Home ព័ត៌មានសំខាន់ៗ អគ្គិភ័យ​លេប​...

អគ្គិភ័យ​លេប​ត្របាក់​រោងចក្រ​ផលិត​ចាន​ប្រអប់​ស្នោ​នៅ​សង្កាត់​ចោមចៅ​២ អស់​មួយ​ខ្នង​

​ដោយៈ​ចាន់តូ​/​ភ្នំពេញៈ រោងចក្រ​ផលិត​ចាន​ប្រអប់​ស្នោ BMPP ស្ថិតនៅ​ភូមិ​ព្រៃ​ល្ងរ សង្កាត់​ចោមចៅ​២ ខណ្ឌ​ពោធិ​សែន​ជ័យ ត្រូវបាន​អគ្គិភ័យ​ឆាបឆេះ​យ៉ាង​សន្ធោរ​សន្ធៅ លេប​ត្របាក់ អស់​អគារ​មួយ​ខ្នង ផ្តើមចេញពី​ទុស្សេ​ចរន្តអគ្គិសនី​កាលពី​វេលា​ម៉ោង​៥​ល្ងាច ថ្ងៃទី​០៦ ខែមករា ឆ្នាំ​២០២១​។​

​អាជ្ញាធរ​បាន​ឲ្យ​ដឹងថា រោងចក្រ​ដែល​ឆាបឆេះ​នេះ សង់​ពី​គ្រោង​ដែក ប្រក់​ស័ង្កសី ទំហំ​៣០​ម៉ែត្រ​x៤០​ម៉ែត្រ បន្ទាប់ពី​អគ្គិភ័យ​ឆាបឆេះ ភ្លាមៗ កម្មករ​នាំគ្នា​បាញ់​ទឹក​ដែរ តែ​ទប់ទល់​មិន​ឈ្នះ ព្រោះ​ក្នុង​រោងចក្រ​មាន​សុទ្ធតែ​ជ័រ វត្ថុធាតុដើម​សម្រាប់​ផលិត​ប្រអប់​ចាន​ស្នោ សម្ភារៈ​ផលិត​រួច និង​ម៉ាស៊ីន​ផលិត ដែល​ងាយ​ឆេះ​។​

​ក្នុង​ប្រតិបត្តិការ​ពន្លត់​អគ្គិភ័យ​នេះ រថយន្ត​ពន្លត់​អគ្គិភ័យ​ជាច្រើន​គ្រឿង រថយន្ត​របស់​អង្គភាព​៧១១ កងពលតូច​លេខ​៧០ ចំនួន​៣​គ្រឿង រថយន្ត​សាលាខណ្ឌ​ពោធិ៍​សែន​ជ័យ ចំនួន​២​គ្រឿង រថយន្ត​របស់​ស្នងការ​ក្រុងភ្នំពេញ សហ​ការបាញ់ទឹក​ពន្លត់​ភ្លើង អស់​រយៈពេល​១​ម៉ោង ទើប​ភ្លើង​រលត់ នៅវេលា​ម៉ោង​៦​ល្ងាច​ថ្ងៃ​ដដែល ។​

​គ្រោះ​អគ្គិភ័យ​នេះ​បង្ក​ឲ្យ រង​ខូចខាត​អាគារ​រោងចក្រ​មួយ​ខ្នង អស់ទាំង​ស្រុង សម្ភារៈ វត្ថុធាតុដើម​សម្រាប់​ផលិត ម៉ាស៊ីន​វាយ​ពុម្ព​ចាន​ប្រអប់ រង​ខូចខាត​អស់ទាំង​ស្រុង តែ​មិន​បង្ក​ឲ្យ​អ្នកណា​រងរបួស​ឡើយ​៕​

ទីតាំងផ្សាយពាណិជ្ជកម្ម

- Advertisment -

Most Popular