Home ព័ត៌មានអន្តរជាតិ ភាពស្ទាក់ស្ទើ...

ភាពស្ទាក់ស្ទើរ​របស់​ថៃ​ក្នង​ការអនុវត្ត​វិធានការ​តឹងរឹង​ប្រឆាំង​កូវី​ដ​១៩ បង្ក​ការ​ខ្វល់ខ្វាយ​

​ប្រែ​សម្រួលៈ​វាសនា​/​បាងកក​៖​អ្នកស្រុក​នៅ​ក្នុង​ខេត្ត​ថៃ​ចំនួន​៦ ឥឡូវ​ត្រូវ​សុំ​ការអនុញ្ញាត​មុន​ចាកចេញ​ពី​ខេត្ត​របស់​គេ​។​ភោជ្ជ​នី​យដ្ឋា​ន​នៅ​ក្រុង​បាងកក ត្រូវ​ឈប់​បំរើ​អាហារ​នៅនឹងកន្លែង​ត្រឹម​ម៉ោង​៩​យប់​។​​បណ្តា​រោងភាពយន្ត​ត្រូវ​បិទ និង​កន្លឬ​ម៉ាស្សា ងងឹត​មិន​ទទួលភ្ញៀវ​សាជាថ្មី​។​

​ថៃ ដែល​កំពុង​តស៊ូ​នឹង​ការផ្ទុះ​ជំងឺ​កូវី​ដ​១៩​នៅ​រលក​ទី​២ បានដាក់​ប្រើការ​រឹតត្បិត​មួយឈុត​ដោយ​អាស្រ័យ​លើ​ការឆ្លងកាត់​ព្រំដែន​ខេត្ត​ម្តងៗ​។​នរណា​ម្នាក់​ដែល​ចង់​ចេញពី​ក្រុង​បាងកក​ទៅកាន់​ខេត្ត​អាយុ​​ទ្យា​ក្បែរ​នោះ ក្នុង​ចម្ងាយ​ផ្លូវ​ធ្វើ​ដំណើរ​ប្រហែល​១​ម៉ោង នឹង​ត្រូវ​ចុះឈ្មោះ​ក្នុង​កម្មវិធី​តាមដាន​ចលនា​មួយ ហើយ​ត្រូវ​ធ្វើ​ចត្តា​ឡីស័​កក្នុងផ្ទះ​១៤​ថ្ងៃក្រោយ​មក​ដល់​បាងកក​វិញ​។​

​ដោយ​ព្យាយាម​បញ្ចៀស​ការជាប់គាំង​សេដ្ឋកិច្ច​ដូច​ដែល​ក្នុងពេល​អនុវត្ត​ការបិទ​ខ្ទប់​ទូទាំង​ប្រទេស​កាលពី​ខែ​មីនា​ឆ្នាំ​មុន ថៃ​ពេលនេះ​បាន​ដាក់ចេញ​វិធានការ​ទប់ស្កាត់​កូវី​ដ​១៩​ដោយ​ប្រយ័ត្នប្រយែង​ដោយ​​ជៀសវាង​ការបិទ​ខ្ទប់​ទូទៅ​។​ជំនួស​អោយ​ការបិទ​ប្រទេស​ទាំង​ស្រុង អាជ្ញាធរ​សំរេច​រឹតបន្តឹង​បណ្តើរៗ ពី​មួយ​ខេត្ត​ទៅ​មួយ​ខេត្ត ដោយ​ចាប់ផ្តើម​កាលពី​ខែ​មុន នៅពេល​ការឆ្លង​ជា​ចង្កោម​ត្រូវបាន​រកឃើញ​​នៅ​ផ្សារ​បង្គារ​មួយ​ក្នុង​ខេត្ត សាមុត សា​ខន ។​

​តែ​មធ្យោបាយ​នេះ​បាន​បង្ក​ការមិន​ស្រួល​ចិត្ត​ក្នុងចំណោម​អ្នកខ្លះ​នៅក្នុង​សហគមន៍​វេជ្ជសាស្ត្រ ដែល​ព្រមាន​ថា​វា​ទុក​អោយ​ថៃ​ប្រឈម​នឹង​ការឆ្លង​នៅ​រលក​ថ្មី​មួយទៀត​នៅ​ឆ្នាំ​នេះ​។​វា​ក៏​កាន់តែ​រុញ​ការ​រើប​​រើ​សេដ្ឋកិច្ច​របស់​ថៃ​អោយ​កាន់តែ​ឃ្លាតឆ្ងាយ​ថែម​ទៀត​។​

​គិត​មក​ត្រឹម​ថ្ងៃ​អង្គារ​ទី​១២​មករា​នេះ ថៃ​មាន​អ្នក​ឆ្លងកូវី​ដ​១៩​សរុប​១០.៨៣៤​នាក់ និង​ចម្លង​នៅ​ទូទាំង​៧៧​ខេត្ត​របស់​ព្រះរាជាណាចក្រ​នេះ​ចាប់​តាំងពី​ខែ​មករា​ឆ្នាំ​២០២០​មក​។​

​ថៃ​កាលពី​ថ្ងៃ​អង្គារ បាន​រក​ឃើញ​អ្នក​ឆ្លងកូវី​ដ​១៩​ថ្មី​ចំនួន​២៨៧​នាក់​ទៀត​បន្ទាប់​ពី​ឆ្លង​២៤៩​នាក់ កាលពី​ថ្ងៃ​ចន្ទ​។​

​អ្នកឯកទេស​ជំងឺឆ្លង​លោក​ធី​រ៉ា វ៉ូ​រ៉ា​តា​ណារ៉ាត មក​ពី​វិទ្យាល័យ​វេជ្ជ​សា​សស្ត្រ​នៃ​សកល​វិទ្យាល័យ​ជូឡា​ឡុងកន​បាន​ប្រាប់​សា​ពត៌មាន​មួយ​ថា «​រដ្ឋាភិបាល​ហាក់​ឆ្លើយតប​នឹង​ការផ្ទុះ​ជំងឺ​នៅ​រលក​ទី​២​នេះ​យឺត​​និង​មិនសូវមាន​ប្រសិទ្ធភាព​ជាង​កាល​ពី​រលក​ទី​១​។​ហេតុផល​ធំ​មួយ​គឺ​ដោយសារ​បារម្ភ​អំពី​ផលប៉ះពាល់​សេដ្ឋកិច្ច​បណ្តាលមកពី​ការបិទ​ប្រទេស​។​ខ្ញុំ​បាន​ព្រមាន​ពួកគេ​អោយ​ប្រយ័ត្ន​ដោយសារ​ប្រទេស​ជា​​ច្រើន​ដែល​ជ្រើស​យក​យុទ្ធសាស្ត្រ​បត់បែន​និង​ផ្តោត​លើ​សេដ្ឋកិច្ច​ខ្លាំង​ជាង​ក្រោយមក​រង​ការឆ្លង​ខ្លាំងក្លា​នៅក្នុង​ប្រទេស​របស់​គេ​ហើយ​ក៏​បិទ​ខ្ទប់​ទូទាំង​ប្រទេស​រយៈពេល​យូរ​ឡើង​ដែល​កាន់តែ​ធ្វើអោយ​​ខូចខាត​សេដ្ឋកិច្ច​ខ្លាំង​ឡើង​»​។​

​លោក កា​សេម ព្រូន​រ៉ា​តា​ណា​ម៉ា​ឡា ប្រធាន​ក្រុម​សិក្សា​ស្រាវជ្រាវ​មូល​ប​ត្រ​CGS-CIMB Securities (​ថៃ​)​បាន​និយាយថា «​រដ្ឋាភិបាល​ហាក់​ស្ទាក់​ស្ទើរនឹង​បិទ​ប្រទេស​នៅពេល​នេះ​ដោយសារ​ខ្លាច​ផល​ប៉ះ​​ពាល់​សេដ្ឋកិច្ច​ដែល​ខ្លួន​បាន​ជួប​កាលពី​ឆ្នាំមុន​។​រដ្ឋាភិបាល​ក៏​សល់​ប្រាក់​តិច​ទៅ​សំរាប់​ជួយ​អ្នក​រង​ផលប៉ះពាល់​ផងដែរ​»​។​

​តែ​ការ​រឹតត្បិត​ល្មម​នៅ​ទីបំផុត​នឹង​ប៉ះពាល់​ឧស្សាហកម្ម​ទេសចរណ៍​ដែល​ចូលរួម​ចំណែក​ប្រមាណ​២០​ភាគរយ​នៃ​ផលិតផល​សរុប​ក្នុងស្រុក​របស់​ថៃ​។​

​លោក​កា​សេម​បាន​និយាយថា​« វិស័យ​ជាក់លាក់​ខ្លះ​ដូចជា សណ្ឋាគារ​និង​ទេសចរណ៍ ចង់អោយ​មាន​ការ​រឹតត្បិត​តឹងរឹង​ខ្លាំង​ឡើង​ដើម្បី​គ្រប់គ្រង​កូវី​ដ​១៩​អោយបាន​ឆាប់​។​ពួកគេ​បារម្ភ​ថា បើ​ការបិទ​ខ្ទប់​​មិន​តឹងរឹង​ហ្មត់ចត់​ល្មម​ទេ ទេសចរណ៍​ក្នុងស្រុក​នឹង​រលំរលាយ​សំរាប់​រដូវ​បុណ្យចូលឆ្នាំ​ថ្មី​នា​ខែ​មេសា​។​បើ​ជំងឺ​បន្ត​រីក​រាលដាល​ហួស​ឆមាស​ទី​១ វា​នឹង​បំផ្លាញ​ទេសចរណ៍​បរទេស​ដែល​ត្រូវ​រើប​ឡើងវិញ​នៅ​ឆមាស​​ទី​២»​។​

​តែ​អ្នកនាំពាក្យ​រដ្ឋាភិបាល បាន​អះអាង​ថា ការបិទ​ខ្ទប់​ប្រទេស​វា​មិន​ចាំបាច់​ទេ ពីព្រោះ​សាធារណជន​យល់ដឹង​របៀប​ការពារ​ខ្លួន​ពី​វីរុស​នេះ​ហើយ​ឥឡូវ​។​

​នាយករដ្ឋមន្ត្រី​ថៃ​កាលពី​សប្តាហ៍​មុន​ថែម​ទាំង​អន្តរាគមន៍ បន្ធូរបន្ថយ​ការ​រឹតត្បិត​លើ​ម៉ោង​អង្គុយ​ទទួលទាន​អាហារ​នៅតាម​ភោជ្ជ​នី​យដ្ឋា​ន​ក្នុងក្រុង​បាងក​កថែម​ទៀត​ផង​។​

​តែ​ការប្រយុទ្ធ​នឹង​កូវី​ដ​១៩​នៅពេល​នេះ​អាច​ស្មុគស្មាញ​ដោយសារតែ​ការពិត​គឺ​ថា ការផ្ទុះ​ជំងឺ​កូវី​ដ​១៩​ក្នុង​សហគមន៍​នាពេល​បច្ចុប្បន្ន​ចេញពី​ការឆ្លង​ជា​ចង្កោម​ចំនួន​២ មួយ​ចេញ​ពី​កម្មករ​ចំណាកស្រុក​​មកពី​ប្រទេស​ជិតខាង និង​មួយទៀត​ចេញពី​វង់ល្បែង​ជាហេតុ​នាំ​អោយ​ការឆ្លង​ក្នុងស្រុក​ជាង​ពាក់កណ្តាល​មិនដឹង​ប្រភព​ច្បាស់លាស់​។​

​នៅក្នុង​កិច្ច​ខិតខំ​រក​អ្នក​ប្រឈម​ការឆ្លង​មក​ធ្វើតេស្តិ៍​និង​ទប់​ការឆ្លង​រាលដាល​ខ្លាំងឡើង ក្រសួង​ការងារ​ថៃ​បាន​ប្រកាស​លើកលែង​ទោស​ដក់​កម្មក​រព​លករ​ចំណាកស្រុក​ខុស​ច្បាប់​ទាំងអស់​ដោយ​អនុញ្ញា​​អោយ​ពួកគេ​មាន​សិទ្ធិ​ស្នាក់​នៅ​ធ្វើការ​នៅ​ថៃ​បាន​២​ឆ្នាំ​ឯណោះ​បើ​ពួកគេ​ចេញ​មក​ចុះឈ្មោះ​ច្បាស់លាស់​៕

​អ្នក​ទទួល​ទាន​អាហារ​នៅតាម​ផ្លូវ​នៃ​ក្រុង​បាងកក​ត្រូវ​អង្គុយ​នៅ​តុ​អាហារ​បាំង​ដោយ​ផ្លា​ស្ទិច​ដើម្បី​ការពារកូ​វីដ​១៩​។​ភោជ្ជ​នី​យដ្ឋា​ន​ក្នុង​ទី​ក្រុងនេះ​អនុញ្ញាត​អោយ​បើក​ទទួលភ្ញៀវ​ត្រឹម​ម៉ោង​៩​យប់ ហួស​ពី​​ម៉ោង​នេះ​អាច​ត្រឹម​ទិញ​យក​ទៅ​ទទួលទាន​នៅ​ខាងក្រៅ​

ទីតាំងផ្សាយពាណិជ្ជកម្ម

- Advertisment -

Most Popular