Home ព័ត៌មានសំខាន់ៗ អាជ្ញាធរខេត្ត...

អាជ្ញាធរខេត្ត គ្រោង​ប្រែក្លាយ​សួន​កុមារ ក្រុង​កំពង់ចាម ជា​សួន​ទឹក​ដ៏​ទំនើប​

​ដោយៈ គង់​ហេង / កំពង់ចាមៈ អាជ្ញាធរខេត្ត​កំពង់ចាម គ្រោង​នឹង​រៀបចំ អភិវឌ្ឍន៍ កែច្នៃ​សួន​កុមារ​ក្រុង បច្ចុប្បន្ន នៅខាងមុខ​សាលាខេត្ត ដែលមាន​ផ្ទៃដី ប្រមាណ​ជិត ១០.០០០ ម៉ែត្រការ៉េ ឱ្យក្លាយ​ជា​សួន​ទឹក (WATER PARK) ទំនើប និង​មាន​លក្ខណៈ​ស្តង់ដារ ដើម្បី​លើកកម្ពស់ វិស័យ​ទេសចរណ៍ ដោយ​ដាក់ឈ្មោះថា « សួរ​កុមារ​សន្តិភាព​»​។​

​លោក អ៊ុន ចាន់​ដា អភិបាលខេត្ត​កំពង់ចាម បាន​មានប្រសាសន៍ នៅក្នុង​កិច្ចប្រជុំ​មួយ ជាមួយ​មន្ត្រី​ជំនាញ​ពាក់ព័ន្ធ នៅក្នុង​សាល​ខេត្ត នា​រសៀល​ថ្ងៃទី ៦ ខែមករា ឆ្នាំ​២០២១​ថាៈ នេះ​ជា​គម្រោង​កែលម្អរ​សួន​កុមារ ក្នុង​ក្រុង​កំពង់ចាម គឺ​ដើម្បី​លើកកម្ពស់ សោភ័ណភាព​ក្រុង និង​រៀបចំ​ទីតាំង​កម្សាន្ត របស់​ប្រជាពលរដ្ឋ​។ ដោយ​ធានា​ផាសុកភាព សោភ័ណភាព និង​សុវត្ថិភាព​ពោល គឺ​ដើម្បី​សក្តិសម ជា​ក្រុង​ជ័យលាភី រំដួល​បី​ទង​។​

​លោក​អភិបាល ខេត្តកំពង់ចាម បាន​មានប្រសាសន៍ថាៈ ក្នុងនោះ យើង​សូមឱ្យ​ម្ចាស់​គម្រោង ជា​ក្រុមហ៊ុន​ឯកជន ធ្វើការ​កែសម្រួល ទៅតាម​ការចូលរួម​មតិយោបល់ ពី​សំណាក់​មន្ទីរជំនាញ និង​អាជ្ញាធរ ក្នុង​កិច្ចប្រជុំ​ពិភាក្សា លើ​គម្រោង​រៀបចំ កែលម្អរ​សួន​កុមារ និង​កន្លែង​កម្សាន្ត ក្រុង​កំពង់ចាម​នេះ​។​

​លោក ស៊ាន សុ​គុន ប្រធាន​មន្ទីរ​ទេសចរណ៍ ខេត្តកំពង់ចាម បានឱ្យដឹង នៅ​រសៀល ថ្ងៃទី​៧ មករា​ថាៈ គម្រោង​សួន​ទឹក ដែល​អាជ្ញាធរខេត្ត បាន​ឯកភាព​នោះ គឺមាន​ជា​អាង​ហែល​ទឹក ជា​អាហារ​ដ្ឋា​ន ជា​ម៉ា​ត ជាដើម​។ គម្រោង​សួន​ទឹក អាចជា​សួន​គំរូ​ទំនើប និង​មាន​លក្ខណៈ​ស្តង់ដារ ដោយ​ខាង​ម្ចាស់​គម្រោង បាន​នាំយក​អ្នកជំនាញ ពី​បរទេស​មក​រៀបចំ​។​

​លោក​ប្រធាន​មន្ទីរ បាន​បន្តថាៈ គម្រោង​សួន​ទឹក​នេះ ដែលមាន​បណ្តោយ ១១៤ ម៉ែត្រ និង​ទទឹង ៦៥ ម៉ែត្រ ភាគច្រើន ផ្តោតលើ​អាង​ហែល​ទឹក សម្រាប់​កុមារ ហើយ​នៅពេល​រៀបចំ​រួចរាល់ អាច​នឹង​ទាក់ទាញ​ភ្ញៀវ ក្នុងស្រុក​ភាគច្រើន ពី​បណ្តា​ខេត្ត ជាប់​កំពង់ចាម ឱ្យ​មកលេង​កម្សាន្ត​។​

​គួរ​បញ្ជាក់ថា គម្រោង​កែលម្អ​សួន​កុមារ ដែល​នឹង​ក្លាយជា «​សួរ​កុមារ​សន្តិភាព​» នោះ គឺ​ម្ចាស់​គម្រោង នឹង​អភិវឌ្ឍន៍ និង​រៀបចំ​សួនច្បារ ក្នុង​បរិវេណ​សួន​នេះ សង់​របង​ដែក​ព័ទ្ធជុំវិញ សង់​ខ្លោងទ្វារ ច្រកចេញចូល ចំនួន​ពីរ​កន្លែង ដាំ​ផ្កា​ព័ទ្ធជុំវិញ ខាងក្នុង​របង​ដែក សង់​អគារ សម្រាប់​ផ្លាស់ប្តូរ សម្លៀកបំពាក់ សង់​អគារ​ជា​អាហារ​ដ្ឋា​ន និង​មី​នី​ម៉ា​ត ក្រាល​ការ៉ូ ជុំវិញ​បរិវេណ កម្សាន្ត សង់​បង្គន់​អនាម័យ​ស្តង់ដារ រៀប​ប្រព័ន្ធ​លូ ក្នុង​បរិវេណ​សួន​កម្សាន្ត និង​ប្រព័ន្ធ​ទឹកស្អាត បណ្តាញ​អគ្គិសនី បំភ្លឺ​ពេលយប់​៕/V​

ទីតាំងផ្សាយពាណិជ្ជកម្ម

- Advertisment -

Most Popular