Home ព័ត៌មានជាតិ អប់រំ អាហារូបករណ៍ ១...

អាហារូបករណ៍ ១០០​ភាគរយ ថ្នាក់​បរិញ្ញាបត្រ ចំនួន ៤៥០​កន្លែង នៅ​ពុទ្ធិក​សកលវិទ្យា​ល័យ​ព្រះសីហនុ​រាជ

ដោយ​: មេសា / ភ្នំពេញ​: សម្រាប់​ឆ្នាំ​សិក្សា ២០២០-២០២១ នេះ ពុទ្ធិក​សកលវិទ្យា​ល័យ​ព្រះសីហនុ​រាជ បានប្រកាស​ផ្តល់ អាហារូបករណ៍ ១០០ ភាគរយ ថ្នាក់​បរិញ្ញាបត្រ ចំនួន ៤៥០​កន្លែង ដែល​ក្នុងនោះ​មាន​៖ ឯកទេស​ផ្នែក​ទស្សនវិជ្ជា​ព្រះពុទ្ធសាសនា​, សង្គមវិជ្ជា​, នីតិសាស្ត្រ​, រដ្ឋបាល​អប់រំ​, គ្រប់គ្រង​ទូទៅ​, អក្សរសាស្ត្រ​ខ្មែរ​, បរិស្ថានវិទ្យា​, ភាសាបាលី និង អក្សរសាស្ត្រ​អង់គ្លេស​។​

​សម្តេច​ព្រះមហា​អរិយវង្ស​បណ្ឌិត ឃី សុវណ្ណ​រតនា សាកលវិទ្យាធិការរង​ទទួលបន្ទុក​ដឹកនាំ​គ្រប់គ្រង​ពុទ្ធិក​សាកលវិទ្យាល័យ​ព្រះសីហនុ​រាជ បានឱ្យដឹងថា អ្នក​ដែល​អាចដាក់​ពាក្យសុំ​អាហារូបករណ៍​រយៈពេល ៤ ឆ្នាំ នេះ​បាន មិនមែន​មានតែ​ព្រះសង្ឃ​ឡើយ ប៉ុន្តែ​ក៏​រួមទាំង​គ្រហស្ថ ទាំងប្រុស ទាំងស្រី ផងដែរ​។

​ពុទ្ធិក​សកលវិទ្យា​ល័យ​ព្រះសីហនុ​រាជ ថ្វីដ្បិតតែ​ដើមឡើយ​គឺជា​គ្រឹះស្ថាន​ឧ​ត្ត​ម​សិក្សា​សម្រាប់​ព្រះសង្ឃ​ក៏ពិតមែន ប៉ុន្តែ​ប៉ុន្មាន​ឆ្នាំ​ចុង​ក្រោយនេះ បានធ្វើ​កំណែទម្រង់ និង​បានទទួល​និស្សិត​ជា​គ្រហស្ថ ដែល​បច្ចុប្បន្ននេះ សមណ​និស្សិត ពោលគឺ​និស្សិត​ជា​ព្រះសង្ឃ ត្រឹមតែ​ប្រមាណ​ជា ៤០ ភាគរយ​ប៉ុណ្ណោះ ដែល​បានសេចក្តីថា មាន​និស្សិត​ជា​គ្រហស្ថ​ច្រើនជាង​ព្រះសង្ឃ ហើយ​ក្នុងចំណោម​និស្សិត​ជា​គ្រហស្ថ​ទាំងនោះ​ទៀតសោត មាន​និស្សិត​ជា​ស្ត្រី​ប្រមាណ​ជា ៥៥ ទៅ ៦០ ភាគរយ​ឯណោះ ដែល​បាន និង កំពុង​សិក្សា​នៅក្នុង​ពុទ្ធិក​សកលវិទ្យា​ល​ព្រះសីហនុ​រាជ​។ រីឯ​មុខវិជ្ជា​ដែល​ត្រូវបាន​បង្រៀន​នៅក្នុង​ពុទ្ធិក​ឧ​ត្ត​មសិ​ក្សា​ដ៏​មាន​វ័យ​ចំណាស់ និង មាន​កិត្តិនាម​ជាងគេ​នៅ កម្ពុជា នេះ ក៏​មិនមែន​មានតែ​ឯកទេស​ផ្នែក​សាសនា​ដែរ ពោល​គឺមាន​ឯកទេស​ផ្នែក​អាណាចក្រ ដូចដែល​បានលើកឡើង​ខាងលើនេះ​ស្រាប់ ។​

​សូមជម្រាបថា ពុទ្ធិក​សកលវិទ្យា​ល័យ​ព្រះសីហនុ​រាជ មាន ៣ ទីតាំង គឺ​ព្រះសីហនុ​រាជ ភ្នំពេញ ដែលមាន​ទីតាំង​នៅមុខ​ព្រះបរមរាជវាំង ទល់មុខ​សាល​មហោស្រព​ចតុមុខ​, ព្រះសីហនុ​រាជ ខេត្តកំពង់ឆ្នាំង និង ព្រះសីហនុ​រាជ ខេត្ត បាត់ដំបង ។ ព័ត៌មាន​លម្អិត​អាច​ទំនាក់ទំនង​តាម​ទូរស័ព្ទ​លេខ ០៩២ ៩៤ ៧៧ ២២៕

ទីតាំងផ្សាយពាណិជ្ជកម្ម

- Advertisment -

Most Popular