ដោយៈ សរិទ្ធ/កណ្តាលៈ នារសៀលថ្ងៃទី៦ ខែមករា ឆ្នាំ២០២១ នេះ ត្រូវបានកម្លាំង សមត្ថកិច្ចព្រហ្មទណ្ឌកម្រិតធ្ងន់ នៃស្នងការដ្ឋាននគរបាល ខេត្តកណ្តាល បានបញ្ជូន ជនសង្ស័យ ដែលចាក់សម្លាប់នារីម្នាក់ មកដល់អយ្យការ អមសាលាដំបូង ខេត្តកណ្តាល ដើម្បីសាសាកសួរ ករណីចាក់សម្លាប់នារី អាយុ១៨ឆ្នាំនោះ ។
ជនសង្ស័យ ឈ្មោះ ទូច សុជាតិ ហៅ ដំរី ហៅ ម៉ាប់ អាយុ៣៥ឆ្នាំ បានប្រព្រឹត្តអំពើឃាតកម្ម នេះ នៅចំណុចបន្ទប់ជួលលេខ៨ ភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្តាល ។ ចំណែកជនរងគ្រោះ ឈ្មោះ ផេង បញ្ញា ភេទស្រី អាយុ១៨ឆ្នាំ មុខរបរ សិស្ស រៀននៅវិទ្យាល័យហ៊ុនសែន តាខ្មៅ មានលំនៅ បច្ចុប្បន្ន នៅកន្លែងកើតហេតុ ។
ឃាតករដែលចាក់សម្លាប់ក្មេងស្រី អាយុ១៨ឆ្នាំ បានសារភាពប្រាប់សមត្ថកិច្ចថាៈ មូលហេតុដែលខ្លួនយកកាំបិត ចាក់សម្លាប់នារីរងគ្រោះ ឱ្យស្លាប់ ក្នុងថ្លុកឈាមនោះ ដោយសារតែខ្លួន ខ្លាចជាប់គុក ព្រោះនារីរងគ្រោះ បានគំរាមថា នឹងប្រាប់ឪពុកម្ដាយ ឲ្យដឹងពីករណីខ្លួនរំលោភសេពសន្ថវៈ កាលពី ៧ ថ្ងៃមុន។
សាក្សីនៅក្បែរកន្លែងកើតហេតុ បានអោយដឹងថាៈ មុនពេលកើតហេតុជនរងគ្រោះ ស្នាក់នៅក្នុងបន្ទប់ជាមួយក្រុមគ្រួសារមានគ្នា៥នាក់ មានឪពុក ម្តាយ និង ប្អូន២នាក់ទៀត ។ លុះដល់ម៉ោង៦ព្រឹក ថ្ងៃទី៥ ខែមករា ឆ្នាំ២០២១ ឪពុក ម្តាយ បាននាំគ្នាចេញទៅធ្វើការ រោងចក្រ និងប្អូនប្រុស ចេញទៅរៀន ។
ស្រាប់តែម៉ោង ៧ព្រឹកថ្ងៃដដែល បងប្អូនអ្នកជិតខាង នៅជិតនោះ ឮសម្លេងស្រែក នាំគ្នាទៅមើលឃើញ ជនរងគ្រោះដេក ក្នុងថ្លុកឈាមក្នុងបន្ទប់ មានឃើញស្នាមចាក់ ជាច្រើនកាំបិត ក៏នាំគ្នាយកជនរងគ្រោះ ទៅសង្គ្រោះ នៅមន្ទីរពេទ្យបង្អែកជ័យជំនះ តែជនរងគ្រោះ ស្លាប់បាត់ទៅហើយ ។
ក្រោយរឿងហេតុនេះ សមត្ថកិច្ចដែលដឹកនាំបញ្ជាផ្ទាល់ ពីលោកឧត្តមសេនីយ៍ទោ ឈឿន សុចិត្ត ស្នងការនគរបាល ខេត្តកណ្តាល បានស្រាវជ្រាវ យ៉ាងយកចិត្តទុក និងឃាត់ខ្លួន បានឃាតករ ដែលធ្វើជាមកទីតាំងកើតហេតុ ដូចគ្មានរឿងអ្វីកើតឡើង ៕/V-PC
