ការប្រកួត​កីឡា​សីដក់​ជើងឯក​ថ្នាក់ជាតិ​គ្រោង​ចាប់ផ្តើម​នា​ថ្ងៃទី​៨-៩ ខែមករា ឆ្នាំ​២០២១

ដោយៈ​ជា​សីហៈ​/​ភ្នំពេញ​:​សហព័ន្ធ​កីឡា​សីដក់​និង​ឈិន​ឡូ​ន​កម្ពុជា​បានប្រកាស​ជូនដំណឹង​ស្តីពី​ការប្រកួត​កីឡា​សីដក់​ជ្រើសរើស​ជើងឯក​ថ្នាក់ជាតិ ប្រចាំឆ្នាំ​២០២០ ដែល​គ្រោង​នឹង​ធ្វើឡើង​រយៈពេល​ពីរ​ថ្ងៃ ពីថ្ងៃ​ទី​៨ ដល់​ថ្ងៃទី​៩ ខែមករា ឆ្នាំ​២០២១ នៅ​វិមាន​ពហុ​កីឡដ្ឋាន​ជាតិ​អូឡាំពិក​។​

​កញ្ញា សួង ចាន់តូ​រ៉ា​ទី អគ្គលេខាធិការ​ស្តីទី សហព័ន្ធ​កីឡា​សីដក់ និង​ឈិន​ឡូ​ន​កម្ពុជា​បញ្ជាក់ថា​ការប្រកួត​កីឡា​សីដក់​ជើង ឯក​ថ្នាក់ជាតិ​នេះ​មាន​៣​វិញ្ញាសា គឺ​វិញ្ញាសា ៣​នាក់ ទល់ ៣​នាក់​បុរស​, ២​នាក់ ទល់ ២​នាក់​បុរស និង​វិញ្ញាសា​នារី ២​នាក់ ទល់ ២​នាក់ ក្រោម​ការសហការ​ពី​ក្រសួង​អប់រំ យុវជន និង​កីឡា​។

​កញ្ញា​បាន​បន្តថា ការប្រកួត​ជើងឯក​ថ្នាក់ជាតិ​នេះ មិន​បើកទូលាយ​ពេក​ទេ ដោយ​កំណត់​យ៉ាងច្រើន​ត្រឹម​ចំនួន ៨​ក្រុម ប៉ុណ្ណោះ ដោយសារតែ​យើង​ត្រូវ​ចូលរួម​ទប់ស្កាត់​ជំងឺ​កូ​វីដ​១៩​ជាមួយ​រាជរដ្ឋាភិបាល​កម្ពុជា​។​ដូច្នេះ​សហព័ន្ធ​មាន​គោលដៅ​កាត់បន្ថយ​ក្រុម​ចូលរួម ដោយ​ជ្រើស​រើសយក​ក្រុម​ខ្លាំងៗ​ប្រកបដោយ​គុណភាព​ខ្ពស់ៗ​ចូលរួម​ប្រកួត​ប៉ុណ្ណោះ​។​

​នៅក្នុង​ការប្រកួត​នេះ ភាគច្រើន​គឺជា​ក្រុម​ជម្រើសជាតិ​ចូលរួម​ប្រកួតប្រជែង ក៏ដូចជា​បង្កើន​គុណភាព​របស់ខ្លួន ត្រៀម​ចូលរួម​ប្រកួតប្រជែង​មេដាយ​នៅក្នុង​ការប្រកួត​ស៊ី​ហ្គេម លើក​ទី​៣១ នា​អំឡុង​ខែវិច្ឆិកា ឆ្នាំ​២០២១ នៅ​ប្រទេស​វៀតណាម​។​សម្រាប់​ក្រុម​ជម្រើសជាតិ​ត្រៀម​ស៊ី​ហ្គេម​នៅ​ប្រទេស​វៀតណាម​ក៏ត្រូវ​ពិនិត្យមើល​លើ​ការប្រកួត​ជើងឯក​ថ្នាក់ជាតិ​មួយ​នេះ​សិន​ដែរ ដើម្បី​ត្រៀម​ប​ញ្ជូ​ល​សមាសភាព​កីឡាករ ដែលមាន​គុណ​ផល​បច្ចេកទេស​ខ្ពស់ៗ​។​

​សូម​រំឭកថា សីដក់​កម្ពុជា គឺជា​ប្រភេទ​កីឡា​សក្តានុពល​មួយ នៅក្នុង​ចំណោម​ប្រភេទ​កីឡា​សក្តានុពល​ផ្សេងៗ​ទៀត ដែល​ធ្លាប់​ដណ្តើមបាន​មេដាយមាស ប្រាក់ និង​សំរឹទ្ធ នៅក្នុង​ស៊ី​ហ្គេម នាពេល​កន្លងមក ជាពិសេស​នៅក្នុង​ការប្រកួត​ស៊ី​ហ្គេម លើក​ទី​៣០​នៅ​ប្រទេស​ហ្វីលីពីន​ឆ្នាំ​២០២១៩​ប្រភេទ​កីឡា​សីដក់​កម្ពុជា​ដណ្តើមបាន​មេដាយប្រាក់​១​លើ​វិញ្ញាសា​ទាត់សី​ចូល​កន្ត្រក​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular