ដោយៈ ប.ជ័យ / បន្ទាយមានជ័យៈ អាជ្ញាធរ ក្រុងប៉ោយប៉ែត បានសាងសង់ផ្ទះ និងឧបត្ថម្ភសម្ភារប្រើប្រាស់ ជាអំណោយរបស់លោក ឧបនាយករដ្ឋមន្ត្រី កែ គឹមយ៉ាន ប្រធានក្រុមការងារ រាជរដ្ឋាភិបាល ចុះជួយខេត្តបន្ទាយមានជ័យ ជូនពលរដ្ឋ ១ គ្រួសារ គឺលោកយាយ ពៅ ចិន្តា និងលោកតា ជាជនពិការ មានបន្ទុក ចិញ្ចឹមកូនចៅ ៧ នាក់ នៅភូមិ/សង្កាត់និមិត្ត ក្រុងប៉ោយប៉ែត ។
ទាក់ទិននឹងករណីនេះ កាលពីថ្ងៃទី៩ ខែមករា ឆ្នាំ២០២១ លោក គាត ហ៊ុល អភិបាលក្រុងប៉ោយប៉ែត រួមដំណើរដោយលោក វរសេនីយ៍ឯក សៅ សារឿន អធិការនគរបាលក្រុង លោក សុខ ពេញណន នាយកស្តីទី លោក ប៉ុក សិរីបុត្រ ប្រធានផែនការនិងគាំទ្រសង្កាត់ លោក ម៉ក់ រតនា អនុប្រធានការិយាល័យ សាធារណការ ដឹកជញ្ជូន អនាម័យ បរិស្ថាន និងសណ្តាប់ធ្នាប់សាធារណៈ ក្រុងប៉ោយប៉ែត លោក ហ៊ុល សំអូន ចៅសង្កាត់និមិត្ត ក្រុមការងារសង្កាត់ ភូមិ យុវជន បានចុះសួរសុខទុក្ខ និងប្រគល់ ផ្ទះឈើប្រក់ស័ង្កសី មួយខ្នង ទំហំ ៤មែត្រ គុណ ៥ម៉ែត្រ ជូនលោកតា យាន សារិទ្ធ និងលោកយាយ ពៅ ចិន្តា ដែលបានរងគ្រោះ មហន្តរាយ ដោយភ្លើងឆេះផ្ទះ និងមានជីវភាពខ្វះខាត ។
សូមរំលឹកថា កាលពីរសៀល ថ្ងៃទី១ មករា កន្លងមក ផ្ទះរបស់តាយាយ ខាងលើនេះ ត្រូវភ្លើងឆេះ ជាមួយនឹងទ្រព្យសម្បត្តិ មួយចំនួនធំ។ លោក គាត ហ៊ុល ក៏បានពាំនាំ ការផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំ និងបានឧបត្ថម្ភ នូវសម្ភារគ្រឿងឧបភោគ និងគ្រឿងបរិភោគ ព្រមទាំងថវិកា មួយចំនួន៕/V
