Home ព័ត៌មានអន្តរជាតិ មេដឹកនាំ​កូរ៉...

មេដឹកនាំ​កូរ៉េខាងជើង​ហៅ​អាម៉េរិក​ថា​ជា​«​សត្រូវ​ធំ​បំផុត​របស់​យើង​»​និង​ប្តេជ្ញា​ពង្រឹង​សមត្ថភាព​នុយគ្លេអ៊ែរ​

​ប្រែ​សម្រួលៈ​វាសនា​/​សេ​អ៊ូ​ល​៖​មេដឹកនាំ​កូរ៉េខាងជើង លោក​គីម ជុង​អ៊ុន បាន​អំពាវនាវ​អោយ​អភិវឌ្ឍ​សព្វាវុធ​នុយគ្លេអ៊ែរ​កាន់​តែ​ទំនើប​ឡើង​និង​បាន​និយាយថា សហរដ្ឋ​អាម៉េរិក​គឺជា​«​សត្រូវ​ធំ​បំផុត​របស់​​យើង​» នេះ​បើ​តាម​ប្រព័ន្ធ​ផ្សព្វផ្សាយ​រដ្ឋ​បាន​និយាយ​កាលពី​ថ្ងៃ​សៅរ៍​។​

​គីម ជុងអ៊ុន ប្តេជ្ញាពង្រឹងសមត្ថភាពនុយគ្លេអ៊ែរដើម្បីទប់កម្លាំងអមិត្ត

យោងតាម​ទីភ្នាក់ងារ​សារព័ត៌មាន​រដ្ឋ​KCNA គោលនយោបាយ​អរិភាព​របស់​រដ្ឋាភិបាល​ក្រុង​វ៉ាស៊ីនតោន​នឹងមិន​ផ្លាស់ប្តូរ​ទេ មិន​ថា​នរណា​កាន់កាប់​កៅអី​សេត​វិមាន តែ​ការទម្លាក់​ចោល​គោលនយោបាយ​​ទាំងនោះ​នឹង​ជា​កូនសោ​រគ​ន្លឺះ​ចំពោះ​ទំនាក់ទំនង​កូរ៉េខាងជើង​-​អាម៉េរិក​។​

​លោក​គីម បាន​និយាយថា « សកម្មភាព​នយោបាយ​ក្រៅប្រទេស​របស់​យើង​នឹង​ផ្តោត​ហើយ​កែ​តម្រង់​ឡើងវិញ​លើ​ការបង្ក្រាប​អាម៉េរិក ដែល​ជា​សត្រូវ​ធំ​របស់​យើង​និង​ជា​ឧបសគ្គ​ធំ​ចំពោះ​ការអភិវឌ្ឍន៍​​នវានុវត្តន៍​របស់​យើង​។​មិន​ថា​នរណា​ចូល​កាន់​អំណាច​នៅ​អាម៉េរិក​ទេ ធម្មជាតិ​ពិត​របស់​អាម៉េរិក​និង​គោលនយោបាយ​មូលដ្ឋាន​របស់​វា​ចំពោះ​កូរ៉េខាងជើង មិន​ដែល​ផ្លាស់​ប្តូរ​ទេ​។​ដូច្នេះ​ត្រូវ​ពង្រីក​ការ​ទាក់​​ទង​ជាមួយ​កម្លាំង​ឯករាជ្យ​ប្រឆាំង​ចក្រពត្តិ​និយម​»​។​

​លោក​បាន​បន្តថា កូរ៉េ​ខាងជើង​នឹង​មិន​ប្រើ​ខុស​សព្វាវុធ​នុយគ្លេអ៊ែ​ររ​បស់​ខ្លួន​ឡើយ ហើយ​ប្រទេស​នេះ​នឹង​ពង្រីក​ឃ្លាំង​សព្វាវុធ​នុយគ្លេអ៊ែរ​របស់ខ្លួន រួម​ទាំង​សមត្ថភាព​វាយប្រហារ​បង្ការ​ទុកជាមុន​និង​វាយ​​ប្រហារ​សងសឹក ជាមួយនឹង​ក្បាល​គ្រាប់​ទំហំ​ផ្សេងៗ​គ្នា​។​

​លោក​ក៏​បាន​អំពាវនាវ​អោយ​ផលិត​គ្រឿង​បរិក្ខា រួម​មាន​សព្វាវុធ​លឿន​ជាង​សម្លេង កាំជ្រួច​ផ្លោង​ឆ្លង​ទ្វីប​ដំណើរការ​ដោយ​ឥន្ធនៈ​រឹង​(ICBMs) ផ្កាយរណប​ឈ្លប​ការណ៍ និង​ដ្រូ​ន​។​

​កូរ៉េ​ខាងជើង​ក៏​ត្រៀម​ធ្វើ​ការសាកល្បង​និង​ផលិត​សព្វាវុធ​ថ្មីៗ រួម​មាន​រ៉ុក្កែត​ក្បាល​គ្រាប់​ច្រើន និង​ក្បាល​គ្រាប់​លឿន​ជា​សម្លេង​សំរាប់​រ៉ុក្កែត​ផ្លោង ខណៈ​ការសិក្សា​ស្រាវជ្រាវ​បង្កើត​នាវាមុជទឹក​ដើរ​ដោយ​ថា​ម​​ពល​នុយគ្លេអ៊ែរ​បាន​ឈាន​ដល់​ដំណាក់កាល​ជិត​ចប់ នេះ​បើ​តាម​គីម ជុង​អ៊ុន​៕

 

ទីតាំងផ្សាយពាណិជ្ជកម្ម

- Advertisment -

Most Popular