ស្មារតី​ជ័យជម្នះ ៧​មករា ជា​មូលដ្ឋានគ្រឹះ នៃ​សន្តិភាព និង​ការអភិវឌ្ឍ​

ដោយៈ​ទស្សនា​វ​ដ្តី​ប្រជាជន​
​ ​ឆ្លងកាត់​រយៈពេល ៤២​ឆ្នាំ បន្ទាប់ពី​ប្រទេសជាតិ​ត្រូវបាន​រំដោះ​ផុតពី​របប​ប្រល័យពូជសាសន៍​ដ៏​សាហាវយង់ឃ្នង នា​ថ្ងៃទី ៧ ខែ មករា ឆ្នាំ ១៩៧៩ មាតុភូមិ​កម្ពុជា​នៃ​យើង​បាននិងកំពុង​ផ្លាស់ប្តូរ​មុខមាត់​ថ្មី​យ៉ាង​ស្រស់បំព្រង​ក្រោម​កម្លាំង មហា​សាមគ្គី​ឯកភាព​ជាតិ​រឹងមាំ ដែល​ប្រជាជន​យើង​បាន​ពុះពារ​ធ្វើ​ពលិកម្ម​ដោយ​សាច់​ស្រស់ ឈាម​ស្រស់ និង​ប្រាជ្ញា​ស្មារតី បង្កើត​នូវ​សមិទ្ធផល​ធំៗ​លើ​គ្រប់​វិស័យ​ជាមួយនឹង​ការដឹកនាំ​ដ៏​ត្រឹមត្រូវ​របស់​គណបក្ស​ប្រជាជន​កម្ពុជា​និង​រាជរដ្ឋាភិបាល​កម្ពុជា ដែលមាន​សម្តេច​អគ្គមហាសេនាបតី​តេ​ជោ​ហ៊ុនសែន​ជា​ប្រមុខ​ដ៏​ឆ្នើម​និង​ឈ្លាសវៃ​បំផុត​។​ពេលនេះ​ប្រជាជន​កម្ពុជា​ទូទាំងប្រទេស​បាននិងកំពុង​សម្តែង​ក្តី​រីករាយ​ជា​ពន់ពេក ក្នុងការ​អបអរសាទ​រ​ខួប​អនុស្សាវរីយ៍ ទី​៤២ នៃ​ទិវា​មហា​ជ័យជម្នះ ៧ មករា (៧ មករា ១៩៧៩ – ៧ មករា ២០២១) ដើម្បី​រំឭក​ទៅដល់​ព្រឹត្តិការណ៍​នៃ​ការផ្តួលរំលំ​របប​ប្រល័យពូជសាសន៍ និង​ការ​រស់​ឡើងវិញ​ដ៏​អស្ចារ្យ​របស់​ប្រជាជន​កម្ពុជា ។

​ ​ប្រជាជន​កម្ពុជា​បាន​ប្រសិទ្ធ​នាម​ថា ថ្ងៃ ៧ មករា ឆ្នាំ​១៩៧៩ គឺជា​ថ្ងៃកំណើត​ទី​ពីរ​របស់ខ្លួន បើ​គ្មាន​ជ័យជម្នះ ៧ មករា​ក៏​យើង​គ្មានអ្វីៗ​នៅថ្ងៃនេះ​ដែរ​។​គ្មាន​ជន​ណាមួយ​ឬ​កម្លាំង​ណាមួយ​អាចមក​បំភ្លៃ​ឬ​បំផ្លាញ​នូវ​សច្ចៈ​ធម៌​ប្រវត្តិសាស្ត្រ​នេះ​បានឡើយ ។ ថ្ងៃ ៧ មករា គឺជា​ការបើក​ឡើងវិញ​នូវ​ទំព័រ​សករាជ​ថ្មី​នៃ​ឯករាជ្យ សេរីភាព ប្រជាធិបតេយ្យ និង​វឌ្ឍនភាព​សង្គម ។ រំឭក​ដល់​ថ្ងៃ ៧ មករា យើង​ក៏​ពិតជា​ចងចាំ​នូវ​គុណូបការៈ​ដ៏​ឧត្តុង្គឧត្តម​របស់​វីរៈ​កម្មាភិបាល យុទ្ធជន យុទ្ធ​នារី នៃ​រណសិរ្ស​សាមគ្គី​សង្គ្រោះ​ជាតិ​កម្ពុជា​និង​វីរៈ​កងទ័ព​ស្ម​គ្រ​ចិត្ត​វៀតណាម​ដែល​បានធ្វើ​ការលះបង់​យ៉ាង​ធំធេង​ក្នុងការ​វាយ​ប្រយុទ្ធ ផ្តួលរំលំ​របប​ប្រល័យពូជសាសន៍​ប៉ុលពត និង​ការពារ​ការ​រស់​ឡើងវិញ​របស់​ប្រជាជន​កម្ពុជា ។​

យើង​គប្បី​រំឭកថា​ក្នុង​រយៈពេល​៣​ឆ្នាំ​៨​ខែ​និង​២០​ថ្ងៃ​ក្នុង​របប​ប្រល័យពូជសាសន៍​ប្រជាជន​កម្ពុជា​ព្រមទាំង​កម្មាភិបាល​ដ៏​ស្មោះត្រង់​ជាច្រើនរូប​បានទទួល​រង​នូវ​ការកាប់សម្លាប់ ទទួលរង​នូវ​ការបិទ​សិទ្ធ​សេរីភាព ការ​បង្ខិតបង្ខំ​ឲ្យ​ធ្វើការ​ហួសកម្លាំង និង​ការធ្វើ​ទារុណកម្ម ដែល​ធ្វើ​ឲ្យ​ប្រជាជន​ស្លាប់​អស់​ជិត ៣​លាន​នាក់ ។
​ផ្តើម​ចេញពី​មូលហេតុ​នេះហើយ ដែល​កម្មាភិបាល​យុទ្ធជន យុទ្ធ​នារី ជា​កម្លាំង​អ្នកស្នេហាជាតិ​បរិសុទ្ធ ដែល​សេសសល់​ពី​ការកាប់សម្លាប់ បាន​ក្រោកឈរឡើង​រួមគ្នា​ឈានដល់​បង្កើតបានជា​រណ​សិរ្ស​សាមគ្គី​សង្គ្រោះ​ជាតិ​កម្ពុជា នៅ​ថ្ងៃទី​២ ខែធ្នូ ឆ្នាំ​១៩៧៨ ជា​អង្គការ​ចាត់តាំង​នយោបាយ​តែមួយគត់ តំណាង​ឲ្យ​ឆន្ទៈ និង​ផល​ប្រយោជន៍​របស់​ប្រជាជន​កម្ពុជា ក្រោកឈរឡើង​វាយ​ផ្តួលរំលំ​របប​ប្រល័យពូជសាសន៍​ទទួលបាន​ជ័យជម្នះ នៅ​ថ្ងៃ ៧ មករា ជា​ប្រវត្តិសាស្ត្រ ។ ៧ មករា បាន​សង្គ្រោះ​អាយុជីវិត​ប្រជាជន​កម្ពុជា​ទាន់ពេលវេលា ។ ៧ មករា បាន​បើក​ឡើង​នូវ​សករាជ​ថ្មី គឺៈ សករាជ​នៃ​ឯករាជ្យ សេរីភាព ប្រជាធិបតេយ្យ និង​វឌ្ឍនភាព​សង្គម ។ ៧ មករា បាន​ផ្តល់ជូន​ប្រជាជន​កម្ពុជា​នូវ​សិទ្ធិសេរីភាព​គ្រប់យ៉ាង​ក្នុងការ​ធ្វើជា​ម្ចាស់​លើ​ជោគវាសនា​របស់ខ្លួន​ពិតប្រាកដ ។ ៧ មករា បានរួម​វិភាគទាន​ដ៏​សកម្ម​ដល់​សន្តិភាព និង​ស្ថិរភាព​នៅក្នុង​តំបន់ ។ ៧ មករា គឺជា​និមិត្តរូប​នៃ​សន្តិភាព និង​អភិវឌ្ឍន៍ ។​

​ ​ក្នុង​រយៈពេល ៤២​ឆ្នាំ កន្លងទៅនេះ ប្រជាជាតិ​កម្ពុជា​បានធ្វើ​ឲ្យ​សម្រេច​នូវ​សមិទ្ធផល​ធំៗ​ជា​ប្រវត្តិសាស្ត្រ គឺៈ ការទប់ស្កាត់​មិន​ឲ្យ​របប​ប្រល័យពូជសាសន៍​វិលត្រឡប់​មកវិញ​បាន និង​ការការពារ​បានការ​រ​ស់​ឡើងវិញ​របស់​ប្រជាជាតិ និង​ជា​បន្តបន្ទាប់ ឈានដល់​ការបង្កើតបាន​មូលដ្ឋានគ្រឹះ​សម្រាប់​ដំណើរការ​បង្រួបបង្រួម​ជាតិ ការបង្កើតបាន​នូវ សន្តិភាព និង​ការអភិវឌ្ឍ ។ ការដណ្តើម​បានមក​វិញ​នូវ​សិទ្ធិសេរីភាព​គ្រប់យ៉ាង ពិសេស​សិទ្ធិ​មានជីវិត​រស់នៅ​ប្រកប ដោយ​កិត្តិយស សេចក្តីថ្លៃថ្នូរ និង​ការលើកស្ទួយ​លទ្ធិប្រជាធិបតេយ្យ កាន់តែ​មានការ​រីកលូតលាស់​ជា​លំដាប់ ។ ការសម្រេចបាន​ជោគជ័យ​ក្នុងការ​បង្រួបបង្រួម​ជាតិ ដែល​នេះ​គឺជា​បំណងប្រាថ្នា​ដ៏​ពិសិដ្ឋ​របស់​ប្រជាជន​កម្ពុជា តាមរយៈ​ការអនុវត្ត​មាគ៌ា​មហា​សាមគ្គី​ជាតិ​ឯកភាព​ជាតិ​ផ្សះផ្សារ​ជម្លោះផ្ទៃក្នុង​អាស្រ័យ​ដោយ​ការដាក់ចេញ​គោលនយោបាយ​បង្រួបបង្រួម​ជាតិ​នៅ​ឆ្នាំ​១៩៨៧​។​ការអនុវត្ត​ដោយ​ជោគជ័យ​នៃ​នយោបាយ​ឈ្នះ​-​ឈ្នះ​បាន​នាំមក​នូវ​សន្តិភាព​ពេញលេញ​នូវ​ការឯកភាព​ជាតិ ឯកភាព​ទឹកដី​ទាំងស្រុង ចាប់ពី​ចុងឆ្នាំ​១៩៩៨ បង្កើតបាន​សន្តិភាព និង​ស្ថិរភាព​នយោបាយ ផ្តល់ឱកាស​ដ៏​មានតម្លៃ​បំផុត ដែល​ពុំ​ធ្លាប់មាន​ដល់​ប្រជាជន​កម្ពុជា​ក្នុងការ​អភិវឌ្ឍ​សង្គមជាតិ ។ ការថែរក្សា​សន្តិភាព សន្តិសុខ និង​ស្ថិរភាព​នយោបាយ​បាន​រឹងមាំ ការពារ​យ៉ាង​គត់មត់​នូវ​ឯករាជ្យ អធិបតេយ្យ និង​បូរណភាព​ទឹកដី ដោយបាន​ឆ្លុះបញ្ចាំង​ឲ្យ​ឃើញច្បាស់​នូវ​ស្មារតី​ស្នេហា​ជាតិ​ដ៏​រឹងមាំ​របស់​ប្រជាជន​កម្ពុជា និង​ការប្រកាន់យក​នូវ​ជំហរ​ច្បាស់ លាស់ ដាច់ខាត រឹងមាំ ក្នុងឋានៈ​ជា​ប្រជាជាតិ​មួយ គឺ មិនអាច​ទទួលយក​ការប្រមាថ​ពី​អ្នកណា​ទាំងអស់ ។

​ការ​ស្តារឡើងវិញ​សេដ្ឋកិច្ចសង្គម ចាប់ពី​លេខ​សូន្យ​ឲ្យ​មានការ​ប្រែប្រួល​រីកចម្រើន​ជា​ជំហានៗ ឈាន​មកដល់​ដំណាក់កាល​នៃ​ការអភិវឌ្ឍ​ធំធេង​លើ​គ្រប់​វិស័យ​ក្នុង​ល្បឿន​លឿន និង​ធ្វើ​ឲ្យ​ជីវភាព​រស់នៅ​របស់​ប្រជាជន​ត្រូវបាន​កែលម្អ​លើកកម្ពស់​ជា​បន្តបន្ទាប់ ។ ការស្តារ និង​លើកស្ទួយ​ឡើងវិញ​នូវ​កិត្តិយស និង​កិត្យានុភាព​ជាតិ​លើ​ឆាក​អន្តរជាតិ មាន​ចំណង​មិត្ត ភាព និង​កិច្ចសហប្រតិបត្តិការ​ល្អ​ជាមួយ​បណ្តា​ប្រទេស ដោយ​ស្មើ​សិទ្ធិ និង​ស្មើភាព ក្នុង​រាល់​បណ្តា​កិច្ចការ​អន្តរជាតិ ។​

​នៅក្នុង​ដំណើរ​វិវត្តន៍​ជា​ប្រវត្តិសាស្ត្រ​គណបក្ស​ប្រជាជន​កម្ពុជា និង​រាជរដ្ឋាភិបាល​កម្ពុជា បានកំណត់​នូវ​ចក្ខុ វិស័យ​ក្នុងការ​ដាក់ចេញ​ផែនការ​សកម្មភាព​ក្នុងការ​អភិវឌ្ឍ​ប្រទេសជាតិ លើ​មាគ៌ា​ឆ្ពោះទៅ​សម្រេច​ចក្ខុវិស័យ កម្ពុជា​ជា​ប្រទេស​មាន​ចំណូល​មធ្យម​កម្រិត​ខ្ពស់​នៅ​ឆ្នាំ​២០៣០ និង​ជា​ប្រទេស​មាន​ចំណូល​ខ្ពស់​នៅ​ឆ្នាំ​២០៥០ ។ ប៉ុន្តែ​ឆ្នាំ​២០២០​នេះ អាស្រ័យ​ដោយ​ការផ្ទុះ​ឡើង​នូវ​ជំងឺ​កូ​វីដ​-១៩ បាន​បង្ក​ផលប៉ះពាល់​យ៉ាងធ្ងន់ធ្ងរ​មកលើ​សេដ្ឋកិច្ច និង​សង្គម ដែល​ធ្វើ​ឲ្យ​ការអភិវឌ្ឍ​របស់​កម្ពុ​ជា ដែល​សម្រេចបាន​ក្នុង​រយៈពេល ៣០​ឆ្នាំ​ចុងក្រោយ​ត្រូវ​ទទួលរង​ការគំរាមកំហែង​យ៉ាងខ្លាំង ប៉ុន្តែ​យើង​នៅតែ​ពុះពារ​ជម្នះ​ឧបសគ្គ​ទាំងនេះ​បាន ។​

នៅក្នុង​ដំណាក់កាល​ដ៏​លំបាក​នេះ រាជរដ្ឋាភិបាល​បានធ្វើ​ឲ្យ​ទទួលជោគជ័យ ចំពោះ​ការប្តេជ្ញាចិត្ត​ក្នុងការ​រក្សា​ឲ្យ​បាន​នូវ​ភាពម្ចាស់ការ​លើ​ការងារ​អាទិភាព​ចម្បង​ពី គឺ ៖ ទី​១- ការបន្ត​រក្សា​នូវ​ស្ថិរភាព​នយោបាយ​ដែលជា​មូលដ្ឋានគ្រឹះ​សម្រាប់​ការគ្រប់គ្រង​ស្ថានការណ៍ និង​ទី​២- ការរក្សា​ស្ថិរភាព​ម៉ាក្រូសេដ្ឋកិច្ច​ឱ្យបាន​ល្អប្រសើរ​ទប់ស្កាត់​អតិផរណា និង​ការឡើង​ថ្លៃទំនិញ​ក្នុង​ទីផ្សារ ។ ជាក់ស្តែង សម្រាប់​រយៈពេល ១០​ខែ ដើមឆ្នាំ​២០២០ ទំហំ​ពាណិជ្ជកម្ម​អន្តរជាតិ សម្រេចបាន ២៩.១៧៣,៦២​លាន​ដុល្លារ ស្មើនឹង​កំណើន ០,៨៥% ក្នុងនោះ​ការនាំចេញ​មាន​ទឹកប្រាក់ ១៤.៥៥០​លាន​ដុល្លារ កើនឡើង ១៨,៦៥% និង​ការ​នាំចូល​មាន​ទឹកប្រាក់ ១៤.៦២៣,៥១​លាន​ដុល្លារ ធ្លាក់ចុះ ១២,២៥% ធៀប​នឹង​រយៈពេល​ដូចគ្នា ឆ្នាំ​២០១៩ ។ ចំណូល​ចរន្ត​ថវិកា ឆ្នាំ​២០២០ ចំណូល​ពន្ធដារ គិត​ត្រឹម​ថ្ងៃទី​១៦ ធ្នូ សម្រេចបាន​ប្រមាណ ២.៦៩៧​លាន​ដុល្លារ ស្មើនឹង ៩៤,៦០% នៃ​ផែនការ និង​ចំណូល​ពន្ធគយ ប្រមាណ ២.១០០​លាន​ដុល្លារ ។ គិត​ត្រឹម​បច្ចុប្បន្ននេះ​រាជរដ្ឋាភិបាល​មាន​សល់​សាច់ប្រាក់​សន្សំ​ជាង ៣.០០០​លាន​ដុល្លារ សម្រាប់​ចំណាយ​ចាំបាច់​នានា ។ ទោះបី​ត្រូវ​ប្រឈម​នឹង​ផលវិបាក​ដែល​បង្កដោយ​ជំងឺ​កូ​វីដ​-១៩ ប៉ុន្តែ​ស្ថានភាព​ហិរញ្ញវត្ថុ​របស់​កម្ពុជា នៅតែមាន​ភាពល្អប្រសើរ ។ កម្ពុជា​មិនបាន​ស្នើ​ដល់​ម្ចាស់បំណុល​ពន្យារ​បង់ប្រាក់​កម្ចី ឬ​កាតព្វកិច្ច​ហិរញ្ញវត្ថុ​អន្តរជាតិ ។ កម្ពុជា​នៅតែមាន​សកម្មភាព​ដ៏​សកម្ម​ក្នុង​ការបញ្ចេញ​សាច់ប្រាក់​គាំទ្រ​កម្មវិធី​វិនិយោគ ដូចជា​នៅក្នុង​វិស័យ​ហេដ្ឋារចនាសម្ព័ន្ធ​ផ្លូវថ្នល់ (​ខេត្ត​ព្រះសីហនុ​-​សៀមរាប​) ការបណ្ដាក់ទុន​សាធារណៈ​ក្នុង​ការកសាង​ផ្លូវថ្នល់ ប្រឡាយទឹក ឬ​គម្រោង​ខ្នាតតូច​នៅតាម​មូលដ្ឋាន និង​ការសង្គ្រោះ​ជនក្រីក្រ និង​ងាយ​រងគ្រោះ ។ ការចំណាយ​ចរន្ត​ដូចជា​ប្រាក់បៀវត្ស​មន្ត្រីរាជការ នៅតែ​រក្សាបាន​ប្រក្រតីភាព ក្នុង​ការបើក​បៀរ​វត្ស​ពីរដង​ក្នុង​មួយខែ ។ លើ​ការ​គាំពារ​សង្គម រាជរដ្ឋាភិបាល នៅតែ​បន្ត​ឧបត្ថម្ភ​ថវិកា ៤០​ដុល្លារ ក្នុង​មួយខែ​ដល់ក​ម្មករ និយោជិត​ក្នុង​វិស័យ​កាត់ដេរ និង​ទេសចរណ៍​ដែល​បាត់បង់​ការងារ ។​

​ទោះបី​មានការ​លំបាក​ខ្លះ​ក្នុង​ឆ្នាំ​២០២០​ប៉ុន្តែ​យើង​នៅតែមាន​សុទិដ្ឋិនិយម​ចំពោះ​អនាគត​នៃ​ការអភិវឌ្ឍ​របស់​ប្រទេសជាតិ​យើង ។ សេដ្ឋកិច្ចកម្ពុជា​នៅ​ឆ្នាំ​២០២១ ត្រូវបាន​ព្យាករណ៍​ថា នឹង​ងើប​ឡើងវិញ ហើយ​រំពឹងថា នឹង​សម្រេចបាន​កំណើន​ក្នុង​រង្វង់ ៣,៥% ដែល​ធ្វើឱ្យ ផ​.​ស​.​ស ថ្លៃ​បច្ចុប្បន្ន ស្ថិតក្នុង​រង្វង់ ១១៧.៩៣៩ ប៊ី​លាន​រៀល សមមូល​នឹង​ប្រមាណ ២៩.០១៣ លាន​ដុល្លារ​អាមេរិក ស្រប​ពេលដែល ផ​.​ស​.​ស​. សម្រាប់​មនុស្ស​ម្នាក់​ត្រូវបាន​រំពឹងថា នឹង​កើន​ឡើងដល់ ១.៧៧១ ដុល្លារ​អាមេរិក បើ​ប្រៀបធៀប​នឹង ១.៦៨៣ ដុល្លារ​អាមេរិក ក្នុង​ឆ្នាំ​២០២០ ។ កំណើន​នេះ​គាំទ្រ​ដោយ​ការ​ងើប​ឡើងវិញ​នៃ​វិស័យសេដ្ឋកិច្ច​សំខាន់ៗ​ដូចជា​វិស័យ​កសិកម្ម​ត្រូវបាន​ប៉ាន់​ស្មានថា​កើនឡើង​ក្នុង​អត្រា​១,៦%,​វិស័យ​ឧស្សាហកម្ម​នឹង​ងើប​ឡើងវិញ​ក្នុង​អត្រា​៤,១%​ពី​កំណើន​អវិជ្ជមាន​,​វិស័យ​សេវាកម្ម​នឹងមាន​កំណើន​ក្នុង​អត្រា ៣,៦% ។ អតិផរណា​មធ្យម​ប្រចាំឆ្នាំ ត្រូវបាន​ប៉ាន់​ស្មានថា​ស្ថិតនៅក្នុង​កម្រិត​អាច​គ្រប់គ្រង​បាន​ក្នុង​អត្រា ៣,១% , អត្រា​ប្តូរ​ប្រាក់រៀល ត្រូវបាន​ប៉ាន់​ស្មានថា នៅតែ​បន្ត​មាន​ស្ថិរភាព​ក្នុង​រង្វង់ ៤.០៦៥​រៀល ក្នុង​មួយ​ដុល្លារ​អាមេរិក , ឱនភាព​គណនី​ចរន្ត ត្រូវបាន​ព្យាករណ៍​ថា នឹង​រួម​តូច​បន្តិច​មក​ត្រឹម ១៧,៣% នៃ ផ​.​ស​.​ស , ទុនបម្រុង​អន្តរជាតិ​សរុប​ត្រូវបាន​រំពឹងថា នឹង​កើន​ឡើងដល់ ១៦.៩៨១​លាន​ដុល្លារ​អាមេរិក និង​ធានា​ការនាំ​ចូល​បាន ៨​ខែ ដោយហេតុថា ការនាំ​ចូល​របស់​កម្ពុ​ជា​ក៏​នឹង​ងើបឡើង​បន្តិច​វិញ ។​

​អបអរ​ខួប ទី​៤២ នៃ​ទិវា​ជ័យជម្នះ ៧ មករា ប្រជាជន​កម្ពុជា​ទូទាំងប្រទេស​បន្ត​ខិតខំ​ពុះពារ​ប្រឹងប្រែង​រួម​កម្លាំង​កាយ ចិត្ត ប្រាជ្ញា​និង​ស្មារតី​សម្រេច​ឲ្យ​បាន​គោលដៅ​ដ៏​ឧតុង្គ​ឧ​ត្ត​មរ​បស់​យើងទាំងអស់គ្នា​នោះ​គឺ​ការកសាង​ប្រទេស​កម្ពុជា​ឲ្យ​កាន់តែ​មានការ​រីកចម្រើន​ខ្លាំងក្លា​ក្លាយទៅជា​ប្រទេស​ជឿនលឿន​មួយ​ជា​សង្គម​មួយ​ប្រកប​ដោយ​អរិយធម៌​និង​ទប់ស្កាត់​មិន​ឲ្យ​កើតមាន​ជាថ្មី​នូវ​សង្គ្រាម ការបែកបាក់ និង​អំពើ​ប្រល័យពូជសាសន៍ ។ យើង​ប្តេជ្ញា​ថែរក្សា​ឲ្យ​បាន​គង់វង្ស រឹងមាំ​នូវ​រាល់​បណ្តា​សមិទ្ធផល ដែល​សម្រេចបាន​ក្នុង​រយៈពេល ៤២​ឆ្នាំ​កន្លងទៅ​មិន​ឲ្យ​កម្លាំង​ណា​មក​បំផ្លិចបំផ្លាញ​បានឡើយ ៕​សរន​

ទីតាំងផ្សាយពាណិជ្ជកម្ម

- Advertisment -

Most Popular