បុរាណ​វិទូៈ វេលាយប់​វែង​ជាង​ថ្ងៃ ឬ​ថ្ងៃ មាន​រយៈពេល​វែង ជាង​យប់ សុទ្ធ​តែមាន​អាថ៌កំបាំង ជាមួយ​ចម្លាក់​ប្រាសាទអង្គរវត្ត​

ដោយៈ អង្គរតូច / សៀមរាបៈ បុរាណ​វិទូ នៃ​អាជ្ញាធរ​ជាតិ​អប្សរា បាន​បង្ហាញថា​ប្រាសាទ អង្គរវត្ត ដែល​បុព្វបុរស​ខ្មែរ បាន​សាងសង់ឡើង មិនមែន​ធ្វើតាម ការនឹកឃើញ​នោះទេ តែ​ជាការ​គុណគូរ​ច្បាស់លាស់ តាម​ក្បួនខ្នាត​។ នេះ​បើតាម​ប្រភពពី​គេហទំព័រ​របស់​អាជ្ញាធ​រ ជាតិ​អប្សរា បាន​ចុះផ្សាយ ជា​សាធារណៈ​។

​លោក អ៊ឹម សុខ​រិទ្ធី បុរាណ​វិទូ និង​ជា​ប្រធាន​នាយកដ្ឋាន អភិរក្ស​ប្រាសាទ ក្នុង​ឧទ្យាន​អង្គរ និង​បុរាណ វិទ្យា​បង្ការ នៃ​អាជ្ញាធរ​ជាតិ​អប្សរា បានលើកឡើង​ថាៈ គេ​តែង​ដឹង​ជាទូទៅ នូវ​ព្រឹត្តិការណ៍​សំខាន់ៗ ដែល​កើតមាន នៅ​ប្រាសាទអង្គរវត្ត​។ នោះ​គឺ​វេលាយប់ និង​ថ្ងៃ ស្មើគ្នា ដែល​គេ​ហៅថា សម​រាត្រី ជាមួយនឹង​ព្រឹត្តិការណ៍ ព្រះអាទិត្យ​រះ​ចំ​ប្រាង្គ​កណ្ដាល ប្រាសាទអង្គរវត្ត ។ ក្រៅពី​ព្រឹត្តិការណ៍​នេះ មាន​វេលា​ពីរ សំខាន់ៗ​ទៀត នោះ​គឺ​វេលា​ថ្ងៃ វែង​ជាង​យប់ និង​វេលាយប់​វែង​ជាង​ថ្ងៃ​។ យ៉ាងណា មាន​មនុស្ស​តិច​ណាស់ ដែល​បាន​សង្កេត និង​ដឹង​រឿងរ៉ាវ នូវវេលា​ទាំងនេះ​។​

​លោក អ៊ឹម សុខ​រិទ្ធី ក៍​បានបង្ហាញ​នូវ តឹកតាង​មួយចំនួន នៃ​វេលាយប់​វែង​ជាង​ថ្ងៃ ដែល​សាធារណជន គួរ​តោង​ចាប់អារម្មណ៍​។ ក្នុង​ទំនៀម​នៃ​ព្រហ្មញ្ញសាសនា វេលាយប់ គឺ​មានន័យថា សភាវៈ​អាក្រក់ មានអំណាច ឬ​បារមី​ខ្លាំង​ជាង​សភាវៈ​ល្អ​។ តួយ៉ាង ក្នុង​វេលាយប់ វែង​ជាង​ថ្ងៃ ដែល​កើតមាន ចំ​ថ្ងៃទី​២១ ខែធ្នូ នោះ គឺ​ពន្លឺ​នៅពេល​ព្រឹក បាន​ចាំង​លើ​រូបចម្លាក់ ជាស​ភាវៈ​អាក្រក់ និង​ស្រមោល នៃ​សសរ​តាម​ថែវ​ប្រាសាទ បាំងបិទ​លើ​ចម្លាក់​សំខាន់ៗ ដែលជា​តួអង្គ នៃ​សភាវៈ​ល្អ ឬ​ពពួក​ទេព​។​

​លោក​បាន​បញ្ជាក់ថាៈ ព្រឹត្តិការណ៍​នេះ គឺ​កើតមាន​ទាំង​នៅ​ថែវ ខាងកើត នា​វេលា​ថ្ងៃ​រះ និង​ថែវ​ខាងលិច នា​វេលា​ពេល​ថ្ងៃ​លិច​។ ព្រឹត្តិការណ៍​នេះ នឹង​ផ្ទុយ​មកវិញ នា​ថ្ងៃទី​២១ ខែមិថុនា ជា​ព្រឹត្តិការណ៍​ប្រចាំឆ្នាំ ដែល​វេលា​ថ្ងៃ​វែង ជាង​យប់​វិញ​ម្ដង​។ អាថ៌កំបាំង​ដ៏​អស្ចារ្យ ដែល​សាធារណជន​ទូទៅ មិនសូវ​ចាប់អារម្មណ៍​នេះ គឺជា​ចំ ណុ​ច​ពិសេស​មួយទៀត នៃ​ប្រាសាទអង្គរវត្ត ក្រៅពី​ភាព​ថ្កុំថ្កើង នៃ​រចនាបថ​ហើយ​នោះ​។ តាម​ការយល់ឃើញ របស់លោក ព្រឹត្តិការណ៍​នេះ មិនមែនជា​រឿង ចៃដន្យ​នោះទេ តែ​វា​ជាការ​គុណគូរ ដ៏​ត្រឹមត្រូវ និង​ច្បាស់លាស់ ពី​បុព្វបុរស​ជំនាន់​នោះ ហើយ​បានរៀបចំ​ត្រឹមត្រូវ​មុននឹង​ឆ្លាក់​ចម្លាក់ រឿងរ៉ាវ​នានា តាម​ទីតាំង​នីមួយៗ​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular