រដ្ឋមន្ត្រី​កសិក​ម្មៈ សត្វ​មាន់​ដែល​ងាប់​ជាង​មួយ​ពាន់​ក្បាល​នៅ​ស្រុក​ឯក​ភ្នំ គឺ​គ្រុនផ្តាសាយ​បក្សី​

ដោយៈ​មុនី​រ័ត្ន​/​ភ្នំពេញៈ ដូច​អ្វីដែល​ប្រជាពលរដ្ឋ​មាន​ព្រួយបារម្ភ​មែន លទ្ធផល​ផ្លូវការ​នៃ​ការធ្វើ​តេស្ត​សំណាក​សត្វ​មាន់​ដែល​ងាប់​ជាង មួយ​ពាន់​ក្បាល នៅ​ស្រុក​ឯក​ភ្នំ ខេត្តបាត់ដំបង​គឺ​បាន​បង្ហាញថា ជា​គ្រុនផ្តាសាយ​បក្សី (H5N1)​។ លទ្ធផល​នៃ​ការធ្វើ​ត​តេស្ត​នេះ គឺ​បានបង្ហាញ​នៅ​ថ្ងៃទី​១១ ខែមករា នេះ​។​ប៉ុន្តែបញ្ហានេះមិនធ្ងន់ធ្ងរទេ។

រូបភាពមាន់ងាប់នៅស្រុកឯកភ្នំខេត្តដំបងនាពេលកន្លងទៅ

​ការធ្វើ​តេស្ត​នេះ​បាន​ធ្វើឡើង​បន្ទាប់ពី​សត្វ​មាន់​ជាច្រើន​ក្បាល​បាន​ងាប់​ជា​បន្តបន្ទាប់​នៅក្នុង​កសិដ្ឋាន​ចិញ្ចឹម​មួយ​មួយកន្លែង​ស្ថិតនៅ​នៅ​ភូមិ​ព្រែក​តា​ច្រែង ឃុំ​ព្រែក​នរិន្ទ ស្រុក​ឯក​ភ្នំ ខេត្តបាត់ដំបង កាលពី​ថ្ងៃទី​៥ ដល់​ថ្ងៃទី​៧ ខែមករា​កន្លងទៅ​។​
​លោក​វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ បានបញ្ជាក់​ប្រាប់​រស្មី​កម្ពុជា​នៅ​ល្ងាច​ថ្ងៃទី​១១ ខែមករា នេះ​ថា លទ្ធផល​ធ្វើ​តេស្ត​លើ​សំណាក​សត្វ​មាន់​ដែល​ងាប់​ជាង ១០០០​ក្បាល នៅ​ភូមិ​ព្រែក​តា​ច្រែង ឃុំ​ព្រែក​នរិន្ទ ស្រុក​ឯក​ភ្នំ បាន​បង្ហាញថា គឺជា​គ្រុនផ្តាសាយ​បក្សី (H5N1) ប៉ុន្តែ​ប្រភេទ​ជំងឺ​នេះ គឺ​មិន​ប៉ះពាល់​ដល់​មនុស្ស​ទេ​។

រូបភាពមាន់ងាប់នៅស្រុកឯកភ្នំខេត្តដំបងនាពេលកន្លងទៅ

​លោក​រដ្ឋមន្ត្រី​បានបញ្ជាក់​យ៉ាង​ដូច្នេះ​ថា “​លទ្ធផល​ធ្វើតេស្ត​បានបញ្ជាក់​ឲ្យ​ដឹងថា គ្រុនផ្តាសាយ​បក្សី (H5N1) ប៉ុន្តែ​ប្រភេទ​ជំងឺ​នេះ មិន​ប៉ះពាល់​ដល់​មនុស្ស​ទេ យើង​នឹងធ្វើ​ប្រកាស​ព័​ត៍​មាននៅ​យប់​នេះ​”​។​

លោករដ្ឋមន្ត្រី​ក្រសួងកសិកម្ម  បានបញ្ជាក់​ទៀតថា មន្ត្រី​របស់​អង្គភាព​អគ្គនាយកដ្ឋាន​សុខភាព​សត្វ ផលិតកម្ម​សត្វ សហការ​ជាមួយ​ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ ខេត្តបាត់ដំបង នឹង​ចុះ​ធ្វើការ​ផ្សព្វផ្សាយ ហើយ​និង​មាន​វិធ​នា​ការទប់ស្កាត់ ជាពិសេស​គឺ​បាញ់ថ្នាំ​សម្លាប់​មេរោគ​នៅ​តំបន់​នោះ ។ ហើយ​លោក​គិតថា វា​មិនជា​បញ្ហា​អ្វី​ប៉ុន្មាន​ទេ ដោយសារ​ការចិញ្ចឹម​មា​ន់​នោះ​នៅ​ដាច់ដោយឡែក​ពី​គេ ហើយ​ផ្ទុះ​ជំងឺផ្តាសាយបក្សី​នេះ វា​អត់​រាលដាល​ទៅ​កន្លែង​ផ្សេង ដោយ​ម្ចាស់​ចិញ្ចឹម​មាន់បាន​កប់​ទុកដាក់​ស្រួលបួល ដូចនេះ​មិនមាន​បញ្ហា​អ្វី​ប្រឈម​ធ្ងន់ធ្ងរ​ទេ​។​
​បើតាម​លោក ហូ ណាំ ម្ចាស់​កសិដ្ឋាន​ចិញ្ចឹម​មាន់បាន​បញ្ជាក់ថា “៣​ថ្ងៃ មាន់​១៣០០​ក្បាល​ឈឺ​ងាប់​គ្មាន​សល់​”​។​

​គួរ​បញ្ជាក់ថា សត្វ​មាន់​ជាច្រើន​ក្បាល​បាន​ងាប់​ជា​បន្តបន្ទាប់​ក្នុង​កសិដ្ឋាន​ស្ថិតនៅ​ភូមិ​ព្រែក​តា​ច្រែង ឃុំ​ព្រែក​នរិន្ទ ស្រុក​ឯក​ភ្នំ ខេត្តបាត់ដំបង​កាលពី​ថ្ងៃទី​៥​ដល់​ថ្ងៃទី​៧​ខែមករា​ហើយ​បានធ្វើ​ឲ្យ​ប្រជាពលរដ្ឋ​រស់នៅ​តំបន់​នោះ​ព្រួយ​បា​រម​ម្ភ​ខ្លាច​មាន​ជំងឺផ្តាសាយបក្សី​៕​សរន

រូបភាពមាន់ងាប់នៅស្រុកឯកភ្នំខេត្តដំបងនាពេលកន្លងទៅ

ទីតាំងផ្សាយពាណិជ្ជកម្ម

- Advertisment -



Most Popular