Home ព័ត៌មានជាតិ សេដ្ឋកិច្ច ក្រុមអ្នកជំនា...

ក្រុមអ្នកជំនាញផ្នែកអាជីវកម្ម ៖ វិបត្តិកូវីដ-១៩បានធ្វើឱ្យម្ចាស់អាជីវកម្មមួយចំនួនកាន់តែពង្រឹងសមត្ថភាព

ដោយ​៖​ដេប៉ូ​
​ភ្នំពេញ​៖​វិបត្តិ​កូ​វីដ​-១៩ បានធ្វើឱ្យ​ម្ចាស់​អាជីវកម្ម​មួយចំនួន​ទទួលរង​នូវ​ផលប៉ះពាល់ ឬ​ឈានដល់​ការ​ក្ស័យធន​។ ទោះបីយ៉ាងណា​ទន្ទឹមគ្នា​ជាមួយ​ការកើត​វិបត្តិ​នេះ​ក៏​ជា​ឱកាស​មួយ​ជំរុញ​ដល់ ម្ចាស់​អាជីវកម្ម​មួយចំនួនធំ​បាន​ប្រើប្រាស់​ពេលវេលា​នៃ​វិបត្តិ​នេះ សម្រាប់​កសាង​និង ពង្រឹងសមត្ថភាព​រប​ស់​ខ្លួន​លើ​ការគ្រប់គ្រង​អាជីវកម្ម និង​ការបង្កើត​អាជីវកម្ម​ថ្មីៗ ប្រកបដោយ​ភាព​ច្នៃប្រឌិត​ស្របតាម​ស្ថានភាព​ជាក់ស្ដែង​។
​បើតាម​ការលើកឡើងរ​ប​ស់លោក អោម សេង​បូរ៉ា ស្ថាបនិក​ស៊ី​អ៊ី​អូ ម៉ា​ស្ទឺ​រ​ក្លឹប​(CEO Master Club) និង​ជា​គ្រូបង្វឹក​ម្ចាស់​អាជីវកម្ម​ដ៏​ល្បីល្បាញ​មួយរូប​នៅ​កម្ពុជា​បានឱ្យដឹងថា​”​វិបត្តិ​កូ​វីត​១៩ បាន​បណ្ដាលឱ្យ​អាជីវកម្ម​ភាគច្រើន​ទទួលរង​ផលប៉ះពាល់​តិច ឬ​ច្រើន និង​ឈានទៅដល់​ការបិទ​ក៏មាន​។ ប៉ុន្តែ​ក៏មាន​ម្ចាស់​អាជីវកម្ម​មួយ​ភាគ​ធំ​បាន​ប្រើប្រាស់​វិបត្តិ​ទៅជា​ការស្វែងរក​ឱកាស ក្នុងការ​បង្កើត​អាជីវកម្ម​ថ្មីៗ​បំពេញ​តាម​តម្រូវ​របស់​ប្រជាជន​ក្នុងស្រុក​”​។​


លោក សេង​បូរ៉ា គូសបញ្ជាក់ថា “​បងប្អូន​ម្ចាស់​អាជីវកម្ម​ខ្លះ គាត់​មើលឃើញ​ឱកាស​នៅក្នុងពេល​មាន​វិបត្តិ​កូ​វីដ​-១៩ វា​អំណោយផល​ដល់​គាត់ ដូចជា​វិស័យ​ដំ​ណី​អាហារ និង​វិស័យ​ផ្សេងៗ​មួយចំនួនទៀត ឃើញថា មានការ​កើនឡើង​។ នេះ​ជា​ឱកាស​បើក​ថ្មី​ដោយ​ប្រើប្រាស់​ធនធាន​ចាស់​។ ហើយ​អ្នកមាន​លុយ​មួយចំនួន ចាប់យក​ឱកាស​ទិញ​អចលនទ្រព្យ​លក់​ប្រញាប់ ឬ​ធូរៗ​ថ្លៃ​”​។​
​លោក​មើលឃើញ​ម្យ៉ាង​ទៀតថា ជា​សំណាងល្អ​មួយ​សម្រាប់​អ្នករកស៊ី​នៅ​កម្ពុជា​ផងដែរ ដោយសារ​រាជរដ្ឋាភិបាល បាន​គ្រប់គ្រង​ការរីក​រាលដាល​ជំងឺ​កូ​វីត​១៩​មាន​ប្រសិទ្ធភាព ដែល​អាចឱ្យ​អាជីវកម្ម​ភាគច្រើន​នៅ​ដំណើរការបាន​។​
​លោក​ថា​“​បើ​មនុស្ស​អស់​ឈាម អស់​អុកស៊ីសែន គឺ​ត្រូវស្លាប់​ហើយ​។ ចំណែក​អាជីវកម្ម បើ​អស់​លុយ គឺ​មិនអាច​ទៅមុខ​បានទេ ប៉ុន្តែ​មុននឹង​បិទទ្វារ ម្ចាស់​អាជីវកម្ម​គួរ​ព្យាយាម​ប​ង្វឹ​ល​សាច់ប្រាក់​ឱ្យអស់​លទ្ធភាព​សិន និង​កុំ​ខ្លាច​ខ្មាស​គេ​ក្នុងការ​បិទទ្វារ ហើយ​ស្វែងរក​លទ្ធភាព​បើក​អាជីវកម្ម​ផ្សេងទៀត​”​។

​ដោយឡែក​លោក កែវ វុទ្ធី នាយក​ប្រ​ត្តិ​ប​ត្តិ ក្រុមហ៊ុន​វុ​ឌ្ឍី​ស័ក្តិ ខម​មើ​សល ឯ​.​ក និង​ជា​ម្ចាស់​ហាង​ថែរក្សា​សម្ផស្ស ណា​រ៉ា ប៊ី​យូ​ធី បានអោយដឹងថា នៅក្នុង​វិបត្តិ​កូ​វីដ​-១៩​នេះ​បានធ្វើឱ្យ​មានការ​ធ្លាក់ចុះ​ប្រាក់ចំណូល ខណៈ​ការបញ្ជា​រទិញ​ពី​អតិថិជន​ធ្លាក់ចុះ​។
​លោក​ថា​៖ “​ប៉ុន្តែ​នៅក្នុង​សម័យ​ដែល​យើង​ជូ​ប​បញ្ហា​កូ​វីដ​នេះ បានធ្វើឱ្យ​យើង​រឹងមាំ​ខ្លាំង​ជាង​មុន និង​រិះរក​វិធី​ទប់ស្កាត់​បញ្ហា​ទៅ​ថ្ងៃក្រោយ​។ ជាក់ស្ដែង ខ្ញុំ​គ្រោង​ពង្រីក​អាជីវកម្ម​របស់ខ្ញុំ​ចំនួន​ពីរ​ទីតាំង​បន្ថែមទៀត​”​។​
​ទាក់ទិន​ក្នុង​រឿងនេះ​ដែរ អ្នកស្រី ស៊ី ចាន់ណា​រ័ត្ន ម្ចាស់​ហាង​លក់​គ្រឿង​អ​ល​ង្គ​ការ និង​ពេជ្រ នៅលើ​អាគារ​ពាណិជ្ជកម្ម​អូ​ឡាំ​ព្យ៉ា បាន​អះអាងថា អាជីវកម្ម​របស់​អ្នកស្រី​មានការ​ថមថយ​តិចតួច​ប៉ុណ្ណោះ​។ អ្នកស្រី​ថា​៖ “​ដោយសារ​ខ្ញុំ​បាន​រៀន​នៅ​ស៊ី​អ៊ី​អូ ម៉ា​ស្ទឺ​រ​ក្លឹប ខ្ញុំ​មាន​យុទ្ធសាស្ត្រ​ថ្មីៗ​ដើម្បី​ត្រៀម​សម្រាប់​វ៉ៃ​លុក​ទីផ្សារ​នៅក្នុង​សម័យ​កូ​វីដ​នេះ​”​។​
​ទោះបីជា​យ៉ាងណា បើតាម​អ្នកជំនាញ​អាជីវកម្ម​រូបនេះ អាជីវកម្ម​អាច​ដំណើរការ​ទៅមុខ ឬ​បិទទ្វារ មិនមែន​អាស្រ័យ​ទាំងស្រុង​លើ​ស្ថានភាព​សង្គម​នោះទេ​។ វា​ក៏​ស្រ័យ​លើ​ម្ចាស់​អាជីវកម្ម ត្រូវមាន​ភាពច្បាស់លាស់ ហ្មត់ចត់​លើ​ការគ្រប់គ្រង និង​ចាត់ចែង​ផ្នែក​ហិរញ្ញវត្ថុ​ផងដែរ ដើម្បី​គេចចេញ​ពី​ការ​ក្ស័យធន និង​មាន​ភាពក្លាហាន​ក្នុង​បិទទ្វា​អាជីវកម្ម ជៀសវាង​បំណុល​វ័ណ្ឌក​។​
​      ជាមួយគ្នា​នោះ​អ្នកជំនាញ​ផ្នែក​អាជីវកម្ម​ខាងលើ លើកទឹកចិត្ត​អោយ​ម្ចាស់​អាជីវកម្ម ឬ​អ្នកវិនិយោគ ហ៊ាន​បោះទុន​រកស៊ី​បន្ថែមទៀត ប្រសិនបើ​ខ្លួន​នៅមាន​លទ្ធភាព​គ្រប់គ្រាន​។ ការធ្វើ​បែបនេះ ក៏​ជាការ​ចូលរួមចំណែក​ជ​ម្រុ​ញ​សេដ្ឋកិច្ចជាតិ​ឱ្យ​បន្ត​ឈានទៅ​មុខ​បាន ហើយ​ក្នុងនាម​ជា​គ្រូបង្វឹក​ម្ចាស់​អាជីវកម្ម​នៅ​កម្ពុជា លោក​នៅតែ​បន្ត​បេសកកម្ម​របស់ខ្លួន ចូលរួមចំណែក​ធ្វើឱ្យ​ម្ចាស់​អាជីវកម្ម​ជា​សមាជិក​របស់ខ្លួន​កាន់តែ​មានការ​រីកចម្រើន និង​បង្កើត​ការងារ​ជូន​ពលរដ្ឋ​កាន់តែច្រើន​៕

ទីតាំងផ្សាយពាណិជ្ជកម្ម

- Advertisment -

Most Popular