ចែក​ឧបករណ៍​ដាំ​គ្រាប់ស្រូវ​ជា​ជួរ​ចំនួន ១០​គ្រឿង ជូន​ដល់​សហគមន៍​កសិកម្ម ក្នុងស្រុក​បរិបូរណ៍ ដែលជា​អំណោយ​របស់​រដ្ឋាភិបាល​អូស្ត្រាលី​

ដោយ​: ទេ​ពក​ង្រី / ខេត្តកំពង់ឆ្នាំង​: ថ្នាក់ដឹកនាំ​ខេត្តកំពង់ឆ្នាំង អញ្ជើញ​ចូលរួម​ពិធី​ចែក​ឧបករណ៍​ដាំ​គ្រាប់ស្រូវ​ជា​ជួរ ចំនួន ១០​គ្រឿង ជូន​ដល់​សហគមន៍​កសិកម្ម ក្នុងស្រុក​បរិបូរណ៍ ដែលជា​អំណោយ​របស់​រដ្ឋាភិបាល​អូស្ត្រាលី ។​

​ពិធី​នេះ​ត្រូវបាន​ឡើង​នៅ​ព្រឹក​ថ្ងៃទី​១៣ ខែមករា ឆ្នាំ​២០២១​នេះ ដោយ​អគ្គនាយកដ្ឋាន​កសិកម្ម សហការ​ជាមួយ​កម្មវិធី​ខ្សែសង្វាក់​តម្លៃ​កសិកម្ម​កម្ពុជា​-​អូស្ត្រាលី ហៅ​កាត់​ថា CAVAC (Cambodia-Australia Agriculture Value Chain Program) និង​មន្ទីរ​កសិកម្ម រុក្ខាប្រមាញ់ និង​នេសាទ​ខេត្ត បានធ្វើ​ការរៀបចំ​ពិធី​ចែក​ឧបករណ៍​ដាំ​គ្រាប់ស្រូវ​ជា​ជួរ (Eli Seeder) ចំនួន ១០​គ្រឿង​ជូន​ដល់​សហគមន៍​កសិកម្ម ដែលជា​អំណោយ​របស់​រដ្ឋាភិបាល​អូស្ត្រាលី​។

​ពិធី​នេះ​ត្រូវបាន​ធ្វើឡើង​ក្រោម​អធិបតីភាព​លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ លោក Pablo Chiho Kang ឯកអគ្គរដ្ឋទូត​អូស្ត្រាលី​ប្រចាំ​ព្រះរាជាណាចក្រ​កម្ពុជា និង​លោកស្រី ប៊​ន សុ​ភី អភិបាលរង​ខេត្តកំពង់ឆ្នាំង ភ្ញៀវ​ជាតិ អន្តរជាតិ ប្រធាន​មន្ទីរ អាជ្ញាធរ​មូលដ្ឋាន មន្ត្រី និង​បងប្អូន​ប្រជាពលរដ្ឋ​។

​លោកជំទាវ​អភិបាលរង​ខេត្ត បាន​រាយការណ៍​ពី​វិស័យ​កសិកម្ម ទូទៅ​ក្នុង​ខេត្ត និង​ជាពិសេស​ដំណាំ​ស្រូវ និង​គ្រោះធម្មជាតិ​ទឹកជំនន់​កន្លងមក​។

​ដែល​ទទួលបាន​ការជួយ​ឧបត្ថម្ភ​ជា​គ្រាប់ពូជ​ស្រូវ​ដ៏​ថ្លៃថ្លា​របស់​សម្តេច​តេ​ជោ ហ៊ុន សែន នាយករដ្ឋមន្ត្រី តាមរយ​: ក្រសួងកសិកម្ម រុក្ខាប្រមាញ់ និង​នេសាទ គណៈកម្មការ​ជាតិ​គ្រប់គ្រង​គ្រោះមហន្តរាយ និង​លោក​ប្រធាន​ក្រុមការងារ​រាជរដ្ឋាភិបាល​ចុះ​មូលដ្ឋាន​ខេត្តកំពង់ឆ្នាំង បងប្អូន​ប្រជាកសិករ​បាន យក​គ្រាប់​ពូជស្រូវ​ទៅ​ស្តារ​ដំណាំ​ស្រូវ​ដែល​រង​ផលប៉ះពាល់​សម្រេចបាន​ចំនួន​១ ៧៩២​ហ​.​ត ស្នើ​នឹង ១០០%​។

​លោក​រដ្ឋមន្ត្រី បាន​ពាំ​នាំនូវ​ការ​ផ្តាំផ្ញើ​សាកសួរ​សុខទុក្ខ និង​សេចក្តី​នឹករលឹក​របស់​សម្តេច​តេ​ជោ ហ៊ុន សែន នាយករដ្ឋមន្ត្រី និង​សម្តេច​កិត្តិ​ព្រឹ​ត្ត​បណ្ឌិត​មក​ជូន​បងប្អូន​ប្រជាពលរដ្ឋ​ក្នុងស្រុក​បរិបូរណ៍​។

​ភ្ជាប់​ទៅនឹង​ជំនួយ​ដ៏​ថ្លៃថ្លា​នេះ តាមរយ​:​ឯកឧត្តម​ឯកអគ្គរដ្ឋទូត លោក​រដ្ឋមន្ត្រី​បាន​ថ្លែងអំណរគុណ​យ៉ាង​ជ្រាលជ្រៅ​ជូន​ចំពោះ​ប្រជាជន និង​រដ្ឋាភិបាល​អូស្ត្រាលី ដែល​បាន​ចូលរួមចំណែក​យ៉ាងសកម្ម​ក្នុងការ​ស្តារ កសាង និង​អភិវឌ្ឍ​ប្រទេស​កម្ពុជា ក្នុងនោះ​ក៏មាន​វិស័យ​កសិកម្ម តាមរយ​:​គម្រោង​កម្មវិធី ការស្រាវជ្រាវ និង​ការបណ្តុះបណ្តាល​ធនធាន​មនុស្ស ដែល​បាន​ចូលរួមចំណែក​យ៉ាងសំខាន់​ក្នុងការ​អភិវឌ្ឍ​វិស័យ​មួយ​នេះ ឲ្យ​មានការ​រីកចម្រើន​គួរ​ឲ្យ​កត់សម្គាល់​។

​ចប់​កម្ម​វិធីចែក​ឧបករណ៍ លោក​រដ្ឋមន្ត្រី និង​លោក​ឯកអគ្គរដ្ឋទូត​បា​ន​អញ្ជើញ​ចូលរួម​ប្រមូល​ផល​ស្រូវ​ជាមួយ​បងប្អូន​ប្រជាកសិករ និង​ពិនិត្យមើល​ការលូតលាស់​ដំណាំ​ស្រូវ​ដែល​បាន​ស្តារឡើងវិញរ​បស់បង​ប្អូន​ប្រជាកសិករ​នៅជាប់​ទីតាំង​ប្រារព្វ​ពិធី​ផងដែរ​៕​

ទីតាំងផ្សាយពាណិជ្ជកម្ម

- Advertisment -

Most Popular