បុរស​១១​នាក់​ត្រូវបាន​ចោទប្រកាន់​ពី​បទ​រំលោភ​សម្លាប់​អ្នក​បម្រើ​តាម​យន្តហោះ​ម្នាក់​នៅ​ហ្វីលីពីន​

​ប្រែ​សម្រួល : កញ្ញា​ដា​លី​ស ៖ បុរស​១១​នាក់​ត្រូវបាន​ចោទប្រកាន់​ពី​បទ​រំលោភ​សេពសន្ថវៈ​និង​មនុស្សឃាត បន្ទាប់​ពី​អ្នក​បម្រើ​តាម​យន្តហោះ​ម្នាក់​ត្រូវបាន​រកឃើញ​ស្លាប់​នៅក្នុង​បន្ទប់​សណ្ឋាគារ​។​

​កាលពី​ថ្ងៃ​អង្គារ​ទី​០៥​មករា ប៉ូលិស​នៅ​ទីក្រុង​ម៉ា​កា​ទី​ប្រទេស​ហ្វីលីពីន​បាន​ចោទប្រកាន់​បុរស​ទាំង​នោះ បន្ទាប់ពី​នាង គ្រីស្ទី​ន អេន​ជេ​លីកា ដា​សេ​រ៉ា អាយុ ២៣​ឆ្នាំ​ត្រូវបាន​ប្រទះឃើញ​ដេកស្លាប់​នៅក្នុង​​អាង​ងូតទឹក​នៅ​ថ្ងៃ​បុណ្យចូលឆ្នាំថ្មី​។​

​គ្រីស្ទី​ន មកពី​ទីក្រុង​ជេ​ណេរ៉ាល់​សាន់​តូ​ស​ស៊ីធី បាន​ធ្វើ​ពិធី​អបអរ​ឆ្លង​ឆ្នាំ​នៅ​សណ្ឋាគារ​ស៊ី​ធី​ហ្គា​ឌែន​ជាមួយ​មិត្តភក្តិ​មុនពេល​នាង​ស្លាប់​។​

​មេ​ប៉ូលិស​ក្រុង​លោក ហា​រ៉ូល ដេ​ផូស៊ី​ថា បានបញ្ជាក់​ថា បុរស​ចំនួន ១១ នាក់ ដែល​បាន​នៅ​ជាមួយ​នារី​រងគ្រោះ​នៅពេលដែល​នាង​ស្លាប់​នោះ ត្រូវបាន​ចោទប្រកាន់​។​

​ទោះយ៉ាងណា ការចោទប្រកាន់​គឺ​មាន​លក្ខណៈ​បណ្តោះអាសន្ន ខណៈ​ដែល​ប៉ូលិស​រង់ចាំ​ការ​ធ្វើ​កោសល្យវិច័យ​លើ​សាកសព​នាង​គ្រីស្ទី​ន​រួចរាល់​សិន​។​

​លោក​វរសេនីយ៍ឯក​ដេ​ផូស៊ី​ថា​បាន​ប្រាប់​កាសែត The Philippine Daily Inquirer ថា បុរស​ភាគច្រើន​ជា “​អ្នក​ចម្លែក​” ចំពោះ​នារី​អាយុ ២៣ ឆ្នាំ​។​

​គាត់​និយាយថា “​មាន​តែ​ពីរ​បី​នាក់​ប៉ុណ្ណោះ​ដែលជា​មិត្តភក្តិ​របស់​នាង​ដា​សេ​រ៉ា​។ អ្នក​ផ្សេង​ទៀត​គឺជា​មនុស្ស​ចម្លែក​ចំពោះ​នាង ពីព្រោះ​ពួកគេ​ស្គាល់​មិត្តភក្តិ​ពីរ​បី​នាក់​របស់​នាង​ប៉ុណ្ណោះ​”​។​

​ការចោទប្រកាន់​នេះ​បាន​កើត​ឡើង​បន្ទាប់ពី “​ការ​ដាច់រ​ហែក​និង​ទឹកកាម​” ត្រូវបាន​រកឃើញ​នៅ​តំបន់​ឯកជន​របស់​ជនរងគ្រោះ​។​សាកសព​របស់​នាង​ក៏​ពោរពេញ​ទៅ​ដោយ​ស្នាម​ជាំ​និង​ស្នាម​ដាច់​រយះ​​ផងដែរ​។​

​អ្នកបម្រើ​វ័យក្មេង​របស់​ក្រុមហ៊ុន​អាកាសចរណ៍​ហ្វីលីពីន​រូបនេះ​ត្រូវបាន​បញ្ជូន​ទៅ​មន្ទីរពេទ្យ​ដោយ​មិត្តភក្តិ​បី​នាក់​ដែល​បាន​រក​ឃើញ​នាង​សន្លប់​នៅក្នុង​បន្ទប់ទឹក​។​

​ពួកគេ​បាន​ធ្វើ​សកម្មភាព​សង្គ្រោះ​បឋម​ដល់​នាង ប៉ុន្តែ​នាង​មិន​បាន​ឆ្លើយតប​ទេ និ ត្រូវបាន​ប្រកាស​ស្លាប់​នៅពេល​ទៅ​មក​ដល់​មន្ទីរពេទ្យ​ក្រុង​ម៉ា​កា​ទី​។​

​តាម​សេចក្តីរាយការណ៍​មិត្តភក្តិ​របស់​នាង​បាន​ប្រទះ​ឃើញ​នាង​ជា​លើកដំបូង​នៅក្នុង​អាង​ងូតទឹក​នៅ​ពេលយប់ ប៉ុន្តែ​គាត់​ស្មានថា​នាង​កំពុង​ដេកលក់ ហើយ​ក៏​យក​ភួយ​ដណ្តប់​ឱ្យ​នាង​។​

​ការរំលែក​ទុក្ខ​មាន​ជា​ហូរហែ​ចំពោះ​អ្នក​បម្រើ​តាម​យន្ដហោះ​រូបនេះ​នៅលើ​បណ្តាញ​សង្គម Instagram បន្ទាប់​ពី​ព័ត៌មាន​នៃ​ការស្លាប់​របស់​នាង​បាន​លេចឡើង​។​

​អ្នកគាំទ្រ​ម្នាក់​បាន​សរសេរថា “​អរគុណ​សម្រាប់​ការចែករំលែក​ដួងព្រលឹង​ដ៏​ស្រស់​ស្អាត​របស់​អ្នក​។ សូម​ហោះ​ឱ្យបាន​ខ្ពស់​។ យើង​សូម​អធិស្ឋាន​ដល់​ដួងព្រលឹង​របស់​អ្នក​”៕

​នាង គ្រីស្ទី​ន អេន​ជេ​លីកា ដា​សេ​រ៉ា ត្រូវ​បុរស​១១​នាក់​រំលោភ​សម្លាប់

ទីតាំងផ្សាយពាណិជ្ជកម្ម

- Advertisment -

Most Popular