​ជនជាតិ​ចិន​បីនាក់ និង​ខ្មែរ ពីរ​នាក់ រងរបួស​ធ្ងន់​ស្រាល ដោយសារ​រថយន្ត បី​គ្រឿង​បុក​គ្នា​

​ដោយៈ ស​រិ​ទ្ធ / ព្រះសីហនុៈ នៅវេលា​ម៉ោង​ជិត ៣ ទៀបភ្លឺ ថ្ងៃទី​៩ ខែមករា ឆ្នាំ​២០២១ នៅ​ចន្លោះ គីឡូម៉ែត្រ​លេខ ១១៥-១១៦ ស្ថិត​ក្នុងភូមិ​ស្ទឹងច្រាល ឃុំ​អូរ​បាក់រទេះ ស្រុក​កំពង់សីលា មាន​គ្រោះថ្នាក់​ចរាចរណ៍​មួយ កើតឡើង​រវាង​រថយន្ត និង​រថយន្ត ចំនួន ៣ គ្រឿង បុក​ប៉ះគ្នា បណ្តាល​ឲ្យ​មនុស្ស ចំនួន​៥​នាក់ រងរបួស​ធ្ងន់ និង​ស្រាល ។​

​សមត្ថកិច្ច បានបញ្ជាក់​ថាៈ រថយន្ត​ទាំង ៣ បើកបរ​ក្នុងទិសដៅ​ស្របគ្នា ព្រះសីហនុ​-​ភ្នំពេញ ក្នុងនោះ រថយន្ត​ទី​១ ជា​រថយន្ត​កុងតឺន័រ ពាក់​ផ្លាកលេខ ភ្នំពេញ 3F-0194 អ្នកបើកបរ ឈ្មោះ លាង ផល្លី ភេទ​ប្រុស អាយុ ៣០ ឆ្នាំ មាន​លំនៅ ភូមិ​ក្រាំង​ស្បូវ ឃុំ​ក្រាំង​ស្បូវ ស្រុក​ឈូក ខេត្តកំពត (​រងរបួស​ស្រាល​)​។ រថយន្ត​ទី​២ ម៉ាក​ហ៊ី​ណូ ពាក់​ផ្លាកលេខ ភ្នំពេញ 3A-1307 អ្នកបើកបរ ឈ្មោះ កង ង៉ែត ភេទ​ប្រុស អាយុ ៦០ ឆ្នាំ មាន​លំនៅ ស្ថិតក្នុង​ភូមិ​គី​រី​វន្ត ឃុំ​ត្រពាំង​ក្រឡឹង ស្រុក​ភ្នំស្រួច ខេត្តកំពង់ស្ពឺ (​រងរបួស​ស្រាល​)​។ រថយន្ត​ទី​៣ ម៉ាក HUMER ពាក់​ផ្លាកលេខ ភ្នំពេញ 2BS-0015 អ្នកបើកបរ ឈ្មោះ ថាំង គួ​ហួយ ភេទ​ប្រុស អាយុ ៣០ ឆ្នាំ ជនជាតិ ចិន (​រងរបួស​ធ្ងន់​) និង​មាន​អ្នករួមដំណើរ ក្នុង​រថយន្ត​ទី​៣​នេះ ជា​ជន​ជាតិចិន​ប្រុស ស្រី ចំនួន ២ នាក់​ទៀត (​មិន​ស្គាល់ឈ្មោះ​) រងរបួស​ធ្ងន់​។​

​ក្រោយ​ហេតុការណ៍​នេះ សមត្ថកិច្ច​ចម្រុះ បានចេញ​អន្តរាគមន៍ បញ្ជូន​ជនរងគ្រោះ ទាំង ៥ នាក់ ទៅ​សង្គ្រោះ​នៅ​មន្ទី​ពេទ្យ​បង្អែក ស្រុកស្រែ​អំបិល ខេត្តកោះកុង​។ ចំណែក​រថយន្ត​ទាំងបី​គ្រឿង បាន​យកទៅ​រក្សាទុក នៅ​អធិការដ្ឋាន​នគរបាល ស្រុក​កំពង់សីលា​៕/V

ទីតាំងផ្សាយពាណិជ្ជកម្ម

- Advertisment -

Most Popular