ដោយៈតារារិទ្ធៈភ្នំពេញ/រាជរដ្ឋាភិបាលកម្ពុជានៅថ្ងៃទី១២ខែមករាឆ្នាំ២០២១នេះបានចេញអនុក្រឹត្យស្ដីពីប្រាក់បេ សកកម្មនៅក្នុងនិងក្រៅប្រទេសសម្រាប់រដ្ឋបាលថ្នាក់ជាតិនិងថ្នាក់ក្រោមជាតិ។អនុក្រឹត្យក៏បានកំណត់ទោសទណ្ឌចំពោះមន្ត្រីរាជការសាធារណៈគ្រប់ប្រភេទនិងគ្រប់ឋានៈ រួមទាំងមន្ត្រីជាប់កិច្ចសន្យាចំពោះសកម្មភាពដែលបានប្រព្រឹត្ត ឬសមគំនិតក្នុងការប្រព្រឹត្តក្លែងបន្លំលិខិតយុត្តិការចំណាយនិងលិខិតស្នាមផ្សេងៗក្នុងគោលបំណងទទួលបានប្រាក់បេសកកម្មដែលខ្លួនពុំមានសិទ្ធិទទួលតាមការកំណត់នៃអនុក្រឹត្យ ។
អនុក្រឹត្យនេះកំណត់អំពីវិធាននិងនីតិវិធីនៃការអនុវត្ដប្រាក់បេសកកម្មនៅក្នុងប្រទេសនិងក្រៅប្រទេសដើម្បីលើកកម្ពស់ប្រសិទ្ធភាព ភាពសក្ដិសិទ្ធិ តម្លាភាពនិងគណនេយ្យ ភាពនៃការបំពេញបេសកកម្មនៅក្នុងប្រទេស និងក្រៅប្រទេសរបស់ថ្នាក់ដឹកនាំមន្ដ្រីរាជការសាធារណៈ និង មន្ដ្រីជាប់កិច្ចសន្យានៃក្រសួងស្ថាប័ន អង្គភាពរដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិនៃកម្ពុជា ។
អនុក្រឹត្យនេះមានវិសាលភាពអនុវត្តចំពោះ៖សមាជិករាជរដ្ឋាភិបាល រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការ អនុរដ្ឋលេខាធិការ សមាសភាពក្រុមប្រឹក្សារាជធានីខេត្ត ក្រុង ស្រុក ខណ្ឌ ឃុំ សង្កាត់ មន្ត្រីរាជការសាធារណៈគ្រប់លំដាប់ថ្នាក់ ទីប្រឹក្សាជំនួយការ មន្ត្រីជាប់កិច្ចសន្យាដែលមានការទទួលស្គាល់ជាផ្លូវការពីក្រសួងមុខងារសាធា រណៈជំនួយការហិរញ្ញវត្ថុនៃរដ្ឋបាលឃុំសង្កាត់ ។
នៅក្នុងជំពូកទី៥ស្តីពីទោសប្បញ្ញត្តិ ក្នុងមាត្រាតី២៤ បានចែងថាមន្ត្រីរាជការសាធារណៈគ្រប់ប្រភេទនិងគ្រប់ឋានៈ រួមទាំងមន្ត្រីជាប់កិច្ចសន្យាត្រូវទទួលទណ្ឌកម្មរដ្ឋបាលនិង សំណងរដ្ឋប្បវេណីតាមច្បាប់និងបទប្បញ្ញត្តិជាធរមានចំពោះសកម្មភាពដែលបានប្រព្រឹត្ត ឬ សមគំនិតក្នុងការប្រព្រឹត្តដូចខាងក្រោម ៖
-ការក្លែងបន្លំលិខិតយុត្តិការចំណាយនិងលិខិតស្នាមផ្សេងៗ ក្នុងគោលបំណងទទួលបានប្រាក់បេសកកម្ម ដែលខ្លួនពុំមានសិទ្ធិទទួលតាមការកំណត់នៃអនុក្រឹត្យនេះ ។
-ការបង្វែរឬកេងប្រវ័ញ្ចាប្រាក់បេសកកម្មដើម្បីយកទៅប្រើប្រាស់ក្រៅពីការបំពេញបេសកកម្ម ។
-ការបង្កើនរយៈពេលបំពេញបេសកកម្ម និង/ ឬចំនួនមន្ត្រីចុះធ្វើបេសកកម្មដែលខុសពីបេសកកម្មដែលបានអនុវត្តជាក់ស្តែង ។
-ការបង្កើតបេសកកម្មដោយក្លែងបន្លំក្នុងគោលបំណងទទួលបានប្រាក់ឧបត្ថម្ភបន្ថែម។
-ការទទួលបានប្រាក់បេសកកម្មតែមិនបានផ្តល់ជូនសាមីមន្ត្រីរាជការសាធារណៈដែលត្រូវបំពេញបេសកកម្ម។
-ការរារាំងឬការព្យាយាមរារាំងដល់ដំណើរការត្រួតពិនិត្យប្រក្រតីភាពនៃការអនុវត្តប្រាក់បេសកកម្ម ។
ទណ្ឌកម្មនេះមិនមែនជាឧបសគ្គសម្រាប់ការចោទប្រកាន់និងការផ្តន្ទាទោសព្រហ្មទណ្ឌ ស្របតាមច្បាប់ និងបទប្បញ្ញត្តិជាធរមាននៃព្រះរាជាណាចក្រកម្ពុជាឡើយ ។
ចំណែកនៅក្នុងមាត្រា២៥ បានចែងថា៖អនុលោមតាមបទប្បញ្ញត្តិច្បាប់ជាធរមានទណ្ឌកម្មរដ្ឋបាលសម្រាប់មន្ត្រីរាជការស៊ីវិលរួមមានជាអាទិ៍៖ការស្តីបន្ទោស,ការផ្លាស់ដោយ បង្ខំតាមវិធានការខាងវិន័យ,ការលុបឈ្មោះចេញពីតារាងឡើងឋានន្តរស័ក្តិឬថ្នាក់,ការដាក់ឱ្យនៅទំនេរគ្មានបៀវត្ស,ការបន្ថយឋានន្តរស័ក្តិឬថ្នាក់, ការដាក់ឱ្យចូលនិវត្តន៍មុន កំណត់,ការបញ្ឈប់ពីការងារដោយបង្ខំឬការបណ្តេញចេញពីមុខតំណែងជាមន្ត្រីរាជការ។
អនុក្រឹត្យនេះមានប្រសិទ្ធភាពអនុវត្តជំនួសអនុក្រឹត្យលេខ ២១៦ អនក្រ.បក ចុះថ្ងៃទី ២២ខែកក្កដាឆ្នាំ២០១៤ ស្តីពីប្រាក់បេសកកម្មនៅក្នុងនិងក្រៅប្រទេសសម្រាប់រដ្ឋបាល ថ្នាក់ជាតិនិងថ្នាក់ក្រោមជាតិ ។ បទប្បញ្ញត្តិទាំង ឡាយណាដែលមានខ្លឹមសារផ្ទុយនឹងអនុក្រឹត្យនេះត្រូវទុកជានិរាករណ៍ ៕
