​អ្នកទេសចរ ចាប់ផ្តើម​កើនឡើង​វិញ​ហើយ តើ​រក្សា​តាម​វិធី​ណា​?

ដោយៈ​ម៉េង​ឆៃ / ភ្នំពេញៈ ក្រសួងទេសចរណ៍ បានប្រកាស​កាលពី​ព្រឹក​ថ្ងៃទី​៥ ខែមករា​នេះ ថា ក្នុង​រយៈពេល ៤​ថ្ងៃ កំឡុងពេល​ឆ្លង​ឆ្នាំ​សកល គិត​ចាប់ពី​ថ្ងៃទី​៣១ ខែធ្នូ ឆ្នាំ​២០២០ រហូតដល់​ថ្ងៃអាទិត្យ ទី​៣ ខែមករា ឆ្នាំ​២០២១ កម្ពុជា ទទួលបាន​ភ្ញៀវទេសចរ ១ ២៧៩ ១២៨ នាក់​។ ក្នុងនោះ ភ្ញៀវ​ជាតិ មាន​ចំនួន ១ ២៦៨ ០២៥ នាក់ និង​ភ្ញៀវ​បរទេស​ផ្ទៃក្នុង មាន​ចំនួន ១១ ១០៣ នាក់​។​

រូបថតក្រសួងទេសចរណ៍

​ក្រសួងទេសចរណ៍ បានលើកឡើង​នូវ​ចំនួន​អ្នកទេសចរ ដែល​បាន​ដើរលេង​កម្សាន្ត ក្នុងអំឡុងពេល​បុណ្យចូលឆ្នាំថ្មី ឆ្នាំ​សកល កាលពី​ចុង​សប្តាហ៍​មុន នៅតាម​គោលដៅ​ទេសចរណ៍​សំខាន់ៗ រួមមាន​៖ នៅ​ភ្នំពេញ ទទួលបាន​អ្នកទេសចរ​ច្រើនជាងគេ រហូតដល់ ៥១៦ ០៩៥ នាក់ បន្ទាប់មក​នៅ​ខេត្តកំពត ១៥២ ១១៩​នាក់ ខេត្ត​ព្រះសីហនុ ១៣៦ ៣១៤​នាក់ ខេត្ត​កែប មាន​ចំនួន ៨៧ ៧៣៧ នាក់ ខេត្តសៀមរាប ៧៧ ៦១៨ នាក់ ខេត្តកំពង់ស្ពឺ ៤៦ ០៣០ នាក់ ខេត្តបាត់ដំបង ៤២ ៨៥០ នាក់ ខេត្តកោះកុង ៣១ ៨៧៩ នាក់ ខេត្តកំពង់ចាម ២៧ ១៨៧ នាក់ និង​ខេត្តកណ្តាល ២៦ ៩៤០ នាក់​។

​ក្រសួងទេសចរណ៍ បាន​កត់សម្គាល់ថា ដោយសារ​ព្រឹត្តិការណ៍​សហគមន៍ ២៨ វិច្ឆិកា ត្រូវបាន​បិទ​បញ្ចប់ កាលពី​ថ្ងៃទី​២៩ ខែធ្នូ ឆ្នាំ​២០២០ នាំ​ឲ្យ​ចលនា​ទេសចរណ៍​ផ្ទៃក្នុង នាឱកាស​ឆ្លង​ឆ្នាំ​សកល​នេះ មាន​ភាព​ផុលផុស​ច្រើន នៅតាម​គោលដៅ​ទេសចរណ៍​នានា​ទូទាំងប្រទេស បើទោះបី​មិនមាន​ការរៀបចំ​ពិធី​ទទួល​ឆ្នាំ​ថ្មី ការប្រគំ​តន្ត្រី និង​ការជួបជុំ​ជា​ទ្រង់ទ្រាយ​ធំ​ក៏ដោយ​។​

​ក្រសួងទេសចរណ៍​បន្ត​ថា​គ្រប់​គោលដៅ​ទេសចរណ៍​និង​មូលដ្ឋាន​អាជីវកម្ម​ទេសចរណ៍​បាន​ខិតខំ​អនុវត្តន៍​តាម​ប្រសាសន៍​ណែនាំ​របស់​សម្តេច​តេ​ជោ​នាយករដ្ឋមន្ត្រី តាម​គោល​ណែនាំ​របស់​ក្រសួងសុខាភិបាល និង​វិធាន​សុវត្ថិភាព​ទេសចរណ៍​របស់​ក្រសួងទេសចរណ៍​។

រូបថតក្រសួងទេសចរណ៍

​ក្នុងអំឡុងពេល​ឈប់សម្រាក​ចូលឆ្នាំ​សកល​នេះ ក្រុមការងារ​របស់​គ​ណៈ​បញ្ជាការ​ឯកភាព​រា​ជ​ធានី​-​ខេត្ត បាន​ចុះ​ពិនិត្យ​និង​ណែនាំ​ដល់ ភ្ញៀវទេសចរ និង​ប្រជាពលរដ្ឋ ដើម្បី​បញ្ជៀ​ស​ការជួបជុំ​ទ្រង់ទ្រាយ​ធំ និង​កកកុញ​មាន​មនុស្ស​ច្រើន ប៉ុន្តែ​ទោះជា​យ៉ាងណាក៏ដោយ ក៏​ការអនុវត្ត​វិធាន​សុវត្ថិភាព​ទេសចរណ៍​ពាក់ព័ន្ធ​ជំងឺ​កូ​វីដ​-១៩​នេះ នៅ​មិនទាន់មាន​ភាព​ពេញលេញ​ទាំងស្រុង​នៅឡើយ ពិសេស​ការរក្សា​គម្លាត​សុវត្ថិភាព នៅតាម​គោលដៅ​ទេសចរណ៍​មួយចំនួន ដែលមាន​លក្ខណៈ​ប្រមូលផ្តុំ​ច្រើន​។ កិច្ចការ​នេះ ក្រសួងទេសចរណ៍ នឹង​បន្ត​ការរៀបចំ​ជាមួយ​រដ្ឋបាល​រាជធានី​-​ខេត្ត​ឲ្យ​កាន់តែ​ម៉ឺងម៉ាត់​បន្ថែមទៀត​។​

​ជាមួយគ្នានេះ ក្រសួងទេសចរណ៍ ក៏បាន​ប្រកាសថា ចំពោះ​ការគ្រប់គ្រង​សន្តិសុខ សណ្ដាប់ធ្នាប់​ជាទូទៅ ក្នុងអំឡុងពេល​ឆ្លង​ឆ្នាំ​សកល នៅ​កម្ពុជា មាន​ភាពល្អប្រសើរ មិនមាន​បញ្ហា ឬ​ការរំខាន​ណាមួយ​កើតឡើង គួរកត់សម្គាល់​ទេ ក្នុង​រយៈពេល ៤​ថ្ងៃនេះ​។

​រីឯ​ការគ្រប់គ្រង​សំរាម នៅតែ​ជា​បញ្ហា​ប្រឈម ជាពិសេស​នៅ​យប់​ឆ្លង​ឆ្នាំ ដោយ​ប្រជាពលរដ្ឋ​មួយចំនួន មិនបាន​ទុក​សំរាម ឲ្យ​បាន​ត្រឹមត្រូវ ដោយ​ទុកចោល​នៅ​កន្លែង​ទទួលទាន​អាហារ​ជុំគ្នា ពិសេស​គោលដៅ​ទេសចរណ៍​ដែលមាន​ការជួបជុំ​ច្រើន ដូចជា នៅ​តំបន់​ឆ្នេរសមុទ្រ និង​ទីប្រជុំជន​ក្នុង​រាជធានី​-​ខេត្ត ជាដើម​។ ប៉ុន្តែ​រដ្ឋបាល​រាជធានី​-​ខេត្ត បាន​ខិតខំ​ចាត់​កម្លាំង​ប្រមូល​ទុកដាក់​សំរាម​នេះ នា​ព្រឹក​បន្ទាប់ ដោយ​ពុំ​ធ្វើ​ឲ្យ​ប៉ះពាល់​ដល់​សោភ័ណភាព​គោលដៅ​ទេសចរណ៍​ឡើយ​។​

រូបថតក្រសួងទេសចរណ៍

​បញ្ហា​សំរាម ក្នុងពេល​បុណ្យទាន​នេះ នៅតែ​បន្ត​កើតឡើង ហើយក៏​បង្កឡើង​ដោយ​មនុស្ស និង​ជា​បញ្ហា ដែល​អាច​ការពារ និង​ជៀសវាង​បាន​។ សូម្បីតែ​នៅមុខ​វាំង ក្នុង​រាជធានី​ភ្នំពេញ នៅពេល​ព្រលប់ៗ ដែលមាន​អ្នក​ទៅលេង​ច្រើន ក៏​កើតជា​សំរាម ថង់​ផ្លា​ស្ទិ​ក ដប​ទឹក​សុទ្ធ ប្រអប់​ស្នោរ កែវ​ជ័រ ជាដើម នៅ​រប៉ាត់រប៉ាយ​តាមផ្លូវ និង​សួនច្បារ គ្មាន​សណ្តាប់ធ្នាប់​ទាល់តែសោះ​។​

​កាកសំណល់​សំរាម​ទាំងនេះ បង្កឡើង​ដោយ​ក្រុម​អ្នក​ទទួលទាន ដែល​បាន​វេច​ខ្ចប់​ចំណីអាហារ ទៅ​អង្គុយ​ទទួលទាន លើ​សួនច្បារ និង​ទិញ​របស់របរ​លក់ដូរ ប្រហិត​ចៀន ជាដើម ដែល​លក់​ទៅ​ទីនោះ​។​

​វិធី​ងាយស្រួល គឺ​ក្រុម​អ្នក​និយម​ទទួលទាន​ចល័ត​ទាំងនោះ ត្រូវតែ​វេច​ខ្ចប់​កាកសំណល់​ទាំងឡាយ ក្រោយ​បរិភោគ​រួច ហើយ​បើ​មិនបាន​យកទៅ​បោះចោល​ក្នុង​ធុងសំរាម ក៏​គួរតែ​គរ​ទុក​មួយ​ដុំ ដើម្បី​ឲ្យ​ក្រុម​សន្តិសុខ និង​អ្នក​បោសសម្អាត យកទៅ​បោះចោល​ឲ្យ​។​

​ម្យ៉ាងទៀត ក្រុម​អ្នកលក់ដូរ​ចល័ត នៅតាម​សួនច្បារ និង​កន្លែង​កម្សាន្ត​នានា ត្រូវ​បង្កើន​ការទទួលខុសត្រូវ​រប​ស់​ខ្លួន ក្នុង​ការធ្វើ​អនាម័យ សម្អាត ហើយ​ត្រូវ​ធានាថា កន្លែង​ខ្លួន​លក់ដូរ គឺ​មិនមាន​កាកសំណល់ ថង់​ផ្លា​ស្ទីក ប្រអប់​ស្នោរ នៅ​រាយប៉ាយ​ឡើយ​។​

​ចំណែក​អាជ្ញាធរ​សមត្ថកិច្ច​វិញ ក៏​គួរតែបង្កើត និង​ដាក់ពង្រាយ​ធុងសំរាម នៅតាម​តំបន់​កម្សាន្ត ពិសេស​សួនច្បារ​ទីសាធារណៈ ព្រោះថា នៅ​សួនច្បារ​មុខ​វាំង មិនមាន​សោះឡើយ ធុងសំរាម​។ ធុងសំរាម មានតែ​នៅ​មាត់ទន្លេ ខាងត្បូង​ព្រះ​អង្គដ​ង្កើ ហើយ​ពោរពេញ​ដោយ​សំរាម ឡើង​ហូរហៀរ​ទៀត​។ ដូច្នេះ​ចង់​មិន​ចង់ បើ​គ្មាន​ធុងសំរាម​ផង អ្នក​ទៅលេង​មុខ​វាំង សម​នឹង​អត់​មាយា​ទ​ផង ក៏​មិនដឹង​កាន់​ដើរ​យក​កាកសំណល់ ទៅ​បោះចោល​នៅឯណា គឺ​មានតែ​បន្សល់ទុក​កាកសំណល់​សំរាម នៅ​កន្លែង​ស៊ីចុក​ហ្នឹង​តែម្តងទៅ​។​

​និយាយ​ពី​គ្រោះថ្នាក់​ចរាចរណ៍ នៅ​ទូទាំងប្រទេស ក្នុងអំឡុងពេល​ឈប់សម្រាក​ចូលឆ្នាំ​សកល ៤​ថ្ងៃ ចាប់ពី​ថ្ងៃទី​៣១ ខែធ្នូ ឆ្នាំ​២០២០ ដល់​ថ្ងៃទី​៣ ខែមករា ឆ្នាំ​២០២១ បានកើត​ឡើង ៤០​លើក បណ្តាល​ឲ្យ​ស្លាប់ ២៤​នាក់ និង​របួស ៤៩​នាក់​។ ក្នុងនោះ អ្នកធ្វើដំណើរ​តាម​ម៉ូតូ ១៤​នាក់ ស្លាប់​ដោយ​គ្រោះថ្នាក់​ចរាចរណ៍ រយៈពេល ៤​ថ្ងៃនេះ​។​

​របាយការណ៍​របស់​ន​គ​របាល​ចរាចរណ៍ និង​សណ្តាប់ធ្នាប់​សាធារណៈ បង្ហាញថា នៅ​ថ្ងៃទី​៣១ ខែធ្នូ ឆ្នាំ​២០២០ គ្រោះថ្នាក់​ចរាចរណ៍ នៅ​ទូទាំងប្រទេស កើតឡើង ២​លើក បណ្តាល​ឲ្យ​ស្លាប់ ៤​នាក់ និង​របួស ៤​នាក់​។ ក្នុងនោះ អ្នកធ្វើដំណើរ​តាម​ម៉ូតូ​ស្លាប់​ម្នាក់ និង​រថយន្ត​ធំ ៣​នាក់​។ មូលហេតុ ដោយសារ​ល្បឿន​។​

​ថ្ងៃទី​១ ខែមករា ឆ្នាំ​២០២១ គ្រោះថ្នាក់​ចរាចរណ៍ នៅ​ទូទាំងប្រទេស បានកើត​ឡើង ២១​លើក បណ្តាល​ឲ្យ​ស្លាប់ ១០​នាក់ និង​របួស ២៦​នាក់​។ អ្នកស្លាប់ ៦​នាក់ ជា​អ្នកធ្វើដំណើរ​តាម​ម៉ូតូ​។ រីឯ​មូលហេតុ ច្រើនជាងគេ ដោយសារ​ល្បឿន មិន​គោរព​សិទ្ធិ មិន​ប្រកាន់​ស្តាំ បត់​មិន​ប្រយ័ត្ន និង​កត្តា​យាន​។​

​ថ្ងៃទី​២ ខែមករា គ្រោះថ្នាក់​ចរាចរណ៍ នៅ​ទូទាំងប្រទេស បានកើត​ឡើង ៧​លើក បណ្តាល​ឲ្យ​ស្លាប់ ៣​នាក់ និង​របួស ៥​នាក់​។ អ្នកស្លាប់ ម្នាក់ ជា​អ្នកធ្វើដំណើរ​តាម​ម៉ូតូ​។ មូលហេតុ ច្រើនជាងគេ ដោយសារ​បើកបរ​មិន​គោរព​សិទ្ធិ ល្បឿន បត់​មិន​ប្រយ័ត្ន និង​កត្តា​យាន​។​

​នៅ​ថ្ងៃទី​៣ ខែមករា​គ្រោះថ្នាក់​ចរាចរណ៍ នៅ​ទូទាំងប្រទេស បានកើត​ឡើង ១០​លើក បណ្តាល​ឲ្យ​ស្លាប់ ៧​នាក់ និង​របួស ១៤​នាក់​។ ៦​នាក់ ស្លាប់ គឺជា​អ្នកធ្វើដំណើរ​តាម​ម៉ូតូ​។ រីឯ​មូលហេតុ​កើតឡើង​ដដែល គឺ​ច្រើនជាងគេ ដោយសារ​ល្បឿន បើកបរ​មិន​គោរព​សិទ្ធិ មិន​ប្រកាន់​ស្តាំ បត់​មិន​ប្រយ័ត្ន និង​ងងុយដេក​។​

​ចំពោះ​កំណើន​នៃ​អ្នកទេសចរ ដែល​ហាក់ដូចជា​កម្រើក​ឡើងវិញ នៅ​អំឡុងពេល​ចូលឆ្នាំ​សកល​នេះ គឺ​អ្នក​បម្រើសេវា​ទាំងឡាយ រាប់​តាំងពី​អ្នកលក់​ចល័ត អ្នក​ជួល​តូប កន្ទេល​អង្គុយ តាម​កន្លែង​កម្សាន្ត​នានា​ទាំងអស់ ត្រូវតែ​សហការ​ជាមួយ​អាជ្ញាធរ​សមត្ថកិច្ច ដើម្បី​បម្រើសេវា​ល្អ ប្រកបដោយ​អនាម័យ​ដល់​អ្នកទេសចរ​ទាំងអស់ មិន​ថា ខ្មែរ ឬ​បរទេស​នោះទេ​។​

​ពិសេស​ទៅទៀត តម្លៃ​សេវាកម្ម​របស់ខ្លួន ពិសេស​ម្ហូបអាហារ បន្ទប់​ស្នាក់នៅ ជាដើម រួមទាំង​ការដឹកជញ្ជូន​ផង សូមកុំ​កាប់​កោរ នៅ​ថ្ងៃ​បុណ្យទាន​។ បទពិសោធន៍​កន្លងមក ពិសេស​នៅពេល​កូ​វីដ ធ្វើ​ឲ្យ​ស្ងាត់​ភ្ញៀវ​ស្ទើរ​ពេញ​មួយឆ្នាំ​២០២០ កន្លងមកនេះ គឺ​ល្មម​ជា​មេរៀន ដក​ពិសោធន៍​ហើយ​។ ដូច្នេះ​គួរតែ​រក្សា​ចាស់ ហើយ​បង្កើន​ថ្មី​។ ខ្មែរ​យើង ងាប់រ​ស់នឹង​ពាក្យសម្តី ព្រមទាំង​ការយកចិត្ត​នេះហើយ​។ រឿង​ខ្លាច​កូ​វីដ ជា​រឿង​មួយ តែ​ក៏​នៅតែមាន​អ្នកដើរ​លេង ព្រោះ​កូ​វីដ យើង​អាច​បង្ការ​បាន តាម​វិធី​ងាយ​របស់​ក្រសួងសុខាភិបាល ពិសេស​ពាក់​ម៉ាស់ លាង​សម្អាត​ដៃ​ញឹកញាប់ និង​រក្សា​គម្លាត​ពីគ្នា​យ៉ាងតិច ១​ម៉ែត្រ​កន្លះ ជាដើម​។​

​ទន្ទឹមនឹង​វិធានការ​ការពារ​កុំ​ឲ្យ​ឆ្លង​កូ​វីដ និង​ការរក្សា​កំណើន​អ្នកទេសចរ ក្នុងអំឡុងពេល​ឈប់សម្រាក​ដើរលេង ពេល​បុណ្យទាន​ក្នុងស្រុក​យើង គឺ​យើង​ក៏​ត្រូវតែ​ចងចាំ និង​បង្កើន​ការប្រុងប្រយ័ត្ន​បន្ថែមទៀត លើ​បញ្ហា​គ្រោះថ្នាក់​ចរាចរណ៍​។ ចូរ​គិត​បន្តិច​ថា អំឡុងពេល​ឈប់សម្រាក​ចូលឆ្នាំ​សកល ៤​ថ្ងៃនេះ កូ​វីដ មិនបាន​សម្លាប់​ប្រជាជន​កម្ពុជា​ណា​ម្នាក់​ទេ តែ​គ្រោះថ្នាក់​ចរាចរណ៍ បានសម្លាប់​ប្រជាពលរដ្ឋ​ខ្មែរ​យើង ដល់​ទៅ ២៤​នាក់ និង​របួស ៤៩​នាក់​។ នេះ​មិនទាន់​គិតដល់​ការខាតបង់​ទ្រព្យសម្បត្តិ និង​បាត់បង់​ពេលវេលា ព្រមទាំង​ចំណាយ​លើ​បុណ្យសព និង​ព្យាបាល​របួស ដោយសារតែ​គ្រោះថ្នាក់​ចរាចរណ៍​រយៈពេល ៤​ថ្ងៃ​នោះឡើយ​។​

​ដូច្នេះ​សូម​បន្ត​សប្បាយ តែ​ក៏​កុំ​ឲ្យ​សប្បាយ​របស់​យើង ពេល​ដើរលេង​នោះ ក្លាយជា​ទុក្ខ​សម្រាប់​ខ្លួន​យើង​ម្នាក់ៗ​ផង សម្រាប់​គ្រួសារ​ផង និង​នាំទុក្ខ​លំបាក​សម្រាប់​សង្គម​ជាតិ​នោះឡើយ​៕​សរន​

ទីតាំងផ្សាយពាណិជ្ជកម្ម

- Advertisment -



Most Popular