ដោយៈសរិទ្ធ/កណ្ដាលៈ បុរសម្នាក់ត្រូវចរន្តអគ្គិសនីខ្សែលួសឆក់ក្នុងស្រះ បណ្ដាលឲ្យស្លាប់ ដែលករណីនេះ កាលពីជាងម៉ោង១២អធ្រាត្រឈានចូលថ្ងៃទី៩ ខែមករា ឆ្នាំ ២០២១ នៅចំណុចស្រះត្រីមួយកន្លែងក្នុងភូមិព្រែកម្រេញ ឃុំពោធិបាន ស្រុកកោះធំ ខេត្តកណ្តាល ។
មន្ត្រីនគរបាលស្រុកកោះធំ បានឲ្យដឹងថា បុរសរងគ្រោះឈ្មោះ ពក ជឿន អាយុ៣៨ឆ្នាំ មុខរបររត់ឡានតាក់ស៊ី មានទីលំនៅភូមិព្រែកម្រិញ ឃុំពោធិបាន ស្រុកកោះធំ ខេត្តកណ្តាល។ ចំណែកម្ចាស់ស្រះឈ្មោះ អ៊ុន ថេ ភេទប្រុស អាយុ៥៦ឆ្នាំ មុខរបរកសិករ មានទីលំនៅភូមិព្រែកម្រេញ ឃុំពោធិបាន ស្រុកកោះធំ ខេត្តកណ្តាល (រត់គេចខ្លួន ) ។
ប្រភពដដែលបន្តថា នៅថ្ងៃទី៨ ខែមករា ឆ្នាំ២០២១ វេលាម៉ោង៩និង៣០នាទីយប់ ជនរងគ្រោះបានចេញពីផ្ទះ ដើម្បីទៅមើលគេបូមទឹកដាក់ស្រូវក្នុងគោលបំណងទៅចាប់ត្រី ។ លុះទៅដល់ចំណុចដីស្រែ ជនរងគ្រោះបានយកភ្លើងហ្វាពីឈ្មោះ ហេង ណេង ដោយប្រាប់ ថាទៅចាប់ត្រី ។ បានមួយសន្ទុះក្រោយមក ក៏ឮសម្រែក ឈ្មោះ ពក ជឿន ស្រែកថាជួយផង។ ភ្លាមនោះ ឈ្មោះ ផល ភាព និងឈ្មោះ ហេង ណេង ទៅកន្លែងកើតហេតុ ឃើញជនរងគ្រោះដួលប៉ះនឹងខ្សែលួស ដែលឈ្មោះ អ៊ុន ថេ រាយឆក់ការពារ កុំឲ្យគេចូលចាប់ត្រី ។ ភ្លាមនោះ ផល ភាព និង ហេង ណេង បានយកឈើគៀសខ្សែលួសចេញ ដើម្បីជួយជនរងគ្រោះ តែជនរងគ្រោះបានស្លាប់បាត់ទៅហើយ ក៏យកសាកសពជនរងគ្រោះមកផ្ទះ រួចរាយការណ៍ជូនអាជ្ញាធរ និងរាយការណ៍បន្តមកអធិការដ្ឋាននគរបាលស្រុកកោះធំ ។
ក្រោយកើតហេតុនគរបាលស្រុកោះធំសហការ ជាមួយប៉ុស្តិ៍នគរបាលរដ្ឋបាល លោកគ្រូពេទ្យ អាជ្ញាធរមូលដ្ឋាន និងក្រុមគ្រួសារជនរងគ្រោះ ធ្វើការពិនិត្យកន្លែងកើតហេតុ និងពិនិត្យសាកសពឃើញថា សាកសពមានស្នាមឆេះខ្មៅនៅលើ.ក មុខខាងឆ្វេង ប្រវែង១០សង់ទីម៉ែត្រ ស្នាមឆេះលើកំភួនដៃខាងស្តាំ ប្រវែង១១ សង់ទីម៉ែត្រ ស្នាមឆេះលើម្រាមដៃស្តាំចំនួន០៤ម្រាម នឹងស្នាមឆេះលើ មេដៃខាងឆ្វេងប្រវែង ០២សង់ទីម៉ែត្រ ក្រៅពីស្លាកស្នាមនេះ ពុំមានស្នាក់ស្នាមអ្វីផ្សេងគួរឲ្យកត់សម្គាល់ឡើយ ។
តាមការសន្និដ្ឋានថា ជនរងគ្រោះស្លាប់ដោយសារឆក់ចរន្តភ្លើង ដែលឈ្មោះ អ៊ុន ថេ រាយការពារផលប្រយោជន៍របស់ខ្លួន បណ្តាលឲ្យស្លាប់អ្នកដទៃ៕
