គ្រួសារ​រងគ្រោះ​ដោយ​ទឹកជំនន់​រាប់ពាន់​គ្រួសារ​ទទួលបាន​ការគាំទ្រ​ជំនួយ​មនុស្សធម៌​ផ្នែក​តម្រូវការ​មូលដ្ឋាន​

​ដោយៈ​បញ្ញា​សាស្ត្រ​/​ភ្នំពេញៈ​អង្គការ​សង្គ្រោះ​កុមារ​( Save the Children) ទទួលបាន​ជំនួយ​មនុស្សធម៌​ពី​សហភាព​អឺរ៉ុប ក្នុងការ​ផ្តល់ជូន​សាច់ប្រាក់​ដោយ​គ្មាន​លក្ខខណ្ឌ ដល់​គ្រួសារ​រងគ្រោះ​ដោយ​ទឹកជំនន់​ចំនួន ៣០០០​គ្រួសារ​ដើម្បី​ឆ្លើយតប​នឹង​តម្រូវ ការ​មូលដ្ឋាន​។​អង្គការ​សង្គ្រោះ​កុមារ សម្រេច​ការងារ​នេះ​បាន​ដោយបាន​ដៃគូ​សហការ​ពី​ភ្នាក់ងារ​វី​ង​ដែលជា​ធនាគារ​ឯកទេស និង​អង្គការក្រៅរដ្ឋាភិបាល​រួមមាន​អង្គការ​កុមារ​រីករាយ​និង​អង្គការ​ហា​ហ្កា​រ​អន្តរជាតិ​។​នេះ​បើ​យោងតាម​សេចក្តី​ព័ត៌មាន​រួមគ្នា​រវាង​អង្គការ​សង្គ្រោះ​កុមារ និង សហភាព​អឺរ៉ុប កាលពីថ្ងៃទី១១ខែមករា។​

​នៅ​ចុងខែ​កញ្ញា​ឆ្នាំ​២០២០​ប្រទេស​កម្ពុជា​បាន​ជួបប្រទះ​ជំនន់​ទឹកភ្លៀង​បណ្តាលឱ្យមាន​ទឹកជំនន់​យ៉ាងខ្លាំង​ដែល​បង្ក​ឱ្យ​ប្រជាជន​រាប់ពាន់​គ្រួសារ​ផ្លាស់​ទីលំនៅ​។ ខេត្តបាត់ដំបង ត្រូវបាន​ចាត់ទុកថា​ជា​ខេត្ត ដែល​ទទួលរង​គ្រោះ​ធ្ងន់​ជាងគេ​ដោយមាន​ប្រជាជន​រង​ផលប៉ះពាល់ ច្រើន​។

​ទឹកជំនន់​ក៏បាន​ប៉ះពាល់​ដល់​សាលារៀន​ក្នុង​តំបន់​សៀវភៅ​សិក្សា បរិក្ខារ​បន្ទប់ទឹក និង​សម្ភារ​ទឹកស្អាត​ជាច្រើន​ផងដែរ​។​យោងតាម ការវាយតម្លៃ​រួមគ្នា​ដែល​ធ្វើឡើង​តាមរយៈ​វេទិកា​ឆ្លើយតប​ផ្នែក​មនុស្សធម៌ គ្រួសារ​ប្រមាណ ៣៤​ភាគរយ បាន​រាយការណ៍​ថា​មិនមាន អាហារ​គ្រប់គ្រាន់​សម្រាប់​បរិភោគ​។ កម្ចី​ម្ហូបអាហារ ឬ​ការកាត់បន្ថយ​បរិមាណ​អាហារ ក្លាយជា​បញ្ហា​រួម​ក៏ដូចជា​ការប្រើ​កម្ចី​សម្រាប់ ទិញ​សម្ភារៈ​ដែល​ចាំបាច់​។​

​លោកស្រី Gloria Doñate នាយិកា​ផ្នែក​យុទ្ធសាស្ត្រ អភិវឌ្ឍន៍​កម្មវិធី និង​ផលប៉ះពាល់ នៃ​អង្គការ​Save the Children បាន​ពន្យល់ថា គ្រួសារ​ដែល​រងគ្រោះ​ដោយ​ទឹកជំនន់​ទាំងនោះ កំពុង​ជួប​ការលំបាក​យ៉ាងខ្លាំង​ក្នុងការ​ទប់ទល់​នឹង​ផលប៉ះពាល់​ទាំង​ផ្នែក​សេដ្ឋកិច្ច និង​សង្គម ដែល​បង្កដោយ​ជំងឺ​កូ​វីដ ១៩​។ ទាំងនេះ​បាន​ក្លាយជា​បន្ទុក​បន្ថែម​ទៀត សម្រាប់​ការចំណាយ​លើ​ការទិញ​អាហារ​និង​ទឹកស្អាត ក៏ដូចជា​សម្ភារៈ ប្រើប្រាស់​ក្នុងផ្ទះ ថ្នាំសង្កូវ និង​កា​រប​ញ្ចូ​ន​កូនៗ​ទៅ​សាលា​វិញ​ផងដែរ​។ លោកស្រី​បន្ត​យ៉ាង​ដូច្នេះ​ថា​“​គ្រួសារ​ទាំងនេះ ជួប​ការលំបាក​រួចទៅហើយ​ក្នុង​ជីវភាព​ប្រចាំថ្ងៃ ដោយសារ​ជំងឺ​កូ​វីដ​១៩ ក៏ដូចជា​ការបាត់បង់​ចំណូល និង​ជីវភាព​រស់នៅ​ប្រចាំថ្ងៃ​។ ការផ្ទេរ​សាច់ប្រាក់​ដោយ​គ្មាន​លក្ខខណ្ឌ​នេះ នឹង​ជួយ​សម្រាល​បន្ទុក​ពួកគេ ដើម្បី​អាចបំពេញ​នូវ​តម្រូវការ​មូលដ្ឋាន​ប្រកបដោយ​សេចក្តី ថ្លៃថ្នូរ ក៏ដូចជា​ជួយ​ស្តារ​នូវ​ជីវភាព​រស់នៅក្នុង​តំបន់​ផងដែរ​” ។

​លោកស្រី Doñate បន្ថែមទៀតថា ការផ្ទេរ​សាច់ប្រាក់​ដោយ​គ្មាន​លក្ខខណ្ឌ​នឹង​ជួយ​ដល់​ក្រុមគ្រួសារ​ទាំងនោះ ពិសេស​គ្រួសារ​ក្រីក្រ ស្ត្រី​ជា​មេ​គ្រួសារ ក្រុមគ្រួសារ​ដែលមាន​ស​មា​ជិ​ក​ជា ជនពិការ ចាស់ជរា ឬ​ស្ត្រី​មាន​ផ្ទៃពោះ ដើម្បី​បំពេញតម្រូវការ​មូលដ្ឋាន​របស់​ពួកគេ រួមមាន​ស្បៀងអាហារ ជម្រក ថ្នាំពេទ្យ សម្លៀកបំពាក់​និង​សៀវភៅ​សិក្សា​ជាដើម​។​ការយកចិត្តទុកដាក់​លើ​បញ្ហា​ការពារ​ដូចជា ការប្រើ​អំពើ ហិង្សា​លើ​កុមារ ឬ​ការរើសអើង​ភេទ​និង​សារសំខាន់​នៃ​ការ​គាំពារ​ផ្លូវចិត្ត​និង​អារម្មណ៍​គឺ​បញ្ហា​ដែល​ទាមទារ​ឱ្យមាន​អន្តរាគមន៍​។​

លោកស្រី​បាន​ពន្យល់​ទៀតថា “​ក្នុងកំឡុងពេល​ពន្យល់​ពី​ការប្រើប្រាស់​ការផ្ទេរ​សាច់​ប្រាក់​ដោយ​គ្មាន​លក្ខខណ្ឌ អង្គការ Save the Children និង​ដៃគូ ធានាឱ្យមាន​ការចូលរួម​យ៉ាងសកម្ម និង​គណនេយ្យភាព​ទៅដល់​ប្រជាជន​ដែល​រង​ផលប៉ះពាល់ តាមរយៈ​យន្តការ​ផ្តល់ព័ត៌មាន​ត្រឡប់​និង​បណ្តឹង​ដែល​ទាំង​បុរស​ស្ត្រី​កុមារា​និង​កុមារី​អាច​ចូលរួម​នៅក្នុង​ការផ្តល់​មតិយោបល់​និង​បណ្តឹង​នេះ​បានដែរ​” ។ គម្រោង​ដែល​ឧបត្ថម្ភ​ថវិកា​ដោយ​សហភាព​អឺរ៉ុប​នេះ ក៏​នឹង​ផ្តល់​សេវា​ទឹកស្អាត ដែលមាន​ការចូលរួម​ពី​អង្គការ​ដៃគូ គឺ​អង្គការ​ទស្សនៈ​ពិភពលោក និង​ជំនួយ​ផ្នែក​ការអប់រំ​ក្នុង​គ្រោះមហន្តរាយ ដើម្បី​ធានាបាន​ថា កុមារា​និង​កុមារី​អាច​ត្រឡប់​ចូលរៀន វិញ​បាន ក្នុង​បរិយាកាស​ប្រកបដោយ​សុវត្ថិភាព​។​

​លោក ឈឿន រ៉ាត់ អ្នកទទួលផល​ម្នាក់​ក្នុងចំណោម​អ្នកទទួលផល​ផ្សេងទៀត​ពី​គម្រោង​នៃ​ការផ្ទេរ​សាច់ប្រាក់​ដោយ​គ្មាន​លក្ខខណ្ឌ បាន​មាន​ពន្យល់ថា “​ពួកគាត់ [​អង្គការ Save the Children និង​ស្ថាប័ន​ដៃគូ​] បាន​ពន្យល់​យ៉ាង​ក្បោះក្បាយ និង​បង្ហាញ​ពី​គម្រោង​យ៉ាង​ល្អិតល្អន់​ថា ប្រសិនបើ​ពួកយើង​មាន​បញ្ហា​អ្វីមួយ ឬ​មិន​ពេញចិត្ត​នឹង​ការងារ​របស់​ពួកគាត់ យើង​អាច​រាយការណ៍​ទៅ​អាសយដ្ឋាន ឬ​ទូរ​សព្ទ​ដែល​បានផ្តល់​ឱ្យបាន​”​។

​ក្នុងអំឡុង​ពេលដែល​ព​ន្យ​ល់ពី​ការ​ប្រ់​ប្រាស់​ការផ្ទេរ​សាច់ប្រាក់​ដោយ​គ្មាន​លក្ខខណ្ឌ អង្គការ Save the Children និង​ដៃគូ​ក៏បាន​លើកកម្ពស់​ការប្រើប្រាស់​សាច់ប្រាក់ ដើម្បី​ដោះស្រាយ​ឧបសគ្គ​សង្គម និង​ហិរញ្ញវត្ថុ ដូច្នេះ​កុមារា​និង​កុមារី​អាចមាន​លទ្ធភាព​ត្រឡប់​ទៅ​រៀន​វិញ​។​

​លោកស្រី ហ៊ុយ អ៊ី​នូ អ្នកទទួលផល​ម្នាក់ទៀត​នៃ​ការផ្ទេរ​សាច់ប្រាក់​ដោយ​គ្មាន​លក្ខខណ្ឌ​ពី​គម្រោង​របស់​យើង​បាន​និយាយថា “​ខ្ញុំ​សប្បាយចិត្ត​ដែល​បាន​ប្រាក់ ដើម្បី​ផ្គត់ផ្គង់​គ្រួសារ​ខ្ញុំ​។​ខ្ញុំ​យកប្រាក់​នេះ​សម្រាប់​ទិញ​អាហារ​និង​សន្សំ​ខ្លះ​ដើម្បី​ទុកឱ្យ​កូន​ទៅ​រៀន​”៕​សរន​

ទីតាំងផ្សាយពាណិជ្ជកម្ម

- Advertisment -

Most Popular