្ត​ច្បាប់ ស្ដីពី ចរាចរណ៍​ផ្លូវគោក នៅ​ទូទាំងប្រទេស តាមរយៈ​ការផាកពិន័យ​អ្នក​ល្មើសច្បាប់ ដោយ​ដំឡើង​ប្រាក់​ផាកពិន័យ​ពី ៣ ទៅ ៥​ដង​។

​អ្នក​ល្មើ​សនឹង​ច្បាប់​ចរាចរណ៍ ដែល​ភាគច្រើន ជា​អ្នកធ្វើដំណើរ​តាម​ម៉ូតូ និង​រ៉ឺម៉ក​ម៉ូតូ ដោយ​មិន​ពាក់មួក​សុវត្ថិភាព និង​អ្នកបើកបរ​រថយន្ត ដោយ​ពុំ​ពាក់​ខ្សែក្រវាត់​សុវត្ថិភាព​។

​យ៉ាងណាក៏ដោយ ការអនុវត្តន៍​វិធានការ​រឹតបណ្តឹង​ច្បាប់​ចរាចរណ៍​ផ្លូវគោក តាមរយៈ​ការបង្កើន​ចំនួន​ទឹកប្រាក់​ផាកពិន័យ​យ៉ាងច្រើន បានធ្វើអោយ​ប្រជាជន​កម្ពុជា​មួយចំនួន ហាក់ដូចជា ព្រួយបារម្ភ និង​រិះគន់​នឹង​ចំណាត់ការ​នេះ​។ ក៏ប៉ុន្តែ​តាមពិត ការ​រឹតបន្តឹង​ច្បាប់​ចរាចរណ៍ ដោយ​បង្កើន​ប្រាក់​ផាកពិន័យ​នេះ គឺ​ដើម្បី​ឲ្យ​ប្រជាពលរដ្ឋ គោរព​ច្បាប់​ចរាចរណ៍ ក្នុង​បំណង​ការពារ​អាយុជីវិត​អ្នកធ្វើដំណើរ​លើ​ដងផ្លូវ ព្រោះថា កន្លងមក ជា​មធ្យម មាន​មនុស្ស ៤​ទៅ ៥​នាក់ បាន​ស្លាប់ ជា​រៀងរាល់ថ្ងៃ ដោយសារ​គ្រោះថ្នាក់​ចរាចរណ៍​។ ដូច្នេះ បើ​ប្រជាពលរដ្ឋ គោរព​ច្បាប់​ចរាចរណ៍ ដោយ​ខ្ជាប់ខ្ជួន គឺ​មិន​ត្រូវមាន​ការព្រួយបារម្ភ​នោះទេ​។​

២-​ម្តាយក្មេក​សម្តេច​តេ​ជោ នាយករដ្ឋមន្ត្រី ហ៊ុន សែន ទទួលមរណភាព​៖
​អ្នកឧកញ៉ា ព្រឹទ្ធ​មហា​ឧបាសិកា ធម្ម​ញ្ញាណ​វិ​វ​ឌ្ឍ​នា ប៊ុន ស៊ា​ង​លី ដែល​ត្រូវជា​ម្តាយ​របស់​សម្តេច​កិត្តិ​ព្រឹទ្ធ​បណ្ឌិត ប៊ុនរ៉ានី ហ៊ុនសែន បានទទួល​មរណភាព កាលពី​ថ្ងៃ​ចន្ទ ទី​០៤ ខែឧសភា ឆ្នាំ​២០២០ វេលា​ម៉ោង ២ និង ១២ នាទី ទៀបភ្លឺ ក្នុង​ជន្មាយុ ៩៦​ឆ្នាំ ដោយ​ជរាពាធ​។

​សព​អ្នកឧកញ៉ា ព្រឹទ្ធ​មហា​ឧបាសិកា បាន​តម្កល់​ធ្វើបុណ្យ​តាម​ប្រពៃណី​ព្រះពុទ្ធសាសនា នៅ​ភូមិគ្រឹះ​សម្តេច​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត នៅជាប់​វិមានឯករាជ្យ ក្នុង​រាជធានី​ភ្នំពេញ​។
​នៅ​ព្រឹក​ថ្ងៃទី​៦ ខែឧសភា សព​ព្រឹទ្ធ​មហា​ឧបាសិកា ត្រូវបាន​ដង្ហែ​ទៅ​បញ្ចុះ នៅ​ស្រុកកំណើត នៅ​ភូមិ​ទី​២ ឃុំរ​ការ​ខ្នុរ ស្រុក​ក្រូចឆ្មារ ខេត្ត​ត្បូងឃ្មុំ​។

​ចំណែក​នៅ​ថ្ងៃទី​៩ ខែឧសភា ឆ្នាំ​២០២០ ចាប់ពី​ម៉ោង ២​រសៀល ពិធីបុណ្យ​ទក្ខិណានុប្បទាន គម្រប់ ៧​ថ្ងៃ ប្រារព្ធ​នៅ​គេ​ដ្ឋា​នស​ម្តេច​អគ្គមហាសេនាបតី​តេ​ជោ និង​សម្តេច​កិត្តិ​ព្រឹទ្ធ​បណ្ឌិត ស្ថិតនៅ​ភូមិ​ទី​២ ឃុំរ​ការ​ខ្នុរ ស្រុក​ក្រូចឆ្មារ ខេត្ត​ត្បូងឃ្មុំ​។​

៣-​ព្រះមហាក្សត្រ និង​សម្តេចម៉ែ យាង​និវត្ត​មកពី​ប្រទេស​ចិន​៖
​កាលពី​ថ្ងៃ​ចន្ទ ទី​១១ ខែឧសភា ឆ្នាំ​២០២០ ព្រះករុណា ព្រះបាទ​សម្ដេច​ព្រះបរមនាថ នរោត្តម សីហមុនី ព្រះមហាក្សត្រ នៃ​ព្រះរាជាណាចក្រ​កម្ពុជា និង​សម្ដេច​ព្រះវររាជ​មាតា បាន​សម្ដេច​យាង​មាតុភូមិនិវត្តន៍ មកកាន់​មាតុប្រទេស​វិញ​ហើយ បន្ទាប់ពី​បាន​យាង​ពិនិត្យ​ព្រះរាជសុខភាព នៅ​ទីក្រុង​ប៉េកាំង សាធារណៈរដ្ឋ​ប្រជាមានិត​ចិន​។ ឥស្សរជន​ថ្នាក់ដឹកនាំ​ជាតិ​កំពូលៗ ព្រះ​ញាតិវង្សានុវង្ស ជាច្រើន បាន​យាង និង​អញ្ជើញ​ទទួល​ព្រះរាជដំណើរ​ព្រះអង្គ នៅ​អាកាសយានដ្ឋាន​អន្តរជាតិ​ភ្នំពេញ​។​

៤-​ព្រះមហាក្សត្រ ព្រះរាជទាន​លើកលែងទោស​លោក ស៊ុត ឌី​ណា​៖
​កាលពី​ថ្ងៃទី​១២ ខែឧសភា ឆ្នាំ​២០២០ ព្រះករុណា ព្រះមហាក្សត្រ បានចេញ​ព្រះរាជក្រឹត្យ លើកលែងទោស​ដល់​លោក ស៊ុត ឌី​ណា អតីត​ឯកអគ្គរដ្ឋទូត​កម្ពុជា ប្រចាំ​ប្រទេស​កូរ៉េខាងត្បូង​។ លោក ស៊ុត ឌី​ណា ត្រូវបាន​ចាប់ឃុំខ្លួន និង​កាត់ទោស​ពីបទ​ពុករលួយ កាលពី​ថ្ងៃទី​៤ ខែមេសា ឆ្នាំ​២០១៦​។ មាន​អាយុ ៤៥​ឆ្នាំ លោក ស៊ុត ឌី​ណា ត្រូវបាន​តុលាការ ផ្តន្ទាទោស​ដាក់ពន្ធនាគា​រ ៥​ឆ្នាំ និង​ពិន័យ ១០​លាន​រៀល​។

​លោក ស៊ុត ឌី​ណា អតីត​ឯកអគ្គរដ្ឋទូត​កម្ពុជា ប្រចាំ​ប្រទេស​កូរ៉េខាងត្បូង​

៥-​កម្ពុជា​អនុញ្ញាត​ឲ្យ​នាំចេញ​អង្ករ ទៅ​បរទេស​ឡើងវិញ​៖
​រាជរដ្ឋាភិបាល​កម្ពុជា តាមរយៈ​ក្រសួង​សេដ្ឋកិច្ច និង​ហិរញ្ញវត្ថុ បានសម្រេច​អនុញ្ញាតអោយ​នាំចេញ​អង្ករ ទៅកាន់​ទីផ្សារ​បរទេស​ឡើងវិញ​ហើយ ចាប់ពី​ថ្ងៃទី​២០ ខែឧសភា ឆ្នាំ​២០២០ តទៅ បន្ទាប់ពី​ផ្អាក​ការនាំចេញ​ជាង ១​ខែ ក្រោម​ហេតុផល ដើម្បី​ធានា​នូវ​សន្តិសុខ​ស្បៀង​របស់​កម្ពុជា នៅ​គ្រា​ដែល​កម្ពុជា ទទួលរង​ឥទ្ធិពល​វិបត្តិ​ជំងឺ​កូ​វីដ​១៩​។​

៦-​លោក ខៀវ ភិរម្យ ទីប្រឹក្សា​ក្រសួង​ព័ត៌មាន ទទួលមរណភាព​៖
​លោក ខៀវ ភិរម្យ ទីប្រឹក្សា​ក្រសួង​ព័ត៌មាន បានទទួល​មរណភាព ក្នុង​ជន្មាយុ ៦២​ឆ្នាំ ដោយ​រោគាពាធ កាលពី​ព្រឹក​ព្រលឹម​ថ្ងៃទី​១៥ ខែឧសភា ឆ្នាំ​២០២០​។ ចាប់ផ្តើម​អាជីព​ជា​អ្នកកាសែត កាលពី​ឆ្នាំ​១៩៩៣ លោក​ខៀវ​ភិរម្យ បាន​បម្រើ​ការងារ​ក្នុង​អង្គភាព​សារព័ត៌មាន​ជាច្រើន​។ ចុងក្រោយ លោក ខៀវ ភិរម្យ ធ្វើការ​ងារ​នៅ​ទូរទស្សន៍ PNN ចាប់តាំងពី​ថ្ងៃទី​២០ ខែមេសា ឆ្នាំ​២០១៥​។ នៅ​ព្រឹក​ថ្ងៃទី​១៧ ខែឧសភា សព​លោក ខៀវ ភិរម្យ ដង្ហែ ទៅ​បូជា នៅ​វត្ត​និរោធ ក្នុង​ខណ្ឌ​ច្បារអំពៅ​។​

៧-​យុទ្ធនាការ​ដោះស្រាយ​ការកកស្ទះ​សំណុំរឿង នៅ​តុលាការ​៖
​កាលពី​ថ្ងៃ​ចន្ទ ទី​១៨ ខែឧសភា ឆ្នាំ​២០២០ រដ្ឋមន្ត្រី​ក្រសួងយុត្តិធម៌ លោក កើត រិ​ទ្ធ បានប្រកាស​បើក​យុទ្ធនាការ ដោះស្រាយ​ការកកស្ទះ​សំណុំរឿង នៅតាម​សាលាដំបូង​រាជធានី​-​ខេត្ត នៅ​ទូទាំងប្រទេស​។ យុទ្ធនាការ ដែលមាន​រយៈពេល​ពី ៦ ទៅ ៩​ខែ​នេះ នឹងចូលរួម​ចំណែក​ដោះស្រាយ​ភាព​ចង្អៀត​ណែន​នៃ​អ្នក​ជាប់ឃុំ នៅតាម​ពន្ធនាគារ ព្រមទាំង​លើកកម្ពស់​សមត្ថភាព​ស្ថាប័ន​តុលាការ ក្នុង​ការផ្តល់សេវា​យុត្តិធម៌​ជូន​ដល់​ប្រជាពលរដ្ឋ ឲ្យ​កាន់តែ​ប្រសើរ​។ ក្នុង​យុទ្ធនាការ​នេះ ក្រសួងយុត្តិធម៌ បានដាក់​ចេញ​នូវ​អភិក្រម ២ គឺ «​ដោះស្រាយ​តាមផ្លូវ​ច្បាប់​» និង «​ជៀសវាង ត្រីងៀត ឆ្លៀត​ពង​»​។​

៨-​បើក​ដំណើរការ​សារមន្ទីរ​ឡើងវិញ​៖
​កាលពី​ថ្ងៃទី​២០ ខែឧសភា រាជរដ្ឋាភិបាល​កម្ពុជា តាមរយៈ​ក្រសួងសុខាភិបាល បានអនុញ្ញាត​ឲ្យ​បើក​ដំណើរការ​សារមន្ទីរ​នានា ជូន​ភ្ញៀវទេសចរ​ជាតិ និង​អន្តរជាតិ ចូល​ទស្សនា​ឡើងវិញ ចាប់ពី​ខែមិថុនា ឆ្នាំ​២០២០ តទៅ​។ ក៏ប៉ុន្តែ​នៅ​សារមន្ទីរ​ទាំងនោះ ត្រូវអនុវត្ត​វិធានការ​អនាម័យ ដើម្បី​ការពារ និង​ទប់ស្កាត់​ការឆ្លង​រីក​រាលដាល​ជំងឺ​កូ​វីដ​១៩ រួមមាន ការ​វាស់​កម្តៅ​អ្នក​ចូល​ទស្សនា លាងដៃ​នឹង​សាប៊ូ អាល់កុល ឬ​ជែ​ល​សម្លាប់​មេរោគ និង​ការរក្សា​គម្លាត ជាដើម​។​

៩-​កម្ពុជា អនុញ្ញាត​ឲ្យ​ជនបរទេស​មកពី​អ៊ីរ៉ង់ អ៊ីតាលី អាល្លឺម៉ង់ អេ​ស្ប៉ា​ញ បារាំង និង​អាមេរិក ចូល​កម្ពុជា​ឡើងវិញ​៖
​ក្រសួងសុខាភិបាល នៅ​ថ្ងៃទី​២០ ខែឧសភា បានចេញ​សេចក្តីប្រកាស​ព័ត៌មាន អនុញ្ញាត​ឲ្យ​ជនបរទេស មកពី​ប្រទេស​ចំនួន ៦ រួមមាន អ៊ីរ៉ង់ អ៊ីតាលី អាល្លឺម៉ង់ អេ​ស្ប៉ា​ញ បារាំង និង​អាមេរិក អាច​ចូលមក​ប្រទេស​កម្ពុជា​ឡើងវិញ ក្រោយពី​ជនបរទេស​ទាំង ៦ ប្រទេស​នេះ ត្រូវបាន​រាជរដ្ឋាភិបាល​កម្ពុជា បិទ​មិនឱ្យ​ចូលមក​កម្ពុជា ចាប់តាំងពី​ពាក់កណ្តាល​ខែមីនា ឆ្នាំ​២០២០ កន្លងទៅ ក្រោម​ហេតុផល ដើម្បី​ទប់ស្កាត់​ការឆ្លង​រីក​រាលដាល​ជំងឺ​កូ​វីដ​១៩​។​

១០-​កម្ពុជា​បើក​ឲ្យ​ដំណើរការ​វិស័យ​កីឡា​ឡើងវិញ​៖
​នៅ​ថ្ងៃទី​២២ ខែឧសភា ឆ្នាំ​២០២០ រាជរដ្ឋាភិបាល តាមរយៈ​ក្រសួងសុខាភិបាល បានអនុញ្ញាត​ឲ្យ​ដំណើរការ​ឡើងវិញ ជា​ជំហានៗ សម្រាប់​វិស័យ​កីឡា​មួយចំនួន​។ ក៏ប៉ុន្តែ​ការបើក​ឲ្យ​មានការ​ប្រកួត​កីឡា​ឡើងវិញ​នេះ ត្រូវអនុវត្ត​តាម​លក្ខ​ខណ្ឌ​មួយចំនួន ដើម្បី​ចូលរួម​ការពារ និង​ទប់ស្កាត់​ការឆ្លង​រាលដាល​ជំងឺ​កូ​វីដ​១៩​។​

១១-​កម្ពុជា​តវ៉ា​នឹង​វៀតណាម ដែល​សាងសង់​តង់​យោធា​តាម​ព្រំដែន​៖
​អាជ្ញាធរ​វៀតណាម បាន​រុះរើ​តង់​យោធា​ទាំង ៣១​កន្លែង ចេញពី​តំបន់​ព្រំដែន មិនទាន់​ដាច់ស្រេច ជាមួយ​កម្ពុជា នៅ​តំបន់​ព្រំដែន​ក្នុង​ខេត្តកណ្តាល​ហើយ​។ ការរុះរើ​តង់​យោធា​ពី​សំណាក់​ភាគី​វៀតណាម​នេះ បានធ្វើ​ឡើង បន្ទាប់ពី​ក្រសួងការបរទេស​កម្ពុ​ជា បាន​ផ្ញើ​កំណត់​ទូត​តវ៉ា ទៅ​រដ្ឋាភិបាល​វៀតណាម ដោយ​ចាត់ទុក​សកម្មភាព ដែល​វៀតណាម បង់​តង់​នៅ​តំបន់​ព្រំដែន​មិនទាន់​ដាច់ស្រេច​នេះ ថា​ជាការ​បំពាន​កិច្ចព្រមព្រៀង​រវាង​ប្រទេស​ទាំងពីរ​។​

១២-​ក្រដាសប្រាក់​ដុល្លារ ប្រភេទ ១​ដុល្លារ ២​ដុល្លារ និង ៥​ដុល្លារ ចាយ​ធម្មតា​៖
​កាលពី​ថ្ងៃទី​២៩ ខែឧសភា សម្តេច​តេ​ជោ នាយករដ្ឋមន្ត្រី ហ៊ុន សែន បានប្រកាស​ឲ្យ​បន្ត​ចាយ​ក្រដាសប្រាក់​ដុល្លារ​អាមេរិក ប្រភេទ ១​ដុល្លារ ២​ដុល្លារ និង ៥​ដុល្លារ ជាធម្មតា នៅក្នុង​ប្រទេស​កម្ពុជា​។ សម្តេច ហ៊ុន សែន បានប្រកាស សូម​បងប្អូន​ប្រជាពលរដ្ឋ បន្ត​ប្រើប្រាស់​ចាយវាយ​ក្រដាសប្រាក់​អាមេរិក​ប្រភេទ ១​ដុល្លារ ២​ដុល្លារ និង ៥​ដុល្លារ ដោយ​សេរី ដោយ​គ្មាន​ការ​កាត់ទឹក ឬ​កាត់​ផុ​ក​អ្វី​ទាំងអស់​។

​ការបញ្ជាក់​ពី​ប្រមុខ​រាជរដ្ឋាភិបាល​ដូច្នេះ បន្ទាប់ពី​ធនាគារជាតិ កាលពី​ថ្ងៃទី​២៨ ខែឧសភា បានប្រកាសថា នៅពេល​ខាងមុខ ធនាគារជាតិ នឹង​ផ្អាក​ការទទួលយក​ក្រដាសប្រាក់​ដុល្លារ​អាមេរិក​ទាំង ៣ ប្រភេទ​នេះ ពី​គ្រឹះស្ថាន​ធនាគារ និង​ហិរញ្ញវត្ថុ​។ ភ្លាមៗ ហាង​លក់ទំនិញ និង​ក្រុម​អ្នកលក់ ចែកចាយ​ផលិតផល​នានា ឈប់​ទទួល​យកលុយ​ដុល្លារ​អាមេរិក ប្រភេទ​ក្រដាស ១​ដុល្លារ ២​ដុល្លារ និង ៥​ដុល្លារ ចាប់ពី​តាំងពី​ថ្ងៃទី​២៨​ឧសភា​។ ក៏ប៉ុន្តែ កាលពី​ថ្ងៃទី​២៩​ឧសភា សម្តេច​តេ​ជោ ហ៊ុន សែន បានប្រកាស​ឲ្យ​ប្រជាពលរដ្ឋ បន្ត​ចាយ​ក្រដាសប្រាក់​ដុល្លារ​ទាំងនេះ ជាធម្មតា​។​

១២-​ផ្លាស់ប្តូរ​អភិបាលខេត្ត​កែប​៖
​កាលពី​ថ្ងៃទី​២៩ ខែឧសភា លោក សោម ពិសិដ្ឋ បាន​ចូលកាន់​តំណែង ជា​អភិបាលខេត្ត​កែប ជំនួស​លោក កែន ស​ត្ថា ដែល​ត្រូវបានតែងតាំង​ជា​រដ្ឋលេខាធិការ​ទីស្តីការគណៈរដ្ឋមន្ត្រី​។ សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​អញ្ជើញ​ជា​អធិបតី​ដ៏​ខ្ពង់ខ្ពស់​ក្នុង​ពិធី​ប្រកាស​ចូលកាន់​តំណែង​អភិបាលខេត្ត​កែប​នេះ​។​

១៣-​កងទ័ព​មួក​ខៀវ​ម្នាក់ ស្លាប់​ដោយសារ​កូ​វីដ នៅ​ប្រទេស​ម៉ាលី​៖
​កាលពី​ថ្ងៃទី​២៩ ខែឧសភា ឆ្នាំ​២០២០ កងកម្លាំង​រក្សា​សន្តិភាព​របស់​កម្ពុជា​ម្នាក់ ដែល​កំពុង​បំពេញបេសកកម្ម​រក្សា​សន្តិភាព​របស់​អង្គការសហប្រជាជាតិ នៅ​ប្រទេស​ម៉ាលី បាន​ស្លាប់ ដោយ​ជំងឺ​កូ​វីដ​១៩​។ កងកម្លាំង​មួក​ខៀវ​កម្ពុជា ដែល​បាន​បាត់បង់​ជីវិត ដោយសារ​ជំងឺ​កូ​វីដ​១៩​នេះ មានឈ្មោះ ស សា​វី អាយុ ៦៣​ឆ្នាំ ជា​ឧ​ត្ត​ម​សេនីយ៍​ទោ មាន​ស្រុកកំណើត​នៅ​ឃុំ​ម្កាក់ ស្រុក​អង្គស្នួល ខេត្តកណ្តាល​។ លោក​បាន​ចេញទៅ​បំពេញបេសកកម្ម​របស់​អង្គការសហប្រជាជាតិ ចំនួន ២​ដង នៅ​ឆ្នាំ​២០១៦ និង​ឆ្នាំ​២០១៩​។​

​ភ្លាមៗ​នោះ កងកម្លាំង​មួក​ខៀវ​កម្ពុជា ដែល​កំពុង​បំពេញបេសកកម្ម​នៅក្រៅ​ប្រទេស បាន​ឆ្លង​ជំងឺ​កូ​វីដ​១៩ មាន​ចំនួន ១០​នាក់​។ ក្រោយមក ត្រូវបាន​ព្យាបាល​ជាសះស្បើយ​វិញ​៕​

ទីតាំងផ្សាយពាណិជ្ជកម្ម

- Advertisment -

Most Popular