CDC បើក​កិច្ចប្រជុំ​ពិគ្រោះ​យោបល់​លើ​សេចក្ដីព្រាងច្បាប់​ស្ដីពី​វិនិយោគ​ថ្មី​នៃ​ប្រទេស​កម្ពុជា​

​ដោយ​: ពៅ​និមល​/​ភ្នំពេញ​: លោក សុខ ចិន្ដា​សោភា រដ្ឋមន្ដ្រី​ប្រតិភូ​អម​នាយករដ្ឋមន្ដ្រី អគ្គលេខាធិកា​ក្រុមប្រឹក្សា​អភិវឌ្ឍន៍​កម្ពុជា (CDC) កាលពី​រសៀល​ថ្ងៃទី​៦ ខែមករា ឆ្នាំ​២០២១​កន្លងទៅ បាន​ដឹកនាំ​កិច្ចប្រជុំ​ពិគ្រោះ​យោបល់ លើ​សេចក្ដីព្រាងច្បាប់ ស្ដីពី​វិនិយោគ​ថ្មី​នៃ​ប្រទេស​កម្ពុជា​។​

​កិច្ចប្រជុំ​ពិគ្រោះ​យោបល​នេះ បាន​ប្រព្រឹត្តទៅ​ដោយមាន​ការចូលរួម​ពី​ក្រុមការងារ​សម្រាប់​ចូលរួម​រៀបចំ​ច្បាប់​វិនិយោគ របស់​ក្រសួង​សេដ្ឋកិច្ច និង​ហិរញ្ញវត្ថុ ដឹកនាំ​ដោយ​លោក​បណ្ឌិត ហ៊ាន សា​ហ៊ី​ប រដ្ឋលេខាធិការ​ក្រសួង​ក្រសួង​សេដ្ឋកិច្ច និង​ហិរញ្ញវត្ថុ ព្រមទាំង​តំ​ណា​ក្រសួង និង​ភាគី​ពាក់ព័ន្ធ​ជាច្រើន​ទៀត​។​

​នៅក្នុង​សេចក្តីប្រកាស​ព័ត​មាន CDC បានឱ្យដឹងថា សេចក្ដីព្រាងច្បាប់​ខាងលើនេះ ត្រូវបាន​រៀបចំឡើង​តាម​ការចង្អុលបង្ហាញរ​បស់​ឯកសារ​គោលនយោបាយ​អភិវឌ្ឍន៍​វិស័យ​ឧស្សាហកម្ម​កម្ពុជា​ឆ្នាំ​២០១៥-២០២៥ និង​ប្រសាសន៍​ណែនាំ​ពីស​ម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជា នៅក្នុង​វេទិកា​រាជរដ្ឋាភិបាល​-​ផ្នែក​ឯកជន​លើក​ទី​១៨ ដែល​បាន​រៀបចំឡើង​កាលពី​ថ្ងៃទី​២៩ ខែមីនា ឆ្នាំ​២០១៩ ក្នុង​គោលបំណង​ធ្វើ​ឲ្យ​ច្បាប់​វិនិយោគ​កម្ពុជា កាន់តែ​មាន​ភាព​ទាក់ទាញ និង​ប្រកួតប្រជែង​សំដៅ​អភិវឌ្ឍន៍​សង្គម​សេដ្ឋកិច្ច នៅ​កម្ពុជា​។

​សេចក្ដីព្រាងច្បាប់​នេះ​ត្រូវបាន​ក្រុមការងារ​ផ្នែក​នីតិកម្ម ពន្ធដារ និង​អភិ​វាល​កិច្ច (​ក្រុម​«​ឃ​») នៃ​វេទិកា​រាជរដ្ឋាភិបាល​-​ផ្នែក​ឯកជន ដោយ​លោក​អគ្គបណ្ឌិត​សភាចា​រ្យ ឧបនាយករដ្ឋមន្ដ្រី រដ្ឋមន្ដ្រីក្រសួង​សេដ្ឋកិច្ច និង​ហិរញ្ញវត្ថុ និង​ជា​សហប្រធាន​ក្រុម «​ឃ​» យកមក​ពិភាក្សា​ជាមួយ​តំណាង​ផ្នែក​ឯកជន ដើម្បី​ទទួលបាន​ធាតុ​ចូល​ជាយថាហេតុ​។​

​សូមបញ្ជាក់ថា ច្បាប់​ស្ដីពី​វិនិយោគ​នៃ​ប្រទេស​កម្ពុជា ត្រូវបាន​អនុម័ត​ឲ្យ​ប្រើប្រាស់​ជា​លើកដំបូង នៅ​ឆ្នាំ​១៩៩៤ និង​បានធ្វើ​វិសោធនកម្ម​កាលពី​ឆ្នាំ​២០០៣៕

ទីតាំងផ្សាយពាណិជ្ជកម្ម

- Advertisment -

Most Popular