Home ព័ត៌មានសំខាន់ៗ ការបង្ក្រាប​ប...

ការបង្ក្រាប​បទល្មើស​ធ​ន​ធាន​ធម្មជាតិ​ឆ្នាំ​២០២០ មាន​កំណើន​ចំនួន ៣.៤៤២​ករណី ឬ​កើនឡើង​ប្រមាណ ៣០​ភាគរយ​

​ដោយ​:​ដេប៉ូ​/​ភ្នំពេញ​: «​ក្រសួងបរិស្ថាន​បង្ហាញ​នូវ​មោទនភាព​ចំពោះ​មន្ត្រី​ឧ​ទ្យា​នុ​រក្ស សមា ជិ​ក​នៃ​សហគមន៍​តំបន់ការពារធម្មជាតិ និង​អង្គការ​ដៃគូ​ទាំងអស់​ដែល បាន​ចូលរួម​ការគ្រប់គ្រង និង​អភិរក្ស​តំបន់ការពារធម្មជាតិ​នៅក្នុង​ឆ្នាំ​២០២០ កន្លងមកនេះ ជាពិសេស​ក្នុងការ​អនុវត្ត​ច្បាប់​ទប់ស្កាត់ និង​បង្ក្រាប​បទល្មើស​ធនធាន​ធម្មជាតិ ដោយ​បទល្មើស​ដែល​បង្ក្រាបបាន​នៅ​ឆ្នាំ​២០២០ មាន​កំណើន​ចំនួន ៣.៤៤២​ករណី ឬ​កើនឡើង​ប្រមាណ ៣០​ភាគរយ​»​។ នេះ​គឺជា​ការបញ្ជាក់​របស់លោក នេត្រ ភក្ត្រា រដ្ឋលេខាធិការ​និង​ជា​មន្ត្រី​នាំពាក្យ​ក្រសួងបរិស្ថាន​នៅ​ថ្ងៃទី​១២ ខែមករា ឆ្នាំ​២០២១​នេះ​។​

​លោក​រដ្ឋលេខាធិការ​បា​ន​បញ្ជាក់ថា ការទទួលបាន​សមិទ្ធ​ផល​ខាងលើនេះ តាមរយៈ​ការអនុវត្ត​ច្បាប់​ប្រឆាំងនឹង​បទល្មើស​ក្នុង​តំបន់ការពារធម្មជាតិ និង​របៀង​អភិរក្ស​ជីវៈចម្រុះ​ទាំង ៦៨ កន្លែង ដែល​ស្ថិតនៅក្រោម​ការការពារ និង​អភិរក្ស​របស់​ក្រសួងបរិស្ថាន​។

​លោក​បាន​ឱ្យដឹងទៀតថា នៅ​ពេញ​មួយឆ្នាំ ២០២០ មន្ត្រី​ឧ​ទ្យា​នុ​រក្ស​ទាំង ១.២០០ នាក់​នៃ​ក្រសួងបរិស្ថាន​បាន​ចុះ​ល្បាត​សរុប​ចំនួន ២៧.៥៨៨ លើក ខណៈ​នៅ​ការចុះ​ល្បាត​នៅ​ឆ្នាំ ២០១៩ មាន​ចំនួន ២៤.០៤៨ លើក ពោល​គឺមាន​ការចុះ​ល្បាត​មានការ​កើនឡើង​ចំនួន ៣.៥៤០ លើក​។ ក្នុង​ការចុះ​ល្បាត​នេះ មន្ត្រី ឧ​ទ្យា​នុ​រក្ស​ដែលជា​មន្ត្រីនគរបាល យុត្តិធម៌​បាន​បង្ក្រាប​បទល្មើស​បាន​ចំនួន ៨.៩១៧ ករណី ខណៈ​ឆ្នាំ ២០១៩ បង្ក្រាបបាន​បទល្មើស​ធ​ន​ធាន​ធម្មជាតិ​ចំនួន ៥.៤៧៥ ករណី គឺមាន​ការកើនឡើង​ចំនួន ៣.៤៤២ ករណី​។

​លោក​នេ​ត ភក្ត្រា បាន​បញ្ជាក់ថា បទល្មើស​ដែល​បង្ក្រាបបាន​ភាគច្រើន​ជា​បទល្មើស​លួច​កាប់​ឈើ ការ​រុករាន​ទន្ទ្រាន​កាន់កាប់​ដីព្រៃ​ខុសច្បាប់ ការ​បរបាញ់​សត្វ និង​ការដាក់​អន្ទាក់​ចាប់​សត្វ​។ ហើយ​នៅ​ឆ្នាំ ២០២០ កន្លងទៅ សំណុំរឿង​បទល្មើស​ធនធានធម្មជាតិ​ដែល​ត្រូវបាន​បញ្ជូន​ទៅកាន់​តុលាការ​មាន​ចំនួន ៦០៥ ករណី ហើយ​នៅ​ឆ្នាំ ២០២០ មានការ​ផាកពិន័យ​អន្តរការណ៍​លើ​ជន​ប្រព្រឹត្តល្មើស​ចំនួន ៨៥៧ ករណី និង​បទល្មើស​ដែល​ត្រូវធ្វើ​ការអប់រំ​និង​ធ្វើ​កិច្ចសន្យា​មាន​ចំនួន ២.៩៤៦ ករណី​។ ក្នុង​ប្រតិបត្តិ​ការចុះ​ល្បាត​និង​បង្ក្រាប​បទល្មើស នៅ​ឆ្នាំ​២០២០ មន្ត្រី​ឧ​ទ្យា​នុ​រក្ស​នៃ​ក្រសួងបរិស្ថាន​បាន​រឹបអូស​រណា​យន្ត​បាន​ចំនួន ៤.០០៤ គ្រឿង គឺមាន​ការកើនឡើង​ប្រមាណ ៥០០ គ្រឿង ខណៈ​នៅ​ឆ្នាំ ២០១៩ រណា​យន្ត​ដែល​ត្រូវបាន​រឹបអូស​មាន​ចំនួន ៣.៤៩៤ គ្រឿង​។

​លោក​រដ្ឋលេខាធិការ​បា​ន​ឱ្យដឹង​បន្ថែមថា ចំណែក​អន្ទាក់​ដែល​ត្រូវបាន ដោះ​បាន​ចេញពី​តំបន់ការពារធម្មជាតិ​ក្នុង​ឆ្នាំ ២០២០ មាន​ចំនួន ៤៣.២៧០​អន្ទាក់ គឺមាន​ការកើនឡើង​ជិត ៤.០០០​អន្ទាក់ ខណៈ នៅ​ឆ្នាំ ២០១៩ កន្លងទៅ អន្ទាក់​ដែល​ត្រូវបាន​មន្ត្រី​ឧ​ទ្យា​នុ​រក្ស​និង​សហគមន៍​តំបន់ការពារធម្មជាតិ​ដោះ​បាន​ចំនួន ៣៩.៣៨២ អន្ទាក់​។ នៅ​ឆ្នាំ​២០២០​កន្លងទៅ រថយន្ត​ចំនួន ២១៥ គ្រឿង​ដែល​ប្រព្រឹត្ត​បទល្មើស​ត្រូវបាន​រឹបអូស និង​គោយន្ត​ចំនួន ៦១១ គ្រឿង ព្រមទាំង​ម៉ូតូ​ចំនួន ៥៩០ គ្រឿង​ត្រូវបាន​ដកហូត​ផងដែរ ។ មន្ត្រី​ឧ​ទ្យា​នុ​រក្ស​ក៏បាន​ដកហូត​កាំភ្លើង​កែច្នៃ​ដែល​ប្រើ​សម្រាប់​បរបាញ់​សត្វ​បាន​ចំនួន ៧៣៧ ដើម និង​ដកហូត​ឈើ​បាន​ចំនួន ២៧១៨​ម៉ែត្រគូប​។

​លោក​រដ្ឋលេខាធិការ​ក្រសួងបរិស្ថាន​បាន​មានប្រសាសន៍​ដែរ​ថា ជាមួយ​ប្រសិទ្ធភាព​នៃ​ការអនុវត្ត​ច្បាប់​នេះ បទល្មើស​ព្រៃឈើ​ខ្នាត​ធំ​លែងមានទៀតហើយ គឺ​នៅមាន​បទ​ល្មើ​ល​ព្រៃឈើ​ខ្នាតតូច​ដែល​មន្ត្រី​ឧ​ទ្យា​នុ​រក្ស​នៃ​ក្រសួងបរិស្ថាន​និង​បន្ត​សហការ​ជាមួយ​សហគមន៍​តំបន់ការពារធម្មជាតិ និង​អង្គការ​ដៃគូ​បន្ត​អប់រំ​ផ្សព្វផ្សាយ​ច្បាប់ និង​អនុវត្ត​ច្បាប់​ដើម្បី​ទប់ស្កាត់ និង​បង្ក្រាប​បទល្មើស​បន្តទៀត​ដើម្បី​ថែរក្សា និង​ការពារ​ធនធានធម្មជាតិ​ដែល​កម្ពុជា​នៅមាន​នេះ​ឱ្យបាន​គង់វង្ស​សម្រាប់​មនុស្ស​រាប់​ជំនាន់​ទៅមុខទៀត​»៕

ទីតាំងផ្សាយពាណិជ្ជកម្ម

- Advertisment -

Most Popular