Home ព័ត៌មានសំខាន់ៗ សមត្ថកិច្ច កំ...

សមត្ថកិច្ច កំពុង​វែកមុខ​ជនសង្ស័យ ៣ នាក់ ដែល​ក្លែងបន្លំ «​សញ្ញាបត្រ​វេជ្ជបណ្ឌិត​»

ដោយៈ ស​រិ​ទ្ធ / ភ្នំពេញៈ សាកលវិទ្យាល័យ​វិទ្យាសាស្ត្រ សុខាភិបាល បាន​រកឃើញថា មាន​ជនសង្ស័យ ៣ នាក់ បាន​ក្លែងបន្លំ «​សញ្ញាបត្រ វេជ្ជបណ្ឌិត​» ដែល​ពេលនេះ សមត្ថកិច្ច​ជំនាញ កំពុង​តាម​វែកមុខ យកមក​ផ្តន្ទាទោស តាមផ្លូវ​ច្បាប់ ។

​យោងតាម​លិខិត​របស់ លោក​សាស្ត្រាចារ្យ វេជ្ជបណ្ឌិត ធា គ្រុយ ប្រធាន​ក្រុមប្រឹក្សា​គណៈ​គ្រូពេទ្យ​ជាតិ ជម្រាប​មក លោក​ប្រធាន​ក្រុមប្រឹក្សា គណៈ​គ្រូពេទ្យ​ខេត្តកំពង់ស្ពឺ កាលពី​ថ្ងៃទី​៣១ ខែធ្នូ ឆ្នាំ​២០២០ កន្លងទៅ ដែល​រស្មី​កម្ពុជា ទើប​ទទួលបាន នៅ​ថ្ងៃទី​៧ ខែមករា ឆ្នាំ​២០២១ នេះ បានអោយដឹងថាៈ ក្រោយពី​មានការ​សង្ស័យ ចំពោះ «​សញ្ញាបត្រ​វេជ្ជបណ្ឌិត​» របស់​ឈ្មោះ សាយ សុវណ្ណ ម៉ក់​សុខ​ជា និង ខា វ៉េង​ហួត ដែល​បាន​យក​ទម្រង់ តាម​សញ្ញាបត្រ​របស់ សាកលវិទ្យាល័យ វិទ្យាសាស្ត្រ សុខាភិបាល​, ក្រុមប្រឹក្សា​គណៈ​គ្រូពេទ្យ​ជាតិ បាន​ស្នើសុំ​ការផ្ទៀងផ្ទាត់ ពី​សាកលវិទ្យាល័យ វិទ្យាសាស្ត្រ សុខាភិបាល នៅ​ថ្ងៃទី​៣ ខែវិច្ឆិកា ឆ្នាំ​២០២០ ដោយ​សាកលវិទ្យាល័យ វិទ្យាសាស្ត្រ សុខាភិបាល បានចេញ​លិខិត​បញ្ជាក់ថា សញ្ញាបត្រ​វេជ្ជបណ្ឌិត របស់​អ្នក​ទាំង ៣ នេះ ពុំមែន​ជា​សញ្ញាបត្រ ដែល​ចេញ​ដោយ សាកលវិទ្យាល័យ វិទ្យាសាស្ត្រ សុខាភិបាល ទេ ។​

​ជាមួយគ្នានេះ លោក​សាស្ត្រាចារ្យ វេជ្ជបណ្ឌិត ធា គ្រុយ សូមអោយ​លោក​ប្រធាន ក្រុមប្រឹក្សា​គណៈ​គ្រូពេទ្យ ខេត្តកំពង់ស្ពឺ មាន​វិធានការ ដូចខាងក្រោមៈ

១-​ដកហូត​សញ្ញាបត្រ​ដើម​របស់ សាយ សុវណ្ណ ម៉ក់​សុខ​ជា និង ខា វ៉េង​ហួត ។​
២-​ធ្វើលិខិត​ជូន​មន្ទីរ​សុខាភិបាល ខេត្តកំពង់ស្ពឺ ដើម្បី​ចាត់វិធានការ តាមផ្លូវ​ច្បាប់ ដែលមាន​ចែង ក្នុង​ក្រមព្រហ្មទណ្ឌ ស្តីពី​ការ​ក្លែងបន្លំ​ឯកសារ ។​
៣-​ជូនដំណឹង​ទៅ​គណៈ​គិលានុបដ្ឋាក និង គណៈ​វិជ្ជាជីវៈ​សុខាភិបាល ដទៃទៀត​ដែរ បើ​មាន​ភាពចាំបាច់ ដោយ​ពួកគាត់ ភាគច្រើន ជា​គិលានុបដ្ឋាក ហើយ​រមែង​បាន​ចុះបញ្ជី ជាមួយ​គណៈ​គិលានុបដ្ឋាក ។​
៤-​ក្រោយ​មាន​វិធានការ ទាំង​អស់ហើយ សូម​លោក​ប្រធាន រៀបចំ​អោយមាន​របាយការណ៍ ត្រឡប់មក​ថ្នាក់ជាតិ​វិញ ដើម្បី​គណៈ​គ្រូពេទ្យ​ជាតិ រៀបចំ​ផ្សព្វផ្សាយ តាម​គេហទំព័រ (Website) និង ទំព័រ​ហ្វេ​ស​ប៊ុ​ក (Facebook Page) របស់​គណៈ​គ្រូពេទ្យ​ជាតិ​៕/V​

ទីតាំងផ្សាយពាណិជ្ជកម្ម

- Advertisment -

Most Popular