Home ព័ត៌មានសំខាន់ៗ ត្រាំ​ពង្រឹង​...

ត្រាំ​ពង្រឹង​ទំនាក់ទំនង​ជាមួយ​អនុ​ប្រធានាធិបតី​ឡើងវិញ ខណៈ​ពួក​ប្រជាធិបតេយ្យ​កំពុង​ធ្វើ​ចំណាត់​ដើម្បី​ចោទប្រកាន់​ប្រធានាធិបតី​

​ប្រែ​សម្រួល : កញ្ញា​ដា​លី​ស​/​វ៉ាស៊ីនតោន ៖ ប្រធានាធិបតី​ដូណាល់ ត្រាំ​និង​អនុ​ប្រធានាធិបតី ម៉ៃ ផេន​បាន​ជួប​គ្នា​កាលពី​ថ្ងៃ​ចន្ទ​ទី​១១​មករា​ជា​លើកដំបូង​ចាប់តាំងពី​ក្រុម​កុបករ​សម្រុកចូល​វិមាន​កា​ពី​តូ​ល​​អាម៉េរិក​កាលពី​សប្តាហ៍​មុន ដែល​នេះ​បង្ហាញ​ពី​ការរួបរួម​គ្នា​ទប់ទល់​នឹង​កិច្ច​ប្រឹងប្រែង​របស់​ពួក​ប្រជាធិបតេយ្យ​ដើម្បី​ចោទប្រកាន់​ដកតំណែង​លោក​ត្រាំ​ជា​លើក​ទី​ពីរ​។​

​ការប្រជុំ​នៅ​ការិយាល័យ​ពងក្រពើ ដែល​ត្រូវបាន​ពិពណ៌នា​ថា​ជា “​ការសន្ទនា​ដ៏​ល្អ​” ដោយ​មន្ត្រីជាន់ខ្ពស់​មួយរូប បាន​កើត​ឡើង​មុន​រយៈពេល ៤៨​ម៉ោង​ដ៏​សំខាន់​នៅ​ពេល​ដែល​លោក​ផេន​ស្ថិត​ក្រោម​សម្ពាធ​​ដើម្បី​ផ្តាច់ខ្លួន​ចេញពី​ប្រធានាធិបតី​និង​ផ្តួចផ្តើម​ការដក​លោក​ត្រាំ​ចេញពី​តំណែង​។​

​សល់​ត្រឹម​៨​ថ្ងៃមុន​ផុត​អាណត្តិ​និង​ជិត​មួយ​សប្តាហ៍​បន្ទាប់ពី​ការបះបោរ​មិនបាន​ជោគជ័យ​ដែល​ធ្វើ​រង្គោះរង្គើ​អាសនៈ​ប្រជាធិបតេយ្យ​របស់​អាម៉េរិក​លោក​ត្រាំ​បាន​ធ្វើដំណើរ​ទៅកាន់​រដ្ឋ​តិច​សាស់​នៅ​ថ្ងៃ​​អង្គារ​នេះ​ក្នុង​ដំណើរ​ចុងក្រោយ​របស់​លោក​ក្នុងនាម​ជា​ប្រធានាធិបតី ដើម្បី​ទៅ​ដល់​ដែនដី​ដែល​ស្វាគមន៍​គាត់ ដូច្នេះ​គាត់​នឹង​អាច​អួត​អំពី​ជោគជ័យ​របស់​រដ្ឋបាល​គាត់​។​

​ទោះ​យ៉ាងណា​នៅ​ទីក្រុង​វ៉ាស៊ីនតោន​គាត់​គឺជា​គោលដៅ​នៃ​កិច្ចខិតខំ​ប្រឹងប្រែង​ដើម្បី​ដក​គាត់​ចេញ​ពី​អំណាច​រួម​ទាំង​ការចោទប្រកាន់​ជា​លើក​ទី​ពីរ​ជា​ប្រវត្តិសាស្ត្រ ដោយ​លើក​នេះ​គឺ​ពីបទ “​ញុះញង់​បះបោរ​” ជុំវិញ​ការរំលោភបំពាន​ដ៏​សាហាវ​របស់​អ្នកគាំទ្រ​របស់​គាត់​ទៅលើ​អគារ​កា​ពី​តូ​ល​។​

​ដំបូង​សភាតំណាងរាស្ត្រ​នឹង​បោះឆ្នោត​នៅ​ថ្ងៃ​អង្គារ​នេះ​លើ​ការប្រឹងប្រែង​ជា​យូរ​ដើម្បី​ឱ្យ​លោក​ផេន​និង​គណៈរដ្ឋមន្ត្រីយក​មក​ប្រើ​ឡើងវិញ​នូវ​វិសោធនកម្ម​រដ្ឋធម្មនុញ្ញ​លើក​ទី ២៥​ដែល​នឹង​ប្រកាស​លោក​ត្រាំ​​មិន​សម​នឹង​បំពេញ​ភារកិច្ច​របស់​គាត់ ហើយ​បន្តុប​លោក​ផេន​ជា​ប្រធានាធិបតីស្តីទី​។​

​ការប្រជុំ​របស់​លោក​ផេន​ជាមួយ​លោក​ត្រាំហាក់​ទាត់​ចោល​អស់​ទៅហើយ​នូវ​ការរំពឹងទុក​បែប​នោះ​។​

​មន្ត្រីជាន់ខ្ពស់​សេត​វិមាន​រូប​នោះ​និយាយថា​”​បុរស​ទាំង​ពីរ​នាក់​បាន​បញ្ជាក់​ជា​ថ្មី​ថា​អ្នក​ដែល​រំលោភច្បាប់​និង​លុកលុយ​វិមាន​កា​ពី​តូ​ល​កាលពី​សប្តាហ៍​មុន​មិន​តំណាងឱ្យ​ចលនា​អាម៉េរិក​ជា​អាទិភាព​​ដែល​គាំទ្រ​ដោយ​ជនជាតិ​អាម៉េរិក​ចំនួន ៧៥ លាន​នាក់​នោះទេ ហើយ​សន្យាថា​នឹង​បន្ត​ការងារ​នេះ​ក្នុងនាម​ប្រទេស​សម្រាប់​អាណត្តិ​សេសសល់​របស់​ពួកគេ​”​។​

​បន្ទាប់មកទៀត ក្រុម​ប្រជាធិបតេយ្យ​នឹង​ជំរុញ​ដំណើរការ​ចោទប្រកាន់​នានា រួមទាំង​ការបោះឆ្នោត​របស់​សភា ដែល​រំពឹង​ធ្វើ​នៅ​ថ្ងៃ​ពុធ​ទី​១៣​មករា​។​

​ចំណាត់ការ ដែល​គំរាមកំហែង​ដល់​ក្តីសង្ឃឹម​នៃ​អនាគត​នយោបាយ​សម្រាប់​លោក​ត្រាំ អាច​ធ្វើឱ្យ​មាន​ភាព​តានតឹង​យ៉ាងខ្លាំង​សម្រាប់​ភាពចម្រូងចម្រាស​រយៈពេល​បួន​ឆ្នាំ​មក​នេះ​នៅ​មុន​ការសម្ពោធ​​កាន់​តំណែង​របស់​លោក ចូ បៃ​ដិន នៅ​ថ្ងៃទី ២០ ខែ​មករា​៕

​លោក​ត្រាំ​ត្រូវ​គ្នា​ជាមួយ​លោក​ផេន​វិញ ក្រោយ​ជួបគ្នា​កាលពី​ថ្ងៃ​ចន្ទ

ទីតាំងផ្សាយពាណិជ្ជកម្ម

- Advertisment -

Most Popular