Home ព័ត៌មានសំខាន់ៗ ​ក្រសួងសុខាភិ...

​ក្រសួងសុខាភិបាល បញ្ជូន​ក្រុមការងារ ទៅកាន់​ខេត្តបន្ទាយមានជ័យ ដើម្បី​ជួយផ្ដល់​សេវា​ពិនិត្យ ព្យាបាល និង​ថែទាំ​អ្នកជំងឺ​កូ​វីដ​-១៩


ដោយៈ សុផល / ភ្នំពេញៈ ក្រសួងសុខាភិបាល បាន​បែងចែក​ក្រុមការងារ ចំនួន​៤​ក្រុម ទៅកាន់​ខេត្តបន្ទាយ មានជ័យ ដើម្បី​ជួយ​ពង្រឹងសមត្ថភាព ក្នុងការ​ផ្ដល់ សេវា​ពិនិត្យ ព្យាបាល និង ថែទាំ​អ្នកជំងឺ​កូ​វីដ​-១៩ ជាពិសេស នៅពេល​មាន​ករណី​ចាំបាច់ ដែល​ត្រូវ​ជួយសង្គ្រោះ​បន្ទាន់ ឱ្យ​កាន់​តែមាន​ប្រសិទ្ធភាព​ខ្ពស់​។

​លោកស្រី វេជ្ជបណ្ឌិត ឱ វណ្ណឌី​ន រដ្ឋលេខាធិការ និង​ជា​អ្នកនាំពាក្យ ក្រសួងសុខាភិបាល បាន​មានប្រសាសន៍ថាៈ ក្រុមការងារ ទាំង​៤​ក្រុម​របស់ ក្រសួងសុខាភិបាល​នេះ បាន​ចូលធ្វើ​ការងារ នៅ​មន្ទីរពេទ្យ​មិត្តភាព កម្ពុជា​-​ជប៉ុន មង្គល​បូរី ដែលជា​មន្ទីរពេទ្យបង្អែក ខេត្តបន្ទាយមានជ័យ ដើម្បី​លើកទឹកចិត្ត និង​គាំទ្រ​ផ្នែក​បច្ចេកទេស ក៏ដូចជា បំពាក់បំប៉ន​សមត្ថភាព បន្ថែមទៀត ជូន​ដល់​ក្រុមគ្រូពេទ្យ​បង្អែក នៃ​ខេត្ត​នេះ​។​

​នៅ​ព្រឹក​ថ្ងៃទី​១១ ខែមករា ឆ្នាំ​២០២១ នេះ ដោយ​អនុវត្តតាម​បញ្ជា របស់​សាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួងសុខាភិបាល ក្រុមការងារ ក្រសួងសុខាភិបាល ដឹកនាំ​ដោយ​លោកស្រី វេជ្ជបណ្ឌិត ឱ វណ្ណឌី​ន រដ្ឋលេខាធិការ និង​ជា​អ្នកនាំពាក្យ ក្រសួងសុខាភិបាល រួម​ដំណើរ​ជាមួយ លោកស្រី វេជ្ជបណ្ឌិត លី អាយ​លែ​ន តំណាង​អង្គការ​សុខភាព​ពិភពលោក ប្រចាំ​កម្ពុជា និង​មន្ត្រី​នៃ​ក្រសួងសុខាភិបាល ព្រមទាំង​ក្រុម​គ្រួ​ពេទ្យ​មិត្តភាព ខ្មែរ​-​សូ​វៀត បាន​ចុះ​បេសកកម្ម​ធ្វើការ​ងារ នៅតាម​បណ្ដោយ​ព្រំដែន កម្ពុជា​-​ថៃ មាន​ខេត្តបន្ទាយមានជ័យ បាត់ដំបង និង ខេត្ត​ប៉ៃលិន​។​

​លោកស្រី បានបញ្ជាក់​ថាៈ ក្រុមការងារ​ក្រសួងសុខាភិបាល បាន​ពិភាក្សា​ជាមួយ​លោក ឡេ ច័ន្ទ​សង្វាត ប្រធាន​មន្ទីរ​សុខាភិបាល ខេត្តបន្ទាយមានជ័យ ក៏ដូចជា ថ្នាក់ដឹកនាំ​ខេត្ត ហើយ​បាន​បែងចែក​ក្រុមការងារ ឱ្យធ្វើ​ការងារ​ជា​ក្រុម​តូចៗ តាម​ជំនាញ​។ ក្រុមទី​១. សម្រាប់​បំពេញការងារ ពិនិត្យ​កិច្ចការ នៃ​ការគ្រប់គ្រង អ្នកជំងឺ​ទូទៅ នៅក្នុង​មន្ទីរពេទ្យ​។ ក្រុមទី​២.​គឺជា​ក្រុមគ្រូពេទ្យ​មិត្តភាព ខ្មែរ​-​សូ​វៀត ដោយ​អនុវត្តតាម​បញ្ជា របស់​រដ្ឋមន្ត្រីក្រសួង​សុខាភិបាល បាន​នាំយកមក ជាមួយ​នូវ ម៉ាស៊ីន​វាស់​ចង្វាក់បេះដូង ដើម្បី​ដាក់ជូន​មន្ទីរពេទ្យ​មិត្តភាព កម្ពុជា​-​ជប៉ុន មង្គល​បូរី និង​ផ្ដល់​ការបង្ហាត់បង្ហាញ អំពី​ការប្រើប្រាស់ ក៏ដូចជា បំពាក់បំប៉ន​នូវ សមត្ថភាព​បន្ថែមទៀត អំពី​នីតិវិធី និង​របៀបរបប នៃ​ការពិនិត្យ​ព្យាបាល អ្នកជំងឺ​កូ​វីដ​-១៩ ក្នុង​គោលបំណង ដើម្បី​ជួយ​គ្នា ទៅវិញទៅមក ក្នុង​ការផ្ដល់សេវា​ពិនិត្យ ព្យាបាល ថែទាំ​ដល់​អ្នកជំងឺ​កូ​វីដ​-១៩ ឱ្យ​កាន់​តែមាន​ប្រសិទ្ធភាព​ខ្ពស់​។ ក្រុមទី​៣. គឺជា​ក្រុម​នៃ​នាយកដ្ឋាន មន្ទីរពេទ្យ​របស់ ក្រសួងសុខាភិបាល ដែល​កំពុង​ជួយ​ដល់ មន្ទីរពេទ្យ​នេះ ក្នុងការ​អនុវត្ត ក៏ដូចជា ពង្រឹងសមត្ថភាព​បន្ថែមទៀត ក្នុងការ​ចាត់ចែង ធ្វើយ៉ាងណា ឱ្យ​ការការពារ​នូវ ការចម្លង​រោគ នៅក្នុង​មន្ទីរពេទ្យ​នេះ ឱ្យបាន​សមស្រប ទៅតាម​លក្ខណៈ​បច្ចេកទេស វិទ្យាសាស្ត្រ និង​ក្រុមទី​៤ ក៏​ជា​ក្រុម​របស់​ក្រសួងសុខាភិបាល ដែលមាន​វេជ្ជបណ្ឌិត​ជំនាញ ផ្នែក​សង្គ្រោះបន្ទាន់ បាននិងកំពុង​ផ្ដល់​ការគាំទ្រ និង​ជួយ​បង្ហាត់បង្ហាញ បន្ថែមទៀត ទៅដល់​ក្រុមគ្រូពេទ្យ សង្គ្រោះបន្ទាន់ នៃ​មន្ទីរពេទ្យបង្អែក ខេត្តបន្ទាយមានជ័យ ដើម្បី​ពង្រឹង​នូវ​សមត្ថភាព របស់​ពួកគាត់ នៅក្នុង​ការជួយ ដល់​អ្នកជំងឺ នៅពេល​ដែលមាន​ករណី​ចាំបាច់​ត្រូវ ជួយសង្គ្រោះ​បន្ទាន់ ទៅដល់​អ្នកជំងឺ​កូ​វីដ​-១៩ ប្រសិនបើ​មាន​ករណី​ធ្ងន់ធ្ងរ ហើយ​មិន​ត្រឹមតែ អ្នកជំងឺ​កូ​វីដ​-១៩​ទេ គឺ​ជួយ​ដល់​អ្នកជំងឺ ដទៃទៀត​ផងដែរ​»​។​

​លោកស្រី រដ្ឋលេខាធិការ បានបញ្ជាក់​ថាៈ ការពង្រឹង​សមត្ថភាព​បន្ថែម ដល់​មន្ទីរពេទ្យ នៅ​ខេត្តបន្ទាយមានជ័យ​នេះ ស្រប​ពេលដែល​ពលករ​ខ្មែរ កាន់តែច្រើន បាន​ចាក​ចេញពី ប្រទេស​ថៃ ត្រឡប់មក​កម្ពុជា​វិញ ក្នុង​គ្រា​ដែល​ប្រទេស​ថៃ កំពុង​រាតត្បាត ដោយ​ជំងឺ​កូ​វីដ​-១៩ ក្នុងនោះ នៅតាម​ច្រកព្រំដែន​នានា រវាង​កម្ពុជា និង​ថៃ មន្ត្រី​សុខាភិបាល បាន​ពង្រឹង​ការធ្វើ​ច​ត្តា​ឡី​ស័ក និង​បាន​រកឃើញ ពលករ​មួយចំនួន មាន​ផ្ទុក​ជំងឺ​កូ​វីដ​-១៩ ដោយ​ក្រសួងសុខាភិបាល បាន​យកចិត្តទុកដាក់ ក្នុងការ​ថែទាំ ព្យាបាល យ៉ាង​ត្រឹមត្រូវ ពី​ក្រុមគ្រូពេទ្យ​ជំនាញ​៕/V

ទីតាំងផ្សាយពាណិជ្ជកម្ម

- Advertisment -

Most Popular