រដ្ឋមន្ត្រី​កសិកម្ម​: មន្ត្រី​ជំនាញ​កំពុង​តាមដាន​ករណី​មាន់​ងាប់​ជាច្រើន​ក្បាល​នៅ​ស្រុក​ឯក​ភ្នំ​

ដោយ​: មុនី​រ័ត្ន / ភ្នំពេញ​: រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ លោក​វេ​ង សាខុន បានបញ្ជាក់​ប្រាប់​រស្មី​កម្ពុជា​ឲ្យ​ដឹងថា ពាក់ព័ន្ធ​ករណី​មាន់​ងាប់​ជាច្រើន​ក្បាល​ជា​បន្តបន្ទាប់​ស្ថិតនៅ​ភូមិ​ព្រែ​កតា​ច្រែង ឃុំ​ព្រែក​នរិន្ទ ស្រុក​ឯក​ភ្នំ ខេត្តបាត់ដំបង មន្ត្រី​ជំនាញ​កំពុងតែធ្វើការ​តាមដាន និង​បាន​យក​សំណាក​មក​ធ្វើការ​វិភាគ​ថា តើ​ងាប់​ដោយសារ​ប្រភេទ​ជំងឺ​អ្វី​?

រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ លោក​វេ​ង សាខុន

​លោក​រដ្ឋមន្ត្រី​បានន​បញ្ជាក់ថា “​ពិតជា​មាន​ករណី​មាន់​ងាប់​មែន យើង​កំពុងតែធ្វើការ​តាមដាន ឥឡូវនេះ​យើង​កំពុងតែ​យក​សំណាក​មក​ធ្វើការ​វិភាគ តើ​ប្រភេទ​ជំងឺ​អ្វី​បានជា​មាន់​ងាប់​?”​។​

​បើតាម​ម្ចាស់​កសិដ្ឋាន​ចិញ្ចឹម​មាន់​លោក ហូ ណាំ បាន​បញ្ជាក់ថា “៣​ថ្ងៃ មាន់​១៣០០​ក្បាល​ឈឺ​ងាប់​គ្មាន​សល់​”​។​

​សត្វ​មាន់​ជាច្រើន​ក្បាល​បាន​ងាប់​ជា​បន្តបន្ទាប់​ក្នុង​កសិដ្ឋាន​ស្ថិតនៅ​ភូមិ​ព្រែក​តា​ច្រែង ឃុំ​ព្រែក​នរិន្ទ ស្រុក​ឯក​ភ្នំ ខេត្តបាត់ដំបង កាលពី​ថ្ងៃទី​៥ ដល់​ថ្ងៃទី​៧ ខែមករា ឆ្នាំ​២០២១​។ ហើយ​បានធ្វើ​ឲ្យ​ប្រជាពលរដ្ឋ​រស់នៅ​តំបន់​នោះ ព្រួយ​បា​រម​ម្ភ​ខ្លាច​មាន​ជំងឺផ្តាសាយបក្សី​។

​រីឯ​លោក​ឈឹម វ​ជិ​រា ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ​ខេត្តបាត់ដំបង បាន​បញ្ជាក់ថា លោក​ចុះទៅពិនិត្យ​ដល់ទី​កន្លែង​ហើយ បាន​យក​វត្ថុ​សំណាក​ទៅធ្វើ​ការវិភាគ​នៅ​ភ្នំពេញ គឺ​មិនមាន​បញ្ហា​អ្វី​ប៉ះពាល់​ដល់​ការឆ្លង​ជំងឺ​ផ្ត​សាយ​បក្សី​អ្វី​ទេ គឺមាន់​ងាប់​ដោយសារ​ជំងឺ​ធម្មតា​។​

​លោក​បន្តថា ម្ចាស់​កសិដ្ឋាន​ចិញ្ចឹម​មាន់ឈ្មោះ ហូ ណាំ ជា​មន្ត្រីរ​មន្ទីរ​សុខាភិបាល​ខេត្តបាត់ដំបង រស់នៅ​ភូមិ​ព្រែក​តា​ច្រែង ឃុំ​ព្រែក​នរិន្ទ ស្រុក​ឯក​ភ្នំ ចិញ្ចឹម​មាន់ ទាកាប៉ា​ជា​លក្ខណៈ​គ្រួសារ​។ ករណី​មាន់​ងាប់​នេះ​កើតឡើង​តាំងពី​ថ្ង​ទី​៥ ដល់​ថ្ងៃទី​៧ ខែមករា ឆ្នាំ​២០២១ តែ​ម្ចាស់​កសិដ្ឋាន​មិនបាន​រាយការណ៍​មក​ជំនាញ​បសុព្យាបាល​ស្រុក និង​ខេត្ត​ឲ្យ​ចុះទៅ​ជួយ​អន្តរាគមន៍​បាញ់ថ្នាំ​ការពារ​ទេ​។

​លោក​បាន​បញ្ជាក់ថា ចំពោះ​មាន់​ដែល​ងាប់​មិនមែន ៣​ពាន់​ក្បាល​ទេ គឺ​ងាប់​តែ ១.៣០០​ក្បាល​ប៉ុណ្ណោះ​ហើយ​ជំនាញ​ប្រាប់​ឲ្យ​យកទៅ​កប់​ចោល​មិន​ឲ្យ​យកទៅលក់​ឲ្យ​អ្នកទិញ​យកទៅ​ហូប​ទេ ព្រមទាំង​ខាង​ជំនាញ​បាន​យក​វត្ថុ​សំណាក​ផ្ញើ​ទៅធ្វើ​កោសល្យ​វិ​ច្ច័​យ​នៅ​ភ្នំពេញ​រួចហើយ​ព្រមទាំង​ជួយ​បាញ់ថ្នាំ​ការពារ​នៅ​ជុំវិញ​បរិវេណ​កសិដ្ឋាន​នេះ​ផងដែរ​៕

ទីតាំងផ្សាយពាណិជ្ជកម្ម

- Advertisment -



Most Popular