Home ព័ត៌មានជាតិ សន្តិសុខ ក្រុមប្រឹក្សា...

ក្រុមប្រឹក្សា​រាជធានី​៖ មួយឆ្នាំ​២០២០ អាជ្ញាធរ​រាជធានី​ភ្នំពេញ រក្សា​សន្តិសុខ សណ្ដាប់ធ្នាប់ និង​គ្រប់គ្រង​រដ្ឋបាល​ទូទៅ បាន​យ៉ាង​ល្អប្រសើរ​

ដោយៈ រ៉ា​ម៉ន/ភ្នំពេញៈ ប្រធាន​ក្រុមប្រឹក្សា​រាជធានី​ភ្នំពេញ បាន​អះអាងថាៈ ពេញ​មួយឆ្នាំ ២០២០ កន្លងទៅនេះ រដ្ឋបាល​រាជធានី​ភ្នំពេញ បាន​រក្សា​នូវ​សន្តិសុខ សណ្ដាប់ធ្នាប់ ការ​គ្រប់ គ្រង ទប់ស្កាត់​ជំងឺ​កូ​វីដ​-១៩ ជាមួយនឹង​ការគ្រប់គ្រង រដ្ឋបាល​ទូទៅ បាន​យ៉ាង​ល្អប្រសើរ រហូត​ទទួលបាន​នូវ​ការគាំទ្រ និង​ការជឿទុកចិត្ត ពី​សំណាក់​បងប្អូន​ប្រជាពលរដ្ឋ នៅ​រាជធានី ភ្នំពេញ យ៉ាង​ពេញទំហឹង​។​

​នេះ​បើតាម​ការលើកឡើង របស់លោក ប៉ា សុជាតិ​វង្ស ប្រធាន​ក្រុមប្រឹក្សា​រាជធានី​ភ្នំពេញ ក្នុង​កិច្ចប្រជុំ​សាមញ្ញ​លើក​ទី​២០ របស់​ក្រុមប្រឹក្សា​រាជធានី​ភ្នំពេញ នា​ព្រឹក​ថ្ងៃទី​១៣ ខែមករា ឆ្នាំ​២០២១​នេះ នៅ​សាលា​រាជធានី​ភ្នំពេញ ដោយមាន​វត្តមាន​លោក ឃួ​ង ស្រេង អភិបាល​រាជធានី​ភ្នំពេញ ។​

​ក្នុងឱកាស​នោះ លោក ប៉ា សុជាតិ​វង្ស បាន​មានប្រសាសន៍ថាៈ បញ្ហា​សន្តិសុខ សណ្ដាប់ ធ្នាប់​សាធារណៈ ការទប់ស្កាត់​ជំងឺ​កូ​វីដ​-១៩ និង​ការគ្រប់គ្រង​រដ្ឋបាល​ទូទៅ ឃើញថា ក្នុង​មួយឆ្នាំ​២០២០​នេះ រដ្ឋបាល​រាជធានី​ភ្នំពេញ រក្សាបាន​យ៉ាង​ល្អប្រសើរ ។ ប៉ុន្តែ​ក៏​នៅមាន ចំណុច​ខ្វះខាត សេសសល់​មួយចំនួន ដែល​អាជ្ញាធរ ត្រូវ​បន្ត​យកចិត្តទុកដាក់ ថែមទៀត​ដែរ​។​

​លោក​ប្រធាន​ក្រុមប្រឹក្សា​រាជធានី​ភ្នំពេញ បានស្នើ​ឲ្យ​អាជ្ញាធរ​រាជធានី​ភ្នំពេញ ខិតខំ​ប្រមូល ផ្ដុំ​កម្លាំង ដើម្បី​អនុវត្ត​ធ្វើយ៉ាងណា ឱ្យ​ភូមិ សង្កាត់ មាន​សុវត្ថិភាព និង​ត្រៀម​បង្ហាញ​ពី សមិទ្ធផល​នានា ជាមួយនឹង​ការរក្សាសន្តិសុខ សណ្ដាប់ធ្នាប់​ទាំងនេះ​បង្ហាញ​ឲ្យ សាធារណជន បានឃើញ ដើម្បី​យើង​ត្រៀម ទទួលយក​ជោគជ័យ ក្នុងការ​បោះឆ្នោត ជ្រើសរើស​ក្រុមប្រឹក្សា​សង្កាត់ នៅ​ឆ្នាំ​២០២២ ខាងមុខនេះ ។ លោក​ក៏បាន​ស្នើសុំ​ឲ្យ ពង្រឹង​តួនាទី​គ្រប់​ថ្នាក់ ទាំង​ថ្នាក់​ខណ្ឌ និង​សង្កាត់ ពី​របៀបរបប​ធ្វើ​ការងារ ឲ្យ​កាន់តែ​ល្អ ប្រសើរ កាន់តែ​ទំនើប ធានាបាន​ស្ថេរភាព ១០០ ភាគរយ​។​

​ជាមួយគ្នា​នោះដែរ ក្រុមប្រឹក្សា​រាជធានី បាន​សម្តែង​ការកោតសរសើរ ចំពោះ​រដ្ឋបាល រាជធានី​ភ្នំពេញ ដែល​បាន​យកចិត្តទុកដាក់ ដល់​ការខិតខំ​ពង្រឹង ការបង្ក្រាប​បទល្មើស គ្រឿងញៀន និង​ច្បាប់​ចរាចរណ៍​ផ្លូវគោក ក៏ដូចជា ការដោះស្រាយ​បញ្ចប់ទំនាស់ និង​ពាក្យបណ្តឹង ក្នុង​ឆ្នាំ ២០២០ កន្លងមកនេះ ដែល​ថ្នាក់​ខណ្ឌ បាន​ដោះស្រាយ​បញ្ចប់ ចំនួន ១៨៨ ករណី និង​ថ្នាក់​សង្កាត់ ដោះស្រាយ​បញ្ចប់​បាន ២៤៨ ករណី​។​

​ចំណែក​មន្ទីរ​វប្បធម៌ និង​វិចិត្រសិល្បៈ បាន​ខិតខំ​សិក្សា​ស្រាវជ្រាវ រកឃើញ​សំណង់​ចាស់ៗ នៅតាម​វត្ត​ចំនួន​៦៩ លើ ៨៩​វត្ត ក្នុង​ខណ្ឌ​ទាំង​១៤ ព្រមទាំង​រកឃើញ វត្ថុ​បុរាណ ដែលមាន នៅតាម​វត្ត​ទាំង ៣៦ លើ ១១០​វត្ត និង​ទួល​បុរាណ​ចំនួន ២​ទៀត (​ទួល​សំរោង និង​ទួល​ចាស់​)​។ កោតសរសើរ ចំពោះ​សកម្មភាព ការ​បំបែក​សហកម្មសិទ្ធិ តាម​បុរី​មួយ ចំនួន​។​

​ក្នុង​កិច្ចប្រជុំ​នោះ លោក ឃួ​ង ស្រេង បានបញ្ជាក់​ថាៈ ចំពោះ​រាល់​សំណើ និង​សំណូមពរ របស់​ក្រុមប្រឹក្សា​រាជធានី​ភ្នំពេញ សុំឱ្យ​រដ្ឋបាល​រាជធានី ពង្រឹង​តួនាទី គ្រប់​ថ្នាក់​ទាំង​ថ្នាក់ ខណ្ឌ និង​សង្កាត់ ពី​របៀបរបប​ធ្វើ​ការងារ ឲ្យ​កាន់តែ​ល្អប្រសើរ​នោះ រដ្ឋបាល​រាជធានី​ភ្នំពេញ នឹង​ខិតខំ​ធ្វើ​កិច្ចការ​នេះ ឱ្យ​ប្រសើរឡើង ថែមទៀត ក្នុង​ឆ្នាំ​២០២១​នេះ​៕/V​-PC

ទីតាំងផ្សាយពាណិជ្ជកម្ម

- Advertisment -

Most Popular